Luuk 5

1Ɔci oŋ gɛɛlti Yaccu bala yɔɔd galŋa yenti Jaliil (Gɛnɛɛcarɛt) ḍwaŋɛti. Ɔci ɛkɛ bwodiwi ma acaan ɛkkɛn buagɔn tieŋdi jyek Jwaŋa Tolan. Ɔci ɛkɛ tiñiyɔ mako. 2Ɔci ɛkɛ murkan gɛɛg yuarnɛ bala yɔɔd galŋji waan taaŋɛti ne yyɛɛwɔ, ɔci murkan weyyɛnyɛ, kooyin bora te murkanji. Ɔci ɛkkɛn bala lɔki morin ɛkkɛn. 3Ɔci ɛkɛ taapcin jiju murka gɛɛlti ne cyɛɛlɔ, gena murka Butruc mena bartan ma a Cimaan te tuk ma Icrayiily. Ɔci Yaccu gɔkcin Butructi agi, “Dala i murka ciɛnja ñamu ne ḍiɛran ṭɔɔlɛ.” Ɔci Yaccu cooccin iñɔ murkaji ɔci bala loṭi mako. 4Ɔci ne ɛkɛ ḍookki te lali mayɛ, ɛkɛ gɔkcin Butructi agi, “Dala murka taaña ‘uotti ñamu nona tuodan, ɔci dala ɛkkɛ morin oldɛ iñɔ aŋka ɛkkɛ muodɛ yako.” 5Ɔci Butruc ṭwokcin ɛkɛti agi, “Ciɛggɔn, ɔɔn balgɔn kanŋɔn ne tolan te weenji ne noon bɔɔni ɔɔn, yeti ɔɔn yɔṭṭɔn genga ne cyɛɛlɔ bɛɛ. Yeti kan i gɔkka a ɔɔnyɛ, pwatcin ‘ya morin olja iñɔ pietin moki ba jyek i.” 6Ɔci ne ɛkkɛn morin olkiti iñɔ pietinyɛ, ɛkkɛn muowin yak kɔɔna kɔɔnno. Ɔci morin ɛkkɛnyɛ, noŋi jietanji yako. 7Ɔci ɛkkɛn borcin maka kanki iki ɛkkɛn maka kanŋan murka parɛtiy, ɔci ɛkkɛn ma gɔpki byeŋkɛn aŋka ɛkkɛn bɛya ɛkkɛn maktan. Ɔci ɛkkɛn bɛɛn ɔci ma magɛ ɛkkɛn. Ɔci ɛkkɛn yak wɛɛdɛ jitin ɔci ḍuaccɛ murkan jitin. Ɔci acaan yak cyɛg cyɛg a ɔɔnyɛ, ɔci murkan noŋi ḍieddi iñɔ. 8Ɔci ne Butruc gɔrni naŋka neeniyɛ, ɛkɛ ḍwoñjin iñɔ Yaccu ciegɛti ɔci gɔkcin ɛkɛti agi, “Ciɛggɔn, dala i ɔgdi ootta ɔntɔ te ‘yati wɛnni, ‘ya dalda, acaan ‘ya yaay a nɔɔdɔn hay!” 9Ɛkɛ gɔki a ɔɔn acaan ɛkɛ buañi te naŋka neeni. Ɔci maka balki i ɛkɛyɛ, ɛkkɛn da buañi moki te mwokta ɛkkɛn muoki yaka coŋin neeni. 10Yaakub i Yɔhanna kɛɛgin Jɛbadi maka kanŋan i Butruc a cyɛɛlɔyɛ, ɛkkɛn buañi daŋkun. Ɔci Yaccu gɔkcin Butructi agi, “Naa i buay bɛɛ. Acca neeniti ne baaṭi ɔɔnyɛ, i ecca ma Jwaŋa Tolanti te jyek ɛkɛ.” 11Ɔci ne ɛkkɛn murkan eekiti nona iwanyɛ, ɔci ɛkkɛn waka neeni dalji ɔntɔ waakɛnda. Ɔci ɛkkɛn bootcin Yaccuti. 12Ɔci ne Yaccu baali bana tolan gɛɛltiyɛ, mena ‘uan gɛɛl bɛɛn ɔci ɛkɛ balki cyɛc ne tolan. Ɔci ne ɛkɛ Yaccu yuarnɛyɛ, ɛkɛ ḍwoñjin iñɔ ɛkɛ ñamɛti ɔci tooccin ɛkɛti gɔkcin agi, “Kan i buagi ‘ya ywaŋdayɔyɛ, dala ‘ya ywaŋdayɔ!” 13Ɔci Yaccu bieŋɛ laŋnɛ bora ɔci topcin mena neeniti, ɔci gɔkcin ɛkɛti agi, “Ɛɛ, ‘ya i ywaŋdin. Dala i waru pwada!” Ɔci ne pɛñan cyɛc ati ɔntɔ te mena neeniti doki. 14Ɔci Yaccu gɔkcin ɛkɛti agi, “Naa i maka pookɛn gɛɛg myetka bɛɛ. Dala i ootta, ɔci dala i waru liɛlja bora gaciic ma Icrayiilti. Ɔci dala i ɛkɛ eeka ‘woñga gena guaŋŋɛ Muuca agi ‘wondi ma gaciic ma Icrayiily. Ɔci a ɔŋŋiyɛ, ŋeettan ma waakɛnda ne pwadan i waru pwani te cyɛc awarɛ.” 15Yeti naŋki Yaccu neeniyɛ, ati peen bonk korkɛnti. Ɔci maka coŋin bɛɛn ɔci bala tyeŋi jyek ɛkɛ, ɔci maka waakɛn yeyin owwɛ ɛkkɛn Yaccuti aŋka ywaŋdɛ ɛkɛ. 16Yeti a oŋkiyɛ, Yaccu ma daldɛ, ɔci ɛkɛ ooddi wɔɔŋji parɛ cɔki Jwaŋa Tolanti. 17Ɔci oŋ gɛɛlti Yaccu bala loṭi mako. Ɔci ma Pɛriciin i maka loṭi worga Juaŋ ɛkkɛn gɛɛg bala ciyi iñɔ daŋkun. Ɛkkɛn bɛɛn te bonk Jaliilji waakɛnda ɔci te bonk Yahuudiyaji daŋkun. Ɔci ma gɛɛg bɛɛn te ban Urcaliim daŋkun. Ɔci war tɛɛn Jwaŋa Tolan bala Yaccuti. Ɔci ɛkɛ bala yɔŋi maka waakɛn yeyin. 18Ɔci maka ‘uay gɛɛg bɛɛn kɛṭṭin mena ‘uan gɛɛl te yiɛño. Ɛkɛ warɛ yaayɛ warɛ puottin. Ɔci ɛkkɛn bala lieṭi pɔya ɛkɛ oltɛti ɛkkɛn orɔ ɔci ɛkɛ ḍuattɛti iñɔ Yaccu ñamɛti te yiɛñy. 19Ɔci ɛkkɛn pɔya men oltɛti yuarɛ bɛɛ, acaan ma bala kɔɔna kɔɔnno. Ɔci te wɛnni ɛkkɛn pyeṭi pɔya on ŋoyɛti ɔci kaaccin ñaalɔ on wyeñɛti, ɔci on wyeñɛ wɔrkɛ, ɔci men ḍuurcɛ iñɔ te yiɛñ Yaccu ñamɛti. 20Ɔci ne Yaccu gɔrni jyenna jyetki ɛkkɛn neeniyɛ, ɛkɛ gɔkcin ‘uanti agi, “Hay! Mug ɔɔn, ‘ya i bɔɔŋnin doki te nɔji i.” 21Ne maka loṭi worga Juaŋ ɔci ma Pɛriciin gɔrki naŋka neeniyɛ, ɛkkɛn bala poŋi yomgɛnti agi, “Hay! Mena ḍori Jwaŋa Tolan neeni a menɛ? A menɛ yaakinti ma bɔɔktɛ te nɔjiy, a Jwaŋa Tolan parɛ bɛɛ?” 22Yeti Yaccuyɛ, paŋi ɛkkɛn ŋeejɛ, ɔci taat ɛkkɛn moki ŋeejɛ, ɔci ɛkɛ ṭwokcin ɛkkɛnti agi, “Gɔṭṭɛ, jyek taata neeni bala ɛkkɛ yomgɔti a ɔɔn ogo? 23Kan ‘ya gɔkca ‘wana puon neeniti ka ɛkɛ bɔɔka ‘ya te nɔji ɛkɛ, walla ka dala ɛkɛ jɔŋdi ñaalɔ potti woony, jwali gɛɛl koy koy te jyeka neeniti yaakkɛn boki? 24Tieŋdɛ, dala ŋeeddɛ ɛkkɛ ‘ya Kaci Ma Baan yaakati maka ciyi ṭɛɛrji bɔɔka te nɔji ɛkkɛn.” Ne Yaccu gɔŋni a ɔɔnyɛ, ɛkɛ warɛ yallɛ ‘wana puon neeniti, ɔci gɔkcin ɛkɛti agi, “‘Ya gɔkka iti, jɔŋŋa ñaalɔ ɔci yiɛñ lula ɔgdi ootta baanji acaan i waru pwani doki!” 25Ɔci ne pɛñan ɛkɛ jɔŋŋin ñaalɔ ɔci yyɛña niini ɛkɛ neeni luullɛ, ɔci ɛkɛ ati baanji doki. Ɔci ɛkɛ bala jieyi Jwaŋa Tolan te naŋka neeni. 26Ɔci ma yomgɛn buañi waakɛnda. Ɔci ɛkkɛn bala jieyi Jwaŋa Tolan. Ɛkkɛn korkɛn buañi ɔci gɔki agi, “Naŋka neeni yuarŋin ikin oŋgati boki?” 27Ɔci ne naŋka neeni baaniyɛ, Yaccu ati bora ɔci mena kanŋa ɛkɛ a limi tulba, mena yenti Matta mena bartan ma a Laawi te tuk ma Icrayiil yuarŋɛ ɛkɛ bala ciyi orɔ ona ḍɔcki ma tulbay. Ɔci ɛkɛ gɔkcin ɛkɛti agi, “Bɛɛd bootta ‘yati acaan i muŋŋin ‘ya aŋka agdi mena laldi ‘ya daŋkun.” 28Ɔci te wɛnni Matta ɛkɛ waak waakɛnda dalnɛ iñɔ, ɔci ɛkɛ jɔllin ñaalɔ bootcin Yaccuti doki. 29Ɔci Matta neeni noŋi juma tolan on ɛkɛ noŋnɛ Yaccu. Ɔci wɛlg bala coŋgin a coŋgin jumati. Acaan maka lyemi tulba ɔci maka pookɛn bala daŋkun. Ɛkkɛn bala ciyi iñɔ iki Yaccu ɔci Matta. 30A ɔŋŋiyɛ, ma Pɛriciin ɔci maka loṭi worga Juaŋyɛ, ɛkkɛn bala wooki maka laldɛ Yaccu agi, “Yeti gɔṭṭɛ, ɛkkɛ omɛ ɔci motɛ iki maka lyemi tulba maka yeyin ogo?” 31Ɔci Yaccu ṭwokcin ɛkkɛnti agi, “Tieŋdɛ, maka waakɛn pwadinyɛ, ɛkkɛn buagɔn kiimi aŋka ɛkkɛn ywaŋdɛ bɛɛ. Gena maka waakɛn yeyin aŋka buagɔn kiimi aŋka ɛkkɛn ywaŋdɛy. 32’Ya bɛɛn aŋka ‘ya boor maka poŋi agi ɛkkɛn aginti maka pwadin bɛɛ. ‘Ya bɛɛn aŋka ‘ya boor maka nɔɔtk aŋka dala ɛkkɛn waakɛn yaltan ɔntɔ te nɔji ɛkkɛnti.” 33Ɔci ɛkkɛn gɔkcin Yaccuti agi, “Maka laldɛ Yɔhannayɛ, ɛkkɛn gwoṭi koñ oŋkanda ɔci cɔki Jwaŋa Tolanti, ɔci maka laltan ma Pɛriciin ɛkkɛn noŋi a ɔɔn daŋkun. Yeti maka lala iyɛ, ɛkkɛn aŋka omi waak ɔci moti oŋkanda ɔɔn.” 34Ɔci Yaccu ṭwokcin ɛkkɛnti agi, “Kan maka wɛlg bɛɛn jumatiyɛ, ɛkkɛn amdɛ koñ boki? Hayɛllɛ! 35Yeti ne oŋ gɛɛltiyɛ, ‘war ñooni eetan ma nona parɛ ɔci ɛkkɛn gworti koñ oŋo.” 36Ɔci Yaccu ɛkkɛn myennɛ te jwalla a caagɔn gɛɛl daŋkun agi, “Men gɛɛl yaakinti jibba ɛkɛ jibba woonɛ ŋwoddɛ jitin ɔci oldɛ ṭuortɛ jibba a daanti boki? Kan ɛkɛ noŋdi a ɔɔnyɛ, ɛkɛ jibba woonɛ yaadɛ dita te ŋunno. Ɔci jibba daan moki pwada bɛɛ, acaan bworŋa woonɛ da parɛ te bworŋa daano. 37Ɔci moki, men gɛɛl mooya wonkɛn neeni luaddɛ kucin a donk jitin boki? A’a. Kan men gɛɛl noŋdi a ɔɔnyɛ, ɔci mooya wonkɛn neeniyɛ, kotti ñaalɔ, ɔci kucin ṭontan jitin. Ɔci ɛkkɛn ḍakti budan iki kucin ɔɔn. 38Mooya wonkɛn neeniyɛ, ɛkkɛn oltan ma te kucin wonkɛn oŋkanda! 39Kan men gɛɛl bala moti mooya te baaṭiyɛ, ɛkɛ buagɔn mooya wonkɛn ne pɛñan bɛɛ. Ɛkɛ gɔki agi mooya a donk neeni ɛkkɛn aŋka pwadɔ.”

will be added

X\