Luuk 4

1Yaccuyɛ, ɛkɛ yomɛ kuumi te Boŋ Jwaŋa Tolan. Ɔci ɛkɛ bɛɛn te Tol Urdunti. 2Ɔci ɛkɛ ati wɔɔŋji ɔci bala aŋan nink a ma baan ne yyɛɛwɔ (40). Ɔci ɛkɛ bala wɛɛdɛ Boŋ Jwaŋa Tolan wɔɔŋji. Ɔci Jwaŋa Yaayan bala mooṭi ɛkɛ. Ɔci te ninka wannayɛ, Yaccu dɛccin gena amtin gɛɛl bɛɛ. Ɔci ne ninka neeni baakiyɛ, ɛkɛ ammɛ koñ ne pɛñan. 3Ɔci Jwaŋa Yaayan gɔkcin ɛkɛti agi, “Kan i ag Kaci Jwaŋa Tolan awarɛyɛ, dala i gwoyi ṭɔlgɛn neeni agayɔ aga ba byedgo.” 4Ɔci Yaccu ṭwokcin ɛkɛti agi, “Gɔṭṭi, jyeka kiigin gɔki agi, ‘Ma ciyi tɛɛti te jyek oomdin pookɛn bɛɛ, yeti ma ciyi tɛɛti te gena jyek Jwaŋa Tolan oŋkanda ɔɔn.’” 5Ɔci Jwaŋa Yaayan neeniyɛ, ɛkɛ Yaccu eññɛ yɔɔnnɛ ñaalɔ poma beyan. Ɔci te wɔɔka wannatiyɛ, ɛkɛ Yaccu lɛɛrnɛ bonk noon warda. 6Ɔci ɛkɛ gɔkcin Yaccuti agi, “Gɔṭṭi, iyɛ, ‘wondin ‘ya bonka neeni waakɛnda. I agdi ḍuaŋa tolan ɛkkɛn, ɔci waka bala bonka neeniti waka pwadinyɛ, ɛkkɛn aga wak i. Acaan ɛkkɛn waakɛnda a wak ‘ya, ɔci ‘ya yaakati mena parɛ ‘woñga daŋkun ba yom ‘ya paru. 7Kan i morca ‘yatiyɛ, ɔci waak waakɛnda aga wak i.” 8Ɔci Yaccu ṭwokcin ɛkɛti moki agi, “Jyeka kiigin gɔki agi, ‘Dala i morca gena Jwaŋa Tolan Ciɛggɔn iti, ɔci noŋja kanŋa ɛkɛ parɛ.’” 9Ɔci Jwaŋa Yaayan Yaccu eññɛ ban Urcaliim, ɔci Yaccu yɔɔnnɛ ɛkɛ ñaalɔ nona buoran on Juaŋ ona tolan wyeñɛti, ɔci Jwaŋa Yaayan gɔkcin ɛkɛti moki agi, “Kan i a Kaci Jwaŋa Tolan awarɛyɛ, dala i kuaja iñɔ te wɛnni. 10Acaan jyeka kiigin gɔki agi, ‘Malɛɛkan ‘wondɛ Jwaŋa Tolan kanŋa aŋka dala ɛkkɛn gɔṭi i.’ 11Ɔci agi, ‘I makti malɛɛkan aŋka i twordi guonan bɛɛ.’” 12Ɔci Yaccu ṭwokcin ɛkɛti agi, “Jiek gɔki agi, ‘Naa i pocci Jwaŋa Tolan Ciɛggɔn i bɛɛ.’” 13Ɔci ne Jwaŋa Yaayan neeni ḍookki te maalla neeni waakɛndayɛ, ɛkɛ oŋ Yaccu dalnɛ te oŋŋa wannati oŋo. Ɛkɛ poŋi gɔki agi, “Ne oŋŋa parɛ gɛɛlti ‘ya pocca moorca ɛkɛ moki.” 14Ɔci Yaccu dɔɔki ban Jaliil, ɔci bala kanŋan te war tɛɛn Boŋ Jwaŋa Tolan. Ɔci jyek yenti ɛkɛ ati baan konɛ warda. 15Ɛkɛ bala loṭi ma oorga morki ma Juaŋy, ɔci ma waakɛnda bala jieyi ɛkɛ. 16Ɔci ɛkɛ ati ban Najarɛt gena bana ciyi ɛkɛ wona ɛkɛ ḍiɛri men ne ɛkɛ tolli ɔɔn. Ɔci ɛkɛ ati kaaccin orɔ ona morki ma Juaŋ ba naŋki ɛkɛ oŋkanda oorga morki ma Juaŋti te Oŋ Cabit. Ɔci ɛkɛ jɔŋŋin ñaalɔ aŋka pokti worga. 17Ɔci ɛkɛ ‘woñgi ma worga Icaaya. Ɔci ɛkɛ worga pɔŋŋɛ ɔci nona pagdɛ ɛkɛ yuarŋɛ. Ɔci ɛkɛ pokcin agi, 18“Boŋ Ciɛggɔn bala ‘yati acaan ‘ya muona ɛkɛ bora aŋka dala ‘ya lor maka bɔwan te jyeka wonkɛn jyeka pwadin neeni. ‘Ya cuonna ɛkɛ aŋka dala ‘ya maka uullɛ Jwaŋa Yaayan pɔkka, ɔci maka ullin pɔkka ñingɛnti daŋkun. Ɔci maka naŋtan ma ne yeyinyɛ, ‘ya gɔkca ɛkkɛnti ɔci ɛkkɛn yomgɛn pwaddi doki. 19’Ya cuonna Ciɛggɔn aŋka dala ‘ya miet ma te ywoni ɛkɛ ywonna pwadan, ywonna ɛkɛ yuoci ma ɛkɛ neeni.” 20Ɔci Yaccu worga kuomnɛti, ɔci ‘wonnɛ mena gɔṭi worgan on Juaŋ neeni. Ɔci ɛkɛ cooccin iñɔ. Ɔci maka bala orɔ ona morki ma Juaŋyɛ, ɛkkɛn bala gɔṭi ɛkɛ waakɛnda. 21Ɔci ɛkɛ gɔkcin ɛkkɛnti agi, “Tieŋdɛ, te oŋŋa neeniyɛ, jyeka bala worga neenitiyɛ, bɛɛn bora doki.” 22Ɔci ma waakɛnda bala gɔki ne pwadan te ɛkɛ. Ɔci ɛkkɛn korkɛn buañi te jyeka pwadin jyeka bɛɛn te ɛkɛ tukɛti neeni. Ɔci ɛkkɛn bala toyi yɔtin agi, “Hay! Mena neeni a kaci Yuocip pari bɛɛ?” 23Ɔci Yaccu gɔkcin ɛkkɛnti agi, “Acca ɛkkɛ gɔktɛ jwali ṭɔɔlɛ neeni ‘yati kaapun agi, ‘Hay! I kiimmo, dala i pocca waru ywaŋa paru aŋka ɔɔn gɔrtɔn.’ Ɔci ɛkkɛ gɔktɛ ‘yati moki kaapun, agi ɛkkɛ tieŋnɛ jyek naŋki ‘ya ban Kapɛrnyam, ɔci agi oŋ ba ‘ya noŋda naŋka neeni wɛnni ban ikin waanɛti wɛnni bɛ?” 24Ɔci Yaccu gɔkcin ɛkkɛnti ‘wota agi, “Tieŋdɛ, maka ciyi ban mena bɔwa waanɛtiyɛ, tieŋdi jyek ɛkɛ bɛɛ. 25“Ɔci ɛkkɛyɛ, ɛkkɛ myettin ‘ya ne pwadan. Ne bɔwa yenti Iliiya baaliyɛ, moong ma Icrayiil moonga ciek bala kɔɔna kɔɔnno. Ɔci ñaal yɔɔni yuong ne ḍoogɔ ɔci ponk ne dɔɔyɔ wilin ne cyɛɛlɔ. Ɔci koñ pɛñ pɛñ mati baan konɛ warda. 26Iliiya cuuññɛ Jwaŋa Tolan gena ɛŋa cieñ gɛɛlti ɛŋ ma kɛɛna pookɛn ban Jarapat ban Ciḍɔɔnji. Ɔci ɛŋa neeniyɛ, ɛkɛ aŋka maŋŋɛ Iliiya parɛ. 27Ɔci moki te ywonna Iliica agi bɔwa Jwaŋa Tolanyɛ, ma Icrayiil maka coŋin gɛɛg naŋŋɛ cyɛco. Ɔci ɛkkɛnyɛ, pɔŋnɛyɔ menga bɛɛ, yeti gena Naaman mena a kɛɛna parɛ men maka ban Cuurya ɛkɛ parɛ aŋka pɔŋnɛ Jwaŋa Tolan te cyɛcy.” 28Ɔci ne ɛkkɛn tieŋki jyeka neeni a ɔɔnyɛ, ɔci maka bala ona morki ma Juaŋ neeniyɛ, ɛkkɛn looñi waakɛnda ne pɛñan. 29Ɔci ɛkkɛn jɔllin ñaalɔ ɔci Yaccu ŋualji bora baan ŋoyɛti. Ban ɛkkɛn bala ñaalɔ poom wyeñɛti, ɔci ɛkkɛn buagɔn Yaccu yieptan iñɔ. 30Yeti Yaccu bala ati goṭi ɛkkɛn jitin ɔɔn. Ɔci ɛkɛ atti. Ɛkkɛn noŋi genga bɛɛ. 31Ɔci ɛkɛ dɔɔki ban Kapɛrnyam ban Jaliilji. Ɔci ɛkɛ bala loṭi ma aŋan te Oŋ Cabit. 32Ɔci ma korkɛn buañi te lali ɛkɛ neeni aŋan daŋkun, acaan ɛkɛ bala loṭi ma ba mena budan bɛɛ. Ɛkɛ bala loṭi ma ba mena balki war tɛɛn bieŋɛti. 33Ɔci ona morki ma Juaŋyɛ, men gɛɛl bala ɔci ɛkɛ muŋŋɛ Jwaŋa yaayan. Ɔci ɛkɛ bala yaadan te pwana tolan agi, 34“Hay i Yaccu men ma Najarɛt, i ŋeejin ‘ya i a men Jwaŋa Tolan mena pwadan. I buagi gena ɔɔnti yeti? I buagi ɔɔn nogdɔn?” 35Ɔci Yaccu gɔkcin ne pɛñan ɛkɛti agi, “Hay! Cied lieda! Dala i kooya bora te menti!” Ɔci Jwaŋa yaayan men wyeŋnɛ iñɔ te ma ñomgɛnti, ɔci ɛkɛ oŋ kooyin bora te menti oŋo. Ɛkɛ men yannɛ bɛɛ. 36Ɔci ma waakɛnda yomgɛn buañi, ɔci ɛkkɛn bala gɔwwi yɔtin pookɛn agi, “Yaccu neeni ɛkɛ a menɛ yeti? Ɛkɛ gɔki jɔkin yeyinti ba mena war tɛɛn bala ɛkɛ bieŋɛti, ɔci ɛkkɛn koodi bora te mati doki?” 37Ɔci jyek naŋki ɛkɛ neeniyɛ, ati peen bonka pookɛn korkɛnti waakɛnda. 38Ɔci Yaccu kooyin bora te ona morki ma Juaŋ, ɔci ɛkɛ ati on Butruc. Acaan Butruc neeniyɛ, mari ɛkɛ warɛ yaayɛ. Ɛkɛ warɛ myɛlla myɛllo. Ɔci ɛkkɛn tooccin Yaccuti te ɛkɛ aŋka ɛkɛ pɔktɛ Yaccu te waja neeni. 39Ɔci Yaccu yɔɔtcin nona ɛkɛti, ɔci ɛkɛ gɔkcin agi, “Dala waja neeni baadi.” Ɔci waja mari Butruc pɔŋniyɔ doki ne pɛñan. Ɔci ɛkɛ jɔŋŋin ñaalɔ, ɔci ɛkɛ maka bɛɛn on ɛkɛti neeni ‘wonnɛ am doki. 40Ɔci ne oŋ waŋɛ unni ɔci ne Oŋ Cabit baaniyɛ, maka waakɛn yeyin te wajan jitkɛn coŋin neeniyɛ, ɛkkɛn owwɛ ma nona Yaccuti waakɛnda, ɔci ɛkɛ byeŋkɛ tannɛ maka waakɛn yeyinti neeni, ɔci ɛkɛ ɛkkɛn ywaŋŋɛyɔ waakɛnda doki. 41Ɔci jɔkin yeyin daŋkunyɛ, ɛkkɛn koonɛ Yaccu bora te mati ne coŋɔn. Ɔci ɛkkɛn bala yaadan agi, “I a Kaci Jwaŋa Tolan!” Yeti acaan ɛkɛ ŋeecɔn ɛkkɛn ne ɛkɛ agɛ Kiṭɔyɛ, Yaccu gɔkcin ne pɛñan ɛkkɛnti. Ɛkɛ ɛkkɛn dɛɛnnɛti agi, “Hay! Naa ɛkkɛ gɔkɛ jiek bɛɛ, ciedɛ lieda doki!” 42Ɔci ne liidɔ te liidi ṭɔɔlɛ ḍiɛranyɛ, Yaccu jɔŋŋin ɔci ati nona wɔɔgan nona baaki may. Ɔci ma bala lieṭi ɛkɛ, ɔci ɛkkɛn bɛɛn ɛkɛti, ɔci ɛkkɛn buagɔn naa Yaccu ban ɛkkɛn daldɛ ooddi bana parɛ bɛɛ. 43Yeti ɛkɛ gɔkcin ɛkkɛnti agi, “Çeej ‘ya ɛkkɛn buagɔn ‘ya, yeti ‘ya buaga ootta bonka pookɛnti aŋka ɛkkɛn laldi ‘ya te jyek cyɛgji Jwaŋa Tolan daŋkun. ‘Ya cuonna Juaŋ aŋka ‘ya lor ma waakɛnda.” 44Ɔci ɛkɛ bala loṭi ma oorga morki ma Juaŋ ban Jaliil.

will be added

X\