Luuk 3

1Ḍuaŋa tolan ne tolan ban Ḍɔɔm bala yenti Taybiiryac Kɛɛcar. Yuonga kanŋi ɛkɛ aŋi a inyaakkɛn ɔci ne dɔɔyɔ (15). Ɔci ḍuaŋan ḍyɛrin neeni bala daŋkun. Ɔci Bilaatuc Bunti ɛkɛ a ḍuaŋa ṭɔɔlɛ ban Yahuudiya. Ɔci Hiruuduc Antipacyɛ, ɛkɛ a ḍuaŋa ban Jaliil. Ɔci Pilibuc mod Hiruuduc Antipacnyɛ, ɛkɛ a ḍuaŋa ban Ituriiya yaakkɛn i ban Tarkɔniitac. Ɔci Licaanyucyɛ, ɛkɛ a ḍuaŋa ban Abaliin. 2Ɔci gaciic tolan ma Icrayiilyɛ, gena Anac. Ɔci mena bootcin ɛkɛ ŋoyɛtiyɛ, gena Kayapac. Ɔci te ywonna neeniyɛ, ne Yɔhanna kaci Jakariya baali wɔɔŋjiyɛ, Jwaŋa Tolan gɔkcin ɛkɛti te jyek lali ma. 3Ɔci Yɔhanna jɔŋŋin te aŋan, ɔci ɛkɛ ati booti bonka bala Tol Urdun taaŋɛti. Ɛkɛ bala loṭi agi dala ma yomgin wiaktɔ te nɔji ɛkki. Ɔci dala ɛkki waakcin yaldɛ te nɔji ɛkki, ɔci dala ɛkki buldi ma aŋka ɛkki bɔɔkta Juaŋ te nɔji ɛkki doki. 4Naŋki Yɔhanna neeniyɛ, bala ba jyeka kiinɛ Icaaya mena a bɔwa Jwaŋa Tolan worgaji ne ɛkɛ gɔki agi, “Pwan men gɛɛl yaaddi wɔɔŋji ɔci gɔkti agi, ‘Dala ɛkkɛ waakɔ ywaŋdɛ te bɛɛna bɛɛdɛ Ciɛggɔn Kiṭɔ neeni. Dala pɔɔk ywaŋdɛ nina ne pwadan, ɔci dala aga tyɛlgan. 5Kolka morginyɛ, ɛkkɛn ñingɛn ḍiemtan, ɔci nonka luolkinyɛ, ɛkkɛn juamdi iñɔ wyetkɛn portan ñiitan a ñiino. Ɔci pɔɔka a ḍwakkan aga tyɛlgan. Ɔci pɔɔka jitkɛn a ḍɔɔṭinyɛ, ɛkkɛn jitkɛn waakɛn ywaŋtan mandi a mañŋin daŋkun. 6Ɔci ma waakɛndayɛ, mena cuonnɛ Jwaŋa Tolan Yuoci ma neeni yuartan ɛkkɛn.’ ” 7Ne Yɔhanna baali loṭi mayɛ, maka coŋin bɛɛn ɛkɛti, ɔci ɛkkɛn buagɔn buldɛ ɛkɛ. Yeti Yɔhanna gɔkcin ɛkkɛnti agi, “Ɛkkɛ agɛ laaban ba koggo, hay! A menɛ ɛkkɛ myennɛ agi ɛkkɛ yooŋjɛ ɔntɔ te ywobji Jwaŋa Tolan ywobja bɛya neenitiy? 8Gɔṭṭɛ poca ɛkkɛ myettin, dala naŋka naŋdɛ ɛkkɛ agdɛyɔ ñamu parun. Dala naŋki ɛkkɛ bala ba naŋki maka wiak te nɔji ɛkkɛn maka waakɛn yali awarɛ. Ɔci naa ɛkkɛ gɔktɛ yomgɔti agi ɛkkɛ uddɛ te ywobji Jwaŋa Tolan neeni acaan Abrahim a yɔr ɛkkɛ bɛɛ. A’a, bɔɔnjin men. Juaŋ ancin te ɛkkɛ bɛɛ, ɛkɛ yaakinti noŋdi gwoyi ṭɔlgɛn aga kɛɛgin Abrahim. 9“Acca Jwaŋa Tolan bala tɔɔyi jang te bɛɛkkɛnti, ɔci janga jied ṭɔlgɛn ne pwadan bɛɛyɛ, ɛkkɛn tɔɔttɛ Jwaŋa Tolan ɔntɔ ɔci yiɛptɛ Juaŋ maccu.” 10Ɔci maka coŋin neeni ne ɛkkɛn tieŋki jyek Yɔhanna neeniyɛ, ɛkkɛn tooccin Yɔhannati agi, “Oŋ kan jiek bala a ɔɔnyɛ, oŋ ɔɔn noŋdɔn a ɔki?” 11Ɔci ɛkɛ ṭwokcin ɛkkɛnti agi, “Ɛɛ, gɔṭṭɛ, mena balki bworŋin ne yyɛɛwɔyɛ, dala ɛkɛ mena baaki bworŋin neeni kɛndɛ. Mena balki amyɛ, dala ɛkɛ maka baakɛ wɛttɛ.” 12Ɔci gɔṭṭɛ maka lyemi tulbayɛ, ɛkkɛn gɛɛg bɛɛn buagɔn buldɛ Yɔhanna daŋkun, ɔci ɛkkɛn tooccin ɛkɛti agi, “Mena loṭi may, oŋ ɔɔn da noŋdɔn a ɔki?” 13Ɔci ɛkɛ ṭwokcin ɛkkɛnti agi, “Ɛɛ, dala ɛkkɛ tieŋdɛ daŋkun. Naa ɛkkɛ ma wandɛ te bilk tulba ‘uottɛti te yomg ɛkkɛ pookɔ ne coŋɔn a ɔɔn bɛɛ.” 14Ɔci ackan gɛɛg tooccin ɛkɛti daŋkun agi, “Oŋ ɔɔn da noŋdɔn a ɔki?” Ɔci ɛkɛ ṭwokcin ɛkkɛnti agi, “Naa ɛkkɛ ‘yeṭɛ ma jitkɛn bɛɛ, ɔci naa ɛkkɛ ma gɛɛg jomdɛyɔ budan bɛɛ. Ɔci naa ɛkkɛ bilk eedɛ te ɛkkɛnti budan bɛɛ, ɔci dala ɛkkɛ yɔmdɛ te bilk kanŋa ɛkkɛ pookɛn.” 15Ma bala kɛɛy mena cuondɛ Jwaŋa Tolan. Ɔci ɛkkɛn bala poŋi gɔki yomgɛnti agi, “Hay! Yɔhanna neeni ɛkɛ a Kiṭɔ Mena Muonɛ Juaŋ Bora boki?” 16Yeti Yɔhanna bala gɔki mati waakɛnda agi, “Gɔṭṭɛ, ‘ya buor ɛkkɛ te pieg budan, yeti men gɛɛl bala bɛya bootti ‘ya ŋoyuti ɛkɛ tolcin te ‘ya. Bala ba ne ‘ya wɛyi ɛkɛ looda ‘ya bora te byeŋ ‘ya bɛɛ. Ɛkkɛ buldɛ ɛkɛ te Boŋ Jwaŋa Tolan ɔci te maaño. 17Ɔci ne ɛkɛ bɛɛdiyɛ, ɛkɛ etti lɔɔlla bieŋɛti. Ɔci ɛkɛ tiitk kiɛptɛ ɔntɔ, ɔci ɛkɛ pok woodgɛn oldɛ jiju twoñji, ɔci tiitk tondɛ maaño. Ɔci maña neeni baadi ywongati bɛɛ.” 18Yɔhanna bala ṭeyi ma te jyeka neeni, ɔci te jyeka pookɛn daŋkun. Ɛkɛ bala loṭi ma te jyeka wonkɛn jyeka pwadin. 19Yeti ne Hiruuduc Antipac mena a ḍuaŋa tolan neeni, ṭeenɛ Yɔhanna te jyek ḍɛɛna ɛkɛ ḍɛññi Ɛrɔɔdyac ɛŋ mod ɛkkɛn ɔci te naŋka pookɛn naŋka naŋŋɛ ɛkɛ yeyinyɛ, 20ɛkɛ Yɔhanna olnɛ ciginji. A ɔŋŋiyɛ, ɛkɛ nɔji ɛkɛ ‘uonnɛti nɔñji. 21Ɔci oŋ gɛɛlti ne Yɔhanna olkiti ma ciginji men bɛɛyɛ, maka coŋin buullɛ Yɔhanna, ɔci Yaccu buullɛ ɛkɛ daŋkun. Ɔci ne Yaccu baali cɔkiyɛ, pɔli warɛ pɔŋnɛ. 22Ɔci Boŋ Jwaŋa Tolan bɛɛn cooccin Yaccuti ba boom ɔɔn. Ɔci pwan bɛɛn te ñaalɔ pɔliji ɔci gɔki agi, “I a Kaci ‘ya Kacca ana ‘yay, ‘ya yomu ñɔɔna ñɔɔn te i.” 23Te oŋŋa Yaccu jɔɔnni te lali mayɛ, yuong ɛkɛ a men baan ne cyɛɛlɔ ɔci mena parɛ byeŋkɛ (30). Ɔci ma bala gɔki te ɛkɛ agi ɛkta agi kaci Yuocip katan. 24Yuocipyɛ, ɛkɛ a kaci Ilay, Ɔci Ilay ɛkɛ a kaci Mattat. Ɔci Mattat ɛkɛ a kaci Laawi. Ɔci Laawi ɛkɛ a kaci Mɛlki. Ɔci Mɛlki ɛkɛ a kaci Yaana. Ɔci Yaana ɛkɛ a kaci Yuocip. Ɔci Yuocip ɛkɛ a kaci Matataayac. Ɔci Matataayac ɛkɛ a kaci Amuc. Ɔci Amuc ɛkɛ a kaci Nahum. Ɔci Nahum ɛkɛ a kaci Acli. Ɔci Acli ɛkɛ a kaci Najaay. Ɔci Najaay ɛkɛ a kaci Maac. Ɔci Maac ɛkɛ a kaci Matataayac. Ɔci Matataayac ɛkɛ a kaci Cɛmayi. Ɔci Cɛmayi ɛkɛ a kaci Yuocip, Ɔci Yuocip ɛkɛ a kaci Yahuuja. Ɔci Yahuuja ɛkɛ a kaci Yɔhanna. Ɔci Yɔhanna ɛkɛ a kaci Rica, Ɔci Rica ɛkɛ a kaci Jɛrubaabil. Ɔci Jɛrubaabil ɛkɛ a kaci Caltayiil. Ɔci Caltayiil ɛkɛ a kaci Niray. Ɔci Niray ɛkɛ a kaci Mɛlki. Ɔci Mɛlki ɛkɛ a kaci Adi. Ɔci Adi ɛkɛ a kaci Kocam. Ɔci Kocam ɛkɛ a kaci Almaddam. Ɔci Almaddam ɛkɛ a kaci Ir. Ɔci Ir ɛkɛ a kaci Yuoci. Ɔci Yuoci ɛkɛ a kaci Iliajar. Ɔci Iliajar ɛkɛ a kaci Yuram. Ɔci Yuram ɛkɛ a kaci Mataat. Ɔci Mataat ɛkɛ a kaci Laawi. Ɔci Laawi ɛkɛ a kaci Cimaan. Ɔci Cimaan ɛkɛ a kaci Yahuuja. Ɔci Yahuuja ɛkɛ a kaci Yuocip. Ɔci Yuocip ɛkɛ a kaci Yunaan. Ɔci Yunaan ɛkɛ a kaci Ilyakiim. Ɔci Ilyakiim ɛkɛ a kaci Mɛliiya. Ɔci Mɛliiya ɛkɛ a kaci Mɛnaan. Ɔci Mɛnaan ɛkɛ a kaci Mataat. Ɔci Mataat ɛkɛ a kaci Nɛtan. Ɔci Nɛtan ɛkɛ a kaci Daawud. Ɔci Daawud ɛkɛ a kaci Jɛci. Ɔci Jɛci ɛkɛ a kaci Ɔbɛd. Ɔci Ɔbɛd ɛkɛ a kaci Bɔwac. Ɔci Bɔwac ɛkɛ a kaci Calmɔɔn. Ɔci Calmɔɔn ɛkɛ a kaci Nacɔɔn. Ɔci Nacɔɔn ɛkɛ a kaci Aminnadaab. Ɔci Aminnadaab ɛkɛ a kaci Aram. Ɔci Aram ɛkɛ a kaci Acrun. Ɔci Acrun ɛkɛ a kaci Paric. Ɔci Paric ɛkɛ a kaci Yahuuja. Ɔci Yahuuja ɛkɛ a kaci Yaakub. Ɔci Yaakub ɛkɛ a kaci Icaak. Ɔci Icaak ɛkɛ a kaci Abrahim. Ɔci Abrahim ɛkɛ a kaci Taara. Ɔci Taara ɛkɛ a kaci Nahur. Ɔci Nahur ɛkɛ a kaci Caruj. Ɔci Caruj ɛkɛ a kaci Rayu. Ɔci Rayu ɛkɛ a kaci Palɛj. Ɔci Palɛj ɛkɛ a kaci Abiir. Ɔci Abiir ɛkɛ a kaci Caalɛ. Ɔci Caalɛ ɛkɛ a kaci Kayiinan. Ɔci Kayiinan ɛkɛ a kaci Arpakcad. Ɔci Arpakcad ɛkɛ a kaci Caam. Ɔci Caam ɛkɛ a kaci Nɔwa. Ɔci Nɔwa ɛkɛ a kaci Lamak. Ɔci Lamak ɛkɛ a kaci Mɛtuucala. Ɔci Mɛtuucala ɛkɛ a kaci Aknɔɔk. Ɔci Aknɔɔk ɛkɛ a kaci Yarid. Ɔci Yarid ɛkɛ a kaci Maheelaliil. Ɔci Maheelaliil ɛkɛ a kaci Kayiinan. Ɔci Kayiinan ɛkɛ a kaci Anoc. Ɔci Anoc ɛkɛ a kaci Cɛt, Ɔci Cɛt ɛkɛ a kaci Adam. Ɔci Adam ɛkɛ a kaci Jwaŋa Tolan.

will be added

X\