Luuk 24

1Ɔci te liidɔ parɛ te tinnɔ ne Oŋ Cabit noŋi bɛɛdi borayɛ, ɔci ne Oŋ Juaŋ cɔɔlniyɛ, ɛkkɛn ati kool wyeñɛti eci elin ywaŋɛ ɛkkɛn neeni. 2Ɔci ɛkkɛn guonan mɔkci niin ɔntɔ te kool tukɛti. 3Yeti ne ɛkkɛn kaacki jiju kooljiyɛ, ɛkkɛn war Ciɛggɔn Yaccu mɔkci bɛɛ. 4Ɔci ɛkkɛn yomgɛn buaññi. Ɔci ne ɛkkɛn balki poŋki te jyek naŋka neeni menyɛ, maka ‘uay bɛɛn ne yyɛɛwɔ, bala ba malɛɛkan ɔci yɔɔtcin ɛkkɛn toŋkɛnti. Bworŋin ɛkkɛn galla gallo. 5Ɔci moong buañi, ɔci ɛkkɛn ñomgɛn tɔcci iñɔ ṭɛɛrji. Ɔci malɛɛkan neeniyɛ, gɔkcin ɛkkɛnti agi, “Hay! Ɛkkɛ lieṭɛ Yaccu mena tɛɛti neeni non maka tuutan wɛnni ogo? 6Gɔṭṭɛ, ɛkɛ bala wɛnni moki bɛɛ, dala ɛkkɛ ñingɔ ñiektɛ te jwalla ɛkkɛ myennɛ ɛkɛ ne ɛkɛ baali te ban Jaliilji meny. 7Ɛkɛ gɔki agi, ‘‘Ya Kaci Ma Baanyɛ, ‘ya ‘wonta ma maka nɔɔtk byeŋkɛnti. Ɔci ‘ya ŋaapta ma, ɔci te ninna akti ḍoogɔyɛ, ‘ya jɔlla ñaalɔ tɛɛt moki.’ ” 8Ɔci ɛkkɛn poŋjin te jyeka guaŋŋɛ Yaccu neeni. 9Ɔci ɛkkɛn yoṭṭin te kool wyeñɛti, ɔci ɛkkɛn Maka A Inyaakkɛn Wilin Ne Cyɛɛlɔ neeni nɔɔtkɛ, ɔci maka pookɛn moki nɔɔtkɛ waakɛnda. 10Gena Moryam Magdalin ɔci Jɔwaana ɔci Moryam mɛy Yaakubn, ɔci moonga pookɛn moonga bala iki ɛkkɛn daŋkuny. Gena ɛkkɛn Cuudan Yaccu nɔɔtkɛ te jyeka neeniy. 11Yeti Cuudan Yaccu jyeti jyek ɛkkɛn bɛɛ. Ɛkkɛn poŋi gɔki agi jyek moong neeniyɛ, a jyeka budan. 12Yeti Butruc jɔŋŋin ɔci yiŋi kool wyeñɛti, ɔci ɛkɛ ḍwoñjin liercin jiju, ɔci ɛkɛ bworŋin poorki ma war Yaccu aŋka mɔŋnɛ niini pookɛn budan. Ɔci ɛkɛ oŋ ati baanji oŋo. Ɔci ɛkɛ konɛ buañi noon te waka yuarŋɛ ɛkɛ neeni. 13Ɔci te oŋŋa wannayɛ, maka laldɛ Yaccu gɛɛg ne yyɛɛwɔyɛ, ɛkkɛn bala ooddi baan gɛɛlti bana yenti Ɛmeeyac. Ban Ɛmeeyac neeniyɛ, looncin te ban Urcaliimti ne ḍiɛran ṭɔɔlɛ, ba wɔɔkan ne dɔɔyɔ wyetkɛn ne yyɛɛwɔ ɔɔn. 14Ɔci ne ɛkkɛn balki atki pɔɔjɔyɛ, ɛkkɛn bala gɔwwɔ yɔtin te naŋka bɛɛn bora waakɛnda neeni. 15Ɔci ne ɛkkɛn balki gɔɔki a ɔɔnyɛ, te wɛnni Yaccu waanɛ bɛɛn oṭṭinti bala ati i ɛkkɛn a cyɛɛlɔ. 16Ɛkkɛn ɛkɛ yuarcɛ ne baali atkɛ i ɛkkɛn ɔɔn, yeti ɛkkɛn ṭuoŋŋɛ ɛkɛ ñingɛnti, ɔci ɛkkɛn ɛkɛ ñiyɛ bɛɛ. 17Ɔci Yaccu tooccin ɛkkɛnti agi, “Hay! Ɛkkɛ mung ɔɔn, ɛkkɛ jyeyɛ te jyek waaka yomɔ ɔɔn?” Ɔci ɛkkɛn yɔɔni ɔci ɛkkɛn yuarnɛ Yaccu ne ɛkkɛn ñingɛn akki cungin te yom yoñy. 18Ɔci men gɛɛl ɛkkɛnti ne cyɛɛlɔ mena yenti Kliyopac, ɛkɛ ṭwokcin Yaccuti agi, “Hay! I bɛɛni ban Urcaliim a wɛli aŋka naŋka bɛɛn bora neeni kwoyi i nɛ?” 19Ɔci Yaccu gɔkcin ɛkkɛnti agi, “Naŋka bɛ?” Ɛkkɛn ṭwokcin ɛkɛti agi, “Gena naŋki Yaccu, men ma Najarɛt mena a bɔway. Ɛkɛ bala loṭi ma ne pwadan, ɔci noŋi naŋka tɛyan. Ɛkɛ pwad pwad Juaŋti ɔci mati waakɛnda. 20Yeti gaciicin ḍwaŋin ma Icrayiil ɔci ma ɔɔn maka ḍwaŋin neeniyɛ, ɛkkɛn ɛkɛ ‘woñgi ma byeŋkɛnti. Ɔci jiek olji ma Yaccu wyeñɛti, ɔci ɛkɛ ŋaapci ma ñaalɔ doki. 21Yeti ɔɔn balgɔn poŋɔn ka ‘wana neeniyɛ, ɛkɛ ma Icrayiil pɔktɛ ḍɔɔggɛnti te cyɛgji maka pookɛn neeni. Ɔci gɔṭṭi moki, gena ninna akki ne ḍoogɔ te wona naŋka guagdɔn ɔɔn neeni bɛɛniy! 22Ɔci moki, ɔɔn korkɔ buañi noon acaan te liid ṭɔɔl ḍiɛranyɛ, moong ma ɔɔn, gɛɛg ati kool wyeñɛti, 23yeti war ɛkɛ mɔkci ɛkkɛn bɛɛ. Ɔci ɛkkɛn dɔɔkkin, ɔci ɔɔn myetkɔn te jyeka neeni. Ɔci ɛkkɛn gɔki agi malɛɛkan gɛɛg waakcin lɛɛlnɛ bora ɛkkɛnti, ɔci malɛɛkan neeniyɛ, gɔki ɛkkɛnti agi Yaccu baalɔ tɛɛtɔ katan moki. 24Ɔci maka balgin iki ɔɔnyɛ, ɛkkɛn gɛɛg ati kool wyeñɛti daŋkun, ɔci kool mɔkci konɛ budan awarɛ ba jyeka guagɛ maka moong neeni ɔɔn!” 25Ɔci Yaccu gɔkcin ɛkkɛnti agi, “Hay! Ɛkkɛ a maka aamman, wyetkɔ baawo! Ba ɛkkɛ jyettɛ jyeka guagɛ maka a bɔwan Jwaŋa Tolan waakɛnda neeni bɛ? 26Naŋka neeni yɔmjin doki acaan Kiṭɔ taabdi te waka neeni waakɛnda ɛkɛ oŋ kaatti non pwani ɛkɛ bɛɛ?” 27Ɔci ɛkɛ ɛkkɛn jɔɔnnɛ lwoŋnɛ jyeka guaŋŋɛ Muuca te ɛkɛy, ɔci te jyek bɔwan Jwaŋa Tolan waakɛnda, te jyeka kiiwɛ ma te jyek naŋki ɛkɛy. 28Ɔci ɛkkɛn cɔɔllinti baan tɛyɛti doki, bana ottan ɛkkɛn neeni. Ɔci Yaccu noŋi ba ne ɛkɛ ooddi ‘yeetti bora ñamu ɔɔn. 29Yeti ɛkkɛn bala poṭi ɛkɛ warɛ agi, “Dala ikin nintin iki ɔɔn wɛnni hay! Acaan oŋ waŋɛ noŋi luutti iñɔ doki. Noon noŋi ula.” Ɔci ɛkɛ yeddin iki ɛkkɛn doki. 30Ɔci ne ɛkɛ baali cieki i ɛkkɛn nona amtiyɛ, ɛkɛ byentan luullɛ, ɔci gɔkcin a pwatcin Juaŋti. Ɔci ɛkɛ byentan wɛɛnnɛ jitin, ɔci ‘wonnɛ ɛkɛ mako. 31Ɔci ɛkkɛn pɔŋnɛ Yaccu ñingɛnti moki. Ɔci ɛkkɛn ɛkɛ ñiyɛ moki. Yeti ne pɛñan Yaccu baaw wiin te nona ɛkkɛnti neeni. 32Ɔci ɛkkɛn bala gɔwwɔ yɔtin pookɛn agi, “Wala yuarnɛ ba! Ne ɛkɛ baali gɔki ikinti yomu nona lwowwin ikin te jyek Juaŋ jitkɛnyɛ, ikin yomgɔ kuumi te yom ñɔɔn ɔci waakɔ jimma a jimi bɛɛ?” 33Ɔci te oŋ waŋɛ wannati, ɛkkɛn jɔŋŋin ne pɛñan, ɔci ati dɔɔki ban Urcaliim. Ɔci maka laldɛ Yaccu A Inyaakkɛn Wilin Ne Cyɛɛlɔ neeniyɛ, mɔŋji ɛkkɛn wyetkɛn ḍɔɔlɛ nona ne cyɛɛlɔ iki maka pookɛn maka bala iki ɛkkɛn oŋkanday. Ɔci maka mɔŋji ɛkkɛn neeni gɔkcin ɛkkɛnti agi, 34“Ciɛggɔn ikin jɔŋŋin ñaalɔ awarɛ, ɔci ɛkɛ warɛ lɛɛlnɛ bora Butructi!” 35Ɔci ‘uaya ne yyɛɛwɔ neeni daŋkun maka neeni myetkɛ daŋkun te naŋka naŋɛ ɛkkɛn pɔɔjɔy, ɔci ne Yaccu ŋeeckiti ɛkkɛn ne ɛkɛ byentan wɛɛnnɛ jitiny. 36Ɔci ne maka neeni balki gɔkki te jyeka neeni menyɛ, Yaccu waanɛ bɛɛn ɔci yɔɔtcin nona maka laldɛ ɛkɛti, ɔci gɔkcin agi, “Dala ɛkkɛ ciedɛ ne pwadan.” 37Yeti ɛkkɛn yomgɛn buañi ne tolan, ɔci bala poŋi yomgɛnti agi, “Hay! A gena bɛɛn ikinti neeniy, ɛkɛ a ‘yeeññan kaapun!” 38Ɔci ɛkɛ gɔkcin ɛkkɛnti agi, “Ɛkkɛ korkɔ buayi noon ogo? Ɔci yomgɔ ŋoodan a ɔɔn ogo? 39Gɔṭṭɛ ‘ya byeŋku ɔci gɔṭṭɛ ‘ya ciegu! Gena ‘ya waanu jiñɛ nɛ. Toptɛ ‘yati, pottɛ gɔrtɛ! ‘Yeeññan balki yoŋi ɔci owi ba ‘ya ɔŋŋi boki? A’a!” 40Ɔci ne ɛkɛ gɔki a ɔɔnyɛ, ɛkɛ ma lɛɛrnɛ byeŋkɛ ɔci ciegɛ. 41Yeti ɛkkɛn jyeti men bɛɛ. Ɛkkɛn yomgɛn kuumi te yom ñɔɔn ɔci bala poŋi jiek yomgɛnti men agi, “Naŋka pwadin neeniyɛ, gena ɛkɛ waanɛ neeni boki?” Ɔci Yaccu oŋ tooccin ɛkkɛnti agi, “Ɛkkɛ balkɛ genga wɛnni amdi ‘ya boki?” 42Ɔci ɛkkɛn ɛkɛ wɛtkɛ ŋwotkɛ yeñña piɛlgɔn. 43Ɔci ɛkɛ yeñi luullɛ, ɔci ɛkɛ omjin te ɛkkɛn ñomgɛnti ɔɔn. 44Ɔci ɛkɛ gɔkcin maka laldɛ ɛkɛ A Inyaakkɛn Wilin ne Cyɛɛlɔti agi, “Gɔṭṭɛ poca, ne ‘ya balgin iki ɛkkɛ menyɛ, ɛkkɛ myennin ‘ya te naŋka bɛɛn ‘yati neeni waakɛnda. ‘Ya gɔkkan ɛkkɛti ka jyeka kiinɛ Muuca te ‘ya worga ganuuntiyɛ, ɔci jyeka kiiwɛ bɔwan Jwaŋa Tolan te ‘ya, ɔci jyeka kiiwɛ ma te ‘ya worga Ɔɔlgtiyɛ, dala ɛkkɛn bɛya bora waakɛnda awarɛ.” 45Ɔci ɛkɛ ɛkkɛn pɔŋnɛ jyetkɛnti aŋka ɛkkɛn tieŋdi jiek jitkɛn jyeka a kiigin neeni. 46Ɔci ɛkɛ gɔkcin ɛkkɛnti agi, “Jyeka kiigin gɔki te Kiṭɔ agi ɛkta taabdɔ ɔci tuudɔ, ɔci ne nink bɛɛdi bora ne ḍoogɔyɛ, agi ɛkta jɔŋdɔ ñaalɔ te lienti moki. 47Ɔci agi dala ma ooddɔ baan wardanda, ɔci ma laldi ma te yenti ɛkta agi kan ma waakɛn yali te nɔji ɛkkɛnyɛ, ɛkkɛn bɔɔŋnɛ Juaŋ doki. Agi dala ma ooddɔ maka ban Urcaliim laldi ñamu. 48Ɛkkɛ agɛ maka naŋka neeni yuarɛ. Dala ɛkkɛ ma myetti te naŋka yuarŋɛ ɛkkɛ waakɛnda neeni. 49Ɔci gɔṭṭɛ, Boŋa guaŋŋɛ Wey ɔɔn agi ɛkkɛ ‘woñji ɛkɛyɛ, ɛkɛ cuoñña ‘ya ɛkkɛti. Yeti dala ɛkkɛ ciedɛ te ban Urcaliimji wɛnni ne ɛkkɛ ‘wondɛ Juaŋ war tɛɛn ɛkɛ te ñaalɔ pɔliji ɔɔn.” 50Ɔci ɛkɛ oŋ ɛkkɛn wɛɛññɛ ne ban Bɛtani ɔɔn. Ɔci ɛkɛ byeŋkɛ loonɛ ñaalɔ, ɔci ɛkɛ gɔkcin ɛkkɛnti agi, “Dala naŋka pwadan bala ɛkkɛti.” 51Ɔci ne ɛkɛ gɔŋni ɛkkɛnti a ɔɔnyɛ, ɛkɛ ati ñaalɔ pɔliji oŋo. 52Ɔci ɛkkɛn morcin ɛkɛti ɔci dɔɔki ban Urcaliim, ɔci ɛkkɛn yomgɛn ñɔɔna ñɔɔn ne tolan. 53Ɔci ɛkkɛn bala oŋkanda on Juaŋ ona tolan, ɔci ɛkkɛn bala jieyi Jwaŋa Tolan.

will be added

X\