Luuk 23

1Ɔci maka coŋin waakɛnda neeniyɛ, ɛkkɛn jɔllin ñaalɔ, ɔci Yaccu lwadɛ eyɛ ɛkkɛn nona Bilaatucti. 2Ɔci ɛkkɛn bala tɔɔmi Yaccu Bilaatucti ɔɔn. Ɛkkɛn gɔki agi, “‘Wana neeniyɛ, ɛkɛ yuarŋɔn ɔɔn, ɛkɛ bala ma ɔɔn jyɛttɛ ɔntɔ. Ɔci ɛkɛ bala dɛyi ɔɔn moki agi naa ɔɔn ḍɔccɔn tulba Kɛɛcar ḍuaŋa tolan ma Ḍɔɔmti bɛɛ. Ɔci ɛkɛ gɔki agi ɛkɛ agji ḍuaŋa ɔɔn ḍuaŋa tolan daŋkun.” 3Ɔci ne ɛkɛ ookiti ma Bilaatuctiyɛ, Bilaatuc tooccin Yaccuti agi, “Hay, i gɔk i a ḍuaŋa tolan ma ɛkkɛ ma Icrayiil nɛ?” Ɔci Yaccu ṭwokcin ɛkɛti agi, “Ɛɛ, ‘ya baal a ɔɔn ba jwalla guagdɛ ɛkkɛ wanna.” 4Ɔci Bilaatuc gɔkcin gaciicin ḍwaŋin ma Icrayiilti ɔci maka coŋinti agi, “Gɔṭṭɛ, hay, ɛkkɛ! ‘Ya gena yaayan gɛɛl yuarŋ ‘wana neeniti aŋka ‘ya jiek olda ɛkɛ wyeñɛti bɛɛ.” 5Yeti ɛkkɛn gɔki ‘yeṭi ne pɛñan Bilaatucti agi, “Maka ciyi bonk Ma Yahuudiya waakɛnda, te ban Jaliil ne wɛnni ɔɔnyɛ, jyek ɛkkɛn ḍuobbin te jyeka loṭi ‘wana neeni ɛkkɛny.” 6Ne Bilaatuc tieŋni jyeka neeniyɛ, ɛkɛ tooccin mati agi, “Ɛkkɛ gɔkɛ ‘wana neeni ɛkɛ a men ma Jaliil?” 7Ɔci ne ɛkɛ tieŋni agi Yaccu bɛɛnɔ te ban Hiruuduc Antipacn gɛɛlti non Jaliilyɛ, ɔci Yaccu cuuññɛ ɛkɛ Hiruuducti doki. 8Te baaṭi Hiruuduc buagɔn ka gɔrti Yaccu, acaan ɛkɛ tieŋŋin jyeka guaktan ma te Yaccu ne coŋɔn. Yeti Yaccu yuarŋɛ ɛkɛ men bɛɛ. Ɔci ne Yaccu cuuññɛ Bilaatuc ɛkɛti te oŋŋa wannayɛ, ɛkɛ yomɛ ñɔɔna ñɔɔno. Ɛkɛ poŋi gɔki agi Yaccu noŋdɔ naŋka tɛyɔ gɛɛl nona ɛkɛ ñamɛti kaapun. 9Ɔci Hiruuduc bala tooci Yaccuti te jyeka coŋin, yeti Yaccu ṭwokcin genga ɛkɛti bɛɛ. 10Gaciicin ḍwaŋin ma Icrayiil i maka loṭi worga Juaŋyɛ, ɛkkɛn bala yɔɔd tɔɔmi Yaccu ne pɛñan. 11Ɔci Hiruuduc ɔci ackan ɛkɛyɛ, ɛkkɛn bala noŋi ne yaayan Yaccuti, ɔci ɛkkɛn bala juoli ɛkɛ. Ɔci Yaccu ɛɛŋnɛ Hiruuduc bworŋa pwadan bworŋa beyan, ɔci cuuññɛ duaŋŋɛ ɛkɛ Bilaatucti. 12Ɔci te oŋŋa wannatiyɛ, Bilaatuc ɔci Hiruuducyɛ, ɛkkɛn ŋeewin aŋi munin. Te ñamuyɛ, ɛkkɛn bala yoyi ñin yaakkɛn te jiek ṭɔlgɛn gɛɛg. 13Ɔci Bilaatuc gaciicin ḍwaŋin ma Icrayiil ɔci ḍuaŋan ɔci maka pookɛn bornɛti waakɛnda. Ɔci ɛkkɛn bɛɛni. 14Ɔci ne ma bɛɛkiyɛ, ɛkɛ gɔkcin ɛkkɛnti agi, “‘Wana neeni oonɛ ɛkkɛ ‘yati, ɔci ɛkkɛ gɔkɛ agi ‘wana neeniyɛ, ɛkɛ a mena ma jyɛttɛ ɔntɔ. Yeti gɔṭṭɛ, jyek ‘wana neeni gwali ‘ya jitin doki ɛkkɛ ñomgɔti. Ɔci jyeka guaŋŋɛ ɛkkɛ tɔɔmmɛ ɛkkɛ ɛkɛ neeniyɛ, ‘ya gɛɛl yuarŋ ɛkɛti bɛɛ. 15Ɔci Hiruuduc Antipac moki jwali gɛɛl yuarŋɛ ɛkɛti bɛɛ. Yaccu dɔɔnɛ ɛkɛ nona ikinti. Gɔṭṭɛ, gena naŋŋɛ ɛkɛ yaayan aŋka tuudi ɛkɛyɛ, gɔ gɛɛl bala bɛɛ. 16A ɔŋŋiyɛ, ‘ya ɛkɛ ḍuado, ɔci ‘ya oŋ ɛkɛ pɔkka oŋo.” [ 17Yuonginda ne Iid Malɛɛka Lien Bɛɛn Goṭi A Gorŋ bɛɛdiyɛ, naŋki Bilaatuc bala aŋka maka bala ciginji men gɛɛl ne cyɛɛlɔ pɔktɛ ɛkɛ budan, wantan ma bɛɛ.] 18Yeti polla tolan bala yaadan te pwana tolan waakɛnda te tuka ne cyɛɛlɔ agi, “‘Wana neeni ɛkɛ nogdɛ, ɔci Baraabac ɛkɛ aŋka pɔkka bɛya bora ɔɔnti!” 19Baraabac neeniyɛ, ɛkɛ bala jiju ciginji acaan oŋ gɛɛltiyɛ, ma gɛɛg buagɔn akuuma muktan ɛkkɛn, ɔci Baraabacyɛ, ɛkɛ bala iki maka neeni. Ɔci moki ɛkɛ bala jiju ciginji acaan ɛkɛ men gɛɛl noŋŋɛ. 20Ɔci Bilaatuc gɔgjin i ɛkkɛn moki, acaan ɛkɛ buagɔn Yaccu pɔktɛ. 21Yeti ɛkkɛn bala yaadan te pwana tolan agi, “Dala ɛkɛ ŋaaptɛ ñaalɔ! Dala ɛkɛ ŋaaptɛ ñaalɔ doki!” 22Ɔci Bilaatuc gɔkcin ɛkkɛnti oŋki ne ḍoogɔ agi, “Ogo? Gena naŋŋɛ ɛkɛ yaayan a gena? Gena naŋŋɛ ɛkɛ yaayan tuudi ɛkɛyɛ, gɔ bala bɛɛ. ‘Ya ɛkɛ ḍuado, ɔci dala ɛkɛ ɔga ooddi.” 23Yeti ɛkkɛn gɔki ‘yeṭi ne pɛñan yool a yooli te jieko. Ɔci ɛkkɛn yaajjin agi, “Dala Yaccu ŋaaptɛ ñaalɔ!” Ɛkkɛn bala yaadan a ɔɔn ne Bilaatuc noŋŋi ba jwali ɛkkɛn ɔɔn. 24Ɔci Bilaatuc gɔkcin mati agi dala ma noŋdi ba yomg ɛkki Yaccuti. 25Ɔci ‘wana bala jiju ciginji te naŋka naŋŋɛ ɛkɛ yaayan ma akuumati ɔci te jyek lienyɛ, ɛkɛ aŋka pɔŋnɛ Bilaatuc ba jyek maka coŋin neeni. Ɔci Bilaatuc ackan ‘wonnɛ Yaccu byeŋkɛnti aŋka dala ɛkkɛn noŋdi ɛkɛti ba yomg ma Icrayiil. 26Ɔci ackan Yaccu eyɛ lwadɛ. Ɔci mena ‘uan mena yenti Cimaanyɛ, koogjin iki ɛkkɛn yomu pɔɔjɔ. Ɛkɛ a men maka ban Cayriin. Ɔci ɛkɛ bala bɛya te yielji. Ɔci ɛkkɛn ɛkɛ mugɛ, ɔci ɛkɛ iircɛ ɛkkɛn kɛṭi kakan Yaccu. Yaccu bala ati ñamu, ɔci Cimaan bala booti Yaccu ŋoyɛti kɛṭi kakan. 27Ɔci polla tolan bootcin ɛkɛ ŋoyɛti. Ɔci maka moong bala iki ɛkkɛn daŋkun. Ɛkkɛn bala poomi korkɛn, ɔci ɛkkɛn bala wiak te Yaccu. 28Ɔci Yaccu warɛ yallɛ ɛkkɛnti, ɔci gɔkcin ɛkkɛnti agi, “Hay! Moong maka ban Urcaliim, dala ɛkkɛ joon daldɛ te ‘ya. Dala ɛkkɛ aŋka wiaktɛ te taab bɛya ḍɔɔgi ɛkkɛti pookɔy, ɔci te kɛɛgin ɛkkɛ. 29Gɔṭṭɛ, oŋ bala bɛya, ɔci ma gɔkti agi, ‘Moonga balki kɛɛgin bɛɛyɛ, ɛkkɛn yomgɛn ñɔyɔ. Gena maka jieni bɛɛ, ɔci maka nɛɛti kɛɛgin bɛɛ neeni.’ 30Ɔci te oŋŋa wannayɛ, ɛkkɛn gɔkti pomkti agi, ‘Dala ɛkkɛ ḍɛɛmdɛ ɔɔnti, ɔɔn kwomdɔntiwi!’ 31Kan ɛkkɛn noŋdi naŋka neeni ‘ya mena pwadantiy, oŋ ɛkkɛn noŋdi a ɔki nɔñji ɛkkɛti ma Urcaliim maka yeyinti neeniy?” 32Ɔci maka pookɛn gɛɛg bala daŋkun ne yyɛɛwɔ. Gena maka yeyin. Ɛkkɛn eyɛ lwadɛ ma iki Yaccu a cyɛɛlɔ acaan noktan ma. 33Ɔci ne ɛkkɛn dɛñki nona bartan ma agi “Oon Men Baan wyeñɛtiyɛ” ɛkkɛn Yaccu ŋaapci ñaalɔ aŋan, ɔci maka yeyin ŋaapci ma ñaalɔ aŋan daŋkun. Mena ne cyɛɛlɔ ŋaapci ma Yaccu taaŋŋa byerɔnti, ɔci mena parɛ ŋaapci ma taaŋŋa aamti. 34Ɔci Yaccu bala cɔki gɔki agi, “Hay! Wey ɔɔn, dala i ackan neeni bɔɔka, acaan naŋka naŋi ɛkkɛn neeni ŋeecɔn ɛkkɛn bɛɛ.” Ɔci ackan bala oomi kɔla te bworŋin ɛkɛ. Ɔci ɛkkɛn bworŋin Yaccu cieñɛ jitin. 35Ɔci ma bala yɔdi gɔṭi naŋka neeni. Yeti ḍuaŋan ma Icrayiilyɛ, ɛkkɛn bala juoli Yaccu agi, “Maka pookɛn yɔɔññɛ ɛkɛ, ɔci acca kan ɛkɛ a Kiṭɔ Mena Muonɛ Juaŋ Borayɛ, dala ɛkɛ warɛ yɔɔdɛ parɛ.” 36Ɔci ackan daŋkunyɛ, ɛkkɛn bala juoli ɛkɛ. Ɔci ɛkkɛn mooya cyɛyan eyɛ, ɔci ɛkkɛn gɔkcin ɛkɛti agi, “Anti, motca.” 37Ɔci ɛkkɛn moki gɔki ɛkɛti agi, “Kan i a Ciɛggɔn Tolan ma Icrayiilyɛ, dala i waru yɔya paru acca.” 38Ɔci jyeka kiigin olji ma kakanti ŋaapci ma ñaalɔ Yaccu wyeñɛti gɔki agi, “MENA NEENI A CIƐGGƆN TOLAN MA ICRAYIIL”. 39Ɔci mena yaayan gɛɛl, mena ŋaapci ma ñaalɔ iki Yaccu neeniyɛ, ɛkɛ bala ḍori Yaccu agi, “Hay! I a Kiṭɔ bɛɛ? Oŋ ba i war i yɔɔdi aŋka i ɔɔn da yɔɔdɔn bɛ?” 40Ɔci mena parɛ neeniyɛ, mena neeni dɛɛnnɛti. Ɛkɛ gɔkcin ɛkɛti agi, “Hay! I buay Jwaŋa Tolan bɛɛ? Jyeka neeni bɛɛn ikin wyetkɔti waakida. 41Ɔci jiek bɛɛn ikinti yaakkɔ amaam bɛɛ. Jiek bɛɛn ikinti te naŋka naŋŋin ikin yeyin neeni. Yeti gɔṭṭi poca, ‘wana neeniyɛ, ɛkɛ noŋi gena yaayan gɛɛl bɛɛ.” 42Ɔci ɛkɛ gɔkcin Yaccuti agi, “Yaccu, dala i poŋja te ‘ya, ne i agdi Ciɛggɔn Tolany.” 43Ɔci Yaccu gɔkcin ɛkɛti agi, “Awarɛ, ‘ya gɔkka iti, acca neeniti ɔŋŋiyɛ, ikin oottin iki ‘ya ñaalɔ pɔliji non cyɛgji ‘ya.” 44Ɔci ne oŋ waŋɛ yɔɔnni yeccuyɛ, ne pɛñan noon uli doki ne oŋ waŋɛ warɛ yiɛnnɛ ɔɔn. Oŋ waŋɛ bala dɛki moki bɛɛ. 45Ɔci bworŋa kɛkci ma orɔ on Juaŋ ona Tolan, bworŋa on kɛɛmmɛ jitin i on ṭɔla jiju neeniyɛ, ɛkɛ ḍañi jitin te ñaalɔ wyeñɛti ne iñɔ ɔɔn. 46Ɔci Yaccu yaadjin te pwana tolan, ɔci ɛkɛ gɔkcin agi, “Wey ɔɔn, boŋ ‘ya ‘wondin i bieŋuti!” Ɔci ne ɛkɛ gɔŋni a ɔɔnyɛ, ɛkɛ tuun doki. 47Ɔci ḍuaŋa ackanyɛ, ne ɛkɛ gɔrni naŋka neeniyɛ, ɛkɛ jieyi Juaŋ gɔki agi, “Ɛɛ, awarɛ, ‘wana neeniyɛ, ɛkɛ a mena pwadan. Ɛkɛ noŋi gena yaayan gɛɛl bɛɛ!” 48Ɔci pooldin ḍwaŋin pooldin bɛɛn gɔṭi naŋka neeniyɛ, ɛkkɛn dɔɔki baanji, ɛkkɛn bala poomi korkɛn acaan ɛkkɛn yomgɛn yeyɔ. 49Ɔci mung Yaccun, ɔci moonga bɛɛn boottin ɛkɛ te bana tolan ban Jaliilyɛ, ɛkkɛn bala yɔdi te nona loonan. Ɔci naŋka neeni waakɛndayɛ, yuarcɛ ɛkkɛn. 50Ɔci mena ‘uan gɛɛl bala yenti Yuocip. Ɛkɛ bɛɛn te ban Ɛrimatiiya ban Yahuudiyaji. Ɛkɛ a mena gɔṭi jiek iki maka ḍwaŋin daŋkun. Ɛkɛ pwad pwado, ɔci naŋki ɛkɛ pwatcin moki. 51Yuocip neeniyɛ, bala kɛɛy oŋŋa cyɛgji Juaŋ bɛɛdiy. Ɛkɛ jiek ñaagɛyɔ iki Maka Gɔṭi Jiek i ma Icrayiil te jyek lyen Yaccu bɛɛ, a’a. Ɔci moki ɛkɛ yookɔn te naŋka naŋtan ɛkkɛn Yaccuti neeni. 52Ɔci Yuocipyɛ, ɛkɛ ati Bilaatuc ñamɛti ɔci tooccin Bilaatucti aŋka ɛkɛ ‘wondɛ Bilaatuc war Yaccu. 53Ɔci ɛkɛ war Yaccu oonɛ iñɔ, ɔci paarŋɛyɔ ɛkɛ te bworŋa woonɛ bworŋa tɛyan. Ɔci eññɛ joŋnɛ koolji. Gena kola wɔrŋɛ Yuocip poom konɛtiy. Men gɛɛl jogɛ ma kola neeniti men bɛɛ. 54Oŋŋa neeniyɛ, a Oŋŋa Yɔŋki Ma Waako. Oŋ Cabit cɔɔllin doki oŋ tɛɛna wannati. 55Ɔci maka moong daŋkun, maka bɛɛn iki ɛkɛ te bana tolan ban Jaliilyɛ, ɛkkɛn bala ati booti Yuocip ŋoyɛti ne cwakanti, ɔci ɛkkɛn gɔrcin ne kool baali wɛnɛy. Ɔci ɛkkɛn bala gɔṭi ne ɛkɛ warɛ ḍuackiti ma jiju a ɔkiy. 56Ɔci ɛkkɛn dɔɔkkin baanji, ɔci ɛkkɛn bala yɔŋi eelan a ḍuobji ɔci eelan labi ma te ñɔɔn aŋka eelan oltan Yaccu warɛti koolji. Ɔci te Oŋ Cabityɛ, ɛkkɛn wowwin ba jyek ganuun.

will be added

X\