Luuk 22

1Iid Byedga Polanyɛ, cɔɔllin doki. Iid neeniyɛ, ma boṭi agi Iid Malɛɛka Lien Bɛɛn Goṭi a Gorŋo. 2Gaciicin ḍwaŋin ma Icrayiil ɔci maka loṭi worga Juaŋyɛ, ɛkkɛn buayi mako, ɔci acaan a ɔɔnyɛ, ɛkkɛn bala lieṭi pɔya ɛkkɛn nokki Yaccu lieda. 3Ɔci Jwaŋa Yaayan kaaccin Yahuuja Ickɛɛryuti yomɛti. Ɛkɛ a mena akki maka laldɛ Yaccu Ne Inyaakkɛn wyetkɛn Ne yyɛɛwɔy. 4Ɔci ɛkɛ ati ɔci ɛkɛ bala gɔṭi jiek iki gaciicin ḍwaŋin ma Icrayiil iki ḍuaŋan bɔlin on Juaŋ ona tolan acaan ɛkɛ buagɔn Yaccu ‘wondɛ ɛkkɛn byeŋkɛnti lieda ɔɔn. 5Ɔci ɛkkɛn yomgɛn ñɔɔna ñɔɔno. Ɔci ɛkkɛn gɔki agi, “Ɛkɛ ‘wontin bilk te naŋki ɛkɛ neeni.” 6Ɔci Yahuuja jyettin gɔki agi, “Ɛɛ, a ɔɔn pwatcin.” Ɔci ɛkɛ ati bala lieṭi pɔya ɛkɛ Yaccu ‘wondɛ ma byeŋkɛnti ne maka coŋin neeni baaki nona ɛkɛti men ɔɔn. 7Ɔci Iid Byedga Polanyɛ, bɛɛn doki. Gena oŋŋa ma ŋoorki kulin ṭɔlgɛn ba naŋki oŋ Iid Malɛɛka Lien Bɛɛn Goṭi a Gorŋo. 8Ɔci Yaccu Butruc cuuññɛ i Yɔhanna ɔci ɛkɛ gɔkcin ɛkkɛnti agi, “Dala ɛkkɛ ooddɛ wak iid ywaŋdɛyɔ, ɔci ɔɔn oŋ bɛɛdɔn ikin omtin oŋo.” 9Ɔci ɛkkɛn tooccin ɛkɛti agi, “I buagi ɔɔn ooddɔn waak ywaŋdɔnyɔ wɛnɛ te ikin?” 10Ɛkɛ gɔkcin ɛkkɛnti agi, “Gɔṭṭɛ, ne ɛkkɛ dɛndɛ ban Urcaliimjiyɛ, mena ‘uan gɛɛl koogdi iki ɛkkɛ. Ɛkɛ kɛṭi pieg te kuñŋan. Ɔci ɛkkɛ boottɛ ɛkɛ ŋoyɛti. Ɛkkɛ ooddɛ iki ɛkɛ ɔɔn ne ona ɛkɛ kaatti ɔɔn. 11Ɔci dala ɛkkɛ gɔktɛ on weegɛnti agi, ‘Mena Loṭi Ma bala tooci agi, “Ba ona cootta ‘ya a on wɛlg bɛ? Acaan ‘ya buaga noŋdɔn iid i maka laldi ‘yay.” ’ 12Ɔci ɛkɛ ɛkkɛ myettɛ te ona tolan ñaalɔ. Ona neeni ywaŋŋɛ ɛkɛ doki. Ɔci dala ɛkkɛ wak iid ywaŋdɛyɔ te ikin aŋan.” 13Ɔci ɛkkɛn atti. Ɔci ɛkkɛn yɔṭi on ba jwalla guaŋnɛ Yaccu ɛkkɛntiy. Ɔci ɛkkɛn wak iid ywaŋɛyɔ aŋan. 14Ɔci ne oŋ waŋa omki ma iid bɛɛni borayɛ, ɔci Yaccu cooccin iñɔ omi am iki Cuudan ɛkɛ Maka A Inyaakkɛn wyetkɛn Ne yyɛɛwɔy. 15Ɔci Yaccu gɔkcin ɛkkɛnti agi, “‘Ya buaga ne pɛñan dala ikin omtin oomdin iid neeni, Iid Malɛɛka Lien Bɛɛn Goṭi A Gorŋ iki ‘ya ne taab bɛɛni ‘yati men bɛɛy. 16Tieŋdɛ, ‘ya ɛkkɛ myettin ne pwadan. ‘Ya omja iid neeni moki bɛɛ. ‘Ya cied ɔɔn ne oŋŋa waak waakɛnda mugdɛ Jwaŋa Tolan bieŋɛti ɔɔn.” 17Ɔci ɛkɛ kubaaya pyeg luutkin luullɛ, ɔci ne ɛkɛ gɔŋni a pwatcin Jwaŋa Tolantiyɛ, ɛkɛ gɔkcin ma ɛkɛti agi, “Antɛ waka nɛ. Ɔci ɛkkɛn ḍyerdɛ jitin ɛkkɛ. 18Tieŋdɛ! ‘Ya motca pyeg luutkin moki bɛɛ. ‘Ya cied budan ɔɔn ne cyɛgji Jwaŋa Tolan bɛɛdi ɔɔn.” 19Ɔci ɛkɛ byentan gɛɛl luullɛ, ɔci cɔkcin Jwaŋa Tolanti. Ɔci ɛkɛ byentan wɛɛnnɛ jitin, ɔci ɛkɛ ma ‘wonnɛ byentan, ɔci ɛkɛ gɔkcin ɛkkɛnti agi, “Antɛ byentan neeni! Gena war ‘ya. Dala ɛkkɛ noŋdɛ a ɔɔn, aŋka ɛkkɛ poŋɛ te ‘ya.” 20Ɔci ne ɛkkɛn ḍookkɛ te amiyɛ, ɔci Yaccu kubaaya pyeg luutkin luullɛ daŋkun. Ɔci ɛkɛ gɔkcin mati agi, “Antɛ! Mottɛ waka bala kubaaya konɛti neeniyɛ, ɛkkɛn a yimg ‘ya, ɛkkɛn kɛɛwin iñɔ te ɛkkɛ. Ɔci te lyena tuuda ‘ya neeniyɛ, Juaŋ noŋdi jyeka wonkɛn iki ɛkkɛ. 21Yeti gɔṭṭɛ, byeŋ mena ‘ya ‘wonda ma byeŋkɛnti neeniyɛ, ɛkɛ balgin iki ‘ya nona amti wɛnni. 22’Ya Kaci Ma Baan tuud ba jyeka kiiwɛ ma te ‘yay. Yeti mena ‘ya ‘wonda ma byeŋkɛnti neeniyɛ, taab bɛya ɛkɛtiyɛ, tol tolo.” 23Ɔci ɛkkɛn bala toyi yɔtin pookɛn agi a menɛ bala ɛkkɛnti wɛnni noŋi naŋka neeniy. 24Ɔci maka laldɛ Yaccu bala toyi yɔtin pookɛn agi, “A menɛ a mena tolan te ikiny?” 25Ɔci Yaccu ɛkkɛn myennɛ agi, “Ḍuaŋan ḍwaŋin Keedin Pookɛnyɛ, balki war tɛɛn ma ɛkkɛnti oŋkanda, ɔci ḍuaŋan ḍwaŋin neeniyɛ, ɛkkɛn bartan ma agi, ‘Maka Ḍɔci Ma Ne Pwadany.’ 26Yeti ɛkkɛyɛ, naa ɛkkɛ baldɛ ba ḍuaŋan ḍwaŋin neeni bɛɛ. Kan mena a mena tolan te ɛkkɛyɛ, dala ɛkɛ aga ba mena ḍiɛran mena moki ma te yoma pwadan. 27Kan mena ciyi omiyɛ, ɔci kan mena parɛ gɛɛl bala noŋi kanŋa ɛkɛyɛ, ba mena a mena tolan te ɛkɛ neeni bɛ? Gena mena ciyi iñɔ neeni. Gena ɛkɛ aŋka tolcin bɛɛ? Yeti ‘yayɛ, ‘ya baal ba mena ḍiɛran ɛkkɛti. 28Ɛkkɛ agɛ maka bala ‘yati oŋkanda ne taab baali ‘yati ɔɔn. 29Ɔci ɛkkɛ ‘wondin ‘ya kanŋa maka a ḍuaŋan ḍwaŋin ba kanŋa ‘ya ne ‘ya ‘wonnata Wey ɔɔn kanŋa mena ḍuaŋa tolan neeni. 30Ɔci a ɔŋŋiyɛ, ikin omtin ɔci mottin iki ‘ya ban cyɛgji ‘ya, ɔci ɛkkɛ naŋdin ‘ya coottɛ kokin wyetkɛnti, ɔci agdɛ ḍuaŋan ḍwaŋin ma Icrayiil maka kɛɛna a inyaakkɛn wyetkɛn ne yyɛɛwɔ neeniy.” 31Ɔci te wɛnni Yaccu gɔrcin Butructi ɔci gɔkcin ɛkɛti agi, “Butruc, Butruc, tieŋŋa poca! Jwaŋa Yaayan bala tooci te ɛkkɛ waakida, acaan ɛkɛ buagɔn ‘ya ɛkɛ ‘woñga naŋki aŋka ɛkɛ buagɔn poci ɛkkɛ a poccin ba kuata ma kuaki pok oŋkanda wanna ɔɔn. 32Yeti ‘ya baal cɔk Juaŋti te i, Butruc, aŋka naa jyenna jyetti i neeniyɛ, ḍɛmdi iñɔ bɛɛ. Ɔci ne i waru yaldi mokiyɛ, dala i modg ɛkkɛ maga, aŋka dala ɛkkɛn yɔɔda ne tɛyan.” 33Yeti Butruc gɔkcin ɛkɛti agi, “Ciɛggɔn, kan ‘ya olta ma ciginji iki iyɛ, dala ‘ya olta ma ɔɔn. Ɔci kan ‘ya nokta ma iki iyɛ, dala ‘ya nokta ma moki ɔɔn!” 34Ɔci Yaccu gɔkcin ɛkɛti agi, “Tieŋŋa, i myettin ‘ya, te ween jiña neeni ne tuan wiakti men bɛɛyɛ, i doki kɛkka te ‘ya oŋki ne ḍoogɔ. I gɔkca mati agi i ‘ya ŋeeja bɛɛ.” 35Ɔci Yaccu tooccin Maka A Inyaakkɛn wyetkɛn Ne yyɛɛwɔti agi, “Oŋŋa ɛkkɛ cuuññin ‘ya ɔci ɛkkɛ attɛ, ɔci kucin ɔci cowaal ɔci wɛɛyi eññɛ ɛkkɛ bɛɛyɛ, coodi ɛkkɛ tɛy tɛy boki?” Ɔci ɛkkɛn kɛkcin agi, “A’a, coodi tɛy tɛy bɛɛ.” 36Ɔci Yaccu gɔkcin ɛkkɛnti agi, “Yeti accayɛ, kan men gɛɛl balki kucin bilkyɛ, dala ɛkɛ kucin neeni eedɛ, ɔci mena balki cowaalyɛ, dala ɛkɛ cowaal eedɛ daŋkun. Ɔci mena balki byeŋgaaran bɛɛyɛ, dala ɛkɛ bworŋ jwami wiɛldɛyɔ, ɔci dala ɛkɛ wɛrdi byeŋgaaran te bilka neeni. 37’Ya ɛkkɛ myettin, jyeka kiigin gɔki te ‘ya agi, ‘Jiek oljɛ ma ɛkɛ wyeñɛti i maka yeyin a cyɛɛlɔ.’ Dala jyeka neeni aga jyeka awarɛ te ‘ya. Acaan jyeka kiiwɛ ma te ‘yayɛ, noŋi cɔmdi bora waakɛnda awarɛ.” 38Ɔci ɛkkɛn gɔki agi, “Ciɛggɔn, gɔṭṭi, byeŋgaaran bala wɛnni ne yyɛɛwɔ!” Ɔci ɛkɛ ṭwokcin ɛkkɛnti agi, “Ɛɛ, kapa ɔɔn.” 39Ɔci Yaccu kooyin bora te bana tolanti neeni, ɔci ati ñaalɔ Pom Jɛtuun wyeñɛti ba naŋki ɛkɛ oŋkanda. Ɔci maka laldɛ ɛkɛ daŋkun bootcin ɛkɛti. 40Ɔci ne ɛkɛ dɛnni nona neenitiyɛ, ɛkɛ gɔkcin ɛkkɛnti agi, “Cɔktɛ Juaŋti aŋka naa ɛkkɛ ḍɛɛmdɛ iñɔ te maali Jwaŋa Yaayan neeni ɔci kɛkti te ‘ya bɛɛ.” 41Ɔci ɛkɛ ati ñamu parɛ ne ḍiɛran ṭɔɔlɛ. Ɔci ɛkɛ ḍwoñjin iñɔ ɔci cɔkcin Jwaŋa Tolanti agi, 42“Wey ɔɔn, kan i buagiyɛ, dala i noŋja naŋki i aŋka naa taab lien neeni bɛya ‘yati bɛɛ. Yeti ‘ya cɔkka iti ba yom ‘ya bɛɛ. ‘Ya cɔkka iti ba yom i.” 43Ɔci malɛɛka gɛɛl bɛɛn ɛkɛti te ñaalɔ pɔliji, ɔci warɛ lɛɛlnɛ bora ɛkɛti. Ɔci ɛkɛ bala moki Yaccu aŋka dala ɛkɛ yomɛ tɛya. 44Ɔci Yaccu yomɛ bala wiak ne tolan konɛ ñɔni warɛ te taab neeni, hay! Ɔci ɛkɛ cɔkcin Juaŋti ne tolan. Ɔci cani kɛɛwin iñɔ te ɛkɛ ñamɛti bala ba yimgo. 45Ɔci ne ɛkɛ ḍookki te cɔŋiyɛ, ɛkɛ ati dɔɔki nona maka laldɛ ɛkɛti. Ɔci ɛkkɛn mɔŋnɛ ɛkɛ wicɔ, acaan ɛkkɛn taabbin te yom yoño. 46Ɔci ɛkɛ gɔkcin ɛkkɛnti agi, “Hay! Ɛkkɛ wiccɛ a ɔɔn ogo? Dala ɛkkɛ jɔldɛ ñaalɔ, ɔci ɛkkɛ cɔktɛ Juaŋti aŋka naa ɛkkɛ ḍɛɛmdi iñɔ te maali Jwaŋa Yaayan neeni, ɔci kɛktɛ te ‘ya bɛɛ.” 47Ne Yaccu baali gɔki jyeka neeni menyɛ, ɔci poli ma polla tolan bɛɛni. Ɔci Yahuuja Ickɛɛryuti ɛkkɛn wɛɛññɛ nona ɛkɛti. Ɔci ɛkɛ ati orcinti Yaccuti, ɔci ɛkɛ Yaccu ñiimmɛ te tukɛ ba naŋki ma ɛkkɛn. 48Yeti Yaccu gɔkcin ɛkɛti agi, “Yahuuja, i ‘ya Kaci Ma Baan ‘wonda ma te ñiimmɔ?” 49Ɔci ne maka atki iki ɛkɛ neeni gɔrki naŋka naŋtan ma ɛkɛti wannayɛ, ɛkkɛn tooccin ɛkɛti agi, “Ciɛggɔn, dala ikin nooktin iki ma te byeŋgaaran ba?” 50Ɔci te wɛnni mena bala Yaccuti gɛɛl mena kanŋan i gaciic tolan ma Icrayiil jyɛmmɛ jyeña byerɔn palnɛ bora te byeŋgaaran. 51Yeti Yaccu gɔkcin ɛkɛti agi, “Kapa ɔɔn, naa i noŋja a ɔɔn moki bɛɛ!” Ɔci Yaccu topcin men jyeñɛti, ɔci ɛkɛ men jyeña ywaŋŋɛ moki. 52Ɔci Yaccu gɔkcin gaciicin ḍwaŋin ma Icrayiilti, ɔci ḍuaŋan bɔlin on Juaŋ ona tolan, ɔci ḍuaŋan ḍwaŋinti agi, “Gɔṭṭɛ, hay! Ɛkkɛ bɛɛnɛ ennɛ byeŋgaaran ɔci gɔlk byeŋkɔti aŋka ‘ya mugdata ɛkkɛ ba muŋi mena ɛɛn ogo? 53Ne ‘ya balgin iki ɛkkɛ on Juaŋ ona tolan oŋkanda ɛkkɛ menga poccin ‘ya muŋŋa bɛɛ. Yeti dala gena ɛkkɛ buagɛ naŋdɛ neeni dala naŋdɛ wona war tɛɛn Mena Yaayan mwoki noon men ɔŋ.” 54Ɔci ɛkkɛn ɛkɛ mugɛ ɔci eyɛ lwadɛ ne on gaciic tolan ma Icrayiilti. Ɔci Butruc ɛkɛ bala bɛya booti te ŋoyɔ nona loonan. 55Ɔci ne ma gɛɛg maañ olkiti jiju kaañjiyɛ, ɔci ɛkkɛn cooccin iñɔ bala ooyi. Ɔci Butruc daŋkun bala ooyi iki mako. 56Ɔci mena a ṭɔɔl gɛɛl Butruc yuarnɛ ne ɛkɛ baali ciyi ooyi maccuy. Ɔci ɛkɛ bala gɔṭi tieci Butruc warɛ a tiito. Ɔci ɛkɛ gɔkcin agi, “Hay! ‘Wana neeni moki a mena booti Yaccu daŋkun, hay!” 57Yeti Butruc kɛkcin, ɔci gɔkcin ɛɛŋti agi, “Hay! Ɛɛŋo, ‘ya gena guaga i neeni ŋeej bɛɛ!” 58Ɔci ne ḍiɛran ṭɔɔlɛ mokiyɛ, mena ‘uan gɛɛl bala gɔṭi Butruc. Ɔci gɔkcin ɛkɛti agi, “Hay! I a men ɛkɛ daŋkun, hay!” Yeti Butruc kɛkcin gɔkcin ɛkɛti agi, “Hay, ‘uano, ‘ya a men ɛkɛ bɛɛ!” 59Ɔci ne ḍiɛran ṭɔɔlɛ mokiyɛ, mena parɛ gɛɛl gɔkcin ɛkɛti moki ne pɛñan agi, “Ɛɛ, ‘wana neeni ɛkɛ bala iki Yaccu awarɛ acaan ɛkɛ a men ma Jaliil!” 60Yeti Butruc gɔkcin agi, “Hay, ‘uano! Jyeka guaga i wanna ŋeej ‘ya bɛɛ!” Ɔci ne pɛñan ne ɛkɛ baali gɔki jyeka neeni menyɛ, tuan wiakcin doki. 61Ɔci Yaccu warɛ yallɛ, ɔci gɔrcin Butructi, ɔci Butruc ñingɛ ñieŋnɛ te jwalla guaŋŋɛ Yaccu ɛkɛti te ñamu agi, “Gɔṭṭi, Butruc, ne tuan wiakti men bɛɛyɛ, i kɛkka te ‘ya oŋki aga ne ḍoogɔ dokiy.” 62Ɔci Butruc ati bora, ɔci bala wiak a joon duor konɛ te naŋki ɛkɛ neeni. 63Ɔci maka gɔṭi Yaccu neeniyɛ, ɛkkɛn bala juoli ɔci jiebi ɛkɛ. 64Ɔci ne ɛkkɛn ɛkɛ ḍɛɛkkiti ñingɛtiyɛ, ɛkkɛn gɔkcin ɛkɛti agi, “Hayya! Dala i noŋja ba naŋki maka bɔwan. Mena i jyɛmmi neeni ŋeejɛ? Gɔkca!” 65Ɔci ɛkkɛn bala wooki ɛkɛ te jyeka pookɛn jyeka coŋin jyeka yeyin. 66Ɔci ne noon bɔɔniyɛ, maka ḍwaŋin ɔci gaciicin ḍwaŋin ma Icrayiil ɔci maka loṭi worga Juaŋyɛ, ɛkkɛn wyetkɛn ḍɔɔlɛ nona ne cyɛɛlɔ, ɔci Yaccu owwɛ ma nona maka gɔṭi jiek ñomgɛnti, ɔci ɛkkɛn gɔkcin ɛkɛti agi, 67“Gɔṭṭi, kan i a Kiṭɔyɛ, dala ɔɔn myettɔn.” Ɔci Yaccu ṭwokcin ɛkkɛnti agi, “Kan ‘ya ɛkkɛ myettinyɛ, ɛkkɛ jyeddɛ bɛɛ. 68Ɔci kan ‘ya tootta ɛkkɛtiyɛ, ɛkkɛ buagɛ ṭwoktɛ genga ‘yati bɛɛ. 69Yeti acca te oŋŋa neeniyɛ, ‘ya Kaci Ma Baan coocca Jwaŋa Tolan taaŋɛti, taaŋŋa byerɔn ñaalɔ.” 70Ɔci ɛkkɛn tooccin ɛkɛti waakɛnda agi, “I a Kaci Jwaŋa Tolan nɛ?” Ɔci Yaccu gɔkcin ɛkkɛnti agi, “Ɛɛ, ‘ya baal a ɔɔn, ba jwalla guagdɛ ɛkkɛ wanna.” 71Ɔci ɛkkɛn gɔki agi, “Hay yeh! Ikin buagin lieṭin jyeka pookɛn moki ogo? Ikin tieŋnin te jyetkɔ jyeka guaŋŋɛ ɛkɛ te tuk ɛkɛ parɛ neeni doki!”

will be added

X\