Luuk 21

1Ɔci Yaccu ñorcin ñaalɔ on Juaŋ ona tolan, ɔci ɛkɛ maka cyɛgan yuarnɛ ɛkɛ bala ḍɔci bilk ɛkkɛn canduuk ḍɔcki ma bilka ‘wontan ma Jwaŋa Tolan. 2Ɔci ɛkɛ ɛŋa cieñ ɛŋa bɔwan daŋkun yuarnɛ ɛkɛ ne ɛkɛ baali ḍɔcci girin ne yyɛɛwɔ budany. 3Ɔci Yaccu gɔkcin agi, “‘Ya ɛkkɛ myettin ne pwadan awarɛ, bilka ḍuannɛ ɛŋa bɔwan, ɛŋa cieñ neeni a ḍiɛkan, yeti Jwaŋa Tolan yomɛ pwanna pwani acaan ɛkɛ ḍɔccin. 4Acaan maka neeni ɛkkɛn kɛñi te bilk ɛkkɛn wyetka kɛci bora te bilka coŋin neeniti, ɔci ḍuacci ɛkkɛn Juaŋti. Yeti ɛŋa bɔwan neeniyɛ, ɛkɛ ḍɔccin bilk ɛkɛ waakɛnda.” 5Ɔci maka laldɛ Yaccu gɛɛg bala gɔki te on Juaŋ ona tolan neeni, agi gwoyya cɔtki ma on warɛ neeniyɛ, agi ɛkki pwannɔ agi pwadgin. Ɔci agi waka ‘woñgi ma Juaŋ on Juaŋ neeni agi pwannɔ agi pwadgin moki. Ɔci acaan a ɔɔnyɛ, Yaccu gɔkcin ɛkkɛnti agi, 6“Gɔṭṭɛ! Oorga yuartɛ ɛkkɛ neeniyɛ, ne oŋ gɛɛltiyɛ, waka neeni laaktan ma ɔntɔ, ɔci guonan gɛɛl niindi menin parɛti bɛɛ. Ɛkkɛn yiɛptan ma iñɔ waakɛnda.” 7Ɔci ɛkkɛn tooccin ɛkɛti agi, “Mena loṭi may, oŋŋa neeni bɛya bora ne tua? Ɔci ne oŋŋa neeni noŋi bɛɛdi boray, oŋ ñiitin ikin te gena?” 8Ɔci ɛkɛ gɔkcin ɛkkɛnti agi, “Gɔṭṭɛ! Dala ɛkkɛ woŋgɔ tiittɛ aŋka naa ɛkkɛ jyɛttɛ ma ɔntɔ bɛɛ. Acaan maka coŋin gɛɛg bɛya, ɔci ɛkkɛn gɔkti agi ɛkkɛn aginti ‘ya Kiṭɔ awarɛ. Ɔci agi Oŋ Kiṭɔ bɛɛnɔ doki. Naa ɛkkɛ tieŋdɛ jyek maka neeni bɛɛ. 9Ɔci ne ɛkkɛ tieŋdɛ ma gɔkki agi lañ baalɔ ɔci agi ywobji baalɔyɛ, naa ɛkkɛ buayɛ ne tolan bɛɛ. Naŋka bala a ɔɔn wanna bɛya waakɛnda, yeti jiek wyetkɛn bawwin men bɛɛ.” 10Ɔci ɛkɛ gɔkcin ɛkkɛnti moki agi, “Keedin wɛɛn warda noogdi yɔtin oŋkanda. 11Ɔci bonka pookɛn gɛɛgtiyɛ, ṭɛɛr warɛ ḍieddi ne pɛñan. Ɔci koñ moki bɛya mati. Ɔci taab tol tolo. Ɔci moki naŋka ñyecki ma yuartan ma ñaalɔ pɔliji. Ɔci ma buatti ne pɛñan. 12“Yeti ne naŋka neeni bɛɛki bora men bɛɛyɛ, ɛkkɛ mwoktɛ mako. Ɔci ɛkkɛ naŋtɛ ɛkkɛn ne yaayan. Ɔci ɛkkɛ yɔɔttɛ ma ma ñomgɛnti oorga morki ma Juaŋti aŋka ma gɔrti jyek ɛkkɛ. Ɔci ɛkkɛ oltɛ ma ciginji. Ɔci moki ɛkkɛ ma gɛɛg yɔɔtti ḍuaŋan ḍwaŋin ɔci ḍuaŋan ṭɔlgɛn ñomgɛnti te jyek ‘ya. 13Ɔci te oŋŋa wannayɛ, ɛkkɛ yaakɛti ma lwogdɛ te jyek ‘ya. 14Dala ɛkkɛ yomgɔ ḍyɛgdɛ acca. Naa ɛkkɛ poŋdɛ te jyeka ɛkkɛ goddi iki ma nona godanti neeni bɛɛ. 15Te oŋŋa wannayɛ, ɛkkɛ magdin ‘ya te jyeka guagdɛ ɛkkɛ. Ɛkkɛ ‘wondin ‘ya ñing tɛɛno, ɔci maka yookɔn te ɛkkɛ neeniyɛ, ɛkkɛn bwandɛ ɛkkɛ te jieko. Ɔci ɛkkɛn yaaktanti gɔkti genga ɛkkɛti moki bɛɛ. 16Ɔci ma waakɛnda yooktan te ɛkkɛ te jyek ‘ya. Te oŋŋa wannayɛ, mɛyi ɛkkɛ ɔci weyi ɛkkɛ, ɔci modg ɛkkɛ ɔci ma ɛkkɛ maka pookɛn, ɔci mung ɛkkɛyɛ, ɛkkɛn ɛkkɛ ‘wontɛ ma byeŋkɛnti, ɔci ɛkkɛ ma gɛɛg noktɛ ɛkkɛn. 18Yeti men gɛɛl ɛkkɛti ḍakti bɛɛ. 19Kan ɛkkɛ yɔɔddɛ ne tɛyanyɛ, ɛkkɛ uddɛ. 20“Gɔṭṭɛ, ne ɛkkɛ ban Urcaliim yuartɛ yuttitiwi ackanyɛ, dala ŋeeddɛ ɛkkɛ oŋŋa bana neeni yaadi cɔɔllin doki. 21Kan ɛkkɛ ciyɛ ban Yahuudiyayɛ, dala ɛkkɛ yooŋdɛ pomk jitin ne pɛñan, naa ɛkkɛ kwattɛ bɛɛ. Naŋka neeni bɛya a yuurgɔn. Ɔci kan ɛkkɛ ciyɛ bana tolantiyɛ, dala ɛkkɛ koodɛ bora ne pɛñan. Kan ɛkkɛ ciyɛ bana tolan ŋoyɛtiyɛ, naa ɛkkɛ kaattɛ bana tolanti moki bɛɛ. 22Acaan oŋŋa bɛya Juaŋ jiek duaktɛ Urcaliim wyeñɛti wannayɛ, ɛkɛ a ‘Oŋ Ywobji Juaŋ Ban Urcaliimti’ ba jyeka kiigin worgaji. 23Maka laci ɔci maka balki kɛɛgin ḍyɛrinyɛ, oŋŋa wanna tɛy tɛy ɛkkɛnti ne pɛñan. Acaan taab bɛya wannayɛ, pɛñña pɛñño, ɔci ywobji Juaŋ tol tol mati. 24Ma noktan ma te byeŋgaaran. Ɔci ma gɛɛg eetan maka yooki ñin iki ɛkkɛn bonka pookɛnti baan warda aga kɛɛnk ɛkkɛn. Ɔci ban Urcaliim buurtan Keedin Pookɛn iñɔ, ɔci ɛkkɛn ciya wɛnan ne yuong ɛkkɛn bɛɛti bora ɔɔn. 25“Oŋŋa bɛya ne ŋoyɔ neeniyɛ, ñiitan ma te naŋki waka pookɛn, ɔci te oŋ waŋɛ, ɔci te paano, ɔci te kɛltan. Ɔci iñɔ ṭɛɛrji wɛnniyɛ, maka bonka ḍwaŋin buaya ne tolan, ɔci lieṭi pɔya yooŋti ɛkkɛn ɔntɔ te pɔɔgi galŋa tolan ɔci te joon ɛkkɛn. 26Ɔci ma gɛɛg yomgɛn poda te bwaji ɔci te naŋka tɛyan naŋka bɛya mati ṭɛɛrjiy. Acaan waka bala ñaalɔ pɔlijiyɛ, ɛkkɛn waakɛn ḍieddi waakɛnda. 27Hayya, ɛkkɛn oŋ ‘ya Kaci Ma Baan yuarta ne bɛɛda te pɔli te war tɛɛn ɔci pwanna pwani ne tolany. 28Ne naŋka neeni noŋki bɛɛtiyɛ, dala ɛkkɛ yɔɔddɛ ne pwadan a tyɛlga, acaan oŋŋa ɛkkɛ magdɛ Juaŋ te maka yookɔn te ɛkkɛ neeniyɛ, cɔɔllin doki.” 29Ɔci Yaccu ɛkkɛn myennɛ te jwalla a caagɔn gɛɛl moki agi, “Gɔrtɛ ŋuammo, ɔci janga pookɛn waakɛnda. 30Ne ɛkkɛ gɔrtɛ jang yuocki ɔci pworkiyɛ, ŋeejɛ ɛkkɛ noon aŋi ḍuoŋ tukɛ doki. 31Ɔci daŋkun, ne ɛkkɛ gɔrtɛ naŋka neeni ne bɛɛti borayɛ, dala ŋeeddɛ ɛkkɛ cyɛgji Jwaŋa Tolan cɔɔllin doki. 32“‘Ya ɛkkɛ myettin ne pwadan. Maka accayɛ, ɛkkɛn tuwa bɛɛ, ɛkkɛn gɛɛg ciya ne jyeka neeni bɛɛti bora waakɛnda ɔɔn. 33Pɔli ɔci ṭɛɛryɛ, ɛkkɛn baadi. Yeti jyek ‘yayɛ, ɛkkɛn baadi bɛɛ. 34“Dala ɛkkɛ woŋgɔ tiittɛ te yomg ɛkkɛ, aŋka naa ɛkkɛ ḍɛɛmdɛ iñɔ jyek coodda yaayan bɛɛ, walla ba jyek nooŋi mooyo, ɔci walla paŋi jyek coodda iñɔ baanji wɛnni bɛɛ. Kan ɛkkɛ yomgɔ ḍɛɛmdi iñɔ te naŋka wannayɛ, ɔci oŋŋa bɛya ne ŋoyɔyɛ, bɛya ne pɛñan ba yiici ne muowi waak ɔɔn. 35Ɛkɛ bɛya te maka ciyi ṭɛra neeni ŋoyɛti waakɛnda. 36Dala ɛkkɛ woŋgɔ tiittɛ oŋkanda ɔɔn. Ɔci cɔktɛ oŋkanda aŋka ɛkkɛ ‘wondɛ Jwaŋa Tolan war tɛɛno, ɔci a ɔɔnyɛ, ɛkkɛ bwantɛ taabn bɛya ɛkkɛti waakɛnda neeni bɛɛ. Ɔci ɛkkɛ yaakɛti yɔɔttɛ ‘ya Kaci Ma Baan ñamuti.” 37Ɔci oŋkandayɛ, Yaccu bala loṭi ma on Juaŋ ona tolan. Yeti te weenjiyɛ, ɛkɛ ooddi ciyi Pom Jɛtuunti. 38Ɔci te liid ṭɔɔl ḍiɛranyɛ, ma waakɛnda bɛya ɛkɛti on Juaŋ ona tolan acaan buagɔn tieŋdi jyek ɛkɛ.

will be added

X\