Luuk 20

1Oŋ gɛɛlti Yaccu bala loṭi ma on Juaŋ ona tolanti te jyeka wonkɛn jyeka pwadin. Gaciicin ḍwaŋin ma Icrayiil ɔci maka loṭi worga Juaŋ ɔci maka ḍwaŋinyɛ, ɛkkɛn waakɛn ñaagɛ nona ne cyɛɛlɔ nona baali Yaccuy. 2Ɔci ɛkkɛn gɔkcin ɛkɛti agi, “Dala i ɔɔn myettɔn, i noŋ naŋka neeni te jyek menɛ? A menɛ i ‘wonni naŋka neeniy?” 3Ɔci Yaccu ṭwokcin ɛkkɛnti agi, “‘Ya da buaga toocca ɛkkɛti te jwali gɛɛl daŋkun. ‘Ya ṭwoktata ɛkkɛ ñamu parun, ɛkkɛ oŋ myettin ‘ya daŋkun oŋo. 4Bulti Yɔhanna bɛɛn te Jwaŋa Tolantɛ, walla bɛɛn te ma baanti budan? Gɔktɛ.” 5Ɔci ɛkkɛn bala tyewɔ yɔtin pookɛn te jwalla neeni agi, “Kan ikin gɔktin agi bulti Yɔhanna neeni bɛɛn te Jwaŋa Tolantiyɛ, ɔci Yaccu tootti ikinti agi, ‘Oŋ kan a ɔɔnyɛ, ba ɛkkɛ jyettɛ jyek ɛkɛti bɛ?’ 6Yeti kan ikin gɔktin agi bulti Yɔhanna bɛɛn te ma baanti budanyɛ, ikin yeptin ma waakɛnda te gwoyi noktin dita, acaan maka coŋin neeni bala poŋi gɔki agi Yɔhannayɛ, ɛkɛ a bɔwa Jwaŋa Tolan.” 7Ɔci ɛkkɛn ṭwokcin gɔkcin Yaccuti agi, “Ɔɔn bulti Yɔhanna neeni ŋeejɔn ne bɛɛni te aŋɛ bɛɛ.” 8Ɔci Yaccu gɔkcin ɛkkɛnti agi, “‘Ya ɛkkɛ myettin te naŋka naŋdi ‘ya neeni daŋkun bɛɛ.” 9Ɔci Yaccu bala loṭi ma te jwalla a caagɔn gɛɛl agi, “Mena ‘uan gɛɛl ati pieti jang balji, ɔci ɛkɛ bala neeni ‘wonnɛ maka pookɛn byeŋkɛnti. Ɔci ɛkɛ ati bana tolan bana parɛ, ɔci ɛkɛ ɛɛni coodi aŋan. 10Ɔci ne wɔɔka pwonki ma jang ṭɔlgɛn bɛɛniyɛ, bal weegɛn mena kanŋan ɛkɛti gɛɛl cuuññɛ nona maka gɔṭi bal neeniti aŋka ɛkɛ kɛntan ma jang ṭɔlgɛn gɛɛg oodɛ baanji ɛkɛti. Yeti mena kanŋan ɛkɛti neeni jiebɛ maka gɔṭi bal neeni, ɔci ɛkɛ cuuñji duakciyɔ byeŋkɛ budan. 11Ɔci moki bal weegɛn mena parɛ gɛɛl cuuññɛ moki. Ɔci ɛkkɛn ɛkɛ jiebɛ daŋkun. Ɔci ɛkɛ naŋɛ ɛkkɛn ne yaayan, ɔci ɛkɛ cuuñji duakciyɔ byeŋkɛ budan. 12Ɔci moki ɛkɛ maka kanŋan ɛkɛti mena akki ḍoogɔ cuuññɛ moki. Ɔci maka gɔṭi bal neeni ɛkɛ yacci, ɔci ɛkɛ yiɛpcɛ bora. 13Ɔci bal weegɛn gɔki agi, ‘Acca ‘ya noŋja a ɔki yeti? Ɛɛ, ‘ya kaci ‘ya aŋka cundo. Ɛkɛ a kacca ana ‘yay, ɔci ɛkkɛn yooktan te jyek ɛkɛ bɛɛ.’ 14Yeti maka gɔṭi bal neeniyɛ, ne ɛkkɛn ɛkɛ yuarkitiyɛ, ɛkkɛn bala gɔwwɔ yɔtin pookɛn agi, ‘Mena neeniyɛ, gena mena wak weegɛn eedɛ ɛkɛ neeni. Dala ikin ɛkɛ noktin. Ɔci wak weegɛn waka te ooddi ɛkɛti neeniyɛ, aga wak ikin.’ 15Ɔci ɛkkɛn ɛkɛ ŋualji bora te balji, ɔci ɛkɛ oŋ nogɛ ɛkkɛn bora oŋo.” Yaccu oŋ tooccin mati agi, “Oŋ bal weegɛn noŋdi a ɔki acca maka gɔṭi bal neeniti? 16Ɛkɛ bɛya ɔci maka gɔṭi bal neeni nogdɛ ɛkɛ, ɔci bal ‘wondɛ maka pookɛn byeŋkɛnti.” Ɔci maka bala tyeŋi jyek Yaccu neeniyɛ, ɛkkɛn gɔki agi, “Aa cca cca cca, a ɔɔn tɛy tɛyo, hay! Naa Juaŋ naŋka bala a ɔɔn wanna gɛɛl oodi ɔɔnti bɛɛ.” 17Ɔci ɛkɛ gɔrcin ɛkkɛnti, ɔci gɔkcin ɛkkɛnti agi, “Jwalla kiigin jiñɛ bala a ɔki ne jwali gɔki agi, ‘Poma guaktan maka cɔti oorg agi ɛkta yaayɔ neeniyɛ, ɛkɛ aŋi poma pwadan on warɛti doki.’ 18Kan men gɛɛl ḍɛmdi poma neeni wyeñɛtiyɛ, ɛkɛ nuotti jitin. Yeti kan poma neeni ḍɛmdi men gɛɛltiyɛ, ɛkɛ mena neeni tiittɛ iñɔ.” 19Ɔci maka loṭi worga Juaŋ ɔci gaciicin ḍwaŋin ma Icrayiilyɛ, ɛkkɛn buagɔn Yaccu muktan ne pɛñan te oŋŋa wanna. Yeti ɛkkɛn buayi maka coŋin. Ɛkkɛn looñi acaan ne Yaccu baali mieti ma te jwalla a caagɔnyɛ, ŋeecɔn ɛkkɛn ne Yaccu baali gɔki jwalla caagɔn neeni te ɛkkɛny. 20Ɔci ɛkkɛn bala kɛɛy ɛkɛ. Ɔci ma ɛkkɛn gɛɛg cuuñɛ ɛkkɛn Yaccuti lieda. Maka cuuñɛ ma neeniyɛ, bala noŋi ba ne ɛkkɛn buagɛ jyek Yaccu awarɛ ɔɔn. Yeti ɛkkɛn bala tyeŋi jyek ɛkɛ te yoma pwadan bɛɛ. Ɛkkɛn bala tyeŋi jyek ɛkɛ acaan ɛkkɛn lieṭi pɔya Yaccu muktiti ɛkkɛn aŋka oltiti ḍuaŋa ṭɔɔlɛ bieŋɛtiy. Ɛkkɛn buagɔn jwalla guagdɛ Yaccu gɛɛl aktanyɔ ɛkkɛn te jwalla yaayan. 21Ɛkkɛn botcin ɛkɛti agi, “Mena loṭi may, ŋeejɔn ɔɔn jyeka guaga i loṭi ma neeniyɛ, ɛkkɛn a jyeka pwadin awarɛ. Ɔci i lor ma waakɛnda te jyeka ne cyɛɛlɔ. I ma kɛba jitin bɛɛ. Ɔci ŋeejɔn ɔɔn moki i lor ma te jyek Jwaŋa Tolan ne pwadan, i lor te yoma awarɛ. 22Ɔɔn myettɔn, kan bɔlin Kɛɛcar ḍuaŋa tolan ma Ḍɔɔm neeni ‘wontin ikin tulbayɛ, a ɔɔn bala ba jyek ganuun ikin ma Icrayiil boki?” 23Yeti yomg ɛkkɛn ŋeejɛ Yaccu ne ɛkkɛn balki gɔkki jyek labji neeniy. Ɔci ɛkɛ ṭwokcin ɛkkɛnti agi, 24“Giric gɛɛl oodɛ wɛnni ikin gɔrtin a cyɛɛlɔ.” Ɔci Yaccu tooccin ɛkkɛnti agi, “Giric neeni balki pɔɔyama menɛ? Ɔci a yenti menɛ bala ɛkɛtiy?” Ɔci ma ṭwokcin ɛkɛti agi, “Gena pɔɔyama Kɛɛcar ḍuaŋa tolan, ɔci yenti ɛkɛ.” 25Ɔci Yaccu gɔkcin ɛkkɛnti agi, “Ɛɛ, yɔɔddɛ ɛkkɛ myettin, wak Kɛɛcaryɛ, ‘wondɛ ɛkɛ. Ɔci wak Jwaŋa Tolanyɛ, dala ‘wondɛ Juaŋ daŋkun.” 26Ɔci maka neeni korkɛn buañi noon te jyek Yaccu neeni. Ɔci ɛkkɛn cien lieda. Ɛkkɛn yaakinti Yaccu bwantan te jwali gɛɛl ma ñomgɛnti bɛɛ. 27Ɔci te oŋŋa wannayɛ, ma Cadyuciin gɛɛg bɛɛn Yaccuti daŋkun. Maka neeni loṭi agi ne ma tuudiyɛ, ma jɔŋdɔ ñaalɔ moki bɛɛ. 28Ɔci ɛkkɛn gɔkcin ɛkɛti agi, “Mena loṭi may, Muuca ikin kieŋnin jiek agi, ‘Kan mena mod ɛkkɛn tuwayɛ, ɔci kan ɛkɛ balki ɛɛŋyɛ, ɔci kan ɛɛŋ kɛɛgin ɛkɛ men baawyɛ, dala ɛŋ ɛkɛ ḍɛɛdɛ mod ɛkkɛn aŋka ɛkɛ jieda kɛɛgin jyettɛ mena tuun neeni.’ 29Oŋ acca gɔṭṭi! Maka ‘uay gɛɛg bala a dɔɔyɔ wyetkɛn ne yyɛɛwɔ. Ɛkkɛn a modin waakɛnda jiennɛ mɛya ne cyɛɛlɔ. Moda tolan ñamuyɛ, ɛkɛ ɛɛŋ ḍɛɛnɛ, ɔci ne ɛkɛ tuuniyɛ, kɛɛgin ɛkɛ baaw men. 30Ɔci moda bootcin moda tolan ŋoyɛti neeniyɛ, ɛŋa neeni ḍɛɛnɛ ɛkɛ moki. Ɔci ɛkɛ tuun moki, ɔci kɛɛgin ɛkɛ baaw men. 31Ɔci moda akki ne ḍoogɔ moki ɛŋa neeni ḍɛɛnɛ ɛkɛ moki. Ɔci ɛkɛ tuun moki, ɔci kɛɛgin ɛkɛ baaw men. Ɔci maka a modin ne dɔɔyɔ wyetkɛn ne yyɛɛwɔ neeniyɛ, ɛɛŋ ḍɛyɛ waakɛnda, yeti ɛkkɛn balki kɛɛgin gɛɛg bɛɛ. Kɛɛgin baaw ɛkkɛnti ne ɛkkɛn tuuki ɔɔn. Ɔci ɛɛŋ dalɛyɔ ɛkkɛn jieni kaci gɛɛl men bɛɛ. 32Ɔci ne ɛkkɛn tuuki waakɛnda a ɔɔnyɛ, ɔci ɛɛŋ daŋkun tuuni. 33Ɛɛ, oŋ ne oŋŋa ma jɔŋti ñaalɔ te lientiy, ɛŋa neeni aga ɛŋ moda ɔkiy? Acaan ɛkɛ ḍɛyi ‘uay ne dɔɔyɔ wyetkɛn ne yyɛɛwɔ, ɔci ‘uay tuun kɛɛgin baaw waakɛnda?” 34Ɔci Yaccu gɔkcin ɛkkɛnti agi, “Tieŋdɛ, maka iñɔ baanji ṭɛɛrji wɛnniyɛ, ɛkkɛn ḍɛɛwɔ. 35Yeti maka pwadin maka jɔŋdi ñaalɔ te kolk jitin, maka dɛndi ban Jwaŋa Tolan ɔci coodda ne baaṭi neeni yuartan ɛkkɛnyɛ, jyek ḍɛɛwin bala ɛkkɛnti moki bɛɛ. 36Jyek ḍɛɛwin baaw ɛkkɛnti, acaan ɛkkɛn tuwa moki bɛɛ. Ɛkkɛn bala ba malɛɛkan ɔɔn. Acaan ɛkkɛn jɔŋŋin ñaalɔ te lienti, ɛkkɛn aŋi kɛɛgin Jwaŋa Tolan ne pwadan. 37Ɛkkɛ tiekɛ agi ma jɔŋdɔ ñaalɔ te lienti moki bɛɛ. Ne Muuca gɔrni maañ baali koldi jaantiyɛ, Juaŋ gɔkcin ɛkɛti agi, ‘Yɔrg ɛkkɛ Abrahim ɔci Icaak ɔci Yaakubyɛ, ɛkkɛn a maka moṭi ‘yati.’ 38Jwaŋa Tolanyɛ, ɛkɛ a Jwaŋ maka tuutan bɛɛ. Ɛkɛ a Jwaŋ maka tɛɛti. Acaan ma ɛkɛ waakɛnda a maka tɛɛti.” 39Ɔci maka loṭi worga Juaŋ gɛɛg gɔkcin Yaccuti agi, “Ɛɛ, mena loṭi may, i ṭwoŋni ne pwadan te taata neeni, hay!” 40Ɔci ɛkkɛn poccin tooccin ɛkɛti te genga moki bɛɛ. 41Ɔci Yaccu tooccin ɛkkɛnti agi, “Ma gɔki agi Kiṭɔ Mena Muonɛ Juaŋ Bora a kaci Daawud ogo? 42Ɛkkɛ pokkɛ jyek Daawud bɛɛ? Daawud waanɛyɛ, oki ɔɔlg gɔki agi, ‘‘Ya tieŋŋan Jwaŋa Tolan gɔkcin Kiṭɔ Ciɛggɔn ‘yati agi, “Dala i coocca ‘ya taaŋuti taaŋŋa byerɔn 43ne maka yookɔn te i bwandaji ‘ya ɔɔn.”’ 44Daawud boṭi Kiṭɔ a Ciɛggɔn ɛkɛ ba Jwaŋa Tolan. Oŋ kan Daawud boṭi Kiṭɔ a Ciɛggɔny, oŋ Kiṭɔ a kaci Daawud moki a ɔki?” 45Ɔci Yaccu gɔkcin maka laldɛ ɛkɛti maka coŋin ñomgɛnti agi, 46“Dala ɛkkɛ woŋgɔ tiittɛ te naŋki maka loṭi worga Jwaŋa Tolan, naa ɛkkɛ noŋdɛ ba ɛkkɛn ɔɔn bɛɛ. Ɛkkɛn ani woon ma ñomgɛnti ɛŋi jibban becin jibban wiɛlɛn pɛñan. Ɔci ɛkkɛn buagɔn dala ma ɛkkɛn naŋtan ba maka ḍwaŋin ma ñomgɛnti dukkanji oŋkanda. Ɔci moki ɛkkɛn buagɔn ciyi kokin pwadinti oorga morki ma Juaŋo, ɔci moki kan juman bala, ɛkkɛn buagɔn ciyi kokin pwadinti oŋkanda ɔɔn. 47Maka neeniyɛ, ɛkkɛn omi wak moonga ciek ɔci oorg ɛkkɛn. Ɛkkɛn a yyɛcin, ɔci ɛkkɛn cɔki cɔŋŋa beyan aŋka ma gɔkti agi ɛkkɛn aninti Juaŋo. Te dienna ɛkkɛn dyetki ma ñingɛn neeniyɛ, Jwaŋa Tolan jiek oldɛ ɛkkɛn wyetkɛnti ne tolan!”

will be added

X\