Luuk 2

1Ɔci te oŋŋa wannayɛ, ganuun Kɛɛcar Ɔgɔɔctoc ḍuaŋa tolan ne tolan ati mati ban Ḍɔɔm konɛ warda agi dala maka bala byeŋ kuuma Ḍɔɔm yengɛn kiidi ma waakcinda. 2Kirniyucyɛ, ɛkɛ a ḍuaŋa ṭɔɔlɛ ban Cuurya te ywonna neeni, gena ywonna ma jɔɔcki te kiin ma neeni. 3Ɔci ma waakɛnda jɔllin te bonk ɛkkɛn jitin, ɔci ɛkkɛn ati bonka ɛkkɛn jietkiti may. 4Ɔci Yuocip daŋkun jɔŋŋin te ban ɛkkɛn ban Najarɛt ban Jaliilji, ɔci ɛkɛ ati ban Yahuudiyaji. Ɛkɛ ati ban Daawud bana bartan ma agi ban Bɛtlaham. Ɛkɛ ati aŋan acaan ɛkɛ a men ma Daawud. 5Ɛkkɛn ati iki ñan ɛkɛ Moryam aŋka yengɛn kiittan worga akuumaji aŋan. Te wɔɔka wannatiyɛ, Moryam laayi, ɔci pana ɛkɛ jieddiyɛ, cɔɔllin doki. 6Ɔci ne ɛkkɛn balki aŋan menyɛ, pana jieddi Moryam bɛɛn doki. 7Ɔci ɛkɛ jieni kacca a kɛɛgɔn kacca ‘uano. Ɔci Moryam kaci paarŋɛyɔ te bworŋin, ɔci ḍuannɛ ɛkɛ kɔn lwomka amtan doky. Ɛkkɛn niini kañ dok acaan on wɛlg kuumi te mako, ɔci noon bala te ɛkkɛn moki bɛɛ. 8Ɔci bana wannatiyɛ, ḍɛɛnin kulin gɛɛg bala bora baan ŋoyɛti gɔṭi kulin ɛkkɛn te ween jiñɛ. 9Ɔci malɛɛka Juaŋ gɛɛl warɛ lɛɛlnɛ bora ɛkkɛnti, ɔci nona cieki ɛkkɛn neeniyɛ, dyɛŋŋɛ Jwaŋa Tolan bɔɔna bɔɔno. Ɔci ɛkkɛn buañi ne tolan. 10Yeti malɛɛka neeni gɔkcin ɛkkɛnti agi, “Naa ɛkkɛ buayɛ bɛɛ! Gɔṭṭɛ, ɛkkɛ eeŋnin ‘ya jyeka wonkɛn jyeka pwadin. Gena jyeka ma yomgɛn ñɔɔktiy, ɔci jyeka neeni bala te ma waakɛnda. 11Te oŋŋa neeniyɛ, Mena Yuoci ɛkkɛ jiedɛ ma ban Daawud. Gena Kiṭɔ Mena a Ciɛggɔny. 12Ɔci gɔṭṭɛ, ne ɛkkɛ ooddɛyɛ, ɛkɛ mɔktɛ ɛkkɛ niin warɛ a paargɔn te bworŋin, ɔci ɛkɛ bala niin kɔɔnji nona ḍɔcki ma lwomka amtan doky. Ɔci a ɔɔnyɛ, ŋeeddɛ ɛkkɛ gena ɛkɛ waanɛ neeni.” 13Ɔci ne pɛñan poli malɛɛkan polla tolan waakɛn lɛɛllɛ bora nona malɛɛka neeniti, ɔci ɛkkɛn bala jieyi Jwaŋa Tolan agi, 14“Dala ma jieddi Jwaŋa Tolan mena bala ñaalɔ neeniy! Ɔci dala coodi pwani bala maka Juaŋ yomɛ pɔŋnɛ ɛkkɛnti iñɔ ṭɛɛrji wɛnni neeni.” 15Ɔci ne malɛɛkan dɔɔkki ñaalɔ pɔlijiyɛ, maka ḍɛɛnin neeniyɛ, ɛkkɛn bala gɔwwɔ yɔtin pookɛn agi, “Hay! Dala ikin oottin ban Bɛtlaham gɔrtin mena guaŋŋɛ Juaŋ ikinti agi bɛɛnɔ doki neeni.” 16Ɔci ɛkkɛn jɔŋŋin ɔci ati ne pɛñan, ɔci ɛkkɛn Moryam mɔkci i Yuocip, ɔci kaci bala niin kɔn lwomka amtan doky. 17Ɔci ne ḍɛɛnin kulin naŋka neeni yuarkiti dokiyɛ, ɛkkɛn ati ma nɔɔtki te jyeka guaŋŋɛ Juaŋ ɛkkɛnti te kaci neeni. 18Ɔci ma waakɛnda ne ɛkkɛn tieŋki jyeka neeniyɛ, ɛkkɛn poni te jyeka ɛkkɛn myetkiti ḍɛɛnin kulin neeni. 19Yeti Moryamyɛ, ɛkɛ jyeka neeni ḍuannɛ yomɛti waakɛnda, ɔci ɛkɛ bala poŋi te jyeka neeni oŋkanda. 20Ɔci ḍɛɛnin kulin dɔɔki non ɛkkɛn. Ɔci ɛkkɛn bala ‘uali jieyi Jwaŋa Tolan te waka yuarɛ ɛkkɛn te woŋgɛn, ɔci te jyeka tieŋji ɛkkɛn te jyetkɛn waakɛnda, acaan naŋki waakɛnda yuarɛ ɛkkɛn ba bolja ɛkkɛn myennɛ malɛɛkay. 21Ɔci ne nink kaci akki ne dɔɔyɔ wyetkɛn ne ḍoogɔyɛ, kaci luoddɛ ma bora doki. Ɔci kaci agɛ ma a Yaccu ba yenta guaŋŋɛ malɛɛka ne Yaccu baali mɛɛgɛn konɛti men bɛɛy. 22Ne wɔɔka yɔŋki ɛkkɛn waakɛn ba jyek ganuun Muuca bɛɛniyɛ, Yuocip i Moryam kaci eyɛ ban Urcaliim aŋka ɛkɛ ‘wontan Juaŋo. 23Jyek ganuun Juaŋ jyeka kiigin gɔki agi, “Kɛɛgin jiettan ma ñamu a kɛɛginyɛ, dala ɛkkɛn ‘wontan ma Juaŋo.” 24Ɔci agi dala ɛkkɛn ɛrdi genga ba jyek ganuun Juaŋ jiña gɔki agi, “Dala ɛkkɛn etti boobg keyi ne yyɛɛwɔ walla boobg Buñk ne yyɛɛwɔ.” 25Ɔci te oŋŋa wannayɛ, mena ‘uan gɛɛl bala ciyi ban Urcaliim. Ɛkɛ yenti Cimaan. Ɛkɛ a mena pwadan. Ɛkɛ ani Jwaŋa Tolan. Ɔci ɛkɛ bala kɛɛy Mena Bɛya Yuoci Ma Icrayiily. Ɔci Boŋ Juaŋ bala ɛkɛti. 26Ɔci Cimaan nɔɔnnɛ Boŋ Jwaŋa Tolan te baaṭi agi ɛkta tuudɔ bɛɛ, ɛkta ciedɔ ne ɛkta Kiṭɔ Mena Muonɛ Juaŋ Bora neeni yuarda ɛkta ñamu parun ɔɔn. 27Ɔci te naŋki Boŋ Juaŋ ɛkɛ yomɛtiyɛ, ɛkɛ kaaccin orɔ on Juaŋ ona tolan. Ɔci ne Yaccu eekiti mɛɛgɛn ɔci weegɛn orɔ on Juaŋ ona tolan ba naŋki ganuunyɛ, 28kaci luullɛ Cimaan ɔci ɛkɛ bala ñɛŋi ɛkɛ. Ɔci ɛkɛ bala jieyi Jwaŋa Tolan agi, 29“Hay! I Ciɛggɔn, dala ‘ya pɔkta tuud ba jyeka guaŋŋi i ‘yatiy. 30Acaan Mena cuonni i Yuoci Ma neeniyɛ, ɛkɛ yuarŋ ‘ya te waŋ ‘ya paru doki. 31Gena mena cuonni i mati waakɛnda wɛɛn warday. 32Ɛkɛ a mena dɛki mena naŋki i lɛɛldɛ bora Keedin Pookɛntiy. Ɔci ma i ma Icrayiilyɛ, ɛkkɛn jiɛtan ma te naŋki ɛkɛ ɛkkɛnti.” 33Yuocip ɔci mɛy Yaccunyɛ, ɛkkɛn poni te jyeka guaŋŋɛ Cimaan neeni. 34Ɔci Cimaan gɔkcin jyeka pwadin ɛkkɛnti. Ɔci ɛkɛ gɔkcin Moryamti agi, “Gɔṭṭi! Kacca neeniyɛ, ɛkɛ aga mena ñyecki ma naŋki Juaŋo, yeti ma gɛɛg yooktan te ɛkɛ. Ɔci iyɛ, taab bɛya iti ñyɛrcin bɛɛ, i konu ñakti ne tolan. Ma Icrayiil maka coŋin gɛɛgyɛ, ɛkkɛn yɔɔda ne tɛyan te ɛkɛ. Ɔci maka coŋin gɛɛgyɛ, ɛkkɛn ḍɛɛmdi iñɔ te ɛkɛ moki. Ɔci te naŋki Kaci i neeniyɛ, paŋŋa paŋtan maka coŋin neeniyɛ, bɛya bora.” 36Ɔci ɛɛŋ gɛɛl daŋkun bala yenti Aanna. Ɛkɛ a bɔwa Jwaŋa Tolan. Ɛkɛ a kaci Panwil. Kɛɛn ɛkkɛn a kɛɛn Acar. Ɛŋa neeni aŋi ṭien doki. Yuonga ɛkɛ cieki iki ‘uarɛ a dɔɔyɔ wyetkɛn ne yyɛɛwɔ budan. 37Ɔci ‘war ɛkɛ tuuni, ɔci ɛkɛ bala ciyi parɛ oŋkanda ne yuong ɛkɛ akki ma baan ne ŋaanɔ ɔci ne ŋaanɔ ɔɔn (84). Ɔci ɛkɛ on Juaŋ ona tolan dalnɛ bɛɛ. Ɛkɛ bala moṭi Juaŋti oŋkanda te oŋ jiñɛ ɔci te ween jiñɛ moki ɔɔn. Ɛkɛ bala gwoṭi koñ aŋka cɔki Juaŋti. 38Ɔci ɛkɛ orcinti nona mati te oŋŋa wanna. Ɔci ɛkɛ bala gɔki a pwatcin Jwaŋa Tolanti te Yaccu. Ɔci ɛkɛ bala mieti ma te jyek Yaccu agi Kiṭɔ mena kɛɛdi ma waandan bɛɛnɔ doki neeni. Maka myennɛ ɛkɛ jiek neeniyɛ, gena maka kɛɛy mena bɛya yuoci maka ban Urcaliimy. 39Ɔci ne Yuocip ɔci Moryam ɛkkɛn kanŋa ḍaakkiti ba naŋki jyek ganuun Jwaŋa Tolanyɛ, ɛkkɛn ati dɔɔki ban ɛkkɛn ban Najarɛt ban Jaliilji. 40Ɔci kaci tolli, ɔci ɛkɛ warɛ tɛɛn ɔci ɛkɛ ñingɛ tɛɛn moki. Ɔci Juaŋ yomɛ pwanna a pwani ɛkɛti oŋkanda ɔɔn. 41Yuonginda te oŋ Iid Malɛɛka Lien Bɛɛn Goṭi A Gorŋyɛ, Moryam mɛy Yaccun ɔci ‘war ɛkɛ Yuocipyɛ, ɛkkɛn ooddi ban Urcaliimji iidti. 42Ɔci ne yuong Yaccu akki inyaakkɛn wyetkɛn ne yyɛɛwɔyɛ, ɛkɛ bala ooddi iki ɛkkɛn ban Urcaliimji ba naŋki iid yuonginda. 43Ɔci ne nink iid bɛɛki borayɛ, ɛkkɛn jɔŋŋin te aŋan ɔci bala ooddi baanji. Ɔci Yaccu yeddin te aŋan, yeti ɛkɛ ŋeejɛ Yuocip ɔci Moryam ne ɛkɛy yenni ŋoyɔ bɛɛ. 44Ɛkkɛn poŋi gɔki agi Yaccu baalɔ bɛɛdɔ iki maka coŋgɔ maka atki iki ɛkkɛny. Ɔci ɛkkɛn ati ati ati ne oŋ unni ɔɔn, hayya ɛkkɛn oŋ liercin Yaccu ma on tukɛ ɛkkɛnti i mung ɛkkɛnti oŋo. 45Yeti ne Yaccu yuarkiti ɛkkɛn men bɛɛyɛ, ɛkkɛn dɔɔki ban Urcaliimji moki. Ɔci ɛkkɛn bala lieṭi ɛkɛ aŋan. 46Ɔci ne nink ne ḍoogɔ bɛɛki borayɛ, Yaccu yuarɛ ɛkkɛn orɔ on Juaŋ ona tolan. Ɛkɛ bala ciyi iki maka ḍwaŋin maka loṭi may. Ɛkɛ bala tyeŋi jyek ɛkkɛn, ɔci ɛkɛ bala tooci ɛkkɛnti te jiek gɛɛg daŋkun. 47Ɔci maka tieŋŋin jyek ɛkɛyɛ, ɛkkɛn poni waakɛnda te ñing tɛɛn ɛkɛ ɔci te ṭwoggin ɛkɛ. 48Ɔci ne ɛkɛ yuarkiti Yuocip i Moryamyɛ, ɛkkɛn yomgɛn buaññi. Ɔci mɛy ɛkkɛn tooccin ɛkɛti agi, “Kaci ‘ya, i noŋŋi a ɔɔn ɔɔnti ogo? Gɔṭṭi, ɔɔn balgɔn lieṭɔn i a lilto. Ɔɔn gɔkɔn ka i dita baaw yieni doki.” 49Ɔci Yaccu ṭwokcin ɛkkɛnti agi, “Ɛkkɛ balgɛ lieṭɛ ‘ya ne pɛñan ɔɔn ogo? Çeejɛ ɛkkɛ ‘ya bɛɛn aŋka dala noŋja kanŋa on Wey ɔɔn bɛɛ?” 50Yeti ɛkkɛn jwalla guaŋŋɛ ɛkɛ ɛkkɛnti neeni jiñɛ yuarcɛji bɛɛ. 51Ɔci ɛkɛ kooyin wu te on Juaŋ ona tolan ɔci ati iki ɛkkɛn ban Najarɛt, ɔci ɛkɛ bala noŋi ba jyek ɛkkɛn oŋkanda. Ɔci mɛy ɛkkɛnyɛ, jyeka neeni olnɛ ɛkɛ yomɛti waakɛnda. 52Ɔci Yaccu ñingɛ tɛya gɔ moki ñingɛ tɛyin ɔɔn, ɔci ɛkɛ tola gɔ moki toli ɔɔn. Ɔci naŋki ɛkɛ pwad pwad Juaŋ ñamɛti, ɔci ma baan ñomgɛnti moki.

will be added

X\