Luuk 19

1Ɔci Yaccu dɛñjin ban Jɛrikɔ. Ɔci ɛkɛ bala ati goṭi baan konɛti. 2Ɔci men gɛɛl bala a ‘uan yenti Jakka. Ɛkɛ a ḍuaŋa maka lyemi tulbay. Ɔci ɛkɛ cyɛg cyɛg te maal ne tolan. 3Ɔci ɛkɛ buagɔn gɔrti Yaccu ne Yaccu baali a ɔkiy. Yeti ɛkɛ yaakinti Yaccu yuarti bɛɛ, acaan ɛkɛ ḍuul ḍul ɔci ma coŋɔ. 4Ɔci acaan a ɔɔnyɛ, ɛkɛ yiŋi ñamu, ɔci kaaccin ñaalɔ jaanti, acaan ɛkɛ buagɔn gɔrti Yaccu te ñaalɔ a ɔɔn, acaan Yaccu bala bɛya ati ooddi te pɔya neeni. 5Ɔci ne Yaccu bɛɛni nona neenitiyɛ, ɛkɛ gɔrcin ñaalɔ ɔci borcin Jakkati agi, “Jakka, kooya iñɔ ne pɛñ. ‘Ya buaga ootta ban ɛkkɛ te oŋŋo.” 6Ɔci ɛkɛ kooyin iñɔ ne pɛñan, ɔci Yaccu eññɛ on ɛkɛ, ɔci ɛkɛ yomɛ ñɔɔna ñɔɔno. 7Ɔci ne maka coŋin neeni gɔrki naŋka neeniyɛ, ɛkkɛn waakɛnda bala wooki Yaccu. Ɛkkɛn gɔki agi, “Yeti Yaccu ooddi on mena nɔɔdɔn neeniti aŋka aga wɛli ɛkɛ ogo?” 8Ɔci ne ɛkkɛn balki on ɛkɛyɛ, Jakka jɔllin ñaalɔ ɔci gɔkcin Ciɛggɔnti agi, “Ciɛggɔn, gɔṭṭi, taaŋi wak ‘yayɛ, gɛɛg wɛtka maka bɔwan. Ɔci kan gen menga eñi ‘ya budan amaamyɛ, ‘ya ɛkɛ ‘woñga ‘uotkati ne ŋaanɔ.” 9Ɔci Yaccu gɔkcin ɛkɛti agi, “A’a, a ɔɔn moki bɛɛ, acaan te oŋŋa neeniyɛ, yɔɔt Jwaŋa Tolan bɛɛn ma ona neeniti acca doki. Mena neeniyɛ, ɛkɛ a kaci Abrahim, mena a men Juaŋ neeni daŋkun. 10’Ya Kaci Ma Baan bɛɛn aŋka lier ɔci yuoc maka yieny.” 11Ɔci ne ma balki tyeŋki jyek Yaccu neeni menyɛ, ɛkkɛn myennɛ ɛkɛ te jwalla a caagɔn neeni. Te wɔɔka wannayɛ, ɛkkɛn cɔɔllinti ban Urcaliimti doki, ɔci ma bala poŋi gɔki agi Yaccu agdi Ciɛggɔn Tolan ne cwakanti, ɔci agi ɛkkɛn cyɛgji Jwaŋa Tolan yuardinti ɛkkɛn ne cwakanti. 12Jwalla a caagɔn guaŋŋɛ Yaccu neeni, ɛkɛ gɔki agi, “Mena ḍuaŋa gɛɛl jɔllin ati bana loonan aŋka ɛkɛ naŋtan ma a mena ḍuaŋa tolan, ɔci ne baaṭi ɛkɛ dɔɔkti baanji moki. 13Ɔci ne ɛkɛ jɔŋni men bɛɛyɛ, ɛkɛ borcin maka kanŋan ɛkɛti, maka a inyaakkɛn neeniti, ɔci ɛkɛ ɛkkɛn ‘wonnɛ bilk gɛɛg byeŋkɛnti aŋka cɔttanyɔ. Ɛkɛ menga da ‘wonnɛ ḍeyyan naŋɛ ma te dahab, ɔci menga da ḍeyyan naŋɛ ma te dahab. Ɔci ɛkɛ gɔkcin ɛkkɛnti agi, ‘Dala ɛkkɛ bilka neeni wyɛldɛ cɔddɛyɔ te waak ne ‘ya bɛɛda ɔɔn.’ 14Yeti maka ciyi ban ‘wana neenitiyɛ, ɛkkɛn yookɔn te ɛkɛ, ɔci ne ɛkɛ jɔŋni atti dokiyɛ, ɛkkɛn men gɛɛl cuuñɛ bana ooddi ɛkɛ neeniti. Ɔci mena cuuñɛ ɛkkɛn neeniyɛ, gɔkcin mati agi, ‘Maka ciyi iki ‘wana neeni baanjiyɛ, ɛkkɛn buagɔn naa ‘wana neeni aga ḍuaŋa tolan ɛkkɛn bɛɛ.’ 15“Yeti ‘wana neeni naŋɛ ma aŋi ḍuaŋa tolan ɔɔn. Ɔci ne ɛkɛ dɔɔŋni baanjiyɛ, ɛkɛ borcin maka kanŋan ɛkɛti, maka ‘wonnɛ ɛkɛ bilk neeniti. Ɔci ɛkɛ tooccin ɛkkɛnti te waka cɔdɛ ɛkkɛn te bilka neeniy. 16Ɔci mena ñamu bɛɛn nona ɛkɛti ɔci gɔkcin ɛkɛti agi, ‘Ḍuaŋa, gɔṭṭi, ḍeyyan i neeniyɛ, ɛkkɛn cɔniyɔ ‘ya ɔci eccin ḍeyyan makɛn ne inyaakkɛn.’ 17Ɔci ḍuaŋa tolan gɔkcin mena neeniti agi, ‘I noŋŋi ne pwadan hay, i a mena pwadan. Gɔṭṭi, acaan i kanŋa ḍiɛran neeni naŋŋi ne pwadanyɛ, i da naŋdin ‘ya agdi ḍuaŋa ṭɔɔlɛ bonka ḍwaŋin ne inyaakkɛn neeni.’ 18Ɔci mena akki yyɛɛwɔ bɛɛn ɔci gɔkcin agi, ‘Ḍuaŋa, gɔṭṭi, ḍeyyan i cɔniyɔ ‘ya ɔci eccin ḍeyyan makɛn ne dɔɔyɔ.’ 19Ɔci ɛkɛ gɔkcin ɛkɛti agi, ‘I noŋŋi ne pwadan hay, gɔṭṭi! I naŋdin ‘ya agdi ḍuaŋa ṭɔɔlɛ bonka ḍwaŋin ne dɔɔyɔ daŋkun.’ 20“Ɔci mena parɛ gɛɛl daŋkun bɛɛni, ɔci ɛkɛ gɔki agi, ‘Ḍuaŋa, gɔṭṭi, ḍeyyan i nɛ. Ɛkɛ koniyɔ ‘ya te bworŋ ṭɔɔlɛ, ɔci ḍuaccan ‘ya bala niin a nink ɔɔn. 21’Ya noŋi a ɔɔn acaan ‘ya buay i, i a mena jiekɛ tɛyan. Acaan oŋkandayɛ, waka cɔdayɔ i bɛɛyɛ, lula i te mati, ɔci waka bɛya te yielji waka dɔŋŋi i bɛɛyɛ, aga wak i.’ 22Ɔci ḍuaŋa tolan neeni gɔkcin ɛkɛti agi, ‘I a mena yaayan hay! Ba jyeka gɔwwɔ i bora te tuk iti neeniyɛ, dɔwwan ‘ya i wyeñuti doki, acaan ‘ya looñ te naŋki i neeni. Çeej i ne ‘ya aga mena jiekɛ tɛyan. Ɔci ŋeej i waka cɔdiyɔ ‘ya bɛɛyɛ, ‘ya ɛkkɛn luldi aga wak ‘ya, ɔci waka bɛya te yielji waka dɔŋi ‘ya bɛɛyɛ, aga wak ‘ya moki. 23Oŋ ba i bilk ‘ya eññi ‘wonni mena parɛ aŋka ɛkɛ bilk ‘ya cɔnna waakɛn aŋka ɛkkɛn mɔkcan ‘ya aŋan iki bilk wyetka jiettanti ma bɛ?’ 24“Ɔci ɛkɛ gɔkcin maka bala yɔɔd ɛkɛ toŋkɛti agi, ‘Ḍeyyan luldɛ te ɛkɛti, ɔci ‘wondɛ mena balki ḍeyyan ne inyaakkɛny.’ 25“Yeti maka neeniyɛ, ɛkkɛn gɔkcin bilk weegɛnti agi, ‘Ḍuaŋa, ɛkɛ balkin ḍeyyan ne inyaakkɛn doki!’ 26“Ḍuaŋa Tolan gɔkcin agi, ‘Ɛɛ, ‘ya ɛkkɛ myettin te jwali ṭɔɔlɛ gɛɛl. Naŋka neeni pwatcin maka woŋgɛn a tiicinti ne ɛkkɛn ‘wontɛti ma waka coŋin a ɔɔn bɛɛ? Gɔṭṭɛ, maka balki waak dokiyɛ, ɛkkɛn ‘uottanti ma waak ɔɔn. Yeti maka balki waak oŋ woŋgɛn a tiicin bɛɛyɛ, waka bala ɛkkɛnti ne ḍiɛkan wannayɛ, lultan ma te ɛkkɛnti. 27Ɔci acca maka yookɔn te ‘ya agi naa ‘ya agji ḍuaŋa tolan ɛkkɛnti bɛɛyɛ, dala ɛkkɛn oodɛ ɛkkɛ ‘yati wɛnni, ɔci ɛkkɛn nogdɛ ɛkkɛ ‘ya ñamuti wɛnni!’ ” 28Ɔci ne Yaccu ḍookki te jyeka neeniyɛ, ɛkɛ ati ñamu bala ooddi ban Urcaliim. 29Ban Bɛtpɛɛj ɔci ban Bɛtani, ɛkkɛn bala Pom Jɛtuun taaŋɛti. Ɔci ne Yaccu noŋi cɔɔlditi bonka neenitiyɛ, ɛkɛ buagɔn maka laldɛ ɛkɛ gɛɛg cundɛ ñamu ne yyɛɛwɔ. 30Ɔci ɛkɛ gɔkcin ɛkkɛnti agi, “Ne ɛkkɛ dɛndɛ bana yɔɔd ɛkkɛ ñomgɔti neeniyɛ, ɛkkɛ tɔɔrɔn ṭɔɔlɛ gɛɛl mɔktɛ yɔɔd a wiɛngɔn. Men gɛɛl taami te ɛkɛ men bɛɛ. Dala ɛkɛ gwottɛ, ɔci dala ɛkɛ oodɛ wɛnni. 31Ɔci kan men gɛɛl tootti ɛkkɛti agi, ‘Ɛkkɛ ɛkta gujji eejji wɛnɛyɛ?’ Dala ɛkkɛ gɔkti ɛkɛti agi, ‘Ciɛggɔn buagɔn ɛkɛ.’ ” 32Ɔci maka cuuññi ɛkɛ neeniyɛ, ɛkkɛn atti. Ɔci ba jwalla guaŋŋɛ Yaccu neeniyɛ, ɛkkɛn tɔɔrɔn ṭɔɔlɛ mɔkci ba jyeka guaŋŋɛ ɛkɛ ɛkkɛnti neeni. 33Ɔci ne ɛkkɛn balki gwotki tɔɔrɔn ṭɔɔlɛyɛ, tɔɔrɔn weyyɛn tooccin ɛkkɛnti agi, “Hay, ɛkkɛ tɔɔrɔn ṭɔɔlɛ guddɛ eedɛ wɛnɛ?” 34Ɔci ɛkkɛn gɔkcin ɛkkɛnti agi, “Ciɛggɔn buagɔn ɛkɛ.” 35Ɔci ɛkkɛn tɔɔrɔn eyɛ Yaccuti, ɔci ɛkkɛn bworŋin ɛkkɛn ḍuacci tɔɔrɔn ŋoyɛti, ɔci ɛkkɛn oŋ Yaccu taapci ñaalɔ tɔɔrɔnti oŋo. 36Ɔci ne ɛkɛ luoṭṭiyɛ, ɛkkɛn bworŋin ɛkkɛn gɛɛg cyɛtci pɔy konɛti aŋka ɛkkɛn noŋdi ɛkɛti ba mena tolan. 37Ɔci ne ɛkɛ bɛɛni ne cualanti ban Urcaliimti nona pɔya ooddi iñɔ Pom Jɛtuuntiyɛ, poli ma polla tolan bootcin ɛkɛti ɔci ɛkkɛn yomgɛn ñɔɔna ñɔɔno. Ɔci ɛkkɛn bala jieyi Juaŋ te pwana tolan te kanŋan naŋŋɛ ɛkɛ waakɛnda yuarɛ ɛkkɛny. 38Ɔci ɛkkɛn gɔki agi, “Dala ma jieyi i, Ciɛggɔn Tolan! I a Kiṭɔ Kaci Daawud, mena bɛɛn te yenti Jwaŋa Tolan. Dala coodi pwani bala ñaalɔ pɔliji, ɔci dala pwani bala Juaŋti mena bala ñaalɔ neeni!” 39Ɔci ma Pɛriciin gɛɛg bala nona poli ma polla tolanti neeni. Ɔci ɛkkɛn gɔkcin ɛkɛti agi, “Mena loṭi may, gɔrca ma iti, poca, yook ɛkkɛn wanna yaayɛ Juaŋti ne tolan. Dala i gɔkca maka lala i ṭeyayɔ.” 40Ɔci Yaccu ṭwokcin ɛkkɛnti agi, “‘Ya ɛkkɛ myettin, kan maka neeni ciya liedayɛ, gwoyya neeni aŋka yaaddi te yom ñɔɔn ɔci jieddi ‘ya, ɔci gɔkti agi ‘ya agjɔ ḍuaŋa tolan ba maka guagdɛ ɛkkɛ wanna ɔɔn.” 41Ne ɛkɛ bɛɛni ne cɔɔlnitiyɛ, ɛkɛ bala gɔṭi ban Urcaliim neeni, ɔci ɛkɛ wiakcin te bana neeni. 42Ɔci ɛkɛ gɔkcin bana neeniti te ɔɔli agi, “Dala te i jyek coodda pwadan neeni te ŋeej i. Acaan accayɛ, i coodda pwadan neeni yuara moki bɛɛ. 43Acaan ne oŋ gɛɛltiyɛ, maka yookɔn te i bɛya, ɔci ɛkkɛn cɔtti cɔdan tɛyan i waruti, ɔci ɛkkɛn i yuttiwi. Ɔci pɔya koodi i bora gɔ bala moki bɛɛ. 44Hay, i ban Urcaliim! I looti ma bora! Ɔci i ḍakti iki kɛɛgin i a cyɛɛlɔ. Guonan gɛɛl daltan ma nina ɛka parɛ warɛti moki bɛɛ. Acaan oŋŋa ‘ya bɛɛna iti acca neeniyɛ, ɛkɛ ŋeej i bɛɛ.” 45Ɔci ɛkɛ kaaccin kaañji kañ on Juaŋ ona tolan, ɔci ɛkɛ maka wɛɛṭi dok ɔci ḍɛɛk ɔci kulin ɔci boobg orɔ neeniyɛ, ŋualnɛ bora. 46Ɔci ɛkɛ gɔkcin ɛkkɛnti agi, “Jyeka kiigin gɔki agi, ‘On ‘yayɛ, a ona cɔkki may.’ ‘Yeti ɛkɛ naŋŋɛ ɛkkɛ a ona cieki maka ɛyyo!’” 47Yaccu bala loṭi ma on Juaŋ ona tolan oŋkanda. Ɔci gaciicin ḍwaŋin ma Icrayiil ɔci maka loṭi worga Juaŋ ɔci maka ḍwaŋinyɛ, ɛkkɛn bala lieṭi pɔya ɛkkɛn Yaccu noktitiy. 48Yeti gena ɛkkɛn buagi aŋka naŋtan ɛkɛti gɔ yuarɛ bɛɛ, ɛkkɛn buayi mako, acaan ma waakɛnda bala tyeŋi jyek ɛkɛ ne tolan.

will be added

X\