Luuk 18

1Ɔci Yaccu bala loṭi maka laldɛ ɛkɛ te jwalla a caagɔn gɛɛl agi, “Dala ɛkkɛ cɔktɛ oŋkanda, naa ɛkkɛ yomgɔ toga bɛɛ.” 2Ɔci ɛkɛ gɔkcin ɛkkɛnti agi, “Oŋ gɛɛlti mena ‘uan gɛɛl bala baan gɛɛlti. Ɛkɛ a ḍuaŋa godan. Ɛkɛ buayi Jwaŋa Tolan ɔci men baan gɛɛl bɛɛ. Ɛkɛ tieŋdi jyek menga bɛɛ. 3Ɔci ɛŋa cieñ gɛɛl bala bana tolanti neeni, ɔci ɛkɛ ooddi nona ḍuaŋa godanti gɔ ɛkɛ moki ati ɔɔn. Ɔci ɛŋa neeni gɔkti ɛkɛti agi, ‘Dala ‘ya magda te mena yookɔn te ‘ya neeni.’ 4Ɔci te ñamuyɛ, ɛkɛ ɛŋa neeni maŋŋɛ bɛɛ. Yeti ne baaṭi ɛkɛ bala gɔki yomɛti parɛ agi, ‘‘Ya buay Juaŋ bɛɛ, ɔci ‘ya buay ma baan bɛɛ. 5Yeti ɛŋa cieñ neeniyɛ, ɛkɛ bala poṭi ‘ya waru, ‘ya ɛkɛ magdo, hay! Kan ‘ya ɛkɛ dalja a ɔɔnyɛ, ɔci ɛkɛ bɛya a ñaccu ɔci ɛkɛ ‘ya kwandaji nɔñji.’ ” 6Ɔci Yaccu gɔkcin mati agi, “Dala ɛkkɛ poŋdɛ jyek ḍuaŋa godan ḍuaŋa yaayan neeni. 7Ɔci Jwaŋa Tolanyɛ, ɛkɛ aŋka yomɛ pwad pwad ma ɛkɛti. Oŋ ɛkɛ ma ɛkɛ maka wiak ɛkɛti te oŋ konɛ ɔci te weenji neeni magdɛ ɛkɛ awarɛ bɛɛ? 8Tieŋdɛ! Juaŋ kwaci te maŋi ma bɛɛ. Yeti ne ‘ya Kaci Ma Baan bɛɛdayɛ, ya ma mɔkca jyeti ‘yati ne pwadan boki?” 9Ɔci ma gɛɛg bala poŋi gɔki agi ɛkkɛn pwadginti te naŋki ɛkkɛn pookɛn. Maka neeni yookɔn te maka pookɛn waakɛnda. Ɔci Yaccu gɔkcin ɛkkɛnti te jwalla a caagɔn agi, 10“Gɔṭṭɛ, oŋ gɛɛlti maka ‘uay gɛɛg ati on Juaŋ ona tolan ne yyɛɛwɔ. Men gɛɛl ne cyɛɛlɔ ɛkɛ a men ma Pɛriciin. Ɔci mena parɛ neeniyɛ, ɛkɛ a mena lyemi tulbay. 11“Ɔci men ma Pɛriciin neeniyɛ, ɛkɛ bala yɔɔd ñaalɔ cɔki Juaŋti te yom ɛkɛ. Ɛkɛ gɔki Juaŋti agi, ‘Jwaŋa Tolan, ‘ya gɔkka iti a pwatcin, ‘ya baal ba maka ani eñi wak maka pookɛn neeni bɛɛ. Ɔci ‘ya waru ḍig ḍig bɛɛ. Ɔci ‘ya a tomma bɛɛ. Walla ‘ya baal ba mena lyemi tulba yɔɔd wɛnni neeni bɛɛ. 12Yeti ‘Ya gwor koñ oŋki ne yyɛɛwɔ te Juaŋ jiñɛ ne cyɛɛlɔ. Ɔci ‘ya ‘woñ i te gena ne cyɛɛlɔ te waka ne inyaakkɛnti oŋkanda.’ 13“Yeti mena lyemi tulba neeniyɛ, ɛkɛ bala yɔɔd te ɔntɔ nona loonan. Ɛkɛ wyeñɛ luoŋnɛ iñɔ. Ɛkɛ ñoṭi ñaalɔ pɔliji bɛɛ. Ɛkɛ bala poomi korkɛ, ɔci gɔki agi, ‘Hay! I Jwaŋa Tolan, dala i yomu pɔkka ‘yati, ‘ya a nɔɔdɔn, hay!’ ” 14Ɔci Yaccu gɔkcin ‘wota agi, “‘Ya ɛkkɛ myettin, mena lyemi tulba neeni bɔɔŋnɛ Juaŋ te nɔji ɛkɛ a lyɛlta, ɔci ɛkɛ ati baanji te yoma pwadan. Yeti ‘wan ma Pɛriciin neeni bɔɔŋnɛ Juaŋ bɛɛ. Acaan maka waakɛn naŋtan ba maka ḍwaŋin pookɛnyɛ, ɛkkɛn naŋdɛ Juaŋ aga ba maka ḍyɛrin. Ɔci maka noŋi ba ɛkkɛn akki maka ḍyɛrinyɛ, ɛkkɛn aŋka naŋdɛ Juaŋ aga maka ḍwaŋin.” 15Ɔci ma bala etti kɛɛgin ɛkkɛn kɛɛgin ḍyɛrin nona Yaccuti. Ɛkkɛn buagɔn dala Yaccu kɛɛgin ɛkkɛn ordiyɔ ɔci gɔkti ɛkkɛnti agi, “Dala ɛkkɛ coodɛ ne pwadan.” Yeti maka laldɛ Yaccu ɛkkɛn kɛkcin maka neeniti. 16Ɔci ne Yaccu gɔrni ɛkkɛn kɛkki a ɔɔnyɛ, ɛkɛ looñi ɔci gɔkcin maka laldɛ ɛkɛti agi, “Dala kɛɛgin bɛya ‘yati! Naa ɛkkɛ ɛkkɛn dɛɛdɛ a ɔɔn bɛɛ, acaan jyek cyɛgji Juaŋyɛ a jyek maka bala ba ɛkkɛn ɔɔn. 17’Ya gɔkka ɛkkɛti ne pwadan acca! Kan men gɛɛl jyek cyɛgji Jwaŋa Tolan mugdɛ ɛkɛ te yoma pwadan ba kacca ḍiɛran bɛɛyɛ, ɛkɛ yaakinti dɛndi non cyɛgji Juaŋti bɛɛ.” 18Ɔci ḍuaŋa ma Icrayiil gɛɛl tooccin Yaccuti agi, “Hay, mena loṭi ma mena pwadany, ‘ya noŋja a ɔki aŋka tɛɛtin baadi bɛɛ neeni bɛɛdi ‘yatiy?” 19Ɔci Yaccu gɔkcin ɛkɛti agi, “Hay! I ‘ya barda a mena pwadan ogo? Mena pwadan gɛɛl bala bɛɛ, gena Jwaŋa Tolan parɛ aŋka pwatciny. 20Jyek ganuun ŋeej i doki ne ɛkkɛn gɔkki agi, ‘Naa i noŋja tomi bɛɛ, naa i menga noga bɛɛ, naa i kor waak bɛɛ, naa i men gɛɛl jomgayɔ bɛɛ, ɔci dala i noŋja ne pwadan weegɔti ɔci mɛɛgɔti.’” 21Ɔci ḍuaŋa neeni ṭwokcin gɔkcin agi, “Ɛɛ, ‘ya baal tiec jyeka neeni waakɛn ne ‘ya wona ḍiɛra ne acca men ɔɔn.” 22Ne Yaccu tieŋni jwalla neeni a ɔɔnyɛ, ɛkɛ gɔkcin ɛkɛti agi, “Gen gɛɛl bala ne cyɛɛlɔ men. Dala i bootta ‘yati. Ne i bootti ‘yatiyɛ, dala i mal i wiɛlja ñin, ɔci bilk ‘woñga maka bɔwan.” 23Yeti ne ‘wana neeni tieŋni a ɔɔnyɛ, ɔci ɛkɛ yomɛ wiak poŋi jiek acaan ɛkɛ balki waak ne coŋɔn. 24Yaccu bala gɔṭi ɛkɛ ne ɛkɛ yomɛ yaaññiy, ɔci gɔkcin ɛkɛti agi, “Maka cyɛganyɛ, owwin ɛkkɛn waakɛn ootiti iñɔ bɛɛti Jwaŋa Tolan bieŋɛtiyɛ, tɛy tɛyo.” 25Ɔci Yaccu jwali dɔŋŋɛji moki agi, “Wɔtcin kolŋan wɔtti ibra waŋɛtiyɛ, koocin te owwin mena maalɛ tolan warɛ oodɛ iñɔ bɛɛdɛ ban cyɛgji Jwaŋa Tolany.” 26Maka tieŋŋin jyeka neeniyɛ, ɛkkɛn tooccin Yaccuti agi, “Oŋ kan a ɔɔny, a menɛ uday?” 27Ɔci ɛkɛ gɔkcin ɛkkɛnti agi, “Waka ma baan yaakinti te naŋki ɛkkɛn bɛɛyɛ, Jwaŋa Tolan aŋka yaakinti te naŋki ɛkkɛn.” 28Ɔci Butruc gɔkcin ɛkɛti agi, “Gɔṭṭi, ɔɔn wak ɔɔn dalnɔn doki aŋka boottɔn iti.” 29Ɔci Yaccu gɔkcin ɛkkɛnti agi, “Tieŋdɛ, ɛkkɛ myettin ne pwadan. Kan men gɛɛl anna ɛkɛ anɛ ‘ya bala ñamu te anna ɛkɛ anɛ on ɛkɛ, walla ɛŋ ɛkɛ, walla modgɛn, walla mɛɛgɛn ɔci weegɛn, ɔci kɛɛgin ɛkɛyɛ, 30ɛkɛ ‘wondɛ Juaŋ waka neeni moki ne coŋɔn ne ɛkɛ baali iñɔ ṭɛɛrji wɛnni meny, ɔci te coodda cieki ma ne baaṭiyɛ, tɛɛtin baadi ywongati bɛɛyɛ, bala ɛkɛti.” 31Ɔci acca Maka A Inyaakkɛn wyetkɛn Ne yyɛɛwɔ neeniyɛ, eññɛ Yaccu bora. Ɔci ɛkɛ gɔkcin ɛkkɛnti agi, “Tieŋdɛ! Acca ikin oottin ban Urcaliim. Ɔci jiek waakɛnda jyeka kiiwɛ maka a bɔwan Jwaŋa Tolan te ‘ya Kaci Ma Baanyɛ, bɛya bora waakɛnda dɔki. 32’Ya Kaci Ma Baanyɛ, ‘ya ‘wonta ma Icrayiil ackan ma Ḍɔɔm byeŋkɛnti. Ɔci ɛkkɛn ñieddi te ‘ya, ɔci juoldi ‘ya, ɔci ma noŋdi ‘yati ne yaayan. Ɔci ñaang ŋuultan ‘yati. 33Ɔci ɛkkɛn ‘ya ḍuata te woonto, ɔci ‘ya nokta ma. Yeti ne nink ne ḍoogɔ bɛɛti borayɛ, ‘ya oŋ jɔlla ñaalɔ tɛɛt moki. Gena jyek ‘ya neeni.” 34Yeti ɛkkɛn jiek jitkɛn neeni tieŋjɛ ne pwadan bɛɛ. Ɛkkɛn jiek jitkɛn kuoli ñin. Ɔci ɛkkɛn jyeka guagdɛ Yaccu neeni mugɛ bɛɛ. 35Ɔci ne ɛkɛ cɔɔlnɛti ban Jɛrikɔyɛ, mena ‘uan mena ulli gɛɛl bala ciyi pɔy taaŋɛti ñwoyi waako. 36Ɔci ɛkɛ bala tyeŋi ne poli maka coŋin balki atki gorki pɔɔjɔ nona ɛkɛ warɛtiy. Ɔci ɛkɛ tooccin agi, “A makɛ goṭi wan?” 37Ɔci ɛkkɛn ɛkɛ myetki agi, “Gena Yaccu men ma Najarɛt, ɛkɛ ati goṭi i taaŋuti wanna.” 38Ɔci mena ulli yaajjin agi, “I Yaccu Kaci Daawud! I a Kiṭɔ mena pwadany. Dala i yomu pɔkka ‘yati ɔci ‘ya pɔkta ñinguti!” 39Ɔci maka bala ati iki Yaccu neeniyɛ, ɛkkɛn mena neeni dɛɛjiti agi naa ɛkta yaadɔ bɛɛ. Yeti ɛkɛ jyeti jyek maka neeni bɛɛ. Ɛkɛ yaajjin ne tolan moki ɔɔn. Ɛkɛ yaadan gɔki agi, “I Yaccu Kaci Daawud, dala i yomu pɔkka ‘yati, ɔci ‘ya pɔkta ñinguti!” 40Ɔci Yaccu yɔɔni ɔci gɔkcin mati agi, “Dala ɛkɛ oodɛ ‘yati wɛnni.” Ɔci ne ɛkɛ bɛɛni nona Yaccutiyɛ, ɔci Yaccu tooccin ɛkɛti agi, 41“I buagi ‘ya noŋja a ɔki iti?” Ɔci ɛkɛ ṭwokcin Yaccuti agi, “Ciɛggɔn, ‘ya buaga dala i woŋgu ‘ya pɔkka aŋka ‘ya noon yuarca.” 42Ɔci Yaccu gɔkcin ɛkɛti agi, “Dala i ñingu pɔkka. Ɔci dala i waru pwada te jyenna i jyetti ‘yati neeni.” 43Ɔci ne pɛñan ɛkɛ yaakinti gwali noon doki. Ɔci ɛkɛ bootcin Yaccuti te oŋŋa wannati ɔɔn. Ɔci ɛkɛ bala jieyi Juaŋo. Ɔci ma waakɛnda ne ɛkkɛn gɔrki naŋka neeniyɛ, ɛkkɛn bala jieyi Juaŋ daŋkun.

will be added

X\