Luuk 17

1Ɔci Yaccu gɔkcin maka laldɛ ɛkɛti agi, “Jyeka ma ḍɛɛmti iñɔ noŋtɛ nɔji neeniyɛ, ɛkkɛn bɛya awarɛ. Yeti mena etti jyeka neeniyɛ, taab bɛya ɛkɛti te naŋka wannayɛ, pɛñcin ne tolan. 2Bolja pom jien poma tolan ḍyɛktiti ma ɛkɛ ḍwaŋɛti ɔci ɛkɛ oŋ yiɛptiti ma galŋa tolantiyɛ, a ḍiɛran te yoña bɛya ɛkɛti te naŋka naŋdɛ ɛkɛ mena ḍiɛran gɛɛlti aŋka dala mena ḍiɛran neeni noŋdi nɔjiy. 3Dala ɛkkɛ woŋgɔ tiittɛ te yomg ɛkkɛ! “Kan mod ɛkkɛ gɛɛl noŋdi nɔjiyɛ, dala i ɛkɛ ṭeya, ɔci kan ɛkɛ warɛ yaldɛyɛ, dala i ɛkɛ bɔɔka. 4Kan ɛkɛ noŋi ne yaayan iti oŋki ne dɔɔyɔ wyetkɛn ne yyɛɛwɔ te oŋ jiñɛ ne cyɛɛlɔ ɔci kan ɛkɛ dɔɔkti gɔkti iti agi ɛkɛ yomɛ yaayɔ te naŋka pɔɔñjɛ ɛkɛyɛ, dala i ɛkɛ bɔɔka doki.” 5Ɔci Cuudan Yaccu neeniyɛ, gɔkcin Ciɛggɔnti agi, “Ciɛggɔn, dala i ɔɔn ‘uottɔnti jyenna ɔɔn jyettɔn iti neeni.” 6Ɔci Ciɛggɔn ṭwokcin ɛkkɛnti agi, “Kan ɛkkɛ jyettɛ ‘yati ne ḍiɛran bala ba kɔba waŋɛ ḍiɛran neeniyɛ, ɔci kan ne ɛkkɛ gɔktɛ jana waayiti agi dala ɛkɛ dɔtti ñaalɔ ooddi warɛ cɔɔtti galŋjiyɛ, ɔci ɛkɛ tieŋdi jyek ɛkkɛ doki. 7“Oŋ ɛkkɛ, naŋki ɛkkɛ bala a ɔki? Kan ‘uan gɛɛl ɛkkɛti balki mena kanŋan ɛkɛti, ɔci kan mena kanŋan ɛkɛti neeni bala bora ooṭi yiel, walla kan bala cieti kuliny, ɔci kan ne ɛkɛ bɛɛdi baanjiy, weegɛn gɔkti ɛkɛti agi, ‘Dala I kooya orɔ, ɔci coocca iñɔ omja amɔ? A’a, a ɔɔn bɛɛ.’ 8Gena weegɛn aŋka gɔkti ɛkɛti agi, ‘Dala i bworŋ kanŋa ‘yɛɛŋja ɔci ‘ya noŋda am omja. Ne ‘ya ḍoodayɛ, i oŋ omja daŋkun oŋo.’ 9Ɔci ne mena noŋi kanŋa neeni kanŋa ɛkɛ ḍagdiyɛ, weegɛn gɔkti a pwatcin ɛkɛti te kanŋa ɛkɛ wanna bɛɛ, acaan gena kanŋa naŋdɛ ɛkɛ weegɛnti naŋŋɛ ɛkɛ wanna. 10Ɔci ɛkkɛ daŋkun, kan ɛkkɛ noŋdɛ ba jyek wey ɛkkɛ waakɛndayɛ, dala ɛkkɛ gɔktɛ te waak ɛkkɛ pookɔ agi ɛkkɛ agɛ ma kanŋa budan. Ɔci agi ɛkkɛ aŋŋɛ genga bɛɛ. Ɛkkɛ noŋŋɛ gena pwadan gɛɛl te yomg ɛkkɛ budan bɛɛ.” 11Ɔci oŋ gɛɛlti ne Yaccu baali pɔɔjɔ ooddi ban Urcaliimyɛ, ɛkɛ goṭi wɔɔka ban Camɛɛrya ɔci ban Jaliil. 12Ɔci ne ɛkɛ dɛnni baanjiyɛ, ɛkɛ koogjin iki maka naŋɛ cyɛc gɛɛg ne inyaakkɛn. Ɛkkɛn bala yɔɔd lonɔ ne ḍiɛran ṭɔɔlɛ. 13Ɔci ɛkkɛn bala yaadan boorɔ te pwana tolan agi, “I Yaccu, Ciɛggɔn, dala i yomu pɔkka ɔɔnti!” 14Ne ɛkɛ gɔrni ɛkkɛntiyɛ, ɛkɛ gɔkcin ɛkkɛnti agi, “Ɔgdɛ ooddɛ gaciicin ma Icrayiilti acaan ɛkkɛ ywaŋŋin ‘ya doki. Dala ɛkkɛn gɔrti waak ɛkkɛ.” Ɔci ɛkkɛn atti. Ɔci ɛkɛ ɛkkɛn ywaŋŋɛyɔ doki. 15Yeti men gɛɛl ne cyɛɛlɔ ɛkkɛntiyɛ, ne ɛkɛ gɔrni ɛkɛ warɛ pwanni a ɔɔnyɛ, ɔci ɛkɛ bɛɛn dɔɔkkin nona Yaccuti, ɔci ɛkɛ bala jieyi Juaŋ te pwana tolan. 16Ɛkɛ ḍwoñjin iñɔ Yaccu ciegɛti, ɔci ɛkɛ gɔkcin Yaccuti a pwatcin. Mena neeniyɛ, ɛkɛ a men ma Camɛɛrya. 17Ɔci Yaccu tooccin ɛkɛti agi, “Maka ywaŋi ‘ya bala a inyaakkɛn bɛɛ? Oŋ ba maka ne dɔɔyɔ wyetkɛn ne ŋaanɔ neeni bɛ? 18Maka neeni ɛkkɛn menga dɔɔkkin nona ‘yati aŋka gɔkti a pwatcin Juaŋti bɛɛ? Gena buñgɔn aŋka bɛɛn dɔɔkkin parɛ?” 19Ɔci ɛkɛ gɔkcin ɛkɛti agi, “Jɔŋŋa ñaalɔ ɔci ɔgdi ootta. Te jyeni i neeniyɛ, i waru pwani doki.” 20Ɔci ma Pɛriciin gɛɛg tooccin Yaccuti agi, “Cyɛgji Jwaŋa Tolan bɛya ne tua?” Ɔci Yaccu ṭwokcin ɛkkɛnti agi, “Bɛɛna bɛɛdi cyɛgji Juaŋyɛ, yuartan ma te woŋgɛn bɛɛ. 21Ɔci men gɛɛl yaakinti gɔki agi cyɛgji Juaŋ baalɔ wɛnni, walla baalɔ aŋan bɛɛ, acaan cyɛgji Juaŋyɛ, ɛkɛ bala ɛkkɛti wɛnni doki.” 22Ɔci ɛkɛ gɔkcin maka laldi ɛkɛti agi, “Ne oŋ gɛɛltiyɛ, ɛkkɛ gɔktɛ agi dala te ‘ya Kaci Ma Baan baljɔ ɛkkɛnti wɛnni. Yeti ‘ya yuardata ɛkkɛ moki bɛɛ. 23Ɔci ma gɔkti ɛkkɛti agi, ‘Ɛkkɛ gɔrcɛ ɛkta baalɔ wɛnni!’ Walla agi, ‘Ɛkkɛ gɔrcɛ ɛkta baalɔ aŋan!’ Yeti naa ɛkkɛ ooddɛ bɛɛ. Ɔci naa ɛkkɛ bootti jyek ɛkkɛnti bɛɛ. 24Bɛɛna bɛɛda ‘ya Kaci Ma Baanyɛ, ‘ya bɛɛd ne pɛñan bala ba ñaal ne wildi noon dyɛgdɛ pɔli ŋwayɛ warday. 25Yeti te ñamuyɛ, ‘ya taabba ne tolan, ɔci maka bala ciyi accayɛ, ɛkkɛn yooktan te ‘ya. 26Ɔci ba coodda cieki ma te oŋŋa Nɔwa baali menyɛ, ɔci ne oŋŋa ‘ya Kaci Ma Baan bɛɛdayɛ, naŋki ɛkkɛn bala a ɔɔn daŋkun. Ma myeldɛ coodi ɔci powa ne ‘ya ywoṭṭanti doki. 27Te wɔɔka wannayɛ, ma bala ñingɛn juadan te kanŋa waka amtan ɛkkɛn ɔci waka maattan ɛkkɛny, ɔci ɛkkɛn bala ḍɛɛwɔ oŋkanda, ɔci bala poŋi te tol bɔrda bɛya ɛkkɛnti bɛɛ, ne oŋŋa Nɔwa kaanni murka tolanji ɔɔn, ɔci tol bɔrda bɛɛni, ɔci maka bala bora neeni ḍakcin waakɛnda. 28Ɔci moki ne Lut baaliyɛ, ma bala omi ɔci moti ɔci wɛɛṭi waako, ɔci waak moki wiɛltanŋɔ, ɔci ɛkkɛn bala pieti waako, ɔci cɔti oorgo. 29Yeti ne oŋŋa Lut kaannɛ bora te ban Caduumyɛ, maañ ɔci gwoyya koldan bɛɛn iñɔ te ñaalɔ ba pɔllo, ɔci maka bana wannati ammɛ waakɛnda. 30Ɔci ba coodi ma Caduum te oŋŋa wannayɛ, ɔci ne oŋŋa ‘ya Kaci Ma Baan waru lɛɛlda borayɛ, ‘ya ma mɔkca ciyi ba coodda wanna daŋkun. 31“Ɔci te oŋŋa wannatiyɛ, kan men gɛɛl bala bora ne naŋka neeni bɛɛdiyɛ, naa ɛkɛ kaatti orɔ aŋka waak oodɛ bora moki bɛɛ. Kan men gɛɛl bala yieljiyɛ, kan ɛkɛ wierŋɛ genga yieljiyɛ, naa ɛkɛ dɔɔdi gena neeniti moki bɛɛ. 32Dala ɛkkɛ poŋdɛ te jyek ɛŋ Luut! 33Kan mena boottin ‘yati gɛɛl jyek ‘ya daldɛ aŋka naa ɛkɛ nogditi ma bɛɛyɛ, mena neeni yɔɔrdi tɛɛtin bala ñaalɔ pɔliji neeni bɛɛ. Yeti kan men gɛɛl boottin ‘yati ɔci noŋdi ba jyek ‘ya, oŋ kan te ɛkɛ noktan ma ɔɔnyɛ, mena neeni ɛkɛ aŋka yɔɔrdi tɛɛtin bala ñaalɔ pɔliji neeni. 34’Ya ɛkkɛ myettin ka te ween jiñɛ wannayɛ, kan ma gɛɛg ne yyɛɛwɔ bala niin aŋgantiyɛ, men gɛɛl ne cyɛɛlɔ eedɛ Juaŋ ñaalɔ ɔci mena parɛ neeniyɛ, ɛkɛ aŋka yada. 35Ɔci kan maka moong gɛɛg ne yyɛɛwɔ moki bala jieyi nona ne cyɛɛlɔyɛ, ɛŋa ne cyɛɛlɔ eedɛ Juaŋ ñaalɔ ɔci ɛka parɛ neeni aŋka yada. 36Kan ma gɛɛg ne yyɛɛwɔ bala yielji te oŋŋa wannayɛ, mena ne cyɛɛlɔ eedɛ Juaŋ ñaalɔ ɔci ɛka parɛ neeni aŋka yada.” 37Ɔci maka laldɛ Yaccu tooccin ɛkɛti agi, “Naŋka neeni bala wɛnɛ?” Ɔci Yaccu ṭwokcin ɛkkɛnti te jwali ṭɔɔlɛ agi, “Nona niini gena tuutayɛ, wɛjjin bɛya ḍwortiti aŋan.”

will be added

X\