Luuk 16

1Ɔci Yaccu gɔkcin maka laldɛ ɛkɛti agi, “Mena ‘uan gɛɛl bala, ɛkɛ a mena cyɛgan. Ɛkɛ balki mena gɔṭi mal ɛkɛ. Ɔci mena neeniyɛ, ɛkɛ tiagiyɔ ma kanŋa weegɛnti agi, ‘Mena neeniyɛ, ɛkɛ wak i ḍagdɛ te naŋka amaamo.’ 2Ɔci kanŋa weegɛn borcin ɛkɛti tooccin ɛkɛti agi, ‘Hay i! Jyeka tieŋŋan ‘ya te i neeni jitkɛn bala a ɔki yeti? Dala i jyek wak ‘ya kiijja worgaji waakɛnda. Acaan ‘ya buaga i kooya bora te kanŋa ‘yati. Ɔci agdi mena gɔṭi mal ‘ya oŋgati moki bɛɛ.’ 3“Ɔci mena neeni bala poŋi yomɛti agi, ‘Acca ‘ya noŋja a ɔki? Kanŋa weegɛn mwonnin te ‘ya doki, ɔci ‘ya yaakati pien luom bɛɛ. Ɔci ‘ya yaakati ñuon waak bɛɛ, acaan ñuon waak neeniyɛ, a lɔɔn ‘yati. 4Ɛɛ, naŋka naŋdi ‘ya ŋeej ‘ya doki, aŋka mung ɔɔn ‘ya dalta bɛɛ, ɛkkɛn ‘ya borta oorg ɛkkɛn jitin.’ 5“Mena gɔṭi maal neeni borcin maka balki dɛɛn kanŋa weegɛnti neeni ne cyɛɛlɔ ne cyɛɛlɔ. Ɔci ɛkɛ tooccin mena bɛɛn ñamɛti agi, ‘Dɛn i bala a ɔki i wey ɔɔn?’ 6“Ɔci ɛkɛ gɔkcin agi, ‘‘Ya balka dɛɛn ñɔdg capiiyan a ma baan ne ŋaanɔ (800).’ “Ɔci mena gɔṭi maal gɔkcin ɛkɛti agi, ‘Anti worga i. Coocca iñɔ ne pɛñ ɔci kiejja a dɛn i a ma baan ne yyɛɛwɔ (400) budan.’ 7“Ɔci mena gɔṭi maal tooccin mena parɛti agi, ‘Oŋ i daŋkun balki dɛɛn ne ñiṭin?’ “Ɔci ɛkɛ gɔkcin agi, ‘‘Ya balka dɛɛn pok cowaaln a alp ne cyɛɛlɔ (1,000).’ “Ɔci mena gɔṭi maal gɔkcin ɛkɛti agi, ‘Anti worga, ɔci i kiejja a dɛn i a cowaaln ma baan ne ŋaanɔ (800) budan.’ 8“Ɔci kanŋa weegɛn ne ɛkɛ tieŋni naŋka neeniyɛ, ɛkɛ gɔkcin mena gɔṭi mal ɛkɛ mena yaayan neeniti agi, ‘I ñingu tɛy tɛyo hay!’ Kanŋa weegɛn gɔki a ɔɔn te naŋki mena kanŋan ɛkɛti naŋka naŋŋɛ te ñing tɛɛn neeni. Awarɛ, maka iñɔ ṭɛɛrji wɛnniyɛ, ɛkkɛn balki ñing tɛɛn ṭɛra neeni ŋoyɛ ne tolan te maka a kɛɛgin Jwaŋa Tolany. 9Ɛkɛ gɔkcin moki agi, ‘Dala ɛkkɛ ma magdɛ te mal ɛkkɛ ṭɛɛrji wɛnni aŋka ne mal ɛkkɛ baati ne baaṭiyɛ, ɔci ɛkkɛ bortɛ Juaŋ ban ɛkɛ, ɔci ɛkkɛ ciedɛ iki ɛkɛ yuonginda ɔɔn.’ 10“Kan mena waŋɛ tiittɛ te gena ḍiɛranyɛ, ɔci ɛkɛ yaakinti waŋɛ tiittɛ te gena tolan daŋkun. Ɔci kan mena noŋi ma ñingɛn te gena ḍiɛranyɛ, ɔci ɛkɛ noŋdi ma ñingɛn te gena tolan daŋkun. 11Kan i waŋu tiicca te waka bala iñɔ ṭɛɛrji wɛnni bɛɛyɛ, a menɛ i ‘wondi waka pwadin waka awarɛy? 12Oŋ kan i noŋi ne pwadan te wak maka pookɛn bɛɛy, oŋ a menɛ i ‘wondi waak aŋka aga wak iy? 13“Mena noŋi kanŋayɛ, ɛkɛ yaakinti noŋdi kanŋa maka ne yyɛɛwɔti bɛɛ. Ɛkɛ dita yooktan te jyek weya parɛ neeni dita, ɔci andi gena jyek weya parɛ neeni dita. A ɔŋŋiyɛ, ɛkkɛ yaakɛti noŋdɛ ba jyek Jwaŋa Tolan yaakkɛn iki jyek yoma buagɔn waka budan neeni bɛɛ.” 14Ma Pɛriciin maka ani bilk neeniyɛ, ɛkkɛn bala tyeŋi jyeka guaŋŋɛ Yaccu neeni waakɛnda, ɔci ɛkkɛn wooki Yaccu. 15Ɔci Yaccu gɔkcin ɛkkɛnti agi, “Ɛkkɛ agɛ maka noŋi ba ɛkkɛ agɛ maka pwadin ma ñomgɛnti, yeti yomg ɛkkɛ ŋeejɛ Jwaŋa Tolan ne ɛkkɛn yiekiy. Waka guaktan ma agi pwadgiyɛ, ɛkkɛn yeyɔ Jwaŋa Tolanti ne tolan. 16“Tieŋdɛ, ne Yɔhanna baawi menyɛ, jyek ganuun Muuca ɔci jyek bɔwan Jwaŋa Tolan bala kanŋan mati doki. Ɔci te oŋŋa Yɔhanna bɛɛni ɔci ne acca ɔɔnyɛ, jyeka wonkɛn jyeka pwadin jyek cyɛgji Jwaŋa Tolanyɛ, bala mati doki. Ɔci ma bala loṭi ma te ɛkkɛn. Yeti ma waakɛnda buagɔn aga ma cyɛgji Jwaŋa Tolan te naŋki ɛkkɛn budan ɔɔn. 17Kan ṭɛɛr baadi walla kan pɔlla ñaalɔ baadiyɛ, jyek ganuun waŋɛ gɛɛl baadi bɛɛ. A’a! 18“Kan mena ‘uan ɛɛŋ daldɛ, ɔci kan ɛkɛ ḍɛɛdi ɛŋa parɛ gɛɛlyɛ, naŋka neeni a tommo. Ɔci kan ɛɛŋ gɛɛl dalnɛ ‘war ɛkɛ, ɔci kan ɛŋa neeni ḍɛɛdɛ ‘wana parɛyɛ, naŋka wanna a tomi moki.” 19“Mena ‘uan mena cyɛgan gɛɛl bala ɛŋi bworŋa wiɛlɛ pɛñan bworŋa buol oŋkanda. Ɔci ɛkɛ ciyi te yoŋni oŋkanda, lieṭi genga bɛɛ. 20Ɔci kaañ tukɛ mena cyɛganti neeniyɛ, mena bɔwan gɛɛl bala niin iñɔ. Ɛkɛ yenti Lajarac. ‘Wana neeniyɛ, ɛkɛ warɛ gwottin ñaalɔ. Ɔci waak tuggɛn ṭoontin, ɔci ɛkɛ warɛ niin a ṭuoṭ warɛ warda. 21Ɔci ɛkɛ poŋi gɔki agi kan ɛkɛ omji waka mena cyɛgan tiɛdɛ ḍwayi ŋwayyɛnti neeniyɛ, agi te ɛkɛ yɔmji doki te ɛkki. Ɔci gɔṭṭi, gɔki daŋkun bɛɛni, ɔci bala noṭi ɛkɛ warɛ. 22“Ɔci oŋ gɛɛltiyɛ, mena bɔwan neeni tuuni, ɔci ɛkɛ eyɛ malɛɛkan nona Abrahim taaŋɛti ñaalɔ pɔliji. Ɔci mena cyɛgan neeni tuun daŋkun, ɔci ɛkɛ jokci ma koolji. 23Ɔci Non Lien nona ootti maka tuwa neeniyɛ, mena cyɛgan neeni bala wooci a waañi ne tolan. Ɔci ɛkɛ ñorcin ñaalɔ ɔci Abrahim yuarnɛ ɛkɛ ciyi nona loonan, ɔci Lajarac bala ciyi ɛkɛ taaŋɛti. 24Ɔci ɛkɛ bala boori yaadan agi, ‘Abrahim, wey ɔɔn, dala i yomu pɔkka ‘yati. Dala i Lajarac cuoñña ɔci ɛkɛ bieŋɛ oldɛ pietin ɔci oldɛ ‘ya lɛmmuti, acaan ‘ya waru nokɔ ne pɛñan te maña neeni!’ 25“Yeti Abrahim kɛkcin ɛkɛti agi, ‘Hay, kacco! Dala i poŋja te coodda cieni ɛkkɛ ṭɛɛrjiy. I balki waka coŋin waka pwadin waakɛnda, yeti Lajarac balki gena waka yeyin waakɛnda. Ɔci acca coodi ɛkɛ aŋka pwanni, ɔci i aŋka wooc a waañi ne tolan. 26Ɔci moki, kola tolan bala yeccu ikin kɛɛmminji. Kan ma gɛɛg bɛya te wɛnni bɛya ɛkkɛtiyɛ, ɛkkɛn yaaktanti bɛɛ. Ɔci moki kan ma bɛya te aŋan bɛya ɔɔnti wɛnniyɛ, ɛkkɛn yaaktanti bɛɛ.’ 27“Ɔci ‘wana cyɛgan gɔkcin ɛkɛti agi, ‘Wey ɔɔn, oŋ kan bala a ɔɔnyɛ, ‘ya buaga dala i Lajarac cuña ban ɔɔn, 28acaan ‘ya balka modg ɔɔn ne dɔɔyɔ aŋan. Dala ɛkkɛn miettɛ ɛkɛ te naŋka neeni, ɔci dala ɛkkɛn ṭeedɛ ɛkɛ aŋka naa ɛkkɛn bɛya wɛnni nona wooca ‘ya neeni bɛɛ.’ 29“Yeti Abrahim gɔkcin ɛkɛti agi, ‘Ɛɛ, gɔṭṭi pocca, ɛkkɛn balki worga Muuca, ɔci worgan maka a bɔwan Jwaŋa Tolan. Dala ɛkkɛn tieŋdi gena jyek ɛkkɛn.’ 30“Yeti ‘wana cyɛgan kɛkcin agi, ‘A’a, a’a! Yɔmjin a ɔɔn bɛɛ! Hay, wey ɔɔn Abrahim, acaan ɛkkɛn woŋgɛn a tiicin te jyek ganuun Muuca bɛɛ. Yeti kan men gɛɛl jɔŋdi te lienti ooddi ɛkkɛntiyɛ, ɛkkɛn tieŋdi ɔci paŋi ɛkkɛn aktanyɔ.’ 31“Yeti Abrahim gɔkcin ɛkɛti moki agi, ‘A’a. Kan ɛkkɛn tieŋdi jyek Muuca ɔci jyek maka a bɔwan Jwaŋa Tolan bɛɛyɛ, kan men gɛɛl jɔŋdi te lienti ɔci ɛkkɛn myettɛ jiekyɛ, ɛkkɛn yooktan men ɔɔn.’ ”

will be added

X\