Luuk 15

1Ɔci te oŋŋa parɛyɛ, maka lyemi tulba ɔci maka pookɛn maka yeyin daŋkun bala. Ɔci ɛkkɛn bɛɛn ḍwoṭṭinti nona Yaccuti aŋka tieŋdi jyek ɛkɛ. 2Ɔci ma Pɛriciin ɔci maka loṭi worga Juaŋyɛ, ɛkkɛn bala wooki Yaccu agi, “Oŋ ‘wana neeni ani maka nɔɔtk ɔɔn ogo yeti? Ɔci ɛkɛ omi iki ɛkkɛn a cyɛɛlɔ ogo?” 3A ɔŋŋiyɛ, Yaccu ɛkkɛn myennɛ te jwalla a caagɔn agi, 4“Gɔṭṭɛ, kan men gɛɛl ɛkkɛti balki kulin a miyya ne cyɛɛlɔ (100) ɔci kan kalŋ gɛɛl yien ne cyɛɛlɔyɛ, mena neeni kalŋ daldɛ bora ḍakti boki? A’a. Daldɛ bɛɛ. Ɛkɛ kulin a ma baan ne ŋaanɔ mena parɛ byeŋkɛ ɔci ne dɔɔyɔ wyetkɛn ne ŋaanɔ (99) neeni daldɛ wɔɔŋji, ɔci ɛkɛ ooddi lieṭi ɛka yien ne cyɛɛlɔ neeni ne ɛkɛ kalŋ yuardɛ ɔɔn. 5Ɔci ne ɛkɛ kalŋ yuardiyɛ, ɛkɛ yomɛ ñɔya ñɔɔno, ɔci ɛkɛ kalŋ cyɛrtɛ ḍwaŋɛti 6ɔci eedɛ baanji. Ɔci ne ɛkɛ dɛndi baanjiyɛ, ɛkɛ borti mung ɛkkɛnti ɔci maka cieki iki ɛkɛ. Ɔci ɛkɛ gɔkti ɛkkɛnti agi, ‘Dala ɛkkɛ yomgɔ ñɔɔgdi iki ‘ya acaan kalŋ ‘ya kalŋa yien neeni yuarŋ ‘ya doki.’ 7Ɔci ba jyeka neeniyɛ, bala ba jyek ma baan daŋkun. Kan ma bala a miyya ne cyɛɛlɔ (100) ɔci kan men gɛɛl ne cyɛɛlɔ yaayiyɛ, ɔci kan ɛkɛ paŋi ɛkɛ agdiyɔyɛ, Jwaŋa Tolan yomɛ ñɔya ne tolan nɔñji te mena warɛ yaldɛ te nɔji ɛkɛ ne cyɛɛlɔ neeni te yom ñɔɔn ɛkɛ yomɛ ñɔyɛ te maka a ma baan ne ŋaanɔ mena parɛ byeŋkɛ ɔci ne dɔɔyɔ wyetkɛn ne ŋaanɔ (99) neeni.” 8“Ɔci moki kan ɛɛŋ gɛɛl balki ḍeyyan a inyaakkɛn ɔci kan ḍeyyan mɛɛgɛn gɛɛl ne cyɛɛlɔ yienyɛ, ɛkɛ ḍeyyan mɛɛgɛn daldɛ budan boki? A’a. Ɛkɛ dyɛka tondɛ ɔci ɛkɛ on jiñɛ wiɛdɛji, ɔci ɛkɛ lierti ne pwadan ne ɛkɛ ḍeyyan mɛɛgɛn yuardɛ ɔɔn. 9Ɔci ne ɛkɛ ḍeyyan mɛɛgɛn yuardiyɛ, ɛkɛ ñarg ɛkkɛn bortiti, ɔci maka cieki iki ɛkɛ bortiti daŋkun. Ɔci ɛkɛ gɔkti ɛkkɛnti agi, ‘Dala ɛkkɛ yomgɔ ñɔɔgdi iki ‘ya acaan ḍeyyan mɛɛgɛn ‘ya ḍeyyan yien neeni yuarŋ ‘ya doki.’ 10Ɔci ba jyeka neeniyɛ, ‘ya gɔkka ɛkkɛti, kan mena nɔɔdɔn gɛɛl warɛ yaldɛ nɔji ɛkɛ daldiyɛ, malɛɛkan Jwaŋa Tolan yomgɛn ñɔya te ɛkɛ ne tolan.” 11Ɔci Yaccu gɔkcin mati agi, “Tieŋdɛ ‘wota, mena ‘uan gɛɛl bala, ɔci ɛkɛ balki kɛɛgin a ‘uay ne yyɛɛwɔ. 12Ɔci moda ḍiɛran ŋoyɔyɛ, gɔkcin weegɛnti agi, ‘Wey ɔɔn, ‘ya ŋwotta taaŋi mal ‘ya bora acca.’ Ɔci weegɛn kɛɛgin ŋuonnɛ maal jitkɛn. 13“Ɔci ne nink gɛɛg bɛɛki borayɛ, kacca ḍiɛran neeni wak ɛkɛ wiɛlnɛyɔ waakɛnda, ɔci bilk olnɛ kuñŋanji eññɛ, ɔci ɛkɛ jɔŋŋin ati bana loonan gɛɛlti. Ɔci aŋan bana atti ɛkɛ neeniyɛ, ɛkɛ bilk ɛkɛ cyɛnnɛji ne pɛñan waakɛnda acaan ɛkɛ bala noŋi amaamo. 14Ɔci ne ɛkɛ bilk waakɛnda ḍaaŋŋɛyɛ, ɔci koñ bɛɛn bana neeniti ne tolan. Ɔci ɛkɛ aŋi mena bɔwan. Ɛkɛ dorki genga bieŋɛti bɛɛ. 15Ɔci ɛkɛ ati tooccin maka ciyi bana neeni gɛɛlti te kanŋa. Ɔci ɛkɛ ‘wonnɛ men gɛɛl kanŋa omti kwotin. 16Ɔci ɛkɛ amɛ koñ ne pɛñan. Ɔci ɛkɛ poŋi gɔki agi baali ba ɛkɛ ŋɛddinti iki kwotin kulk no. Yeti ɛkɛ ‘wonnɛ men gɛɛl gena amdɛ ɛkɛ gɛɛl bɛɛ. 17“Ne ɛkɛ poŋnɛ warɛyɛ, ɛkɛ gɔkcin yomɛti parɛ agi, ‘Hacc, ɛkkɛ! Wey ɔɔn balki maka kanŋan ɛkɛti kɔɔna kɔɔnno, ɔci waka amtan ɛkkɛn kɔɔna kɔɔni moki. Ne ɛkkɛn balki omki oomdinyɛ, gɔ ɛkkɛn tiɛtkin oomdin moki ɔɔn. Yeti ‘ya baal nogda koñ wɛnni ogo! 18Hay, a’a! ‘Ya jɔŋŋa ñaalɔ ootta dɔwwa wey ɔɔnti, ɔci ‘ya gɔkca ɛkɛti agi, “Wey ɔɔn, ‘ya domi naŋki Jwaŋa Tolanti, ɔci noŋi amaam iti moki. 19’Ya baal ba kaci i moki bɛɛ. Dala ‘ya naŋda i agdi ba mena kanŋan iti te bilk budan.” ’ 20Ɔci ɛkɛ jɔŋŋin ɔci ati dɔɔki weegɛnti. “Ɔci ne ɛkɛ baali bɛɛdi te nona loonan menyɛ, ɛkɛ yuartɛ weegɛn. Ɔci weegɛn yomɛ pɔŋnɛ ɛkɛti, ɔci ɛkɛ yiŋi kookcin ɛkɛti pɔɔjɔ, ɔci weegɛn ɛkɛ muŋŋɛyɔ ɔci ñiimmɛ te tukɛ. 21“Ɔci kaci gɔkcin ɛkɛti agi, ‘Wey ɔɔn, ‘ya noŋi nɔji Jwaŋa Tolanti ɔci iti daŋkun. Ɔci a ɔɔnyɛ, ‘ya baal ba kaci i moki bɛɛ.’ 22“Yeti weegɛn borcin maka kanŋan ɛkɛti ɔci gɔkcin ɛkkɛnti agi, ‘Ba ɛkkɛ bɛɛ, dala ɛkkɛ yooŋdɛ ettɛ bworŋa pwadan ɔci oodɛ ɛɛŋdɛ ɛkɛ warɛti, ɔci ḍejja pwadan ɛɛŋdɛ ɛkɛ bieŋɛti, ɔci wɛyi ɛɛŋdɛ ɛkɛ ciegɛti daŋkun. 23Ɔci naañ ṭɔɔlɛ caagan ŋardɛ, ɔci dala ikin noŋtin juma, ɔci dala ikin yomgɔ ñɔɔgdi! 24Acaan kaci ‘ya neeni ɛkɛ bala ba ne ɛkɛ tuuni doki no, ɔci acca ɛkɛ bala tɛɛti men. Ɔci ɛkɛ yien doki, ɔci acca ɛkɛ warɛ yuarŋɛ dɔki.’ Ɔci ɛkkɛn noŋjin juma doki, ɔci ɛkkɛn yomgɛn ñɔɔna ñɔɔno. 25“Ɔci te oŋŋa wannati kacca tolan bala bora balji, ɔci ne ɛkɛ bɛɛni cɔɔlniti baanjiyɛ, ɛkɛ tieŋŋin waka ñiɛlki ma ne balki wiakkiy, ɔci ɛkɛ tieŋŋin ɔɔlg ma ne ma balki ñiɛlkiy. 26Ɔci ɛkɛ borcin ma kanŋa gɛɛlti, ɔci tooccin ɛkɛti agi, ‘Hay! Ɛkkɛ lyɛlɛ a ɔɔn a gena yeti?’ 27“Ɔci mena neeni gɔkcin ɛkɛti agi, ‘I gɔrni bo, mod ɛkkɛ bɛɛn dɔɔkkin baanji, ɔci wey ɛkkɛ naña caagan neeni ŋaarŋɛ ŋoornɛ ɛkɛ, acaan ɛkɛ bɛɛn dɔɔkkin baanji weegɛnti doki. Ɛkɛ ḍakcin ɔntɔ bɛɛ.’ 28“Ɔci moda tolan neeniyɛ, ɛkɛ looñi, ɔci ɛkɛ yookɔn te kaaccin orɔ. Ɔci wey ɛkkɛn kooyin bora nona ɛkɛti ɔci gɔkcin ɛkɛti agi, ‘I bɛɛd oottin kaattin orɔ yɔŋ. Naa i noŋ a ɔɔn bɛɛ.’ 29Ɔci ɛkɛ ṭwokcin weegɛnti agi, ‘Gɔṭṭi, hay! Yuong aŋi ñiṭin ne ‘ya baala noŋa kanŋa iy! Ɔci jyek i bɛɛnji ‘ya oŋgati bɛɛ. Ɔci i ‘ya ‘wonna genga ba ñuaŋ ṭɔɔlɛ gɛɛl ɔɔn bɛɛ, ɔci ‘ya noŋna i juma ṭɔɔlɛ gɛɛl aŋka ‘ya yomu ñɔɔdɛ i mung ɔɔn bɛɛ! 30Yeti ne kaci i, mena mal i ḍaaŋŋɛ waakɛnda amaam te naŋki moonga tobin neeni ne bɛɛniyɛ, i ɛkɛ aŋka ŋoorni naña caagan!’ 31Ɔci weegɛn gɔkcin ɛkɛti agi, ‘Kaci ‘ya, a gena ɔɔn, ikin balkin iki ‘ya oŋkanda, ɔci wak ‘ya a wak i waakɛnda. 32Yeti ikin yaakinti cietin budan te naŋki juma te oŋŋa pwadan neeni a ɔki? Acaan mod ɛkkɛ neeni bala ba ne ɛkɛ tuuni doki no. Yeti acca ɛkɛ bala tɛɛti dɔki! Ɔci moki ɛkɛ yieni. Yeti ɛkɛ warɛ yuarŋɛ dɔkɔ!’ ”

will be added

X\