Luuk 14

1Oŋ gɛɛlti te Oŋ Cabityɛ, Yaccu ati omi on mena ḍuaŋa gɛɛlti. Ḍuaŋa neeniyɛ, ɛkɛ a men ma Pɛriciin. Ɔci ma Pɛriciin bala gɔṭi booti Yaccu warɛ. 2Ɔci mena ‘uan gɛɛl bala wɛnan ɛkɛ warɛ kottin ñaalɔ. 3Ɔci Yaccu tooccin maka loṭi worga Juaŋti ɔci ma Pɛriciinti daŋkun. “Kan men gɛɛl ma ywaŋdɛ te Oŋ Cabity, ɛkɛ jyek ganuun bɛɛññɛji te naŋka neeni doki?” 4Yeti ɛkkɛn ṭwokcin genga ɛkɛti bɛɛ. Ɛkkɛn cien lieda. Ɔci Yaccu mena warɛ yaayan neeni muŋŋɛ ɔci ywaŋŋɛyɔ. Ɔci Yaccu mena neeni cuuññɛ bora. 5Ɔci Yaccu tooccin mati agi, “Oŋ naŋki ɛkkɛ bala a ɔki? Kan kaci gɛɛl walla kan a yaan gɛɛl ḍɛmdi jiidɔ te Oŋ Cabity, ɛkkɛ ɛkɛ oodɛ bora ne pɛñan bɛɛ?” 6Ɔci ɛkkɛn yaaŋnɛti ṭwokcin ɛkɛti moki bɛɛ. 7Ɔci ne Yaccu gɔrni ma balki bɛɛti on mena ḍuaŋa neeni gɔ ɛkkɛn moki coockin nonka pwadin neeni pookɛn a ɔɔnyɛ, ɛkɛ ma myennɛ te jwalla a caagɔn gɛɛl agi, 8“Kan men gɛɛl boor i agi i bɛɛdji nona jumatiyɛ, ɔci ne i ooddi jumatiyɛ, naa i coocca nona pwadanti ñamu te yom i paru bɛɛ. Acaan kan mena tolan te i 9gɛɛl bortɛ juma weegɛn agi bɛɛdɔ coottɔ nona pwadanti nona coonni i neeni, ɔci i aŋka jɔɔlti ma ñaalɔ te nona neeniti ɔci ootta coocca nona iñɔyɛ, naŋka neeni yaayɛ, a lɔɔno. 10Yeti kan men gɛɛl boor i agi i bɛɛdjiyɛ, ɔci ne i ooddiyɛ, dala i coocca nona iñɔ, aŋka ne juma weegɛn bɛɛdiyɛ, ɛkɛ gɔkti iti kaapun agi, ‘Mug ɔɔn, bɛɛd coocca nona pwadanti.’ Ɔci kan a ɔɔnyɛ, ɛkɛ noŋjin iti ne pwadan nona maka coŋin ñomgɛnti. 11Acaan maka waakɛn naŋtan ba maka ḍwaŋinyɛ, ɛkkɛn naŋdɛ Juaŋ aga ba maka ḍyɛrin. Ɔci maka waakɛn dɔɔtan iñɔ ba maka ḍyɛrinyɛ, ɛkkɛn aŋka aga maka ḍwaŋin.” 12Ɔci Yaccu gɔkcin mena ɛkɛ bornɛ neeniti agi, “Kan i boor ma agi ma bɛɛdɔ amti te liidɔ walla te oŋ unniyɛ, naa i boor gena mung ɛkkɛ ɔci walla gena modg ɛkkɛ, ɔci walla ma ɛkkɛ, ɔci walla maka ciyi iki i maka balki waak neeni pookɛn bɛɛ. Kan i boor maka neeniyɛ, ɔci ne baaṭi i borti ɛkkɛn daŋkun. Ɔci a ɔɔnyɛ, bala ba wak i dɔɔkti iti moki. 13Kan i boor ma amti on iyɛ, dala i boorja gena maka bɔwan, ɔci maka byeŋkɛn ɔci bɔggɛn yiegin, ɔci maka ŋɔr, ɔci maka ullin. 14Ɔci kan i noŋja a ɔɔnyɛ, i yomu ñɔya, acaan maka neeni yaakinti wak i dɔɔtan iti moki bɛɛ. Ɔci ne oŋŋa maka pwadin jɔŋti ñaalɔ te kolk jitinyɛ, i ‘wondi Jwaŋa Tolan waka pwadin ba naŋki i wanna.” 15Ɔci maka omi iki ɛkkɛn men gɛɛl ɛkkɛntiyɛ, ne ɛkɛ tieŋni jyeka guagdɛ Yaccu neeniyɛ, ɛkɛ gɔkcin ɛkɛti agi, “Mena omdi juma ban Jwaŋa Tolanyɛ, ɛkɛ yomɛ ñɔya, hay!” 16Ɔci Yaccu ṭwokcin ɛkɛti agi, “Oŋ gɛɛlti mena ‘uan gɛɛlyɛ, noŋi juma, ɔci ɛkɛ maka coŋin myennɛ te juma neeni. 17Ɔci ne oŋ juma bɛɛniyɛ, juma weegɛn mena kanŋan ɛkɛti gɛɛl cuuññɛ mati agi dala ma bɛɛdɔ, ɛkɛ waak ḍaaŋjɛ doki, ɔci ɛkɛ atti. 18Yeti ma waakɛnda bɛɛr jieko, ɔci ɛkkɛn kɛkcin ɛkɛti. Mena ‘uan gɛɛl gɔki agi, ‘‘Ya wɛɛṭi bal gɛɛl ɔci buaga ootta gɔrca balo. ‘Ya bɛɛd bɛɛ.’ 19Ɔci mena parɛ gɔki agi, ‘‘Ya wɛɛṭi yotka ooṭi noon ne inyaakkɛn, ɔci ‘ya buaga ootta ɛkkɛn pɔɔcca kanŋati. ‘Ya bɛɛd bɛɛ.’ 20Ɔci mena parɛ gɛɛl gɔki agi, ‘‘Ya ḍɛñi ɛɛŋ a ñooni ɔci waru a cuul men, ɔci ‘ya yaakati bɛɛd bɛɛ.’ 21“Ne mena neeni tuokiti mayɛ, ɛkɛ dɔɔki baanji weegɛnti, ɔci ɛkɛ weegɛn myennɛ te jyeka guagɛ ma ɛkɛti neeni. Ɔci on weegɛn looñi, ɔci gɔkcin mena kanŋan ɛkɛti neeni agi, ‘Gɔṭṭi poca, dala i ɔgdi ootta bodda ne pɛñan pɔɔka neeniji waakɛnda. Dala i lierca gena maka bɔwan, ɔci maka byeŋkɛn ɔci bɔggɛn yiegin, ɔci maka ŋɔr, ɔci maka ullin. Maka neeniyɛ, dala i ɛkkɛn aŋka owwa amti.’ 22Ɔci ne mena neeni kanŋa guaŋŋɛ weegɛn neeni naŋŋɛ dokiyɛ, ɛkɛ gɔkcin weegɛnti agi, ‘Wey ɔɔn, jyeka guaŋŋi i ‘yati neeniyɛ, naŋi ‘ya doki, ɔci on kuumi men bɛɛ. Noon bala men.’ 23Ɔci weegɛn gɔkcin ɛkɛti agi, ‘Ɛɛ, dala i ɔgdi ootta bodda ne pɔɔka eetan ma bora baan ŋoyɛti, ɔci ne pɔɔka eetan ma ḍyɛrin yelk jitin, ɔci maka bala aŋanyɛ, myetka ne pwadan ɛkkɛn bɛya wɛnni amti, aŋka dala on kuma te mako. 24’Ya gɔkka ɛkkɛti, maka borkan ‘ya te ñamuyɛ, ‘ya buaga ɛkkɛn men gɛɛl bɛya wɛnni dɛtti wak juma ‘ya neeni bɛɛ.’ ” 25Oŋ gɛɛltiyɛ, pooldin ḍwaŋin bala ati i Yaccu, ɔci Yaccu warɛ yallɛ, ɔci ɛkɛ gɔkcin ɛkkɛnti agi, 26“Kan men gɛɛl bɛya ‘yatiyɛ, dala anna ɛkɛ ani ‘yayɛ, bala ñamu te anna ɛkɛ anɛ weegɛn, ɔci mɛɛgɛn, ɔci ɛŋ ɛkɛ, ɔci kɛɛgin ɛkɛ, ɔci modgɛn, ɔci kowwɛn ɔci war ɛkɛ waanɛ daŋkun. Kan a ɔɔn bɛɛyɛ, ɛkɛ yaakinti aga men ‘ya bɛɛ. 27Mena mwondi te war ɛkɛ ɔci bootti ‘yati bɛɛyɛ, ɛkɛ yaakinti aga men ‘ya bɛɛ. 28“Ɔci kan men gɛɛl ɛkkɛti buagɔn cɔti ony, ɛkɛ cootti iñɔ ñamu parun, ɔci gɔrti ne waka cɔti ɛkɛ on neeni yɔmki waakɛnda bɛɛ? 29Kan ɛkɛ poŋdi ñamu bɛɛyɛ, ɔci kan ɛkɛ poccin cɔtcin on ŋwayɛ doki, ɔci kan waka cɔti ɛkɛ on bɔɔnjinyɛ, ɛkɛ on daldɛ te cɔnno. Ɔci ne ma bɛɛti gɔrti ne on ŋwayɛ niini parɛ budanyɛ, ɛkkɛn lɛɛrti ‘wana neeni agi, 30‘Gɔrtɛ poca, ɛkɛ poccin cɔtcin on ŋwayɛ, yeti ɛkɛ on ḍaaŋŋɛ bɛɛ.’ 31“Tieŋdɛ ‘wota, kan ḍuaŋa tolan gɛɛl buagɔn noowɔ iki ḍuaŋa tolan parɛ gɛɛly, ɛkɛ cootti iñɔ ñamu parun ɔci poŋdi ne ackan ɛkɛ ackan a alpn ne inyaakkɛn (10,000) neeni yɔmti boki no. Ɛkɛ poŋdi ñamu acaan ŋeejɛ ɛkɛ ackan ḍuaŋa tolan parɛ neeni a alpn a men baan ne cyɛɛlɔ (20,000). 32Ɔci kan ɛkɛ poŋi gɔki agi ma ɛkɛ bwandi ma ditayɛ, ɛkɛ men gɛɛl cundɛ ḍuaŋa tolan parɛti neeni ne ɛkɛ looni men te ban ɛkkɛn aŋka gɔkti ɛkɛti te jyek ŋɛyo. 33A ɔɔnyɛ, dala ɛkkɛ poŋdɛ ñamu ne pwadan ne ɛkkɛ agdɛ ma ‘ya awarɛ boki no. Kan anna ɛkkɛ anɛ ‘ya bala ñamu te anna ɛkkɛ anɛ waka pookɛn bɛɛyɛ, ɛkkɛ yaaktɛti agdɛ ma ‘ya bɛɛ. 34“Toli killan pwad pwado. Yeti kan toli poli dokiyɛ, ɛkɛ moki coda a ɔki? 35Ɛkɛ pwada moki bɛɛ. Kanŋa ɛkɛ bala moki bɛɛ. Ɛkɛ oltan ma ṭɛɛrji pietki ma waak moki bɛɛ, walla oltan ma waka piidi ma ŋwayyɛnti aŋka pworki waak moki bɛɛ. Kan ɛkkɛ balkɛ jyetkɔyɛ, dala ɛkkɛ tieŋdɛ jyeka guaŋi ‘ya neeni ne pwadan.”

will be added

X\