Luuk 13

1Ɔci te oŋŋa wannayɛ, ma gɛɛg bɛɛn ɔci ɛkkɛn bala mieti Yaccu te naŋka naŋŋɛ Bilaatuc mena a ḍuaŋa ṭɔɔlɛ ma Jaliiltiy. Acaan ne ɛkkɛn balki ɛrki waak Juaŋtiyɛ, ɛkkɛn noŋŋɛ Bilaatuc, ɔci yimg ɛkkɛn ñaaŋŋɛyɔ ɛkɛ iki yimg mal ɛkkɛn. 2Ɔci Yaccu ṭwokcin ɛkkɛnti agi, “Ɛɛ, oŋ ɛkkɛ poŋɛ gɔkɛ agi naŋka neeni bɛɛn ɛkkɛnti acaan nɔji ɛkkɛn tol tol te nɔji ma ban Jaliil maka pookɛn waakɛnda? 3A’a! ‘Ya ɛkkɛ myettin. Ɛkkɛ daŋkun, kan ɛkkɛ waakɔ yaldɛ bɛɛyɛ, ɛkkɛ ḍaktɛ daŋkun. 4Ɔci moki ɛkkɛ poŋɛ agi maka ne inyaakkɛn om ne cyɛɛlɔ wyetkɛn ne ḍoogɔ (18), maka ona ban Cilɔɔwam ona beyan ḍɛmnin ɛkkɛn wyetkɛnti neeni, nɔji ɛkkɛn tol tol te nɔji ma ban Urcaliim maka pookɛn waakɛnda? 5A’a! ‘Ya ɛkkɛ myettin. Ɛkkɛ daŋkun, kan ɛkkɛ waakɔ yaldɛ bɛɛyɛ, ɛkkɛ ḍaktɛ daŋkun waakida ba ɛkkɛn ɔɔn.” 6Ɔci ɛkɛ ɛkkɛn myennɛ te jwalla a caagɔn neeni agi, “Mena ‘uan gɛɛl balki ŋuami gɛɛl bala kaañji kañ ɛkɛ. 7Ɔci ɛkɛ gɔkcin mena gɔṭi balti agi, ‘Gɔṭṭi, ‘ya bɛɛn yuong ne ḍoogɔ doki aŋka gɔrca ŋuami ṭɔlgɛ, yeti ŋuami ṭɔlgɛ gɛɛg bala bɛɛ. Dala i jaan tɔcca iñɔ hay! Te gena aŋka ɛkɛ yɔɔdi kɛki non budan a ɔɔn?’ 8Yeti mena gɔṭi bal neeni gɔkcin ɛkɛti agi, ‘Yɔɔdi lakun. Jaan dalja, dala yɔɔda ba ywoni ne cyɛɛlɔ moki, ɔci tuagdi ŋwayɛti lakun ɔci noŋga ‘yɛt doko. 9Ɔci ikin gɔrtin kan ne jaan jieddi ṭɔlgɛ boki no. Ɔci kan ɛkɛ jieda bɛɛyɛ, ɛkɛ oŋ tɔcca i iñɔ ne ywoniti oŋo.’ ” 10Ɔci Yaccu bala loṭi ma ona morki ma Juaŋ gɛɛlti te Oŋ Cabit. 11Ɔci ɛɛŋ gɛɛl bala wɛnan, ɛkɛ warɛ yaayɛ te baaṭi doki te naŋki jwaŋa yaayan ɛkɛti. Yuonga wooci ɛkɛ aŋi inyaakkɛn ɔci ne dɔɔyɔ wyetkɛn ne ḍoogɔ (18) doki. Ɛkɛ puonnɛ waja pwomgɛti, ɔci ɛkɛ ati geyi a geen yaakinti warɛ mɛɛdɛ ñaalɔ bɛɛ. 12Ɔci ne Yaccu ɛŋa neeni yuarnɛyɛ, ɛkɛ borcin ɛkɛti agi, “Hay! Ɛɛŋo, waja i neeniyɛ, bawwin doki.” 13Ɔci Yaccu byeŋkɛ tannɛ ɛkɛti, ɔci ɛɛŋ doki warɛ mɛɛnɛ ñaalɔ ne pɛñan. Ɔci ɛkɛ bala jieyi Jwaŋa Tolan. 14Yeti ḍuaŋa ona morki ma Juaŋ neeniyɛ, ɛkɛ looñi ne pɛñan acaan Yaccu mena neeni ywaŋŋɛ te Oŋ Cabit. Ɔci ɛkɛ gɔkcin maka orɔ neeniti agi, “Tieŋdɛ, ɛkkɛ myettin ne pwadan. Nink kanŋa bala a dɔɔyɔ wilin ne cyɛɛlɔ. Dala ɛkkɛ bɛɛdɛ te ninka neeni te jyek ywaŋi ma waakɛn, naa ɛkkɛ bɛɛdɛ te jyek ywaŋi waakɔ te Oŋ Cabit bɛɛ!” 15Ɔci Ciɛggɔn Yaccu gɔkcin ɛkɛti doki agi, “Hay, ɛkkɛ maka noŋi ma ñingɛn nɛ! Ɛkkɛ waakidayɛ, ɛkkɛ yotk ɛkkɛ ɔci tɔrin ɛkkɛ pɔktɛ te Oŋ Cabit eedɛ moottɛ pieg bɛɛ? Ɛɛ, ɛkkɛ wak ɛkkɛ eedɛ pietin te Oŋ Cabit daŋkun. 16Ɛŋa muŋŋɛ jwaŋa yaayan ba yuong ne inyaakkɛn om ne cyɛɛlɔ wyetkɛn ne ḍoogɔ (18) neeniy, ɛkɛ a kaci Abrahim daŋkun ba ikin bɛɛ? Oŋ kan ɛkɛ pɔkkan ‘ya te Oŋ Cabit te waja ɛkɛ neeniy, jyeka neeni yeyɔ ɛkkɛti a ɔki?” 17Ɔci ne Yaccu gɔŋni a ɔɔnyɛ, maka yookɔn te ɛkɛ neeniyɛ, waakɛn aŋi lɔɔno, ɛkkɛn yaakinti gɔkti genga moki bɛɛ. Ɔci maka coŋin yomgɛn ñɔɔna ñɔɔn te naŋka coŋin naŋka naŋdɛ Yaccu pwadin neeni. 18A ɔŋŋiyɛ, Yaccu tooccin mati agi, “Cyɛgji Jwaŋa Tolan bala a ɔki? ‘Ya gɔkka ɛkkɛti ka ɛkɛ bala ba bolji gena yeti? 19Ɛɛ, ɛkɛ bala ba kardala waŋɛ. Ñing kardala neeni ḍyɛrgin a ḍyɛrgin ba ñing kɔba ɔɔn. Ɔci ɛkɛ piinnɛ men gɛɛl bal ɛkɛ. Ɛkɛ ḍiɛṭ ḍyɛro, yeti ne ɛkɛ yulliyɛ, ɛkɛ aŋi jana tolan ɔci kɛrkɛ kɔɔna kɔɔnno. Ɔci ḍiirg bɛɛn bala eyi kwork ɛkɛ kɛrkɛti ne coŋɔn. (A ɔɔnyɛ, bala ba jyek cyɛgji Juaŋ daŋkun. Jyek cyɛgji Juaŋ ɛkkɛn jɔɔtcin ne ḍiɛran te maka ne ḍiɛkan, ɔci ɛkɛ poni jitin ne ma coŋki a coŋgin ɔɔn.”) 20Ɔci Yaccu tooccin mati moki agi, “Cyɛgji Jwaŋa Tolan bala ba bolji gena ɛkkɛti yeti? 21Ɛɛ, ɛkɛ bala ba jyek ñamgo. Ɛɛŋ gɛɛl bala noŋi byedgo, ɔci ɛkɛ ñamg ñaaŋŋɛyɔ i ḍuobja a waagɔn ne ḍiɛkan ɔci ḍuannɛ, ɔci bala niin lieda ne ñamg atki ḍuobjiti warɛ warda ɔɔn.” 22Ɔci Yaccu bala ati booti bonk korkɛn, ɔci ɛkɛ bala loṭi ma bonka neeniti ne ɛkɛ baali ooddi ban Urcaliimy. 23Ɔci men gɛɛl tooccin ɛkɛti agi, “I Ciɛggɔn, oŋ maka yɔɔdɛ Jwaŋa Tolan ɛkkɛn a ḍiɛkan budan?” Ɔci Yaccu gɔkcin ɛkɛti agi, 24“Gɔṭṭi, pɔya ootti ma pɔliji ɛkɛ tukɛ ciɛṭin bɛɛ. Dala ɛkkɛ pottɛ oŋkanda kaattɛ orɔ te on tuka ḍiɛran neeni. Naa ɛkkɛ pɔɔd daldɛ bɛɛ. Acaan ne baaṭi maka coŋin potti ka kaatti orɔ, yeti ɛkkɛn yaaktanti bɛɛ. 25Kan on weegɛn on tukɛ wiɛnnɛ te orñi doki ɔci kan ɛkkɛ bɛɛdɛ boottɛ ne ŋoyɔ ɔci yɔɔttɛ on tukɛti bora ɔci bortɛ agi, ‘I Ciɛggɔn, on tukɛ pɔkka ɔɔn koodɔnyɛ,’ Ɛkɛ ṭwokti ɛkkɛti agi, ‘Hay! Ɛkkɛ bɛɛnɛ te aŋɛ? Ɛkkɛ ŋeejin ‘ya bɛɛ.’ 26Ɔci ɛkkɛ gɔktɛ ɛkɛti agi, ‘Pari ɔɔn a maka bala omin iki i bɛɛ? Ɔci ne i baali loṭi ma pɔɔk ban ɔɔn jitinyɛ, ɔɔn balgɔn iki i moki.’ 27Ɔci ɛkɛ gɔkti ɛkkɛti moki agi, ‘Gɔṭṭɛ ɛkkɛ myennin doki ka ɛkkɛ ŋeejin ‘ya bɛɛ. Yoñ ɛkkɛ bala ɛkkɛ ḍɔɔggɔti. Dala ɛkkɛ ɔgdɛ ooddɛ ɔntɔ te ‘yati wɛnni.’ 28Ɛkkɛ wiaktɛ a joono, ɔci ɛkkɛ lɛkɔ tiittɛti te yom yoñ ne ɛkkɛ gɔrtɛ Abrahim ɔci Icaak ɔci Yaakub, ɔci maka bɔwan Jwaŋa Tolan waakɛnda ne ɛkkɛn kaatti cyɛgji Jwaŋa Tolantiy, yeti ɛkkɛ aŋka ŋualdɛ Juaŋ ɔntɔ. 29Ɔci ma bɛya te pɔli ŋwayyɛti waakɛnda, ɔci ɛkkɛn cootti iñɔ non juma ban cyɛgji Jwaŋa Tolan. 30Ɛkkɛ maka cooŋi ñingɛn te wak ṭɛɛr wyeñɛ, ɔci boottin ‘yati acca te yoma awarɛ bɛɛ neeniyɛ, ‘ya ɛkkɛ ‘wondin genga ñaalɔ pɔliji bɛɛ. Yeti ɛkkɛ maka waka iñɔ wɛnni kuoŋnɛ ŋotkɔ waakɛnda, ɔci boonnɛ ‘yati acca te yoma awarɛ neeniyɛ, ɛkkɛ aŋka ‘wondin ‘ya waak ne coŋɔn ba yomg ɛkkɛ ‘yati.” 31Ɔci te oŋŋa wannayɛ, ma Pɛriciin gɛɛg bɛɛn Yaccuti ɔci gɔkcin ɛkɛti agi, “Dala i jɔlla ñaalɔ te bana neeniti wɛnni ookca bora ootta bana parɛ aŋka i uddi, acaan Hiruuduc Antipac buagɔn noki i.” 32Ɔci Yaccu gɔkcin ɛkkɛnti agi, “Dala ɛkkɛ ooddɛ Hiruuduc Antipac mena labjɛ tolan ba wɛɛw neeni myettɛ agi ‘ya tieŋjɔ. Gɔṭṭɛ, ‘ya baal koocca jɔkin yeyin bora ɔci yɔŋ ma waakɛn te oŋi ɔci ne liidɔ ɔci ne oŋiti moki ɔɔn. ‘Ya kanŋa ‘ya cwamja. 33Ɛɛ, dala ŋeeddɛ ɛkkɛ ‘ya baal pɔɔjɔ, acca ɔci ne liidɔ ɔci ne oŋiti ɔɔn. ‘Ya kanŋa ‘ya cwamdo. ‘Ya tuud bora bɛɛ, ‘ya nokta ma aŋan ban Urcaliimji ba bɔwan Jwaŋa Tolan bɔwan nogɛ ɛkkɛn ñamu, wanna ɔɔn. 34“Hay! Ma Urcaliim, ma Urcaliim, maka noki bɔwan Juaŋ, maka yebi maka cuonnɛ Jwaŋa Tolan ɛkkɛti te gwoyi nɛ. Bala ba aakṭi mɛɛgɛn ne boori ṭɔlg ɛkɛ, ɔci ṭɔlg ɛkɛ wɔtti ɛkɛ bɔggɛtiyɛ, ɔci oŋkanda yom ‘ya buagɔn ka da ɛkkɛ bɛɛdɛ ‘yati a ɔɔn daŋkun, yeti ɛkkɛ yookɛ te ‘ya! 35Gɔṭṭɛ, on ɛkkɛ on Juaŋ ona tolan dalnɛ Jwaŋa Tolan doki. Tieŋdɛ! ‘Ya yuardata ɛkkɛ moki bɛɛ, yeti ne ‘ya bɛɛda kooda ban ɛkkɛ, ɔci ɛkkɛ gɔktɛ ‘yati agi, ‘Mena bɛɛn te yenti Jwaŋa Tolan neeniyɛ, ɛkɛ pwad pwado. Dala ɛkkɛ jieyɛ ɛkɛ!’”

will be added

X\