Luuk 12

1Ɔci ne ɛkkɛn balki gɔkki jyek muŋi Yaccu menyɛ, ɔci ma waakɛn ḍɔɔlɛ ne coŋɔn te oŋŋa wannati. Ɔci acaan ma bala kɔɔna kɔɔniyɛ, ma bala moori ciegɛnti a morto. Ɔci Yaccu gɔkcin maka laldɛ ɛkɛti ñamu agi, “Gɔṭṭɛ, dala ɛkkɛ woŋgɔ tiittɛ te ñamg ma Pɛriciin. Ñamga guagdi ‘ya neeniyɛ, gena ñamg woodgɛn bɛɛ. Gena naŋka ɛkkɛn noŋki ma ñingɛny. 2Gen gɛɛl coktanyɔ ma bɛɛ, yeti gena coktanyɔ mayɛ, ne baaṭi ɛkɛ dɔki bɛya bora. Ɔci moki ma yaakinti jiek coktanyɔ korkɛnti bɛɛ. Ne baaṭi jyeka neeni bɛya bora moki. 3Gena guaktan ma nona mielyɛ, tieŋtan ma te oŋji nona bɔwan doki. Ɔci moki kan gena guaktan meetan ma a meed oorg jitintiyɛ, tieŋtan ma te bora ne ma balki gɔkki jyeka neeni te pwana tolany. 4“Hay! Mung ɔɔn, ‘ya gɔkka ɛkkɛti naa ɛkkɛ buayɛ te maka noki ɛkkɛ waakɔ neeni bɛɛ. Acaan ɛkkɛn yaakinti noŋdi naŋka parɛ gɛɛl moki bɛɛ. 5’Ya ṭey ɛkkɛ aŋka ɛkkɛ mena buayɛ ɛkkɛ ŋeeddɛ, gena Jwaŋa Tolan. Dala ɛkkɛ buattɛ Juaŋ mena yaakinti noki ma waakɛn, ɔci yaakinti ma yiɛptɛ bana maañti awarɛy. ‘Ya gɔkka ɛkkɛti ka dala ɛkkɛ buattɛ mena guaŋi ‘ya neeni! 6“Tieŋdɛ, ḍiirga ḍyɛrin ne dɔɔyɔ ma wɛɛṭi te giric ne cyɛɛlɔ bɛɛ? Yeti Jwaŋa Tolan ɛkɛ ḍiirga ḍyɛrin neeni ŋeejɛ ɛkɛ waakɛnda. Ɛkɛ ñingɛ yeya te ḍiirga ḍyɛrin gɛɛg bɛɛ. 7Ɔci moki Juaŋ gɔṭi ɛkkɛ ne tolan. A ɔɔnyɛ, naa ɛkkɛ buayɛ bɛɛ. Juaŋ gɔṭi ɛkkɛ ne tolan te ḍiirga ḍyɛrin ḍiirga coŋin neeni, acaan ɛkkɛ pwadgɛ ne tolan te ḍiirga neeni! 8“Gɔṭṭɛ ‘wota, ‘ya ɛkkɛ myettin, kan maka gɔki agi ‘ya ŋeejatiyɛ, ɔci ‘ya Kaci Ma Baan malɛɛkan myetka daŋkun ka maka neeni ɛkkɛn a ma ‘ya. 9Ɔci kan mena kɛki gɔki agi ‘ya ŋeejati ɛkɛ bɛɛyɛ, ɔci ‘ya da malɛɛkan kɛkka ka ɛkɛ ŋeej ‘ya daŋkun bɛɛ. 10“Tieŋdɛ, kan mena gɔki wooki ‘ya Kaci Ma Baanyɛ, ɛkɛ bɔɔktɛ Jwaŋa Tolan, yeti gɔṭṭɛ, kan men gɛɛl wooki Boŋ Juaŋyɛ, ɛkɛ bɔɔktɛ Juaŋ te naŋka neeni moki bɛɛ, ɛkɛ ḍakcin doki. 11“Ɔci gɔṭṭɛ, ne ɛkkɛ eetɛ ma oorga morki ma Juaŋ aŋka ɛkkɛn ɛkkɛ noŋtɛ godan ma ñomgɛntiyɛ, naa ɛkkɛ buayɛ jyeka guagdɛ ɛkkɛ ɛkkɛnti bɛɛ. Ɔci moki kan ɛkkɛ eetɛ ma ḍuaŋan ṭɔlgɛnti walla maka ḍwaŋintiyɛ, naa ɛkkɛ buayɛ lieṭɛ jiek yomgɔti aŋka ɛkkɛ ṭwoktɛ mati aŋka yuocɛ waakɔ bɛɛ. 12Acaan te oŋŋa wannayɛ, ɛkkɛ nɔɔttɛ Boŋ Juaŋ te jyeka guagdɛ ɛkkɛ matiy.” 13Ɔci men gɛɛl bala nona poli ma polla tolanti neeni. Ɔci ɛkɛ gɔkcin Yaccuti agi, “Mena loṭi may, dala i gɔkca mod ɔɔnti aŋka ɛkɛ ‘ya wɛtta wak wey ɔɔn.” 14Ɔci Yaccu gɔkcin ɛkɛti agi, “Hay, muk ɔɔn! ‘Ya naŋŋa menɛ a mena gɔṭi godan ɛkkɛti i moodɔ? Ɔci moki ‘ya naŋŋa menɛ a mena ma wɛɛddɛ waako?” 15Ɔci ɛkɛ gɔkcin ɛkkɛnti waakɛnda agi, “Dala ɛkkɛ woŋgɔ tiittɛ te jyek bwakti waka budan waakɛnda. Acaan men baan tɛɛti awarɛ te waka coŋin neeni bɛɛ.” 16Ɔci Yaccu ɛkkɛn myennɛ te jwalla caagɔn gɛɛl agi, “Mena ‘uan gɛɛl mena cyɛgan bala dwoki pok yelk jitin, ɔci yelk ɛkɛ eccin pok ne coŋɔn. 17Ɔci ne ɛkɛ gɔrni pok coŋki a ɔɔnyɛ, ɛkɛ bala poŋi te jyeka neeni yomɛti agi, ‘Hay, ɛkkɛ! ‘Ya noŋja a ɔki yeti? Acaan ‘ya balka tuotka ḍɔcca ‘ya poka coŋin neeni bɛɛ?’ 18“Ɔci ɛkɛ poŋjin yomɛti, ɔci ɛkɛ gɔki agi, ‘Ɛɛ, ‘ya noŋja a ɔɔn, ‘ya tuotk ‘ya laagdiyɔ, ɔci ‘ya ejja ɛkkɛn ḍwaŋin, ɔci ‘ya pok pwokca tuotk jitin, ɔci wak ‘ya waakɛnda olja jiju. 19Ɔci ne naŋka neeni ḍagda ‘yayɛ, ‘ya oŋ gɔkca war ‘yati oŋ agi, hay, war ‘ya, i tieŋni! Naa i taabba te genga moki bɛɛ. Dala i coocca a cooccin budan, ɔci i omja ne pwadan, ɔci motca ne pwadan, ɔci cied te yoma ñɔyan oŋkanda ɔɔn.’ ” 20“Yeti ne ɛkɛ baali poŋi a ɔɔn menyɛ, Jwaŋa Tolan gɔkcin ɛkɛti agi, ‘Hay! I amgɔn, gɔṭṭi, te ween jiñɛ neeniyɛ, i tuudi. Oŋ waka ḍuanni i coŋin i waru ñɔyi neeni aga wak menɛ acca?’ 21“Ɔci gɔṭṭɛ daŋkun, ba jyek naŋki ‘wana neeniyɛ, bala ba jyek maka ḍɔci waka coŋin aŋka amtan ɛkkɛn pookɛny. Maka neeni ɛkkɛn balki waka coŋin, yeti Juaŋ ñamɛtiyɛ, ɛkkɛn bala ba maka bɔwan maka anin budan.” 22Ɔci ɛkɛ gɔkcin maka laldɛ ɛkɛti agi, “A ɔŋŋiyɛ, ‘ya gɔkka ɛkkɛti, naa ɛkkɛ poŋɛ te jyek coodi ɛkkɛ wɛnni bɛɛ, walla te jyek waka amdɛ ɛkkɛ bɛɛ, walla moki te waka ‘yɛŋdɛ ɛkkɛ bɛɛ. Yeti dala ɛkkɛ yomgɔ ḍuattɛ gena Jwaŋa Tolanti acaan waka neeni ɛkkɛn a waka bala ñamu aŋka ɛkkɛ woŋgɔ caŋdɛ te ɛkkɛn bɛɛ. Jwaŋa Tolan yaakinti ɛkkɛ ‘wondɛ ɛkkɛn. 23Yeti jyek tɛɛtin bala ñamu te jyek oomdin. Ɔci moki jyek waak ikin bala ñamu te bworŋin. 24Gɔṭṭɛ, ḍiirgyɛ, ɛkkɛn dwoki pok bɛɛ, ɔci ɛkkɛn ɛṭi pok bɛɛ, ɔci balki tuotk walla nona ḍɔcki ɛkkɛn waak gɛɛl bɛɛ. Yeti Juaŋyɛ, ɛkɛ ɛkkɛn ‘wondɛ waka amtan ɛkkɛn oŋkanda. Yeti ɛkkɛ pwadgɛ Juaŋti ne tolan te ḍiirgo. 25Ɔci moki men gɛɛl ɛkkɛti yaakinti tɛɛtin ɛkɛ ‘uottiti parɛ te paŋi jiek boki? Hayɛllɛ! 26Ɔci kan ɛkkɛ kookɛti te naŋka ḍiɛran neeniy, oŋ ɛkkɛ poŋɛ jiek te jyeka pookɛn te jyek coodi ɛkkɛ neeni ogo? 27Dala ɛkkɛ poŋdɛ te jyek pɛɛppin luom jitin. Ɛkkɛn noŋi kanŋa bɛɛ, ɔci ɛkkɛn ṭwoṭi bworŋin bɛɛ, yeti ɛkkɛn pwanna pwanno. Cɔlaman mena a ḍuaŋa tolan te baaṭiyɛ, ɛkɛ bala ɛŋi bworŋin pwadin ne tolan, yeti ɛkɛ buanɛ pɛɛppin te pwanno. 28Hay! Ɛkkɛ maka jyeti Juaŋti ne ḍiɛran ṭɔɔlɛ budany, tieŋdɛ! Pɛɛppinyɛ, ɛkkɛn bala luom jitin, ɔci kan luom iin dokiyɛ, ɛkɛ tontan ma maaño, ɔci pɛɛppin neeni ɛkkɛn ḍakti ne pɛñan doki. Ɔci kan Juaŋ waka budan neeni naŋdɛ ɛkɛ pwanna pwani a ɔɔny, oŋ ɛkkɛ daŋkun, ɛkkɛ ‘wondɛ ɛkɛ waka ‘yɛŋdɛ ɛkkɛ daŋkun bɛɛ? 29“Jyek waka amdɛ ɛkkɛ, ɔci jyek waka maaddɛ ɛkkɛyɛ, naa paŋi ɛkkɛn bala ñamu ɛkkɛ yomgɔti bɛɛ. Naa ɛkkɛ yomgɔ wiak te jyek waka neeni bɛɛ. 30Maka a ma Jwaŋa Tolan bɛɛyɛ, ɛkkɛn lieṭi waka neeni ne tolan. Yeti ɛkkɛyɛ, Wey ɛkkɛ bala, ɔci ŋeejɛ ɛkɛ ɛkkɛ yaakɛti ciyɛ budan te waka neeni bɛɛ. 31Dala ɛkkɛ liertɛ jyek cyɛgji Juaŋ aŋka ɛkɛ bala ñamu ɛkkɛ yomgɔti, ɔci ɛkkɛ ‘uottiti Juaŋ waka neeni daŋkun.” 32Ɔci Yaccu gɔkcin ma ɛkɛti moki agi, “Hay! Poli ṭɔɔlɛ, naa ɛkkɛ buayɛ bɛɛ. Wey ɛkkɛ buagɔn ɛkkɛ ‘wondɛ cyɛgjo. 33Dala ɛkkɛ wak ɛkkɛ wiɛldɛŋɔ, ɔci dala ɛkkɛ maka bɔwan ‘wondɛ bilka neeni. Ɔci a ɔɔnyɛ, ɛkkɛ baltɛ waka pwadin ñaalɔ ban Jwaŋa Tolan. Waka neeniyɛ, ɛkkɛn baadi oŋgati bɛɛ. Ɔci ɛyi gɛɛg bala ñaalɔ aŋan bɛɛ, ɔci waka ḍyɛrin ba bɔŋni ɛkkɛn baaw moki. Wak ɛkkɛ ñaalɔ ḍakti te naŋki waka neeni bɛɛ. 34Nona ḍɔccɛ ɛkkɛ waakyɛ, ɛkkɛ yomgɔ bala aŋan ne tolan daŋkun.” 35Ɔci Yaccu gɔkcin ɛkkɛnti agi, “Dala ɛkkɛ waakɔ aga ywaŋgin, 36ɔci kɛɛddɛ ‘ya ba maka noŋi kanŋa ne kɛɛki weegɛn bɛɛdi dɔɔkti baanji te nona atti ɛkɛ jumatiy. Ɛkkɛn kɛɛy aŋka ɛkɛ ne ɛkɛ bɛɛdi ɔci borti on tukɛtiyɛ, ɛkkɛn ɛkɛ pɔktan ne pɛñan doki. 37Tieŋdɛ, maka noŋi kanŋa neeni kan ɛkkɛn mɔktɛ wey ɛkkɛn ne tɛɛtki ɔci waakɛn a ywaŋgɔnyɛ, ɛkkɛn yomgɛn ñɔya ñɔɔno. Acaan weegɛn warɛ ywaŋdɛ, ɔci ɛkɛ gɔkti ma kanŋati agi dala ɛkkɛn cootti iñɔ, ɔci ɛkkɛn eektɛ weegɛn oomdin. 38Kan weegɛn bɛya te ween jiñɛ tuodan walla kan bɛya ne tinnɔ, ɔci kan ɛkkɛn mɔktɛ ɛkɛ tɛɛti menyɛ, ɛkkɛn yomgɛn ñɔya ñɔɔno. 39Dala ŋeeddɛ ɛkkɛ ne pwadan on weegɛnyɛ, kan te oŋ waŋa bɛɛdi mena ɛɛn neeni te ŋeejɛyɛ, ɛkɛ te wiccin bɛɛ. Ɛkɛ te bala kɛɛy ɔci te mena ɛɛn neeni te kaaccin orɔ bɛɛ. 40Ɔci ɛkkɛ daŋkun, dala ɛkkɛ yomgɔ ywaŋdɛ ne pwadan acaan ba oŋ waŋa guaktan ma agi ‘ya Kaci Ma Baan bɛɛdjɔ bɛɛ neeniyɛ, ‘ya dita bɛɛd ywoṭṭati dɔki.” 41Ɔci Butruc tooccin Yaccuti agi, “Hay, i Ciɛggɔn! Jwalla caagɔn neeni mienni i bora te ɔɔn Maka A Inyaakkɛn Wyetkɛn Ne Yyɛɛwɔ neeni pookɔ, walla te ma waakɛnda?” 42Ɔci Yaccu ṭwokcin Butructi agi, “Gɔṭṭi ‘wota, mena gɔṭi on ne pwadan mena ñingɛ tɛyan a menɛ? Ɛkɛ a mena naŋdɛ weegɛn a ḍuaŋa ma kanŋa aŋka gɔṭi ɛkkɛn ɔci ɛkkɛn ‘wonda oomdin oŋkanda ne pwadany. 43Mena nɔttɛ weegɛn jiek neeni kan bala noŋi kanŋa ɛkɛ neeni ne pwadanyɛ, ɛkɛ yomɛ pwada pwanno. 44Awarɛ, ne baaṭi ɛkɛ naŋdɛ weegɛn aga mena tolan te maka pookɛn, ɔci ɛkɛ aga mena mwoki wak weegɛn waakɛnda. 45Yeti kan mena neeni gɔkti yomɛti agi, ‘Wey ɔɔn kwatti aŋan, ɛkɛ bɛya ne pɛñan bɛɛ.’ Ɔci ɛkɛ jɔŋdi jiebdi ma kanŋa maka pookɛn maka ‘uayi ɔci maka a moongo. Ɔci ɛkɛ moki omdi ɔci motti ɔci noktan mooyo. 46Ɔci ne oŋ gɛɛlti ne baaṭi weegɛn bɛya ywortiti a ywoṭṭin ɔci mena yaayan neeni woottɛ poŋi te bɛɛn ɛkɛ neeni bɛɛ, ɔci walla da oŋa bɛɛdi weegɛn ŋeejɛ bɛɛ. Ɔci mena yaayan neeni ḍuadɛ weegɛn ne yaajan, ɔci ɛkɛ yiɛptɛ weegɛn ciginji i maka yeyin. 47Men kanŋa mena jyek weegɛn ŋeejɛ ne pwadan ɔci ɛkɛ waŋɛ a tiicin bɛɛ, ɔci walla noŋdi ba jyek weegɛn bɛɛyɛ, ɛkɛ ḍuadɛ weegɛn ne pɛñan. 48Yeti kan mena neeni jyek weegɛn ŋeejɛ ne pwadan bɛɛyɛ, ɔci kan ɛkɛ noŋdi naŋka yaayanyɛ, ɛkɛ ḍuadɛ weegɛn ne ḍiɛran daŋkun. Acaan kan men gɛɛl bala ñamu te naŋki gengayɛ, ma gɔki ɛkɛti agi dala naŋki ɛkta pwaddɔ ne tolan. Ɔci kan men gɛɛl ‘woñgi ma kanŋa tolanyɛ, ɔci ma gɔki ɛkɛti agi dala ɛkɛ kanŋa naŋdɛ ne pwadan daŋkun. 49“‘Ya bɛɛn aŋka ṭɛɛr toñga maaño. Dala te ‘ya maañ toñgan omjin doki. 50Taab pɛñan bala bɛya ‘yati, ɔci ‘ya muldawi taab neeni. Acca ‘ya yomu noki warɛ ne tolan ne naŋka neeni cɔmdi bora ɔɔn. 51Ɛkkɛ poŋɛ gɔkɛ agi te bɛɛna bɛɛna ‘ya neeni ma ciya ne pwadan iñɔ ṭɛɛrji wɛnnɛ? Hayɛllɛ! Gɔṭṭɛ, te bɛɛna bɛɛna ‘ya neeniyɛ, ma kɛɛpti jitin. 52Te acca neeniti ne ñamu ɔɔnyɛ, maka ciyi ona ne cyɛɛlɔ kɛɛpti jitin. Kan ma bala ne dɔɔyɔyɛ, ɛkkɛn yoddi ñino, ɔci maka ne ḍoogɔ neeniyɛ, ɛkkɛn maka ne yyɛɛwɔ neeni yooktan ñino, ɔci maka ne yyɛɛwɔ neeniyɛ, ɛkkɛn da yooktan te maka ne ḍoogɔ neeni. 53Kɛɛgin weyyɛn yooktan te kɛɛggɛn acaan ɛkkɛn a ma ‘ya, ɔci kɛɛgin da yooktan te weyyɛn acaan ɛkkɛn a ma ‘ya. Kɛɛgin mɛyyɛn yooktan te kɛɛgin ɛkkɛn kɛɛgin a moongo, ɔci kɛɛgin a moong yooktan te mɛyyɛn daŋkun acaan ɛkkɛn a ma ‘ya. Ɔci marin da yooktan te moong kɛɛggɛn acaan ɛkkɛn a ma ‘ya, ɔci moong da yooktan te marŋgɛn acaan ɛkkɛn a ma ‘ya.” 54Ɔci Yaccu gɔkcin maka coŋinti daŋkun agi, “Ne ɛkkɛ gɔrtɛ pɔli wyeñɛ baali yɔɔdi pɔya koriiyatiyɛ, ɛkkɛ gɔkɛ agi, ‘Ñaal noŋi bɛya,’ ɔci ñaal bɛya awarɛ. 55Ne ɛkkɛ gɔṭɛ jwami yoŋdi te pɔya cuayati mokiyɛ, ɛkkɛ gɔkɛ agi, ‘Te oŋi noon myɛlcin,’ ɔci bala a ɔɔn doki. 56Hay, ɛkkɛ maka noŋi ma ñingɛn nɛ, jyek waka bala iñɔ ṭɛɛr ŋoyɛti ɔci pɔliji ŋeejɛ ɛkkɛ, yeti jyek naŋka bɛɛn mati acca aŋka ñyecki ma bɛɛn Kiṭɔyɛ, ɛkɛ aŋka kwoyɛ ɛkkɛ ogo? Ɛkkɛ yiegɛ ne tolan, ɔci ɛkkɛ wookɛ Jwaŋa Tolan. 57“Dala ɛkkɛ pottɛ jyek ɛkkɛ ywaŋdɛ pookɔ. 58Kan i baal pɔɔjɔ ootta non godanti, ɔci i yɔɔrni iki mena tɛki i waruyɛ, dala i toocca ɛkɛti aŋka ɛkkɛ jiek ywaŋdɛ wona men ɛkkɛ dɛndɛ mena gɔṭi jiek ñamɛti bɛɛy. Kan a ɔɔn bɛɛyɛ, i wanti ma ɔci olti ma ciginji dita. 59Te jyeka awarɛ, i dita kooya bora te ciginji a ñaccu bɛɛ. I cied ne i ḍɔtti bilka ma buagi waakɛnda ɔɔn.”

will be added

X\