Luuk 11

1Ɔci Yaccu bala cɔki noon gɛɛlti. Ɔci ne ɛkɛ ḍookki te cɔŋiyɛ, mena laldɛ ɛkɛ gɛɛl gɔkcin ɛkɛti agi, “Ciɛggɔn, ɔɔn laldɔn te cɔŋi daŋkun bala ba Yɔhanna ne ɛkɛ baali loṭi maka laldɛ ɛkɛ wanna ɔɔn yɔŋ.” 2Ɔci ɛkɛ gɔkcin ɛkkɛnti agi, “Ɛɛ, yɔɔddɛ ɛkkɛ laldin daŋkun. Gɔṭṭɛ, ne ɛkkɛ cɔktiyɛ, dala ɛkkɛ gɔktɛ agi, Wey ɔɔn, dala yenti i tola. Dala ma gɔrti i a Ciɛggɔn Tolan noon warda. 3Ɔɔn ‘wondɔn oomdin te oŋŋa neeni. 4Ɔci ɔɔn bɔɔktɔn te nɔji ɔɔn, bala ba ɔɔn daŋkun maka pookɛn maka noŋi ne yaayan ɔɔnti bɔɔktɔn te nɔjja naŋtan ɛkkɛn ɔɔntiy. Naa ɔɔn daldɔn ooddɔn non jyeka yeyinti bɛɛ.” 5Ɔci Yaccu gɔkcin maka laldɛ ɛkɛti agi, “Kan men gɛɛl ɛkkɛti ooddi on muukɛnti te ween jiñɛ tuodanyɛ, ɔci kan ɛkɛ ñwoddi ɛkɛti agi, ‘Mug ɔɔn, dala i jɔŋŋa ñaalɔ ‘ya kɛnda byedg ne ḍoogɔ lakun 6acaan mug ɔɔn gɛɛl bɛɛn te nona loonan, ɔci ɛkɛ dɛññin acca, ɔci ‘ya balka genga aŋka ‘woñga ɛkɛ amdɛ bɛɛ.’ 7Ɔci mug ɛkkɛ gɔkti iti te orɔ kaapun agi, ‘Hay! A menɛ yeti bɛɛn jieci ɔɔn weenji ɔɔn? ‘Ya ‘yeŋi uuli te orñi doki, hay! Ɔɔn niinnɔn iñɔ i kɛɛgin ‘ya doki, hay! ‘Ya waru buagɔn jɔldi ñaalɔ moki aŋka i kɛndin waka i buagi neeni bɛɛ, dala nientin a weeno.’ 8“Yeti kan i toocca mug ɛkkɛti men ɔɔnyɛ, ɛkɛ jɔŋdi ñaalɔ, ɔci i kɛndi ɛkɛ waka i buagiti neeni waakɛnda. Yeti ɛkɛ jɔŋdi ñaalɔ acaan ɛkɛ a mug ɛkkɛ bɛɛ. Ɛkɛ jɔŋdi ñaalɔ te jiɛta i jieci ɛkɛ a jiɛt neeni. 9“Ɛkkɛ myettin ‘ya daŋkun. Dala ɛkkɛ cɔktɛ Jwaŋa Tolanti te gena ɛkkɛ buagɛy. Ɛkɛ a mena yomɛ pwadan, ɛkɛ ɛkkɛ ‘wondɛ gena ɛkkɛ buagɛy. Dala ɛkkɛ toottɛ ɔɔn, naa ɛkkɛ waakɔ pola te taat bɛɛ. Ɔci moki kan gena yaayan gɛɛl bɛɛn ɛkkɛ ḍɔɔggɔtiyɛ, dala ɛkkɛ toottɛ ɛkkɛti aŋka ɛkɛ ɛkkɛ ‘wondɛ ñing tɛɛno. Ɔci kan men gɛɛl ɛkkɛ kɛgdɛ pɔy ɛkɛjiyɛ, ɛkɛ ɛkkɛ magdɛ gena wanna uuttɛ ɛkɛ ɔntɔ te pɔɔjɔ. 11Kan kaci gɛɛl tootti weegɛnti te yeñña a ‘yɛɛgɔn gɛɛly, ɔci weegɛn kaci ‘wondɛ gena kaaŋɔ? A’a, bala a ɔɔn bɛɛ. 12Ɔci kan ɛkɛ tootti te kumi gɛɛly, ɔci weegɛn kaci ‘wondɛ gena jiinɔ? A’a, bala a ɔɔn bɛɛ. 13Oŋ ɛkkɛ, ɛkkɛ agɛ maka yeyin, yeti ɛkkɛ yaakɛti kɛɛgin ɛkkɛ ‘wondɛ waka pwadin waka toocki ɛkkɛn ɛkkɛti neeni. Oŋ Wey ɛkkɛ mena pwadan ñaalɔ pɔliji neeni, kan ma tooci ɛkɛti te waka pwadiny, ɛkɛ yaakinti ɛkkɛn ‘wondɛ ɛkɛ Boŋ ɛkɛ bɛɛ?” 14Ɔci oŋ gɛɛlti Yaccu jwaŋa yaayan koonɛ bora te mena ‘uanti. ‘Wana neeni yaakinti gɔki jiek te Jwaŋa yaayan neeni bɛɛ. Ɔci ne jwaŋa yaayan kooni bora te ɛkɛtiyɛ, ɔci ‘uan oŋ gɔkcin jiek oŋo. Ɔci maka coŋin neeniyɛ, ɛkkɛn yomgɛn buañi te naŋka neeni. 15Yeti maka neeni gɛɛg tieki gɔki agi, “Ah, gena Byɛljabul ciɛggɔn jɔkin yeyin waanɛ bala moki Yaccu te kaat jɔkin yeyin bora te mati neeni.” 16Ɔci maka pookɛn gɛɛgyɛ, ɛkkɛn da bala poci Yaccu a poccin. Ɛkkɛn bala ‘yeṭi ɛkɛti agi dala ɛkta ɛkkɛn lɛɛrtɛnti naŋka ñyecki ma ɛkɛ naŋka tɛyan gɛɛl wardan lɛɛlda bora ñaalɔ pɔliji. 17Yeti Yaccu paŋi ɛkkɛn ŋeejɛ ne ɛkkɛn pocki ɛkɛ a pocciny, ɔci ɛkɛ gɔkcin ɛkkɛnti agi, “Ba jwali konɛ bɛɛ. Gɔṭṭɛ, bana tolanyɛ, kan ma kɛɛptan jitin te jiekyɛ, coodi pwad pwad bɛɛ. Ɔci bala ba ma on tukɛ ne cyɛɛlɔ kan ɛkkɛn kɛɛptin jitin te jiekyɛ, ɛkkɛn ḍɛɛmdi iñɔ ɔci cyɛndi jitin. 18Yeti ɛkkɛ poŋɛ gɔkɛ agi ‘ya jɔkin yeyin kooya bora te war tɛɛn Byɛljabul. Jwaŋa Yaayanyɛ, kan ma ɛkɛ kɛɛptin te jiekyɛ, cyɛgji ɛkɛ yɔɔda ne tɛyan boki? A’a, jwali pɔɔnnɛ ɛkkɛ a ɔɔn. 19Ɔci kan te ‘ya jɔkin yeyin kooya bora te war tɛɛn Byɛljabulyɛ, oŋ ma ɛkkɛ ma Icrayiil ɛkkɛn jɔkin yeyin kootan bora te war tɛɛn menɛ? Kan jyek ɛkkɛ bala a ɔɔnyɛ, ma ɛkkɛ neeni loondi ɛkkɛti daŋkun bɛɛ? 20Yeti kan ‘ya jɔkin yeyin kooya bora te war tɛɛn Jwaŋa Tolanyɛ, dala ŋeeddɛ ɛkkɛ cyɛgji Jwaŋa Tolan bɛɛn owwan ‘ya ɛkkɛti doki. 21“Kan mena ‘uan mena warɛ tɛyan ne pɛñan balki wak lañyɛ, ɔci kan ɛkɛ bala gɔṭi on ɛkɛ ona tolan neeniyɛ, menga yaakinti noŋdi genga wak ɛkɛti bɛɛ. 22Yeti kan mena parɛ gɛɛl bɛyayɛ, ɔci kan ɛkɛ warɛ tɛɛcin ne tolan te mena te ñamu neeniyɛ, ɛkkɛn noogdi yaakkɛn ɔci ɛkɛ on weegɛn bwandɛ. Ɔci on weegɛn ṭwaldɛ ɛkɛ byeŋkɛti te wak lañ waakɛnda. Te ñamu on weegɛn bala poŋi agi wak lañ neeni tɛyɔ, ɔci agi menga yaakiti noŋdi genga ɛkɛti ne ɛkɛ balkiti waka neeni bɛɛ. Yeti kan mena warɛ tɛyan ne tolan te ɛkɛ gɛɛl bɛyayɛ, ɛkɛ kaatti orɔ ɔci waak eedɛ waakɛnda, ɔci ɛkɛ ma kiendɛ waka neeni budan. 23“Tieŋdɛ, naŋki ‘ya ŋeejɛ ɛkkɛ ɛkkɛn pwadɔ. Mena buagɔn ‘ya bɛɛyɛ, ɛkɛ yookɔn te ‘ya awarɛ. Ɔci mena lyemin iki ‘ya waak bɛɛyɛ, ɛkɛ waak cyɛddɛ jitin. 24“Ɔci ‘ya gɔkka ɛkkɛti te jwalla neeni moki. Kan men gɛɛl mugdɛ jwaŋa yaayan gɛɛlyɛ, ɔci kan jwaŋa yaayan neeni koodi bora te ɛkɛti ooddi ḍɔki a ḍwaŋi nona wɔɔgan nona iwan lieṭi nona woodi ɛkɛyɛ, ɔci kan nona ciyi ɛkɛ pwadan yuardɛ bɛɛyɛ, ɛkɛ gɔkti war ɛkɛti agi, ‘‘Ya ootta dɔwwa ona daljan ‘ya neeni.’ 25Ɔci ɛkɛ ooddi dɔɔdi menti, ɔci men mɔktɛ ɛkɛ pwanna pwanno, gena yaayan gɛɛl bala moki bɛɛ. 26Ɔci ɛkɛ oŋ ooddi etti jɔkin pookɛn jɔkin yeyin ne dɔɔyɔ wyetkɛn ne yyɛɛwɔ. Ɔci jɔkin neeniyɛ, ɛkkin ñamu buankɔn te yoño. Ɔci ɛkkɛn kaatti jiju menti waakɛnda, ɔci ‘wana neeniyɛ, coodi ɛkɛ coodda ne ŋoyɔyɛ, yaaya ne tolan nɔñji te coodda ñamu.” 27Ɔci ne Yaccu gɔŋni a ɔɔnyɛ, ɔci ɛɛŋ gɛɛl bala yɔɔd nona poli ma polla tolanti, ɔci ɛkɛ gɔkcin te pwana tolan agi, “Mena i jienni ɔci mena i niɛnni te aak neeniyɛ, dala Jwaŋa Tolan ɛkɛ naŋdɛ yomɛ ñɔya ñɔɔno.” 28Ɔci Yaccu gɔkcin ɛkɛti agi, “Ɛɛ, yeti maka tieŋdi jyek Juaŋ ɔci noŋdi ba jyek ɛkɛyɛ, ɛkkɛn aŋka yomgɛn ñɔɔna ñɔɔn ne tolan nɔñji.” 29Ɔci ne polla tolan balki bɛɛti kɛɛkti a kɛɛgjin ɛkɛti a ɔɔnyɛ, ɔci ɛkɛ gɔkcin ɛkkɛnti agi, “Hay ɛkkɛ maka ciyɛ acca nɛ, ɛkkɛ yiegɛ ne tolan! Ɛkkɛ lieṭɛ naŋka ñyecki ma aŋka ɛkkɛ lɛɛrtin ‘ya ne ‘ya cuonnati Juaŋ awarɛyɛ? A’a. Ɛkkɛ lɛɛrtin ‘ya naŋka wanna gɛɛl bɛɛ. Yeti ɛkkɛ gɔrtɛ gena naŋka bala ba naŋka naŋŋɛ Juaŋ Yunaanti mena a bɔwa te baaṭi neeni. 30Bala ba Yunaan ne noŋŋi naŋka ñyecki ma Jwaŋa Tolan maka ban Ninawatiyɛ, ɔci ‘ya Kaci Ma Baanyɛ, ‘ya da noŋŋa naŋka ñyecki ma Juaŋ mati maka bala accay. 31Mena a ḍuaŋa tolan ma Ciba, ḍuaŋa a ɛɛŋyɛ, ɛkɛ da jɔŋdi ñaalɔ i ɛkkɛ a cyɛɛlɔ te oŋ godan, ɔci te oŋŋa wannayɛ, ɛkɛ jiek dɔɔdɛ ɛkkɛ wyetkɔti. Acaan ḍuaŋa tolan neeni jɔŋŋin te ban ɛkkɛn bana loonan, ɔci ɛkɛ ati aŋka tieŋdi jyek Cɔlaman. Acaan Cɔlaman neeniyɛ, ɛkɛ ñingɛ tɛy tɛyo. Ɔci accayɛ, ‘ya mena ñing tɛɛn ɛkɛ bala ñamu te ñing tɛɛn Cɔlamanyɛ, ‘ya baal wɛnni, ɔci ɛkkɛ yookɛ te ‘ya. 32Gɔṭṭɛ, ne oŋ godan bɛɛdiyɛ, maka ban Ninawa jɔŋdi ñaalɔ i ɛkkɛ a cyɛɛlɔ te oŋŋa wanna, ɔci ɛkkɛn jiek dɔɔtan ɛkkɛ wyetkɔti. Acaan maka ciyi ban Ninawaji ne ɛkkɛn tieŋki jyek Yunaanyɛ, ɛkkɛn waakɛn yaljɛ ɔntɔ te naŋki ɛkkɛn. Ɔci accayɛ, ‘ya mena baal ñamu te Yunaan baal wɛnni. Ɔci ɛkkɛ yookɛ te ‘ya. 33“Kan men gɛɛl dyɛka tondɛ maañyɛ, ɔci dyɛka kwomdɛwi ɛkɛ te piil boki? Dyɛka ḍuattɛ ɛkɛ ñaalɔ nona ḍɔcki ma ɛkɛ aŋka kan maka bala orɔyɛ, ɛkkɛn dyɛgdɛyɔ dyɛka. 34Waŋ i ñoṭi noon ñortɛ war i warda. Yeti kan waŋ i gɔṭi ne pwadanyɛ, war i yaakinti nona ooddɛ ŋeeddɛ. Kan woŋgi i pwadɔ bɛɛyɛ, war i nona ooddɛ ŋeeddɛ bɛɛ. 35Bala a ɔɔn daŋkun, te yom iyɛ, i yaakiti mena jyetti i wanna ŋeejja ne pwadan. Kan yom i pwatcinyɛ, i yaakiti jyedda ‘yati, yeti kan yom i yaayɛyɛ, i yaakiti jyedda mena pwadan gɛɛlti bɛɛ. 36Dala i waŋu tiicca ɔci ŋeejja i ne pwadan a yom i pwatcin, ɔci a ɔɔnyɛ, i cood ne pwadan bala ba ona dyɛgɛji maaño.” 37Ɔci ne Yaccu baali gɔki a ɔɔn menyɛ, men ma Pɛriciin gɛɛl borcin ɛkɛti agi dala ɛkta bɛɛdɔ ɛkkɛn ominti am ban ɛkkɛn. Ɔci ɛkɛ ati orɔ, ɔci ɛkɛ cooccin iñɔ nona omki ma amy. 38Ɔci men ma Pɛriciin neeni yomɛ buañi ne Yaccu coonni iñɔ budan byeŋkɛ luaŋŋɛ ñamu bɛɛy. 39Ɔci Ciɛggɔn gɔkcin ɛkɛti agi, “Ɛkkɛ ma Pɛriciinyɛ, ɛkkɛ yɔŋɛ ḍwayi waakɛn te bora budan. Yeti ḍwayi korkɛntiyɛ, ɛkkɛn kuumi te waka yeyin ba ɛkkɛ yomgɔ ne kuumki te naŋki waka yeyin. Ɛkkɛ anɛ eñi wak maka pookɛn. Ɔci ɛkkɛ noŋɛ amaam ba wyetk ɛkkɛ pookɔ. 40Ɛkkɛ agi aamman. Mena cɔti ma korkɛn, ɔci mena cɔti ma waakɛn neeniyɛ, ɛkɛ a mena ne cyɛɛlɔ bɛɛ? 41Dala ɛkkɛ woŋgɔ tiittɛ te yomg ɛkkɛ. Dala ɛkkɛ maka bɔwan ‘wondɛ waak te yoma awarɛ. Ɔci a ɔɔnyɛ, waak waakɛnda pwaddi ba jyek ganuun ma Icrayiil ɛkkɛti. 42“Hay! Ɛkkɛ ma Pɛriciin, ɛkkɛ ‘woññɛ Juaŋ te wak ɛkkɛ oŋkanda waka ḍyɛrin. Gena naanna ɔci lɛlŋ ɔci janga pookɛn moki. Ɔci kan ɛkkɛn bala a inyaakkɛnyɛ, ɔci gɔ ɛkkɛ daŋkun ɛkɛ ‘woñgi oŋkanda ne cyɛɛlɔ ba naŋka Juaŋ buagɛ ɛkkɛti ɔɔn. Yeti naŋka ḍwaŋin naŋki ganuunyɛ, aŋka dalnɛ ɛkkɛ. Gena ani Jwaŋa Tolan, ɔci naŋka pwadan ma baanti. Dala te ɛkkɛ noŋdɛ waka neeni waakɛnda, naa te gɛɛl daldɛ bora bɛɛ. 43“Hay ɛkkɛ ma Pɛriciin, ɛkkɛ buagɛ ciyɛ kokin pwadinti oorga morki ma Juaŋ, ɔci ɛkkɛ buagɛ ma ñiepi ɛkkɛ ne pwadan dukkan jitin. 44Hay ɛkkɛ, ɛkkɛ yiegɛ. Ma yiegdi te ɛkkɛ. Ɛkkɛ balgɛ ba kolka jokki ma maka tuutan kolka kuolin ñin may. Ma poŋi gɔki agi pɔy pwadɔ, yeti ne ɛkkɛn ootti kolk wyetkɛntiyɛ, ɛkkɛn waakɛn cuultan.” 45Maka loṭi ma te ganuunyɛ, gɛɛg bala wɛnan. Ɔci ɛkkɛn gɛɛl ṭwokcin Yaccuti ne cyɛɛlɔ agi, “Mena loṭi may, te jyeka neeniyɛ, bala ba ne i wooki ɔɔn daŋkun no.” 46Ɔci Yaccu gɔkcin ɛkkɛnti agi, “Hay ɛkkɛ maka loṭi ma te ganuuny, ɛkkɛ gɔkɛ mati te jyeka loṭɛ ɛkkɛ ma jitkɛn tɛyan neeni, yeti ɛkkɛ woodgɔ balgɛ noŋɛ ba jyeka neeni bɛɛ. 47Hay, ɛkkɛ, ɛkkɛ eyɛ oorga jokki ma maka bɔwan maka nogɛ yɔrg ɛkkɛ neeni. 48Te naŋki ɛkkɛ neeniyɛ, bala ba ne ɛkkɛ poŋɛ gɔkɛ agi bɔwan te baaṭi neeni nogɛ yɔrg ɛkkɛ awarɛ. Ɔci moki te naŋki ɛkkɛ neeniyɛ, bala ba ne ɛkkɛ gɔkɛ agi nooŋŋa yɔrg ɛkkɛ bɔwan nokkɛti neeni pwatcin ɛkkɛti. Yɔrg ɛkkɛyɛ, ɛkkɛn a maka noki bɔwan Jwaŋa Tolan, ɔci ɛkkɛyɛ, ɛkkɛ agɛ maka yɔŋi oorga jokki ma maka bɔwan neeni. 49Te jyeka neeniyɛ, Jwaŋa Tolan gɔki te ɛkkɛ agi ɛkɛ ma cuoñjɛ bɔwan ɔci cuudan, ɔci maka neeni gɛɛg nogjɛ ɛkkɛ, ɔci ma gɛɛg naŋjɛ ɛkkɛ ne yaayan. 50Ɔci a ɔɔnyɛ, dala tieŋdɛ jwalla neeni ne pwadan, jyek lyen bɔwan waakɛnda, bɔwan nogɛ ma te ñamu wona noon aŋŋɛ Jwaŋa Tolan, ɔci ne acca ɔɔnyɛ, jyek lyen ɛkkɛn bɛya aŋa ɛkkɛ wyetkɔti maka ciyi accay. 51Bɔwan nogɛ ma neeniyɛ, gena Habiil, ɔci bɔwan pookɛn, ne Jakariyati ɔɔn. Jakariya neeniyɛ, ɛkɛ bala yɔɔd yiika on Juaŋ ona tolan i gena ɛrki ma waaky. Ɔci ne ɛkɛ baali wɛnanyɛ, ɛkɛ nogɛ ma. Awarɛ, ‘ya gɔkka ɛkkɛti, jyek yimg maka bɔwan neeniyɛ, bɛya ɛkkɛ wyetkɔti ɛkkɛ maka bala ciyi accay! 52“Hay, ɛkkɛ maka noŋi kanŋa ganuun! Ma buagɔn ka jyek Juaŋ ŋeettan, yeti ɛkkɛ pɔy tuka ɛkkɛn jiek ŋeettɛti ne pwadan uullɛ. Ɛkkɛ woodgɔ da kaannɛ pɔy tukɛ neeniti bɛɛ, ɔci moki maka buagɔn ka ɔga pɔy tuka neenitiyɛ, ɛkkɛn dɛɛnɛ ɛkkɛ.” 53Ɔci ne Yaccu jɔŋni noŋi kaatti bora te ona neenitiyɛ, maka loṭi worga Juaŋ ɔci ma Pɛriciinyɛ, ɛkkɛn bala wooki ɛkɛ ne pɛñan, acaan ɛkkɛn buagɔn Yaccu gɔkti jyeka coŋin. 54Ɛkkɛn buagɔn Yaccu jwali gɛɛl damdɛ aŋka ɛkɛ muktan ɛkkɛn.

will be added

X\