Luuk 10

1Ɔci ne jyeka neeni baakiyɛ, Yaccu maka pookɛn gɛɛg muonɛ bora a ma baan ne ḍoogɔ mena parɛ byeŋkɛ (70). Ɔci ɛkɛ ɛkkɛn cuuññɛ botcin ñamu bonka pookɛn jitin. Ɔci ɛkkɛn magga da atin ne yyɛɛwɔ, ɔci magga da atin ne yyɛɛwɔ. Maka neeni cuuññɛ ɛkɛ ñamu bonka ḍwaŋin ɔci bonka ḍyɛrin jitin, bonka ɛkɛ buagɔn ooddi ɛkkɛnti neeni. 2Ɔci ɛkɛ gɔkcin ɛkkɛnti agi, “Maka coŋin buagɔn tieŋdi jyek ‘ya ɔci jyeddi, yeti maka loṭi ɛkkɛn te jyek ‘ya a ḍiɛkan ṭɔlgɛn budan. Dala ɛkkɛ cɔktɛ Jwaŋa Tolanti aŋka dala ɛkɛ ma kanŋa ‘uottɛti cuondɛ ɛkɛ aŋka ɛkkɛ maktɛ. 3Dala ɛkkɛ ɔgdɛ ooddɛ. Yeti gɔṭṭɛ! Ɛkkɛ balgɛ ba kulin ṭɔlgɛn ḍyɛrin. ‘Ya ɛkkɛ cundin nona balki bowiny. 4Naa ɛkkɛ eedɛ bilk kucin korkɛnti bɛɛ, walla cɔnta ecɛ ɛkkɛ waak bɛɛ, walla wɛɛyi korkɛn ne yyɛɛwɔ bɛɛ. Ɔci kan ɛkkɛ koogdɛ iki magga yomɔyɛ, naa ɛkkɛ ñiebdɛ iki ɛkkɛn bɛɛ. 5“Ne ɛkkɛ kaattɛ on gɛɛltiyɛ, dala ɛkkɛ ñieptɛ mati ñamu agi, ‘Dala ɛkkɛ coodɛ te pwanno.’ 6Ɔci kan men gɛɛl bala ona neeniti, ɔci ɛkɛ yomɛ pwanna pwaniyɛ, jyeka guagdɛ ɛkkɛ ɛkɛti te coodi pwani neeniyɛ, aga jyeka pwadin ɛkɛti. Yeti kan ɛkɛ yomɛ pwad pwad ɛkkɛti bɛɛyɛ, jyek coodi pwani neeni bala ɛkɛti bɛɛ, bala gena ɛkkɛti pookɔ. 7Dala ɛkkɛ ciedɛ te ona ne cyɛɛlɔ, ɔci dala ɛkkɛ omdɛ ɔci mottɛ iki ma ona neeni. Acaan mena noŋi kanŋayɛ, dala ɛkɛ ‘wontan ma waak ba kanŋa ɛkɛ. Naa ɛkkɛ atɛ ḍɔkɛ a ḍwaŋi gɔ moki atɛ oorga pookɛnti ɔɔn moki bɛɛ. 8“Ɔci gɔṭṭɛ moki, ne ɛkkɛ kaattɛ baan gɛɛltiyɛ, kan maka bana neeniti ñiebdɛ iki ɛkkɛ ne pwadanyɛ, dala ɛkkɛ omdɛ waka ɛkkɛ ‘wontɛ ɛkkɛn neeni. 9Dala maka waakɛn yeyin ywaŋdɛ, ɔci dala ɛkkɛ gɔktɛ ɛkkɛnti agi, ‘Hay! Gɔṭṭɛ ɔɔn gɔktɔn ɛkkɛti. Jyek cyɛgji Jwaŋa Tolan bɛɛn oṭṭinti ɛkkɛti doki aŋka mugdɛ ɛkkɛ.’ 10Yeti ne ɛkkɛ kaattɛ baan gɛɛlti, ɔci kan maka bana neeniti yookɔn te ɛkkɛyɛ, dala ɛkkɛ yɔɔttɛ ban ɛkkɛn konɛti, ɔci dala ɛkkɛ gɔktɛ mati agi, 11‘Šɛr ban ɛkkɛ ṭɛra bala ɔɔn ciegɔti neeniyɛ, ṭyɛŋdɔn ɔɔn iñɔ te ban ɛkkɛ wɛnni, aŋka ŋeettan ma ɛkkɛ yookɛ te jyeka awarɛ neeni. Ɔci dala ŋeeddɛ ɛkkɛ jyek cyɛgji Jwaŋa Tolan bɛɛn ban ɛkkɛ doki.’ 12’Ya gɔkka ɛkkɛti agi, ne oŋ godan oŋŋa tolan bɛɛdiyɛ, taab ban Caduum ɔci ban Gamɔɔra bwandɛ taab maka bana yooktan te ɛkkɛ neeni! 13“Hay, ɛkkɛ maka ciyi ban Kɔrajin, ɔci ɛkkɛ maka ciyi ban Bɛtceeyida, ɛkkɛ wyetkɔ tɛɛna tɛɛn ba ooŋkan a ɔɔn ogo? Maka ban Tayir ɔci maka ban Ciḍɔɔnyɛ, kan te ɛkkɛn gɔrki naŋka tɛyan naŋka naŋi ‘ya neeniyɛ, te ɛkkɛn ɛɛŋjin bworŋin cyeji, ɔci wyetkɛn tuoggi tooldin te yom yoñ te nɔji ɛkkɛn doki, ɔci te ɛkkɛn waakɛn yali ‘yati te baaṭi doki. 14’Ya gɔkka ɛkɛti, te oŋ godanyɛ, taab maka ban Tayir, ɔci taab maka ban Ciḍɔɔnyɛ, ɛkɛ bala ñamu te taab ɛkkɛ bɛɛ. Taab ɛkkɛ aŋka tolcin. 15“Ɔci ɛkkɛ maka ban Kapɛrnyam, ɛkkɛ poŋɛ gɔkɛ agi ɛkkɛ waakɔ koobdɛ ñaalɔ ooddɛ ne ñaalɔ pɔliji ɔci ḍwaŋdɛ ne baaṭi? A’a, ɛkkɛ ḍwaŋdɛ bɛɛ. Ɛkkɛ ḍɛɛmdɛ Jwaŋa Tolan iñɔ ne pɛñan. Ɛkkɛ eetɛ ma bana yaayanti acaan ɛkkɛ waka naŋi ‘ya ban ɛkkɛ a waka te ɛkkɛ jyeddɛ ‘yatiyɛ, tuoññɛji ɛkkɛ waakɛnda.” 16Ne jyeka neeni baakiyɛ, Yaccu oŋ gɔkcin maka laldɛ ɛkɛti agi, “Ɛɛ, maka tieŋdi jyek ɛkkɛyɛ, ɛkkɛn tieŋdi jyek ‘ya daŋkun. Ɔci maka yookɔn te ɛkkɛyɛ, ɛkkɛn yookɔn te ‘ya daŋkun. Ɔci mena yookɔn te ‘yayɛ, ɛkɛ da yookɔn te Jwaŋa Tolan mena ‘ya cuonna neeni daŋkun.” 17Ɔci maka a ma baan ne ḍoogɔ mena parɛ byeŋkɛ (70) neeniyɛ, ɛkkɛn dɔɔkkin te yoma ñɔyan te nona ɛkkɛn cuuññɛ Yaccu lorki may. Ɔci ɛkkɛn gɔkcin Yaccuti agi, “I gɔrni bo Ciɛggɔn, nona ɔɔn cuuññɔn i waayiti kan ɔɔn gɔktɔn jɔkin yeyinti te yenti iyɛ, ɔci ɛkkɛn tieŋdi jyek ɔɔn doki, ɔci ɛkkɛn noŋi ba jyek ɔɔn!” 18Ɔci Yaccu gɔkcin ɛkkɛnti agi, “Ɛɛ, yeti gɔṭṭɛ, ‘ya gɔrcan Jwaŋa Yaayan yuarcan ḍɛmmin te ñaalɔ ne pɛñan ba ñaal ne wildi a wildiny. 19Yeti gɔṭṭɛ, ɛkkɛ ‘wonnin ‘ya war tɛɛn byeŋkɔti aŋka ɛkkɛ kogi ɔci jiidg moortɛ iñɔ, ɔci ɛkkɛn noŋdi genga ɛkkɛti bɛɛ. Ɔci mena yookɔn te ɛkkɛ mena tɛyan neeniyɛ, war tɛɛn ɛkɛ bwandɛ ɛkkɛ daŋkun te war tɛɛn ɛkkɛ ‘wondin ‘ya neeni. 20Yeti naa ɛkkɛ yomgɔ ñɔya ne jɔkin yeyin noŋki ba jyek ɛkkɛ ɔɔn bɛɛ. Dala ɛkkɛ aŋka yomgɔ ñɔya ne tolan acaan yeng ɛkkɛ kiinnɛ Jwaŋa Tolan worgaji ñaalɔ pɔliji agi ɛkkɛ agjɛ ma ɛkɛ doki.” 21Ɔci te oŋŋa wanna Yaccu yomɛ ñɔɔn ne tolan te Boŋ Juaŋo, ɔci ɛkɛ gɔkcin agi, “Hay i Wey ɔɔn, i a Ciɛggɔn ñaalɔ, ɔci i a Ciɛggɔn nona iñɔ wɛnni moki! Pwatcin doki acaan jyeka neeni coŋŋiyɔ i maka gɔki agi ɛkkɛn ñingɛn tɛyɔti, ɔci i jiek lɛɛlni bora aŋa maka waakɛn dɔwwɛ iñɔ buagɔn jiek jitkɛn yuartany. Hay, Wey ɔɔn, ‘ya gɔkka iti a pwatcin moki acaan naŋka neeni pwatcin iti hay!” 22Ɔci Yaccu gɔkcin mati agi, “‘Ya ‘wonna Wey ɔɔn bieŋuti waak waakɛnda. Menga yaakinti ‘ya Kaci Juaŋ neeni ŋeejɛ ne ɛkɛ agɛ menɛ bɛɛ. Gena Weegɛn parɛ aŋka ɛkɛ ŋeejɛ ne pwadany. Ɔci menga Kaci Weegɛn ŋeejɛ bɛɛ. Gena ‘ya Kaci parɛ aŋka ɛkɛ ŋeejɛy. Ɔci moki kan ‘ya Kaci Wey ɔɔn lɛɛlla bora matiyɛ, maka neeni yaakinti Juaŋ ŋeettan ne pwadan.” 23Ɔci Yaccu gɔkcin maka laldɛ ɛkɛti lieda agi, “Maka gɔṭi ba waka gwaldɛ ɛkkɛ accayɛ, ɛkkɛn yomgɛn ñɔɔna ñɔɔno. 24Maka a bɔwan Jwaŋa Tolan ɔci ḍuaŋan ḍwaŋin maka coŋin te baaṭiyɛ, ɛkkɛn buagɔn gɔrti naŋka gwaldɛ ɛkkɛ acca neeni, yeti naŋka neeni yuarɛ ɛkkɛn bɛɛ, ɔci moki ɛkkɛn buagɔn ka te tieŋdi jyeka tieŋdɛ ɛkkɛ acca neeni daŋkun, yeti ɛkkɛn tieŋŋin jyeka neeni bɛɛ.” 25Ɔci oŋ gɛɛlti mena loṭi worga Juaŋ gɛɛl jɔŋŋin ñaalɔ, ɔci tooccin Yaccuti te jwalla a caagɔn gɛɛl. Ɛkɛ poci Yaccu a poccin. Ɛkɛ tooccin ɛkɛti agi, “Mena loṭi may, ‘ya noŋja a ɔki aŋka tɛɛtin baadi bɛɛ neeni yuarda ‘yay?” 26Ɔci Yaccu tooccin ɛkɛti agi, “Hay, i! Jyek ganuun jyeka kiigin neeni gɔki a ɔki? I baal poŋ a ɔki te ɛkkɛn?” 27Ɔci ɛkɛ ṭwokcin agi, “Ganuun gɔki agi, ‘Dala ɛkkɛ anɛ Ciɛggɔn ɛkkɛ Jwaŋa Tolan ne tolan. Dala ɛkkɛ anɛ ɛkɛ te yomg ɛkkɛ waakɛnda, ɔci te coodi ɛkkɛ moki waakɛnda, ɔci kandɛ ɛkɛti te war tɛɛn ɛkkɛ moki waakɛnda, ɔci te paŋi ɛkkɛ moki waakɛnda.’ ‘Ɔci dala anna ɛkkɛ anɛ ma ɛkkɛyɛ, yoomdi i anna ɛkkɛ anɛ waak ɛkkɛy.’” 28Ɔci Yaccu gɔkcin ɛkɛti agi, “Jyek ṭwoggin i neeni yɔmjin, bɛɛn ne pwadan hay! Dala i noŋja ba jyek ṭwoggin i neeni oŋkanda, ɔci i uddi.” 29Ɔci mena loṭi worga Juaŋ neeni poŋi gɔki agi naa Yaccu poŋdɔ gɔɔdɔ agi ɛkɛ tooccɛ jyeka neeni budan bɛɛ. Ɔci ɛkɛ tooccin ɛkɛti moki agi, “Ma ɔɔn neeni a makɛ?” 30Ɔci Yaccu ṭwokcin agi, “Tieŋŋa jwali ṭɔɔlɛ neeni. Mena ‘uan gɛɛl bala ati te ban Urcaliim, ati ooddi ban Jɛrikɔ. Ɔci ɛkɛ koogjin iki maka ɛyi gɛɛg pɔɔjɔ. Ɔci ɛkɛ mugɛ ɛkkɛn, ɔci bworŋin ɛkɛ guoddɛ bora te ɛkɛ warɛti, ɔci ɛkɛ jiebɛ ɛkkɛn, ɔci dalji a lien doki. 31Ɔci gɔṭṭi te oŋŋa wannayɛ, mena gaciic ma Icrayiil gɛɛl bala ati te pɔya neeni daŋkun ooddi noon gɛɛlti. Ɔci ne gaciic neeni ‘wana neeni yuarnɛyɛ, ɛkɛ kɛccin pɔy taaŋŋa parɛti, ɔci ɛkɛ ati doki. 32Ɔci men ma Laawi gɛɛl bɛɛn daŋkun bala goṭi pɔya neeniji, ɔci men yuarŋɛ, ɔci ɛkɛ kɛccin ɔntɔ pɔy taaŋɛti, ɔci ɛkɛ ati daŋkun men dalnɛ walla konɛ ooŋŋin ɛkɛti bɛɛ. 33Yeti men ma Camɛɛrya, kɛɛna yoyi ñin i ma Icrayiil neeni gɛɛl bala ati goṭi pɔya neeniti daŋkun, ɔci ɛkɛ mena neeni mɔŋnɛ bala niin pɔɔjɔ. Ɔci ɛkɛ yomɛ pɔŋnɛ buagɔn mena neeni magdɛ. 34Ɔci ɛkɛ orcinti ɛkɛti, ɔci ɛkɛ men luaŋŋɛ nonka ɛkɛ jiepkiti ma neeni, ɔci noŋnɛ ñɔɔno, ɔci poornɛ bworŋin. Ɔci ɛkɛ mena neeni ḍuannɛ tɔɔrɔn ɛkɛ ŋoyɛti, ɔci eññɛ on maka wɛlg on bilko, ɔci ɛkɛ bala gɔṭi ɛkɛ. 35Ɔci ne liidɔyɛ, ɛkɛ bilk gɛɛg oonɛ bora ɔci ‘wonnɛ on weegɛn. Ɔci ɛkɛ gɔkcin ɛkɛti agi, ‘Dala i gɔrca ‘wana neeniti ne pwadan, ɔci ne ‘ya dɔɔktayɛ, kan i buagi bilk makɛnyɛ, i ‘uottin moki.’ ” 36Ɔci Yaccu tooccin mena loṭi ganuun neeniti agi, “Oŋ acca i poŋ gɔk a ɔki? Te naŋki maka ne ḍoogɔ neeni, ba mena noŋi ba ‘wana yacci ma neeni agi ma ɛkkɛn waanɛ bɛ?” 37Ɔci ‘uan gɔkcin Yaccuti agi, “Gena mena yomɛ pɔŋnɛ ‘uantiy.” Ɔci Yaccu gɔkcin agi, ‘Ɛɛ, walla yuarni ba, dala i daŋkun ootta noŋja ba naŋki ɛkɛ ɔɔn mati.’ 38Ne Yaccu baali atki iki maka laldɛ ɛkɛ menyɛ, ɛkkɛn dɛñjin baan gɛɛlti bana ciyi mena ɛɛŋ gɛɛl yenti Marta. Ɔci Marta gɔkcin ɛkkɛnti te yoma pwadan agi dala ɛkki coottɔ on ɛkɛ. 39Ɔci kow Martan bala yenti Moryam. Ɔci Moryam cooccin iñɔ ṭɛɛrji Yaccu ñamɛti, ɔci ɛkɛ bala tyeŋi jyek ɛkɛ. 40Yeti Marta bala ñingɛ juadan te kanŋa nwali oomdin maka wɛlg neeni. Ɔci ne ɛkɛ pyɛnnɛji kanŋayɛ, ɛkɛ bala poŋi jiek te coodi Moryam neeni. Ɔci ɛkɛ ati Yaccuti, ɔci tooccin ɛkɛti agi, “I Ciɛggɔn, gɔrca poca ‘ya dalna kow ɔɔn noŋ kanŋa waakɛnda paru. Oŋ i poŋ te naŋki ɛkɛ neeni bɛɛ? Dala i ɛkɛ myetka poca bɛya aŋka ‘ya magda te kanŋa.” 41Yeti Ciɛggɔn ṭwokcin ɛkɛti agi, “Hay Marta, Marta! I baal noowi i kanŋa a noowin. 42Yeti gɔṭṭi, poca! Naŋki gɛɛl ne cyɛɛlɔ bala wɛnni, ɛkɛ aŋka bala ñamu te naŋka pookɛn waakɛnda. Gena tyeŋi jyek ‘ya, ɔci Moryam buagɔn naŋka neeni pwatcin bɛɛ. Ɔci men gɛɛl yaakinti dɛyi ɛkɛ te naŋka neeni bɛɛ.”

will be added

X\