Luuk 1

1Pwatcin mug ɔɔn Tiyɔɔpiloc, maka coŋin bala kieyi jyek naŋka bɛɛn goṭṭin bora ikinti te yuonga neeniy. Jyeka neeni kiiwi ma 2ba bolja ikin mietkinti maka Yaccu yuarɛ te woŋgɛn te ñamuy. Maka Yaccu yuarɛ te woŋgɛnyɛ, gena ɛkkɛn a maka mieti ma te jyek Yaccuy. 3Ɔci ‘ya daŋkunyɛ, ‘ya baal lier jyeka neeni jitkɛn te baaṭi doki. Ɔci a ɔɔnyɛ, ‘ya buaga i kiegdin worga te jyeka neeni waakɛnda. 4Ɛɛ, i myetki ma doki te jyeka neeni. Yeti ‘ya buaga i myettin moki aŋka dala i jyeka neeni ŋeejja ne pwadan ɛkkɛn a jyeka awarɛ. 5Gɔṭṭi, jwali ‘ya neeni ŋwayɛ jɔɔtti te jyek mena gaciic ma Icrayiil gɛɛl neeni. Ne Hiruuduc tolan agi ḍuaŋa tolan ban Yahuudiyayɛ, gaciic gɛɛl bala yenti Jakariya. Kɛɛn ɛkkɛn ma boṭi agi kɛɛn Abaayja. Ɛŋ Jakariyayɛ, Ɛkɛ yenti Iliicabɛt. Ɛkɛ ɔci ‘war ɛkɛyɛ, ɛkkɛn a kɛɛna ne cyɛɛlɔ, acaan ɛkkɛn bɛɛn te kɛɛn gaciicin ma Icrayiilti. Ɛkkɛn a kɛɛn Haruun. 6Ɔci ɛkkɛn yaakkɛn pwadgin Jwaŋa Tolan ñamɛti. Ɛkkɛn bala tieci jyek ganuun Juaŋ jitkɛn ne pwadan oŋkanda. 7Yeti ɛkkɛn balki kaci gɛɛl bɛɛ, acaan Iliicabɛt ɛkɛ a bɔrño, ɔci ɛkkɛn yaakkɛnyɛ, ḍwaŋgin doki. 8Maka gaciicin ma Icrayiilyɛ, ɛkkɛn bala noŋi kanŋa Juaŋ ñamɛti yɔŋi a ywaŋi, magga da te kɛɛnɛn te Oŋ Juaŋ koni ɛkkɛn. Ɔci oŋ kɛɛn Jakariya bɛɛni, ɔci ɛkkɛn bala kanŋan orɔ on Juaŋ ona tolan on kona jiju. Ɔci oŋŋa Jakariya ooddi ṭuoṭi ḍɔŋi poom orɔ bɛɛni. 10Ɔci ne oŋ waŋɛ ṭuorki ma ḍɔŋi poom neeni bɛɛniyɛ, ɛkɛ kaaccin orɔ, ɔci maka coŋin bala yɔdi bora cɔki Juaŋti ba naŋki ɛkkɛn oŋkanda ne wɔɔka wanna bɛɛdiy. 11Ɔci ne pɛñan malɛɛka Juaŋ gɛɛl warɛ lɛɛlnɛ bora Jakariyati, Ɔci yɔɔtcin nona ṭuorki ma ḍɔŋi poom taaŋɛti taaŋŋa byerɔn. 12Ɔci ne malɛɛka yuarnɛ Jakariyayɛ, ɔci Jakariya bala poŋi jieko, ɔci ɛkɛ buayi ne tolan. 13Yeti malɛɛka gɔkcin ɛkɛti agi, “Naa i buay bɛɛ, Jakariya! Acaan gena i toonni Juaŋti neeniyɛ, ɛkɛ tieŋŋin doki. Gɔṭṭi, ɛŋ i Iliicabɛtyɛ, ɛkɛ jieda kacca a ‘uano. Ɔci kaci okka yenti agi Yɔhanna. 14Ɔci ɛkkɛ yaakkɔ iki ɛŋ iyɛ, yomgɔ ñɔya ne tolan, ɔci maka coŋinyɛ, ɛkkɛn yomgɛn ñɔɔgdi te jiedi ɛkɛ daŋkun. 15Ɛkɛ aga mena tolan Juaŋ ñamɛti. Ɔci ɛkɛ motti pyeg luutkin pyega pɛñan neeni oŋgati bɛɛ. Ɔci ɛkɛ motti mooy bɛɛ. Ɔci ɛkɛ yomɛ kuma te Boŋ Jwaŋa Tolan te oŋŋa ɛkɛ jieddi mɛɛgɛny. 16Ɔci ma Icrayiil waakɛn yaltan ne coŋɔn Ciɛggɔn ɛkkɛn Jwaŋa Tolanti te jyek ɛkɛ. 17Ɔci ɛkɛ bɛya botti ñamu Kiṭɔ ñamɛti. Ɔci yom ɛkɛ, ɔci war tɛɛn ɛkɛ bala ba war tɛɛn Iliiya bɔwa te baaṭi neeni ɔɔn. Ɔci te jyek ɛkɛyɛ, yomg maka ḍwaŋin koya bala ba yomg kɛɛgin ḍyɛrin. Ɔci maka wyetkɛn tɛyanyɛ, ɛkkɛn waakɛn yaltan aga maka ñingɛn tɛyan maka pwadin neeni. Ɔci te jyek ɛkɛyɛ, ma yomgɛn ywaŋtan aŋka ne oŋŋa Ciɛggɔn bɛɛdiyɛ, ma mɔktɛ jiek ywaŋɛ doki.” 18Ɔci Jakariya ṭwokcin malɛɛkati agi, “Naŋka neeni ŋeejja ‘ya a ɔki, kan bɛya ‘yati awarɛy? Acaan ‘ya aŋi daan doki, ɔci ɛŋ ‘ya aŋi ṭien daŋkun.” 19Ɔci malɛɛka ṭwokcin ɛkɛti agi, “Gena ‘ya Gebriyal mena yɔɔd Juaŋ ñamɛti oŋkanda gɔkka iti neeni. Ɛkɛ ‘ya cuonna iti aŋka i myettin te jyeka wonkɛn jyeka pwadin neeni. 20Yeti gɔṭṭi! Acca i yaaktiti jiek moki bɛɛ. I cied lieda ɔɔn ne oŋŋa naŋka neeni bɛɛdi bora ɔɔn, acaan i jyetti jyek ‘ya bɛɛ. Ɔci naŋka neeniyɛ, ne ponk ɛkɛ bɛɛti borayɛ, yuara i ne bɛɛdi bora awarɛy.” 21Ɔci te wɔɔka wanna ɔɔnyɛ, ma bala yɔdi bora kɛɛy Jakariya, ɔci ɛkkɛn buayi ne ɛkɛ kwanni orɔ on Juaŋ ona tolan a ɔɔny. 22Yeti ne ɛkɛ kooni borayɛ, ɛkɛ yaakinti gɔkti genga mati bɛɛ. Ɔci ɛkkɛn poŋi gɔki agi, “Ɛkɛ liɛlti gɛɛl yuarnɛ orɔ on Juaŋ ona tolan kaapun no.” Ɔci ɛkɛ bala gɔki mati te byeŋkɛ. Ɛkɛ yaakinti gɔkti mati te tukɛ bɛɛ. 23Ɔci ne wɔɔka kanŋan ɛkɛ on Juaŋ ona tolanji baaniyɛ, ɛkɛ oŋ ati dɔɔki baanji. 24Ɔci ɛŋ ɛkɛ Iliicabɛt laaccin doki. Ɔci ne ɛɛŋ laanni a ɔɔnyɛ, ɔci te ponka ne dɔɔyɔ neeniyɛ, ɛkɛ gorcin bora ati noongati bɛɛ. Ɛkɛ bala ciyi te baanji. 25Ɔci ɛkɛ gɔki agi, “Naŋka neeniyɛ, a naŋki Juaŋ ‘yati, acaan ɛkɛ bala poŋi te ‘ya ne ma balki gɔkki ne yaayan ‘yatiy.” 26Ɔci ne ponk laaja Iliicabɛt akki dɔɔyɔ wilin ne cyɛɛlɔyɛ, Gebriyal mena a malɛɛka neeniyɛ, cuonnɛ Jwaŋa Tolan ban Najarɛtti. Ban Najarɛt neeniyɛ, bala ban Jaliilji. 27Gebriyal neeni ati ban mena ṭɔɔl gɛɛl, gena ñan Yuocip ma Daawud ḍuaŋa tolan, ɔci ṭɔla neeni yenti Moryam. 28Ɔci malɛɛka bɛɛn ɛkɛti ɔci gɔkcin ɛkɛti agi, “I niinni? Juaŋ yomɛ pwanna pwani iti! Juaŋ balgi iki i. I pwanni moonga pookɛn ñomgɛnti doki!” 29Ɔci ne Moryam tieŋni jyek ɛkɛyɛ, Moryam buañi ne tolan. Ɔci ɛkɛ bala poŋi gɔki agi, “Jyek Malɛɛka neeni bala a ɔki ɔɔn ‘yati yeti?” 30Ɔci malɛɛka gɔkcin ɛkɛti moki agi, “Hay! I Moryam, naa i buay bɛɛ, acaan Jwaŋa Tolan yomɛ pwanna pwani iti. 31Gɔṭṭi! I laacca, ɔci i jiedi kacca ‘uano. Ɔci ɛkɛ okka i yenti a Yaccu. 32Ɔci ɛkɛ aga mena tolan, ɔci ɛkɛ bartan ma agi Kaci Jwaŋa Tolan ñaalɔ. Ɔci Ciɛggɔn ikin Jwaŋa Tolanyɛ, ɛkɛ ‘wondɛ non yɔr ɛkkɛn Daawud. Ɛkɛ cootti kaakci Daawudti. 33Ɔci ɛkɛ aga Ciɛggɔn Tolan ma Icrayiil yuonginda ɔɔn. Ɛkɛ koodi bora te cyɛgji ɛkɛti ywongati bɛɛ!” 34Ɔci Moryam ṭwokcin malɛɛkati agi, “Naŋka neeni bɛya ‘yati a ɔki? ‘Ya a ṭɔɔl men.” 35Ɔci malɛɛka ṭwokcin ɛkɛti agi, “Ɛɛ, gɔṭṭi, Boŋ Juaŋ bɛya iti, ɔci war tɛɛn Jwaŋa Tolan ñaalɔ bɛya iti moki. Ɔci a ɔŋŋiyɛ, kacca jieda i pwadan neeniyɛ, ɛkɛ bartan ma agi Kaci Jwaŋa Tolan. 36Ɔci gɔṭṭi, Iliicabɛt men ma ɛkkɛyɛ, ɛkɛ laayi ne ɛkɛ aŋi ṭien ɔɔn. Mena bartan ma agi mena bɔrñi neeniyɛ, ponk laaja ɛkɛ aŋi dɔɔyɔ wilin ne cyɛɛlɔ doki. 37Genga bala Juaŋ tɛɛkti bɛɛ.” 38Ɔci Moryam gɔkcin malɛɛkati agi, “‘Ya a men Jwaŋa Tolan. Dala naŋki ɛkɛ bɛya ‘yati ba jwalla guaŋŋɛ ɛkɛ acca neeni.” Ɔci malɛɛka Moryam dalnɛ. Ɛkɛ baaw atti. 39Ɔci ne nink gɛɛg bɛɛki bora ne ḍiɛkanyɛ, Moryam jɔŋŋin ati ne pɛñan baan gɛɛlti buorjiwi non Yahuudiyati. Bana neeni bala pomk jitin. 40Ɔci ɛkɛ kaaccin on Jakariya ɔci ɛkɛ ñiepcin Iliicabɛtti. 41Ɔci ne Iliicabɛt tieŋni ñiimi Moryamyɛ, kacca bala ɛkɛ konɛti neeniyɛ, ɛkɛ bala ñieyi ne tolan. Ɔci Iliicabɛtyɛ, ɛkɛ yomɛ kuumi te Boŋ Jwaŋa Tolan. 42Ɔci Iliicabɛt gɔkcin te pwana tolan agi, “I baal ñamu te moonga pookɛn te maŋŋa i maŋŋiti Juaŋ neeniy! Ɔci kacca bala i konuti neeniyɛ, ɛkɛ magdɛ Jwaŋa Tolan ne tolan daŋkun! 43’Ya a gena aŋka mɛy Ciɛggɔn ‘ya bɛɛdi ḍieŋdi ‘yatiy? 44Gɔṭṭi! Ne ‘ya tieŋna ñiimi iyɛ, kacca bala ‘ya konuti neeniyɛ, ɛkɛ bala ñieyi ‘ya konuti ne pɛñan acaan ɛkɛ yomɛ ñɔɔna ñɔɔno. 45Acaan i jyetti yomuti ɔci gɔk agi Juaŋ noŋdɔ ba jyeka guaŋda ɛktayɛ, i yomu ñɔɔna ñɔɔno!” 46Ɔci Moryam gɔkcin agi, “Yom ‘ya bala jieyi Ciɛggɔn ikin. 47Yom ‘ya ñɔɔna ñɔɔn te naŋki Jwaŋa Tolan Mena Yuoci ‘ya neeni. 48’Ya a mena ḍiɛran, yeti ɛkɛ bala poŋi te ‘ya. Acca ɔci oŋkanda ɔɔnyɛ, ma gɔkti agi ɛŋa neeniyɛ, ɛkɛ yomɛ ñɔɔna ñɔɔno. 49Acaan Jwaŋa Tolan mena balki war tɛɛn tolan neeniyɛ, ɛkɛ noŋi naŋka tɛyan ‘yati. Yenti ɛkɛ pwanna pwanno, ɔci tolla tollo. 50Maka buayi Juaŋyɛ, Juaŋ yomɛ pɔktɛ ɛkkɛnti yuonginda ɔɔn. 51Juaŋ ɛkɛ bala noŋi naŋka tɛyan. Maka gɔki agi ɛkkɛn ḍwaŋginti neeniyɛ, ɛkɛ ɛkkɛn cyɛnnɛ jitin. 52Maka a ḍuaŋan ḍwaŋinyɛ, ɛkkɛn koonɛ ɛkɛ iñɔ te kokin ḍwaŋji ɛkkɛnti, ɔci maka ḍyɛrin yomgɛntiyɛ, ɛkkɛn aŋka naŋŋɛ ɛkɛ aŋi maka ḍwaŋin. 53Maka amɛ koñyɛ, ‘wonnɛ ɛkɛ waka pwadin. Ɔci maka cyɛganyɛ, cuunnɛyɔ byeŋkɛn budan. 54Ma ɛkɛ ma Icrayiilyɛ, maŋŋɛ ɛkɛ ne pwadan. Ba jyeka guaŋŋɛ ɛkɛ yɔrg ikintiyɛ, ɛkɛ ñingɛ yien te jyeka naŋŋɛ ɛkɛ te baaṭi neeni bɛɛ. 55Ɛkɛ yomɛ pɔŋnɛ Abrahimti ɔci kɛɛgin ɛkɛti waakɛnda. Ɔci ɛkɛ yomɛ pɔktɛ kɛɛgin ɛkkɛnti daŋkun yuonginda ɔɔn.” 56Moryamyɛ, ɛkɛ bala ciyi ban Iliicabɛtn ba ponk ne ḍoogɔ. Ɔci ne ponka neeni bɛɛki borayɛ, ɛkɛ jɔŋŋin ati dɔɔki baanji. 57Ɔci pana jieddi Iliicabɛtyɛ, bɛɛn bora doki. Ɔci ɛkɛ jieni kacco, ɔci kaci a ‘uano. 58Ɔci ne maka cieki iki ɛkkɛn ɔci kɛɛn ɛkkɛn tieŋki agi Jwaŋa Tolan yomdan pɔŋda ɛktati a ɔɔnyɛ, ɛkkɛn yomgɛn ñɔɔna ñɔɔno. Ɔci Iliicabɛt daŋkunyɛ, ɛkɛ yomɛ ñɔɔna ñɔɔno. 59Ɔci ne nink kaci akki ne dɔɔyɔ wyetkɛn ne ḍoogɔyɛ, kaci luoddɛ ma bora doki. Ɔci ma buagɔn kaci oktan yenti agi Jakariya ba yenti weegɛn ɔɔn. 60Yeti mɛy ɛkkɛn kɛkcin agi, “A’a! A ɔɔn bɛɛ. Ɛkɛ yenti Yɔhanna!” 61Ɔci ma gɔkcin ɛkɛti agi, “I gɔk ɛkɛ aktin a menɛ? Ɛkɛ aktin a ɔɔn, men ɛkkɛ gɛɛl agɛ ma a ɔɔn?” 62Ɔci ɛkkɛn gɔkcin kaci weegɛnti te byeŋkɛn agi, “Kaci aktin a ɔki?” 63Ɔci kaci weegɛn tooccin ɛkkɛnti te gena kieki ma jieky, ɔci ɛkɛ kiejjin agi, “Ɛkɛ yenti Yɔhanna.” Ɔci ma jitkɛn buañi waakɛnda! 64Ɔci ne pɛñan ɛkɛ yaakinti jiek moki, ɔci ɛkɛ bala jieyi Jwaŋa Tolan. 65Ɔci maka cieki iki ɛkkɛnyɛ, ɛkkɛn buañi waakɛnda. Maka bala ciyi bonka bala pomk jitin ban Yahuudiyayɛ, ɛkkɛn waakɛnda bala jyɛyi te jyeka neeni. 66Ɔci maka tieŋŋin jyeka neeniyɛ, bala poŋi jyek kacca neeni. Ɛkkɛn gɔki agi, “Hɔɔy! Ɛkkɛ, kacca neeni ɛkɛ aga gena parin lieda ne baaṭi? Acaan naŋki Juaŋ bala ɛkɛti awarɛ.” 67Ɔci Yɔhanna weegɛn Jakariyayɛ, ɛkɛ yomɛ kuumi te Boŋ Jwaŋa Tolan, ɔci ɛkɛ bala gɔki te jyek naŋka bɛya ne ŋoyɔ agi, 68“Dala ikin jiettin Jwaŋa Tolan Jwaŋ ma Icrayiil, acaan ɛkɛ bala poŋi te ma ɛkɛ. Ɛkkɛn yɔɔññɛ ɛkɛ. 69Gɔṭṭɛ, yana yuoci ikin cuonnɛ ɛkɛ ikinti te kɛɛn Daawud kɛɛngɔn ɛkɛti. Ikin ‘wonnin Jwaŋa Tolan Mena Yuoci ikin mena tolan, mena bɛɛn te ma Daawudtiy. 70Ɔci a ɔɔnyɛ, bala ba jyeka guaŋŋɛ ɛkɛ te baaṭi te tuk maka a bɔwan Jwaŋa Tolan maka pwadin neeniy. 71Ɛkɛ gɔkcin ɛkkɛnti agi ɛkɛ ikin yɔɔtin te maka yookɔn te ikin waakɛnday. 72Ɛkɛ yomɛ pɔŋnɛ yɔrg ikinti te baaṭi, ɛɛ, ɛkɛ yomɛ pɔŋnɛ Abrahim waanɛti te poŋjin ɛkɛ poŋni te jyeka ḍuaññɛ ɛkɛ Abrahimti pwadin neeniy. 74Ɔci te wɔɔka ikin ‘wonninti ɛkɛ kanŋin Juaŋti te yoma wɔɔgan neeniyɛ, ɛkɛ ikin pɔŋnin ḍɔɔggɔti te maka yoyyin ñin iki ikiny. 75Ɛkɛ yomɛ pɔŋnɛ moki te naŋka ɛkɛ ikin naŋŋinti pwannin ɛkɛ ñamɛti, ɔci waakɔ ywaŋŋin aŋka yɔɔdin noŋin kanŋa ɛkɛ ñamɛti yuonginda neeni. 76‘Hay i kacco, i barti ma a bɔwa Jwaŋa Tolan ñaalɔ. Te jyek iyɛ, ma yomgɛn ywaŋtan. Ɔci ne oŋŋa Ciɛggɔn bɛɛdiyɛ, ma mɔktɛ jiek ywaŋɛ doki.’ 77Ɔci ma ɛkɛ myetka i te yɔɔd Jwaŋa Tolan yɔɔta yuoci ɛkɛ ma ne ɛkkɛn bɔɔktɛ ɛkɛ te nɔji ɛkkɛny. 78Juaŋ ma bɔɔktɛ a ɔɔn acaan ɛkɛ yomɛ a pɔggɔn mati. Ɔci acaan a ɔŋŋiyɛ, ma ciya te nona ulanti moki bɛɛ. 79Noon dɛkti mati bɔɔna bɔɔno. Ɔci ɛkkɛn buayi lien moki bɛɛ. Ɛkkɛn wɛɛdɛ Juaŋ oŋkanda ɔɔn. Ɔci a ɔŋŋiyɛ, ɛkkɛn ‘wondɛ Jwaŋa Tolan coodi pwanno.” 80Ɔci kacca yenti Yɔhanna neeni tolli. Ɔci ɛkɛ balki war tɛɛn Boŋ Jwaŋa Tolan. Ɔci ɛkɛ bala ciyi wɔɔŋji nona liedan neeni oŋkanda ɔɔn ne oŋŋa ɛkɛ jɔɔnnɛ te lali ma Icrayiilti ɔɔn.

will be added

X\