Yɔhanna 5

1Ɔci ne naŋka neeni baakiyɛ, ɔci iid ma Icrayiil bala, ɔci Yaccu ati Urcaliimji. 2Ɔci puol bala Urcaliimji Kaañ Tukɛ Kulin taaŋɛti. (Yenti puol te tuk ma Icrayiil ma boṭi a Bɛtcatta.) Ɔci doŋki bala ne dɔɔyɔ puol taaŋɛti. 3Maka waakɛn yeyin bala niin doŋki jitin a ḍiɛkan bɛɛ. Maka neeni a maka ñingɛn ulan ɔci maka ŋɔṭo, ɔci maka bɔggɛn iwan ɔci maka omgɛn iwan. [Ɛkkɛn bala kɛɛy ne pieg kotti ñaalɔ ba oŋkanday. 4Acaan a oŋki malɛɛka Juaŋ ooddi iñɔ puolji, ɔci pieg ṭuudiji. Mena warɛ yaayan mena jɔɔtti kaatti a wyeñ puolji ne pieg ṭuudiji malɛɛkayɛ, ɛkɛ doki nina te waja bala ɛkɛtiy.] 5Ɔci mena ‘uan gɛɛl bala toonnɛ iñɔ warɛ. Yuong ɛkɛ yuonga woociyɛ, a men baan mena parɛ byeŋkɛ ɔci ne dɔɔyɔ wyetkɛn ne ḍoogɔ (38). 6Ɔci ne Yaccu gɔrni ɛkɛ baali niini iñɔ a ɔɔnyɛ, ɔci ŋeejɛ Yaccu ‘wana neeni warɛ yaayɛ te baaṭi doki, ɔci Yaccu gɔkcin ɛkɛti agi, “I buagi waru pwada?” 7Mena warɛ yaayan gɔkcin ɛkɛti agi, “Ciɛggɔn, ne pyega ma waakɛn pwatti kotti ñaalɔyɛ, menga bala ‘ya olda pietin aŋka ‘ya waru pwaddɛ bɛɛ. Ne ‘ya buaga ka ‘ya ɔgdiyɛ, mena parɛ bala ñamu doki pietin.” 8Yaccu gɔkcin ɛkɛti agi, “Jɔŋŋa ñaalɔ aaran lula ɔgdi ootta baanji.” 9Ɔci ‘uan warɛ pwani ne pɛñan, kwaccin bɛɛ. Ɔci aaran luullɛ, ɔci ɛkɛ bala ati parɛ, ati a woono. Ɔci oŋŋa wanna a Oŋ Cabit. 10Ɔci ma Icrayiil maka ḍwaŋin gɔkcin mena warɛ pwaniti agi, “Oŋŋa neeni a Oŋ Cabit, ɔci kan i aaran eedi te oŋŋa neeniyɛ, i jyek ganuun bɛɛññiji.” 11Yeti ɛkɛ gɔkcin ɛkkɛnti agi, “Mena ‘ya waru pwanni neeniyɛ, gɔkkin ‘yati agi ‘ya aaran luljɔ ɔgji ootcɔ baanji.” 12Ɔci ma tooccin ɛkɛti agi, “A menɛ gɔkkin iti agi i aaran lulji ɔgji ootci baanjiy?” 13Mena warɛ pwani neeniyɛ, mena ɛkɛ pɔŋnɛ te waja neeniyɛ, kwoyi ɛkɛ acaan Yaccu warɛ uunnɛ ɔntɔ nona parɛti acaan poli ma polla tolan bala. 14Ɔci ne baaṭi ɛkɛ yuarŋɛ Yaccu on Juaŋ ona tolan. Yaccu gɔkcin ɛkɛti agi, “Gɔrca, i waru pwanni. Naa i moki noŋja naŋka yaayan bɛɛ. Pɛñña bɛya iti ne ŋoyɔyɛ, bɛya a pɛñña ne yaayan iti.” 15’Uan ati dɔɔki ma Icrayiilti, ɔci ɛkkɛn myennɛ agi, “Gena Yaccu ‘ya ywaŋŋay.” 16Ɔci acaan a ɔŋŋiyɛ, ma Icrayiil bala noŋi ywobji Yaccuti acaan Yaccu men ywaŋŋɛ te Oŋ Cabit. 17Yeti Yaccu gɔkcin ɛkkɛnti agi, “Wey ɔɔn bala kanŋan men, ɔci ‘ya daŋkun baal kanŋ men.” 18Ɔci ma Icrayiil ne ɛkkɛn tieŋki jyeka guaŋŋɛ Yaccu neeniyɛ, ɛkkɛn buagɔn Yaccu noktan a jitkɛn bɛɛ, acaan gena naŋŋɛ ɛkɛ Oŋ Cabit jyɛnnɛji parɛ neeni bɛɛ, naŋka parɛ bala moki, acaan ɛkɛ boṭi Jwaŋa Tolan agi Weegɛn, ɔci a ɔɔnyɛ, ɛkɛ noŋi ba ɛkɛ yoomki i Jwaŋa Tolan no. 19Yaccu gɔkcin ɛkkɛnti agi, “Dala ɛkkɛ tieŋdɛ jyeka guagdi ‘ya ɛkkɛti a jyeka awarɛ neeni, ‘ya Kaci yaakati noŋ genga paru budan bɛɛ. ‘Ya gɔr ba waka naŋdɛ Wey ɔɔn, ɔci ‘ya noŋja daŋkun. 20Acaan Wey ɔɔn ani Kacco, ɔci ‘ya Kaci lɛɛrta te naŋki ɛkɛ waakɛnda, ɔci ɛkɛ Kaci lɛɛrtɛ te naŋka pookɛn daŋkun. Ɔci naŋka ŋoyɔ neeni tɛɛcin te naŋka ñamu, ɔci ɛkkɛ poddɛ. 21Ɔci bala ba Wey ɔɔn ne ma luoldɛ ñaalɔyɛ, ɔci ɛkkɛn ‘wondɛ ɛkɛ tɛɛtin, ɔci ‘ya Kaci daŋkun kan ‘ya buagayɛ, ‘ya ma ‘woñga tɛɛtin ba yom ‘ya. 22Wey ɔɔn noŋdi godan ma bɛɛ. Naŋka neeni waakɛndayɛ, ‘wonna ‘ya Kaci ɛkɛ, 23aŋka ma waakɛnda ani ‘ya Kaci ba ɛkkɛn anki Wey ɔɔn daŋkun ɔɔn. Kan mena ani ‘ya Kaci bɛɛyɛ, ɔci ɛkɛ ani Wey ɔɔn daŋkun bɛɛ. Mena neeniyɛ, a mena ‘ya cuonnay. 24“Dala ɛkkɛ tieŋdɛ jyeka guagdi ‘ya ɛkkɛti a jyeka awarɛ neeni, mena tieŋdi jyek ‘ya ɔci jyeddi mena ‘ya cuonnatiyɛ, ɛkɛ ciya yuonginda. Ɔci jyek ywobji bɛya ɛkɛti te oŋ godan bɛɛ. Ɛkɛ a mena tuwa moki bɛɛ. Ɛkɛ aŋi mena tɛɛti doki. 25Awarɛ, oŋ bala bɛya, ɔci bala acca doki, gena oŋŋa maka tuun tieŋti pwan ‘ya Kaci Jwaŋa Tolany, ɔci maka tieŋdiyɛ, ɛkkɛn uda. 26Acaan ba Wey ɔɔn ne tɛɛti parɛ te tɛɛtin ɛkɛyɛ, ɔci Wey ɔɔn gɔkkin ‘ya Kaciti, ɔci ‘ya Kaci moki tɛɛt ba tɛɛtin Wey ɔɔn. 27Ɔci Wey ɔɔn ‘ya Kaci ‘wonna jwali aŋka ‘ya noŋja godan acaan ‘ya a Kaci Ma Baano. 28Naa ɛkkɛ poddɛ te jyeka neeni bɛɛ, acaan ne baaṭi ma waakɛnda maka bala kolk jitin tieŋdi pwan ‘ya, 29ɔci ne ɛkkɛn tieŋti pwan ‘yayɛ, ɛkkɛn jɔldi ñaalɔ waakɛnda. Ɔci maka naŋki ɛkkɛn pwadinyɛ, ɛkkɛn jɔldi ɔci ciyi tɛɛti moki ɔɔn. Ɔci kan maka naŋki ɛkkɛn yeyinyɛ, ne ɛkkɛn jɔŋti ñaalɔyɛ, ɛkkɛn ḍakti ba jyek godan ɛkkɛn. 30“‘Ya yaakati noŋ genga te yom ‘ya paru budan bɛɛ. ‘Ya tieŋŋa jiek te ñamu ɔci ‘ya gɔkka, ɔci jyeka guagdi ‘ya a jyeka awarɛ, acaan ‘ya buaga noŋ ba naŋki ‘ya bɛɛ. ‘Ya buaga noŋ ba naŋki Wey ɔɔn mena ‘ya cuonnay. 31“Kan ‘ya miet ma te jyek war ‘ya paruyɛ, a ɔɔn yɔmjin mati bɛɛ. 32Yeti gena Mena parɛ mieti ma te war ‘yay, ɔci ŋeej ‘ya jyek ɛkɛ a jyeka awarɛ. 33“Ɛkkɛ ma cuuññɛ Yɔhannati doki, ɔci ɛkkɛ myennɛ ɛkɛ te jyeka awarɛ. 34Yeti ‘ya buaga men baan gɛɛl gɔkti ma myettɛ te ‘ya bɛɛ. Yeti ‘ya gɔkkan ɛkkɛti te jyeka neeni aŋka ɛkkɛ yɔɔdin. 35Yɔhanna ne ɛkɛ baali ɛkkɛtiyɛ, ɛkɛ bala ba dyɛka ne dɛki a dyɛŋiy, ɔci ɛkkɛ yomgɔ ñɔyɔ ne ḍiɛran ṭɔɔlɛ te dyɛŋi ɛkɛ dyɛŋŋa wanna. 36“‘Ya balka genga, ɛkɛ mieti ma te ‘ya ne pwadan, miti Yɔhanna buannɛ kanŋa ‘ya ‘wonnata Wey ɔɔn aŋka cwamdi ‘yay, kanŋa neeni ma myettɛ ‘ya cuonna Jwaŋa Tolan. Ɔci jyek myetkin neeni aŋka pwatcin te jyek Yɔhanna. 37Ɔci Wey ɔɔn mena ‘ya cuonna ɛkɛ ma myennɛ te jyek ‘ya daŋkun. Pwan ɛkɛ tieŋnɛ ɛkkɛ oŋgati bɛɛ, ɔci war ɛkɛ yuarŋɛ ɛkkɛ oŋgati bɛɛ. 38Ɔci jyek ɛkɛ bala niin ɛkkɛ yomgɔti bɛɛ, acaan ɛkkɛ tiekɛ jyek mena ɛkɛ cuonnɛ. 39Ɛkkɛ lieṭɛ jiek te worgaji acaan ɛkkɛ poŋɛ gɔkɛ agi tɛɛtin baadi bɛɛ neeniyɛ, yuardɛ ɛkkɛ worgaji. Jyeka lildɛ ɛkkɛ neeniyɛ, gena jyeka mietki ma a jyek ‘yay. 40Ɔci ne ɛkkɛ yookɛ waakɔ te bɛɛn ‘yati, oŋ ɛkkɛ ‘wondin ‘ya tɛɛtin a ɔki? 41“Pwani ‘ya bɛya te ma baan tuggɛn budan bɛɛ. 42Yeti ŋeej ‘ya yomg ɛkkɛ ani Jwaŋa Tolan bɛɛ. 43’Ya bɛɛn te yenti Wey ɔɔn, ɔci ɛkkɛ jyettɛ ‘yati bɛɛ. Kan mena parɛ bɛya te yenti ɛkɛ budanyɛ, ɛkkɛ jyeddɛ gena ɛkɛti. 44Ɛkkɛ yaakɛti jyeddɛ a ɔki ne ɛkkɛ buagɛ jieyɛ maka pookɛn, ɔci maka pookɛn jieyi ɛkkɛ, ɔci ɛkkɛ buagɛ jieyɛ Jwaŋa Tolan bɛɛ? 45“Naa ɛkkɛ poŋdɛ ɛkkɛ tiagdinyɔ ‘ya Wey ɔɔnti bɛɛ. Mena ɛkkɛ tiagdɛ bala. Gena Muuca mena ɛkkɛ jyettɛ ɛkɛtiy. 46Ɛkkɛ te jyettɛ Muucati awarɛyɛ, ɛkkɛ te jyettɛ ‘yati daŋkun, acaan jyeka kiinɛ ɛkɛ neeniyɛ, kiinɛ ɛkɛ gena jyek ‘ya. 47Yeti kan ɛkkɛ jyettɛ jyeka kiinɛ ɛkɛ bɛɛyɛ, oŋ ɛkkɛ jyeddɛ jyek ‘ya a ɔki?”

will be added

X\