Yɔhanna 21

1Ɔci ne naŋka neeni baakiyɛ, Yaccu warɛ lɛɛlnɛ bora moki maka laldɛ ɛkɛti Galŋ Jaliil ḍwaŋɛti. (Ɔci galŋ yenta parɛ moki yenti “Taybiiryac”.) 2Maka laldɛ Yaccu bala nona ne cyɛɛlɔ. Gena Butruc, ɔci Tɔmac mena bartan ma a Yuongɔn, ɔci Nataanyal mena bɛɛn te ban Kɛna ban Jaliilji, ɔci kɛɛgin Jɛbadi, ɔci maka ‘uay bala ne yyɛɛwɔ moki. 3Ɔci Butruc gɔkcin ɛkkɛnti agi, “‘Ya ootta wyec yako.” Ɔci ɛkkɛn gɔkcin Butructi agi, “Ikin oottin iki ɔɔn.” Ɔci ɛkkɛn ati ɔci kaaccin murkaji, yeti te ween jiñɛ neeni ɛkkɛn mwoki yeñi gɛɛl ne cyɛɛlɔ bɛɛ. 4Ɔci ne noon bɔɔniyɛ, Yaccu bala yɔɔd galŋ ḍwaŋɛti, yeti kwoyɔn maka laldɛ ɛkɛ. Ɛkkɛn poŋi agi gena Yaccu yɔɔd wanna bɛɛ. 5Yaccu gɔkcin ɛkkɛnti agi, “Kɛɛgin ‘ya, yak bala?” Ɛkkɛn gɔkcin agi, “A’a, baawo.” 6Yaccu gɔkcin ɛkkɛnti moki agi, “Mali yiɛptɛ murka taaŋŋa byerɔn, ɔci ɛkkɛ yɔɔrdɛ acca.” Ɔci ɛkkɛn mali yiɛpcɛ, ɔci ɛkkɛn yaakinti mali ootan bora te pietin moki bɛɛ, acaan yak bala jiju coŋɔ. 7Mena ani Yaccu gɔkcin Butructi agi, “Gena Ciɛggɔn!” Bworŋin Butruc bala niin ɔntɔ te kanŋa, ɔci ne ɛkɛ tieŋni agi gena Ciɛggɔnyɛ, ɛkɛ bworŋin ‘yɛɛŋnɛ, ɔci kaaccin iñɔ galŋji ati Yaccuti. 8Ɔci maka laldɛ Yaccu maka pookɛn bɛɛn te murka, bɛɛn wɔɔci mali acaan mali kuumi te yako. Šɛɛr jiñɛ looncin ɛkkɛnti bɛɛ, bala ba mitarn jitkɛn a miyya ne cyɛɛlɔ (100). 9Ne ɛkkɛn kaacki bora ṭɛɛrjiyɛ, mañ mulŋin yuarɛ ɛkkɛn, ɔci yak bala maccu ɔci byedg bala daŋkun. 10Yaccu gɔkcin ɛkkɛnti agi, “Yaka muoŋŋɛ ɛkkɛ acca gɛɛg oodɛ.” 11Ɔci Butruc kaaccin murkaji ɔci mali wuannɛ ɛkɛ bora ṭɛɛrji kuumi te yaka ḍwaŋin a miyya ɔci ma baan ne yyɛɛwɔ mena parɛ byeŋkɛ ɔci ne ḍoogɔ (153). Yeti yaka coŋin neeni mali ɛɛri jitin bɛɛ. 12Yaccu gɔkcin ɛkkɛnti agi, “Bɛɛdɛ, omdɛ.” Ɔci ma tooccin ɛkɛti agi ɛkɛ a menɛ bɛɛ, acaan ŋeecɔn ɛkkɛn gena ɛkɛ Ciɛggɔn. 13Ɔci Yaccu bɛɛn ɔci byedg wɛɛnnɛ ma jitkɛn, ɔci ‘wonnɛ ma, ɔci yaka ‘yɛggin daŋkun naŋŋɛ a ɔɔn. 14Ɔci te oŋŋa Yaccu jɔŋni ñaalɔ te lienti tɛɛti moki, ɔci ne oŋŋa ɛkɛ baali galŋ ḍwaŋɛti ɔɔnyɛ, Yaccu warɛ lɛɛlnɛ bora, oŋki aŋi ne ḍoogɔ doki. 15Ɔci ne ɛkkɛn omki ne ḍookkiyɛ, Yaccu gɔkcin Butructi agi, “Butruc kaci Yɔhanna, i an ‘ya ne tolan te waka neeni boki?” Ɔci Butruc gɔkcin ɛkɛti agi, “Ɛɛ, Ciɛggɔn, ŋeej i ‘ya an i.” Yaccu gɔkcin ɛkɛti agi, “Kulin ṭɔlgɛn ‘ya oomga tuggɛnti.” 16Yaccu gɔkcin moki agi, “Butruc kaci Yɔhanna, i an ‘ya?” Butruc gɔkcin ɛkɛti agi, “Ɛɛ, Ciɛggɔn, ŋeej i ‘ya an i.” Yaccu gɔkcin ɛkɛti agi, “Waŋu tiicca kulin ‘yati.” 17Yaccu gɔkcin ɛkɛti te oŋŋa akki ne ḍoogɔ agi, “Butruc, kaci Yɔhanna, i an ‘ya?” Ɔci Butruc yomɛ yaañi acaan Yaccu tooccin ɛkɛti oŋki ne ḍoogɔ agi, “I an ‘ya?” Ɔci Butruc gɔkcin agi, “Ciɛggɔn, waak waakɛnda ŋeej i, ɔci ŋeej i ‘ya an i.” Yaccu gɔkcin ɛkɛti agi, “Kulin ‘ya oomga tuggɛnti. 18Tieŋŋa, ‘ya gɔkka iti awarɛ, wonta i men ḍiɛri i ɛɛŋja bworŋin ɔci at te yom i, yeti ne i agdi daanyɛ, i byeŋku miɛtca bora, ɔci mena parɛ i ḍɛgdi, ɔci i eeti ma nona i buagiti bɛɛ.” 19(Ne Yaccu gɔŋni a ɔɔnyɛ, ɛkɛ Butruc myennɛ lyen ɛkɛ a myetkin. Ɔci te lyen ɛkɛ ma gɔrti pwani Jwaŋa Tolan.) Ne ɛkɛ gɔŋni a ɔɔnyɛ, ɛkɛ gɔkcin Butructi agi, “Bootta ‘yati.” 20Ɔci Butruc warɛ yallɛ, ɔci mena ani Yaccu yuarnɛ ɛkɛ bala bootti ɛkkɛn ŋotkɛnti. Mena neeni a mena ciyi Yaccu taaŋɛti iidtiy. Ɔci gena ɛkɛ tooci gɔki agi, “Ciɛggɔn, mena i ‘wondi ma byeŋkɛnti a menɛ?” 21Ɔci Butruc ne mena neeni yuarnɛyɛ, ɛkɛ tooccin Yaccuti agi, “Ciɛggɔn, oŋ mena nɛ?” 22Yaccu gɔkcin ɛkɛti agi, “Kan ‘ya buaga ɛkɛ ciya wɛnni ne ‘ya bɛɛda ɔɔnyɛ, gena jyek i bɛɛ. Dala i bɛɛd bootta ‘yati.” 23Ɔci jiek ati modgɛnti waakɛnda, ɛkkɛn poŋi gɔki agi mena laldɛ Yaccu neeni tuudɔ bɛɛ. Yeti Yaccu gɔkcin a ɔɔn bɛɛ. Yaccu gɔkcin agi, “Kan ‘ya buaga ɛkɛ ciya wɛnni ne ‘ya bɛɛda ɔɔnyɛ, gena jyek i bɛɛ.” 24’Ya mena laldɛ Yaccuyɛ, gena ‘ya a mena mieti jyeka neeniy. Ɔci jyeka neeni kiin ‘ya. Ɔci ŋeecɔn ikin jyeka neeni a jyeka awarɛ. 25Naŋka naŋŋɛ Yaccu naŋka coŋin, naŋka pookɛn bala daŋkun. Ɔci kan jyek naŋki Yaccu kiitan ma worganji waakɛndayɛ, baan warda yaakinti worgan eedɛ bɛɛ, noon kuma warda.

will be added

X\