1 Ɔci ne Iid Malɛɛka Lien Bɛɛn Goṭi A Gorŋ biɛṭi men nink ne dɔɔyɔ wilin ne cyɛɛlɔyɛ, Yaccu bɛɛn ban Bɛtani nona baali Lajarac mena luolnɛ ɛkɛ ñaalɔ te lienti neeni. 2 Ɔci ma bala nɔṭi am aŋan nɔrtan Yaccu, ɔci Marta bala ma eektɛ oomdin, ɔci Lajarac bala omi oomdin i maka pookɛn i Yaccu. 3 Ɔci Moryam eccin eelan wiɛlɛ tɛyan rɔtil tukɛ ne cyɛɛlɔ, ɔci eelan neeni a ñɔɔn jaan gɛɛl yenti nardiin. Ɔci ɛkɛ pwoŋnɛ Yaccu ciegɛti, ɔci Yaccu puuññɛ ciegɛti te jyeyi ɛkɛ. Ɔci on jiñɛ warda ŋooyi milla mili te eelan. 4 Ɔci mena ne cyɛɛlɔ mena bala maka laldɛ Yaccuti, ɛkɛ yenti Yahuuja Ickɛɛryuti (ɛkɛ a kaci Cimaan Ickɛɛryuti), ɔci ɛkɛ a mena Yaccu ‘wonnɛ ma byeŋkɛnti. 5 Ɛkɛ gɔkcin agi, “Te gena yeti i yooki ikin eelan neeni wiɛlnin bora te bilk ne coŋɔn aŋka ‘wontin maka bɔwan neeniy?” 6 Ne Yahuuja gɔŋni a ɔɔn neeni ɛkɛ yomɛ pwatcin maka bɔwanti bɛɛ. Ɛkɛ a ɛɛno. Kuñŋan bilk bala ɛkɛti, ɔci ɛkɛ bala koṭi bilka ḍuatan ma jiju kuñŋanji. 7 Yaccu gɔkcin Yahuujati agi, “Yahuuja, ɛkɛ dalja, hay! Ne ɛkɛ noŋi a ɔɔnyɛ, bala ba ‘ya joŋŋata ɛkɛ a joŋi doki no. 8 Maka bɔwan balgi iki ɛkkɛ yuonginda, ɔci ɛkkɛ yaakɛti noŋdɛ ne pwadan ɛkkɛnti, ɔci ɛkkɛn ‘wondɛ waako. Yeti ‘ya balkin iki ɛkkɛ yuonginda bɛɛ.” 9 Ɔci poli ma Icrayiil polla tolan ne ɛkkɛn tieŋki Yaccu baali aŋanyɛ, ɛkkɛn bɛɛn gɔrti Yaccu. Ɔci ɛkkɛn bɛɛn gɔrti Yaccu parɛ bɛɛ, ɛkkɛn bɛɛn gɔrti Lajarac mena luolnɛ Yaccu ñaalɔ te lienti neeni daŋkun. 10 Ɔci gaciicin ḍwaŋin ma Icrayiil ɛkkɛn ñoowin te jiek waakɛnda, buagɔn Lajarac noktan, 11 acaan ma Icrayiil maka coŋin jyeti Yaccuti doki te gena naŋŋɛ ɛkɛ Lajaracti neeni. 12 Ɔci ne liidɔ polla tolan maka bɛɛn Iid Malɛɛka Lien Bɛɛn Goṭi A Gorŋ tieŋŋin a Yaccu bala bɛya ban Urcaliim. 13 Ɔci ɛkkɛn eccin tuum aamkɛ byeŋkɛnti aŋka noŋdi ɛkɛti ba mena tolan, ɔci ati kookcin Yaccuti ɔci yaajjin agi, “Dala ma jieyi i Juaŋo! I a Kiṭɔ Kaci Daawud! Mena bɛɛn te yenti Jwaŋa Tolan dala Juaŋ noŋdi ne pwadan Ciɛggɔn Tolanti! Gena Ciɛggɔn ma Icrayiil Ciɛggɔn Tolan!” 14 Ɔci Yaccu yɔṭi tɔɔrɔn ṭɔɔlɛ ɔci ɛkɛ taapcin tɔɔrɔnti bala ba jyeka kiijji ma worgaji agi, 15 “Ma Urcaliim, naa ɛkkɛ buayɛ bɛɛ. Ciɛggɔn Tolan ɛkkɛ bala bɛya toobdi te tɔɔrɔn ṭɔɔlɛ.” 16 Te ñamu gena naŋŋɛ Yaccu neeni kwoyɔn maka laldɛ ɛkɛ, yeti ne Yaccu jɔlni ñaalɔ te wara woonɛyɛ, ɔci ɛkkɛn ñingɛn ñieki te jyeka kiijji ma worgaji te naŋka neeni. Ɔci ɛkkɛn ñingɛn ñieki te naŋka naŋi ma Yaccuti neeni. 17 Poli ma polla tolan maka bala i Yaccu oŋŋa ɛkɛ Lajarac luolnɛ ñaalɔ te kooljiyɛ, maka neeni jyek Yaccu dalji bɛɛ. Ɛkkɛn bala ma myettan oŋkanda te naŋka naŋŋɛ Yaccu Lajaracti. 18 Poli ma polla tolan tieŋŋin ɔci ati kookcin Yaccuti. Ɛkkɛn tieŋŋin Yaccu noŋi naŋka ñyecki ma ɛkɛ neeni. 19 Ma Pɛriciin gɔgjin pookɛn agi, “Gɔṭṭɛ, ɛkkɛ yaakɛti noŋdɛ genga boki? Maka baan warda ati bootcin ɛkɛti doki.” 20 Maka bɛɛn moṭi Jwaŋa Tolanti te oŋ iidyɛ, ma gɛɛg a ma Giriik. 21 Ɔci maka neeni bɛɛn Pilibucti. Pilibuc ɛkɛ a men ma Bɛtceeyida ban Jaliilji. Ɔci ma Giriik gɔkcin Pilibucti agi, “Ɔɔn buagɔn gɔrtɔn Yaccu.” 22 Pilibuc ati Andarawuc myennɛ, ɔci ɛkkɛn ati yaakkɛn Yaccu myetki. 23 Ɔci Yaccu gɔkcin ɛkkɛnti agi, “Oŋŋa ma gɔrti pwani ‘ya Kaci Ma Baan cɔɔllin doki. 24 Gɔṭṭɛ, ‘ya gɔkka ɛkkɛti, kan poñi waŋɛ ḍɛmdi ṭɛɛrjiyɛ, ɔci kan ɛkɛ cokkɛ ñin ma piik bɛɛyɛ, ɛkɛ niin parɛ budan. Yeti kan ɛkɛ cokkɛ ñin ma piikyɛ, ɛkɛ yula, ɔci ɛkɛ ñingɛ bɛya ne coŋɔn. 25 Kan mena ñingɛ caŋdɛ te ani war ɛkɛ parɛyɛ, ɛkɛ ḍakti. Mena wierti te war ɛkɛ iñɔ baanji wɛnni te jyek ‘yayɛ, ɛkɛ warɛ tiidɛyɔ acaan te tɛɛtin baadi bɛɛ neeni. 26 Kan menga buagɔn aga kɛɛngɔn ‘yayɛ, dala ɛkɛ bootti ‘yati. Ɔci nona ‘ya baalayɛ, kɛɛngɔn ‘ya bala daŋkun. Kan mena kanŋan ‘yatiyɛ, Wey ɔɔn gɔki a ɛkɛ pwad pwado. 27 “Acca ‘ya yomu yaayɛ ne pɛñan. Ɔci ‘ya gɔkca a ɔki? ‘Ya gɔkca agi, ‘Wey ɔɔn, dala i yuoc ‘ya te oŋŋa neenɛ?’ Yeti gena te naŋka neeni aŋka ‘ya bɛɛna tuuda neeni. 28 Wey ɔɔn, dala i noŋja aŋka ma gɔrti pwani i.” Ɔci pwan bɛɛn te ñaalɔ gɔkcin agi, “‘Ya noŋjan doki aŋka ma gɔrti pwani ‘ya, ɔci ‘ya noŋja a ɔɔn moki.” 29 Ɔci poli ma polla tolan bala yɔdi ne cwakanti, ɔci ɛkkɛn tieŋŋin ɔci gɔkcin agi, “Gena ñaala wiak wanna hay!” Ɔci maka pookɛn gɛɛg gɔki agi, “Gena malɛɛka gɔkcin Yaccutiy.” 30 Yaccu gɔkcin agi, “Pwana neeni bɛɛn te ‘ya bɛɛ, bɛɛn acaan te ɛkkɛ. 31 Ɔci acca godan ṭɛɛrji noŋi bɛya, ɔci Jwaŋa Yaayan ḍuaŋa ṭɛɛrji yiɛpca ‘ya ɔntɔ. 32 Ɔci ne ‘ya ŋaaptata ma ñaalɔyɛ, ɔci ‘ya ma cieññati orati ‘yati waakɛnda.” 33 Ne ɛkɛ gɔŋni a ɔɔnyɛ, ɛkɛ ma myennɛ te jyek lyen ɛkɛ. 34 Polla tolan gɔkcin Yaccuti agi, “Çeejɔn ɔɔn te worga ne Kiṭɔ bɛɛdiyɛ, ɛkɛ ciyi yuonginda. Yeti i gɔk agi ‘ya Kaci Ma Baan ŋaapta ma ñaalɔ. Mena guaga i a Kaci Ma Baan neeni a menɛ?” 35 Yaccu gɔkcin ɛkkɛnti agi, “Mena dɛki balgi iki ɛkkɛ ne ḍyɛṭ ṭɔɔlɛ. Dala ɛkkɛ ooddɛ ne noon bɔwi aŋka ɛkkɛ ḍɛɛmdɛ bɛɛ. Kan mena ooddi te nona mielyɛ, nona ooddɛ ɛkɛ ŋeejɛ bɛɛ. 36 Dala ɛkkɛ jyeddɛ mena dɛkiti ne ɛkɛ balgi iki ɛkkɛ men ɔŋ. A ɔŋŋiyɛ, ɛkkɛ agdɛ kɛɛgin mena dɛkiy.” Ne Yaccu gɔŋni a ɔɔnyɛ, ɔci ɛkɛ luoṭi doki, ɔci warɛ coŋŋɛ te ɛkkɛn. 37 Yaccu noŋi naŋka ñyecki ma ɛkɛ naŋka coŋin ma ñomgɛnti, yeti ma jyeti ɛkɛti bɛɛ. 38 Te naŋka neeniyɛ, bala ba jyeka guaŋŋɛ Icaaya te baaṭi dɛññin bora doki. Icaaya gɔki te baaṭi agi, “Ciɛggɔn, a makɛ jyeti jyeka guaŋŋin ikiny? Ɔci a makɛ gɔrcin war tɛɛn iy?” 39 Ɔci maka yookɔn te Yaccu neeni yaakinti jyeddi ɛkɛti bɛɛ, bala ba jyeka guaŋŋɛ Icaaya agi, 40 “Jwaŋa Tolan ɛkkɛn aammɛ ñingɛnti ɔci wyetkɛn uulnɛ ñaalɔ aŋka naa ɛkkɛn gɔrti ɔci jiek jitkɛn yuartan, ɔci waakɛn yaltan bɛya ‘yati aŋka ɛkkɛn ywaŋdiyɔ ‘ya bɛɛ.” 41 Icaaya gɔkcin a ɔŋŋi acaan ɛkɛ gɔrcin pwani Yaccu, ɔci gɔkcin jiek te ɛkɛ. 42 Ɔci ḍuaŋan ma Icrayiil jyeti Yaccuti ne coŋɔn, yeti ɛkkɛn ma myetkɛ agi, “Ɔɔn jyettɔn Yaccuti bɛɛ.” Ɛkkɛn buayi dita ɛkkɛn ŋualtan ma Pɛriciin bora te ona morki ma Juaŋti. 43 Acaan anna anki ɛkkɛn jyek Juaŋ bala bɛɛ. Ɛkkɛn ani jyek ma baan ne tolan, ɔci buagɔn ma gɔki agi ɛkkɛn aginti maka pwadgɔ. 44 Ɔci Yaccu yaajjin gɔkcin agi, “Kan mena jyeddi ‘yatiyɛ, ɛkɛ jyeddi ‘yati paru bɛɛ, ɛkɛ jyeddi mena ‘ya cuonnati daŋkun. 45 Kan mena ‘ya yuartayɛ, ɛkɛ mena ‘ya cuonna da yuartɛ ɛkɛ. 46 ’Ya bɛɛn iñɔ ṭɛɛrji baal ba mena dɛki, aŋka maka jyeddi ‘yati moki ciyi nona miel bɛɛ. 47 Kan mena tieŋdi jyek ‘ya ɔci jiek bɛɛdɛjiyɛ, gena ‘ya noŋ godan ɛkɛ bɛɛ. Acaan ‘ya bɛɛn noŋ godan bɛɛ. ‘Ya bɛɛn yuoc mako. 48 Yeti mena yookɔn te ‘ya ɔci tieŋdi jyek ‘ya bɛɛyɛ, godan bɛya ɛkɛti. Jyek ‘ya jyeka yookiti ɛkɛ neeniyɛ, bɛya ɛkɛ wyeñɛti te oŋŋa bɛya ookti ne ŋoyɔy. 49 Godan bɛya a ɔɔn acaan ‘ya gɔkkan ɛkkɛti te jyek ‘ya paru budan bɛɛ, yeti ‘ya gɔk ba jyeka ‘ya myennata Wey ɔɔn parɛ mena ‘ya cuonna. 50 Ɔci ŋeej ‘ya jyek ɛkɛ etti tɛɛtin baadi bɛɛ neeni mati. Jyeka guagdi ‘yayɛ, guagdi ‘ya ba jyeka ‘ya myennata Wey ɔɔny.”
