Yɔhanna 11

1Ɔci mena ‘uan bala yenti Lajarac. Ɛkɛ warɛ yaayɛ ne pɛñan, ɔci ɛkɛ bala ciyi ban Bɛtani, kowi ɛkkɛn a Moryam ɔci Marta. 2Lajarac ɛkɛ a mod Moryamn mena eelan pwoŋnɛ Yaccu ciegɛti ɔci puuññɛ te jyeyi ɛkɛy. 3Ɔci kowwɛn men gɛɛl cuuñɛ Yaccuti ɔci gɔkcin ɛkɛti agi, “Ciɛggɔn, Lajarac mena onga i ɛkɛ warɛ yaayɛ.” 4Yeti ne Yaccu tieŋni jwalla neeniyɛ, ɛkɛ gɔkcin agi, “Waja neeni bɛɛn ɛkɛti a ɔɔn acaan Juaŋ buagɔn Lajarac tuwa bɛɛ. Yeti waja neeni bɛɛn aŋka ma gɔrti pwani Jwaŋa Tolan, ɔci ma gɔrti pwani ‘ya Kaci Jwaŋa Tolan.” 5Yaccu ani Marta ɔci kow ɛkkɛn ɔci Lajarac. 6Ne Yaccu tieŋni a Lajarac warɛ yaayɛyɛ, ɛkɛ yeddin te nona ciyi ɛkɛ aŋan nink ne yyɛɛwɔ men. 7Ne nink ne yyɛɛwɔ baakiyɛ, ɛkɛ gɔkcin maka laldɛ ɛkɛti agi, “Ikin dɔɔtin ban Yahuudiya moki.” 8Maka laldɛ Yaccu gɔkcin ɛkɛti agi, “Mena loṭi may, i baal aŋan ne cwakanti, ɔci ma Icrayiil noŋi yebi i, ɔci i noŋ dɔwwa aŋan moki?” 9Yaccu gɔkcin ɛkkɛnti agi, “Hay! Tieŋdɛ poca! Acca neeniti ɔci oŋkanda ɔɔnyɛ, ‘ya yaakati ciy men ɔɔn. ‘Ya tuud men bɛɛ, acaan ‘ya men gena ‘ya cuonnata Wey ɔɔn aŋka naŋdi neeni cwamjan bɛɛ. ‘Ya ɛkɛ cwamja.” 11Yaccu gɔkcin a ɔɔn ɛkkɛnti, ɔci ne ḍiɛran ṭɔɔlɛ ‘wota gɔkcin agi, “Mug ikin Lajarac wiccin, ‘ya ootta aŋka ɛkɛ ṭiewa ñaalɔ.” 12Maka laldɛ ɛkɛ gɔkcin agi, “Ciɛggɔn, kan ɛkɛ wiccinyɛ, pwatcin, ɔci ɛkɛ warɛ tɛya moki.” 13Ne Yaccu gɔŋni agi Lajarac winnɔyɛ, gena lyen Lajarac, yeti ma tieŋŋin ne pwadan bɛɛ. Ɛkkɛn bala poŋi gɔki agi Lajarac winni agi wardan. 14Ɔci ne baaṭi Yaccu ɛkkɛn myennɛ ne pwadan agi, “Lajarac tuuni. 15Ɔci ‘ya yomu ñɔy ñɔy acaan ‘ya baaw ɛkɛti aŋan aŋka ɛkkɛ gɔrtɛ naŋki ‘ya, ɔci ɛkkɛ jyeddɛ ‘yati. Bɛɛdɛ, oottin ɛkɛti acca.” 16Ɔci Tɔmac (mena bartan ma a Yuongɔn) gɔkcin maka laldɛ Yaccu, maka atki i ɛkɛti agi, “Dala ikin oottin aŋka ikin tuutin iki Yaccu a cyɛɛlɔ.” 17Ne Yaccu bɛɛni dɛnni borayɛ, ɛkɛ tieŋŋin agi Lajarac bala koolji nink ne ŋaanɔ doki. 18Ban Bɛtani cualcin te ban Urcaliim, bala ba wɔɔkan ne yyɛɛwɔ, 19ɔci ma Icrayiil maka coŋin bɛɛn wɔɔwwin ḍieŋŋin Martati ɔci Moryamti aŋka ɛkkɛn yomgɛn pwattɛ. 20Marta tieŋŋin Yaccu bala bɛya, ɔci ɛkɛ jɔŋŋin ne pɛñan ɔci ati ɔci koogjin i ɛkkɛn yomɔ. Yeti Moryam ɛkɛ yeddin te baanji. 21Marta gɔkcin Yaccuti agi, “Ciɛggɔn, kan i te baali wɛnniyɛ, te mod ɔɔn tuun bɛɛ. 22Yeti acca ŋeej ‘ya kan i toocca Jwaŋa Tolanti te gengayɛ, ɛkɛ i ‘wondi.” 23Yaccu gɔkcin ɛkɛti agi, “Mod ɛkkɛ moki jɔŋdi ñaalɔ.” 24Marta gɔkcin ɛkɛti agi, “Çeej ‘ya oŋŋa ma jɔŋti ñaalɔ oŋŋa bɛya ookti ne ŋoyɔyɛ, ɔci ɛkɛ da jɔŋdi.” 25Yaccu gɔkcin ɛkɛti agi, “‘Ya a mena ma luoldɛ ñaalɔ, ɔci ‘ya a mena tɛɛtki mako. Maka jyeddi ‘yatiyɛ, ɛkkɛn ne tuutiyɛ, ɛkkɛn ciyi tɛɛti men. 26Ɔci maka tɛɛti kan ɛkkɛn jyeddi ‘yatiyɛ, ɛkkɛn tuwa oŋgati moki bɛɛ. I jyetti jyeka neenɛ?” 27Marta gɔkcin ɛkɛti agi, “Ɛɛ, Ciɛggɔn, ‘ya jyeti doki, i a Kiṭɔ, i a Kaci Jwaŋa Tolan, i a mena guaktan ma bɛya iñɔ ṭɛɛrjiy.” 28Ne Marta gɔŋni a ɔɔnyɛ, ɛkɛ ati borcin kow ɛkkɛn Moryamti, ɔci gɔkcin ɛkɛti meejjin a meejjin agi, “Mena Loṭi Ma bɛɛn ɔci bala tooci i.” 29Ne Moryam tieŋni a ɔɔnyɛ, ɛkɛ jɔllin ne pɛñan, ati kookcin Yaccuti, 30acaan Yaccu dɛññin baanji men bɛɛ. Ɛkɛ bala te yomɔ men nona kookki i Martay. 31Ne ma Icrayiil maka bala orɔ i Moryam aŋka mwoni ɛkɛ konɛ neeni gɔrki Moryam jɔŋni ne pɛñan, ɔci kaanni borayɛ, ɛkkɛn bala poŋi agi Moryam ati ooddi wiak kool wyeñɛti kɔŋji no. Ɔci ɛkkɛn bootcin ɛkɛti. 32Ɔci ne Moryam bɛɛni nona Yaccu baali, ɔci ne Yaccu yuarnɛ ɛkɛyɛ, ɛkɛ ḍwoñjin iñɔ Yaccu ñamɛti, ɔci gɔkcin ɛkɛti agi, “I te baali wɛnniyɛ, te mod ɔɔn tuun bɛɛ.” 33Ne Yaccu gɔrni Moryam wiagi, ɔci ma Icrayiil maka bɛɛn i ɛkɛ wiakki daŋkunyɛ, Yaccu yomɛ yaayɛ ne tolan. 34Ɔci Yaccu tooccin gɔkcin agi, “Ɛkɛ joŋnɛ wɛnɛ?” Ɛkkɛn gɔkcin Yaccuti agi, “Ciɛggɔn, bɛɛd gɔrca.” 35Ɔci Yaccu wiakcin. 36Ɔci ma Icrayiil gɔkcin agi, “Gɔṭṭɛ, gena mena ani Lajarac ne tolan neeni!” 37Yeti ma gɛɛg gɔkcin agi, “Yaccu mena yaakinti maka ñingɛn ulan pɔktɛ neeniyɛ, te ɛkɛ baali wɛnniyɛ, te Lajarac tuun boki?” 38Ɔci Yaccu booŋ tonnɛ bora moki, ɔci ɛkɛ ati kool wyeñɛti. Kola neeni a wɔrgɔn poomti, ɔci poom bala kool tukɛti. 39Yaccu gɔkcin agi, “Poom taandɛ ɔntɔ!” Ɔci Marta, kow mena tuun neeni, gɔkcin ɛkɛti agi, “Ciɛggɔn, ɛkɛ bala koolji nink aŋi ŋaanɔ, ɔci ɛkɛ doki ŋooyin!” 40Yaccu tooccin ɛkɛti agi, “‘Ya katan gɔkkan iti te ñamu ka i ne jyeddi ‘yatiyɛ, ɔci i gɔrca pwani Jwaŋa Tolan bɛɛ?” 41Ɔci poom taanji ma ɔntɔ, ɔci Yaccu ñorcin ñaalɔ ɔci gɔkcin agi, “Wey ɔɔn, pwatcin. I doki tieŋni jyek ‘ya. 42Çeej ‘ya i tieŋŋa jyek ‘ya oŋkanda, yeti ‘ya gɔkkan a ɔŋŋi aŋka maka yɔdgin iki ‘ya neeni tieŋdi, ɔci ɛkkɛn jyeddi ‘ya cuonna i.” 43Ne ɛkɛ gɔŋni a ɔɔnyɛ, ɔci ɛkɛ yaajjin ne tolan, gɔkcin agi, “Lajarac, kooya bora!” 44Ɔci mena tuun neeni kooyin bora, ɔci ɛkɛ byeŋkɛ a ḍɛɛggin ɔci ciegɛ a ḍɛɛggin te bworŋin poorki ma maka tuway. Ɔci wyeñɛ a paargɔn te bworŋo. Ɔci Yaccu gɔkcin mati agi, “Bworŋin laaktɛ ɔntɔ, ɔci dala ɛkɛ potti woono!” 45Ɔci ma Icrayiil maka bɛɛn i Moryam ɔci gɔrcin waka naŋŋɛ Yaccuyɛ, maka coŋin gɛɛg jyeti ɛkɛti. 46Ɔci maka pookɛn gɛɛg ati ma Pɛriciin myetkɛ te waka naŋŋɛ Yaccuy. 47Ɔci gaciicin ḍwaŋin ma Icrayiil ɔci ma Pɛriciin, ɛkkɛn wyetkɛn ḍɔɔlɛ nona ne cyɛɛlɔ i maka gɔṭi jieko, ɔci gɔgjin pookɛn agi, “Ikin noŋtin a ɔki? ‘Wana neeni noŋi naŋka coŋin naŋka ñyecki ma ɛkɛ. 48Kan ikin ɛkɛ daltin noŋi a ɔɔnyɛ, ma waakɛnda jyeddi ɛkɛti, ɔci ma Ḍɔɔm bɛya kɛɛn ikin muktan ɛkkɛn, ɔci on Juaŋ ona tolan neeni lɛktan.” 49Menga bala ɛkkɛnti yenti Kayapac. Ɛkɛ a gaciic tolan ma Icrayiil te ywonna neeni. Ɔci ɛkɛ gɔkcin ɛkkɛnti agi, “Jyeka neeni ŋeejɛ ɛkkɛ bɛɛ. 50Ɛkkɛ jiek gwallɛ jitin waakɛnda bɛɛ. Kan mena ne cyɛɛlɔ tuwa te ma waakɛndayɛ, ɔci te naŋka neeni kan ma Icrayiil waakɛnda ḍakti bɛɛyɛ, a ɔɔn pwatcin.” 51Kayapac gɔkcin jyeka neeni te yom ɛkɛ budan bɛɛ. Te ywonna neeni ɛkɛ a gaciic tolan ma Icrayiil, ɔci ma myennɛ ɛkɛ te naŋka bɛya ne ŋoyɔ agi Yaccu tuwa te kɛɛn ma Icrayiil, 52ɔci ɛkɛ tuwa te kɛɛn Ma Icrayiil pookɛn bɛɛ, yeti te kɛɛgin Jwaŋa Tolan kɛɛgin cyɛnŋin jitin bala baan warda ḍɔɔldiyɔ Yaccu aga maka ne cyɛɛlɔ. 53Ɔci te oŋŋa wannati ɔci oŋkanda ɔɔn, ɛkkɛn bala gɔṭi jyek lyen Yaccu, buagɔn ɛkɛ noktan. 54Ɔci te jyeka neeni Yaccu warɛ liɛlnɛ bora ma Icrayiil ñomgɛnti moki bɛɛ. Ɛkɛ ati ban Iprayim bana ḍiɛran bana wɔɔŋ lɛkɛti, ɔci ɛkɛ bala ciyi aŋan i maka laldɛ ɛkɛ. 55Ɔci ne Iid Malɛɛka Lien Bɛɛn Goṭi A Gorŋ cɔɔlnɛ dokiyɛ, maka ciyi ɔntɔ ban Urcaliim toŋkɛti, maka coŋin ɔɔccin ban Urcaliim konɛti noŋi naŋki ma Icrayiil te jyek lɔɔŋo. 56Ɔci maka neeni bala lieṭi Yaccu. Ɛkkɛn bala orɔ on Juaŋ ona tolan bala yɔdi gɔwwɔ pookɛn ɔci toyi yɔtin agi, “I poŋ a ɔki? Yaccu boki bɛya iidtɛ?” 57Gaciicin ḍwaŋin ma Icrayiil ɔci ma Pɛriciin gɔkcin mati te ñamu doki agi, “Kan men gɛɛl nona ciyi Yaccu ŋeejɛyɛ, dala ɛkɛ bɛya ɔɔn miettɔn aŋka ɔɔn ɛkɛ mugdɔn.”

will be added

X\