Yaakub 5

1Tieŋdɛ hay! Ɛkkɛ maka ciyi baan konɛti maka waakɛn coŋin, dala ɛkkɛ yomgɔ yiegdi, ɔci dala ɛkkɛ yomgɔ wiakti te taab bala bɛya ɛkkɛti ne baaṭi neeni. 2Wak ɛkkɛ waka coŋin neeni yiegin doki. Bworŋin ɛkkɛ amɛ ḍillan doki. 3Ɔci dahab ɛkkɛ ɔci bil pɔdda moki, ɛkkɛn aŋi dalŋaañan doki. Ɔci te oŋ godan ɛkkɛyɛ, jyek dalŋaañan neeni bɛya bora, ɔci jiek tɛya acaan waak ḍuaññɛ ɛkkɛ amaam budan. Ɔci te oŋŋa bɛya wannayɛ, jiek pɛñ pɛñ ɛkkɛti bala ba maaño. 4Gɔṭṭɛ! Maka ɛṭi pok ɛkkɛyɛ, bilk ɛkkɛn ammɛ ɛkkɛ doki. Ɔci jyek bilka neeni waakɛn coktan bɛɛ, bɛya bora. Jyek maka ɛṭi pok neeniyɛ, tieŋnɛ Ciɛggɔn Tolan doki. 5Iñɔ baanji wɛnniyɛ, wak ɛkkɛ kɔɔna kɔɔnno, ɔci oŋkanda ɛkkɛ balgɛ lieṭɛ waka ɛkkɛ yomgɔ ñɔɔtɛy, ɛkkɛ waakɔ caaŋŋɛ te waak balgɛ ba moldin oomi ma aŋka noktan te iidy. 6Ɛkkɛ maka pwadin neeniyɛ, jomnɛyɔ ɛkkɛ nonk godan agi ɛkki yiegɔ. Ɔci ɛkkɛn noŋŋɛ ɛkkɛ. Ɔci ɛkkɛn yaakinti kɛkti genga ɛkkɛti bɛɛ. 7Yeti hay, modg ɔɔn! Dala ɛkkɛ ciedɛ kɛɛddɛ Ciɛggɔn te yoma ñɔyan ne ɛkɛ bɛɛdi ɔɔn. Gɔṭṭɛ! Maka dwoki waakyɛ, te ñamu ɛkkɛn kɛɛy ñal ḍuoŋ tukɛ, ɔci ne baaṭi ɛkkɛn kɛɛy ywakṭi moki. Ɔci ɛkkɛn ciyi kɛɛy pok te yoma ñɔyan ne pok ḍwaŋti ɔɔn. 8Ɔci ɛkkɛ, dala ɛkkɛ daŋkun ciedɛ te yoma ñɔyan. Naa ɛkkɛ buayɛ genga bɛɛ. Acaan oŋŋa Ciɛggɔn bɛɛdiyɛ, cɔɔllin doki. 9Modg ɔɔn, naa ɛkkɛ woowɛ yɔtin pookɔ bɛɛ. Kan mena wooki mena parɛyɛ, jiek bɛya ɛkɛ wyeñɛti. Ciɛggɔn Godan Tolan bala bɛya, bala pɔy tukɛti doki. 10Dala ikin poŋtin te taab maka a bɔwan Jwaŋa Tolan maka bala gɔki mati te yenti Ciɛggɔnyɛ, taab ɛkkɛn tol tolo, yeti ɛkkɛn yomgɛn ñɔyɔ men ɔɔn. 11Çeejɛ ɛkkɛ maka a bɔwan Jwaŋa Tolan maka yɔɔd ne tɛyanyɛ, ikin boṭin ɛkkɛn agi ɛkkɛn a maka yomgɛn ñɔyin. Ɛkkɛ tieŋnɛ jyek Ayuub ne ɛkɛ baali yɔɔdi ne tɛyan ne taab baali ɛkɛti ne tolany. Ɛkɛ dalnɛ Juaŋ bɛɛ. Ɛkɛ maŋŋɛ Jwaŋa Tolan. Ɔci a ɔŋŋiyɛ, ŋeejɛ ɛkkɛ Juaŋ yomɛ a pɔkɔn mati, ɔci ɛkɛ ani ikin ne tolan. 12Modg ɔɔn, jwalla tolan bala, ɔci ɛkɛ gɔki agi, “Naa ɛkkɛ gɔktɛ genga te yenti pɔlla ñaalɔ ɔci te yenti ṭɛra iñɔ ɔci te yenti menga bɛɛ.” Ɔci kan ɛkkɛ jyettɛ te jwali gɛɛlyɛ, dala ɛkkɛ gɔktɛ ne pwadan agi, “Ɛɛ.” Ɔci kan ɛkkɛ yooktɛ te jwali gɛɛlyɛ, dala ɛkkɛ kɛktɛ ne pwadan agi, “A’a.” Ɔci a ɔɔnyɛ, jiek bɛya ɛkkɛ wyetkɔti bɛɛ. 13Kan men gɛɛl ɛkkɛti balki taabyɛ, dala ɛkɛ cɔkti Juaŋti oŋkanda ɔɔn. Kan men gɛɛl yomɛ ñɔy ñɔyyɛ, dala ɛkɛ ‘ualdi ɔɔlg agi Juaŋ pwadɔ. 14Ɔci kan men gɛɛl ɛkkɛti warɛ yaayɛyɛ, dala ɛkɛ borti cyekin kaniicati aŋka ɛkkɛn bɛya. Ɔci ɛkkɛn ñɔɔn oltan ɛkɛ wyeñɛti, ɔci ɛkkɛn cɔkti Jwaŋa Tolanti te ɛkɛ. 15Ɔci te jyenna jyetki Ma Kiṭɔti ne ɛkkɛn cɔkki ɛkɛti a ɔɔnyɛ, Juaŋ yaakinti mena warɛ yaayan neeniy ywaŋdɛ. Ɔci kan ɛkɛ balki nɔjiyɛ, ɛkɛ bɔɔktɛ Juaŋo. 16Dala ɛkkɛ nɔji ɛkkɛ lɛɛldɛ bora modgɔti pookɔ, ɔci dala ɛkkɛ cɔktɛ Juaŋti te maka pookɛn, ɔci dala ɛkkɛn daŋkun cɔkti Juaŋti te ɛkkɛ aŋka ɛkkɛ waakɔ pwaddi. Acaan kan men gɛɛl pwani Juaŋti doki ɔci kan ɛkɛ cɔkti Juaŋtiyɛ, Juaŋ yaakinti noŋdi naŋki ɛkɛ naŋka tɛyan. 17Gɔṭṭɛ poca, te jyek cɔŋi neeniyɛ, bala ba jyek Iliiya. Iliiyayɛ, ɛkɛ bala ba ikin daŋkun ɔɔn. Ɔci ɛkɛ bala cɔki Juaŋti ne tolan te jyek ñaal agi naa ñaal bɛɛdɔ bɛɛ. Ɔci ñaal yɔɔni yuong ne ḍoogɔ ɔci ponk ne dɔɔyɔ wilin ne cyɛɛlɔ. 18Ɔci ɛkɛ cɔkcin Juaŋti moki, ɔci ñaal bɛɛn ne tolan, ɔci waka amtin bɛɛn moki. 19Modg ɔɔn, kan men gɛɛl ɛkkɛti jyetcin ɔntɔ te jyeka awarɛtiyɛ, ɔci kan ɛkɛ dɔɔnɛti mena parɛ gɛɛlyɛ, 20mena men dɔɔnɛti neeniyɛ, dala ŋeeddɛ ɛkɛ ne pwadan mena neeni yɔɔññɛ Juaŋo, ɔci ɛkɛ ḍakti moki bɛɛ, ɛkɛ bɔɔŋnɛ Juaŋ te nɔji ɛkɛ nɔjja coŋin neeni doki.

will be added

X\