Yaakub 4

1Jyek lañ ɔci jyek ṭiewin bɛɛn te aŋɛ ɛkkɛti? Jyeka neeni bɛɛn te yomg ɛkkɛti, acaan yomg ɛkkɛ noowɔ jiju te jyek bwakti waako. 2Ne ɛkkɛ buagɛ waak ɔci waak baaki ɛkkɛtiyɛ, ɛkkɛ nokkɛ ma te bwakti waako. Acaan ne ɛkkɛ korkɔ motki te wak maka pookɛn ɔci ne ɛkkɛ yaakɛti genga eedɛ bɛɛyɛ, ɛkkɛ ṭiewɛ aŋka ɛkkɛ noowɛ wanna. Yeti waak gɛɛg baaw ɛkkɛti acaan ɛkkɛ toonnɛ Juaŋti te ɛkkɛn bɛɛ. 3Ɔci oŋkanda ne ɛkkɛ toocɛ Jwaŋa Tolanti te waakyɛ, ɛkkɛ ‘wondɛ ɛkɛ bɛɛ, acaan ɛkkɛ buagɛ waka neeni te yomg ɛkkɛ pookɔ budan. 4Hay ɛkkɛ maka jyetcin ɔntɔ nɛ, ŋeejɛ agi ne mena ani jyeka iñɔ baanji wɛnni naŋki ɛkɛ yaayɛ Juaŋti ne pɛñan bɛɛ? Acaan a ɔŋŋiyɛ, mena ani jyeka iñɔ baanji wɛnniyɛ, ɛkɛ a mug Jwaŋa Tolan bɛɛ. Ɛkɛ a mena yoyi ñin i Juaŋo. 5Ɛkkɛ poŋɛ gɔkɛ agi jyeka worgaji neeni a jyeka budan ne Jiek gɔkki agi, “Boŋa ikin ‘wonninti Juaŋyɛ, ɛkɛ konɛ motcin ne pɛñan.” 6Yeti yom pwani ikin ‘wontinti Juaŋ neeni, ɛkɛ aŋka tɛɛcin ne tolan te kon monno. Ɔci acaan a ɔŋŋiyɛ, ɛkɛ noŋi ba jyeka guaŋŋɛ ɛkɛ te ñamu agi, “Kan ma kooŋi waakɛn agi ɛkkɛn aginti maka ḍwaŋinyɛ, Juaŋ kɛkti te ɛkkɛn. Yeti maka poŋi yomgɛnti agi ɛkkɛn aginti maka ḍyɛrinyɛ, Jwaŋa Tolan yomɛ pwada pwani gena ɛkkɛnti.” 7Acaan a ɔŋŋiyɛ, dala ɛkkɛ noŋdɛ ba jyek Jwaŋa Tolan oŋkanda, ɔci Jwaŋa Yaayan kaaktɛti ɛkkɛ, ɔci ɛkɛ kwaya te ɛkkɛti. 8Dala ɛkkɛ ortɛti Jwaŋa Tolanti ɔci ɛkɛ daŋkun ortiti ɛkkɛti. Dala ŋeeddɛ ɛkkɛ ɛkkɛ agɛ nɔɔtko, ɔci naŋka naŋdɛ ɛkkɛ yaayanyɛ, dala lɛgdɛ ɛkkɛ jitin. Hay! Ɛkkɛ maka noŋi waakɛn te ma ñingɛn budan nɛ, dala ɛkkɛ nɔji daldɛ te naŋki yomgɔti. 9Dala ɛkkɛ yomgɔ wiakti awarɛ, ɔci dala ɛkkɛ yomgɔ yiegdi te nɔji ɛkkɛ, ɔci dala ɛkkɛ wiaktɛ! Naa ɛkkɛ lɛɛṭɛ bɛɛ, yeti dala ɛkkɛ wiaktɛ te nɔji ɛkkɛ. Naa ɛkkɛ yomgɔ ñɔyɔ bɛɛ, yeti dala ɛkkɛ yomgɔ yiegdi te nɔji ɛkkɛ! 10Naa ɛkkɛ noŋdɛ ba maka yomgɛn ḍwaŋin Jwaŋa Tolan ñamɛti bɛɛ. Dala ɛkkɛ noŋdɛ ba maka yomgɛn ḍyɛrin, ɔci a ɔɔnyɛ, ɛkkɛ magdɛ Jwaŋa Tolan. 11Modg ɔɔn, naa ɛkkɛ woowɛ yɔtin pookɔ bɛɛ. Kan men gɛɛl wooki mod ɛkkɛn men Kiṭɔ, ɔci kan ɛkɛ gɔki agi naŋki ɛkta neeni yaayɔyɛ, a ɔɔnyɛ, bala ba ɛkɛ wooki jyek ganuun, ɔci a ɔɔn bala ba ɛkɛ gɔki agi jyek ɛkɛ aŋka pwadgɔ te jyek ganuun. Kan i noŋja a ɔɔnyɛ, i tiec jyek ganuun waakɛn bɛɛ, yeti i waru naŋŋi a mena jiek oldɛ ma wyetkɛnti. 12Ciɛggɔn godan gɛɛl bala ne cyɛɛlɔ. Gena Jwaŋa Tolan mena ma ‘wonnɛ jyek ganuun. Ɔci gena ɛkɛ aŋka yaakinti gɔkti mati agi dala men uddɔ walla agi dala ɛkta tuudɔ. Oŋ i gɔk i aŋka a menɛ yeti ne i wooki mod ɛkkɛ a ɔɔn wan hay, muka maam? 13Gɔṭṭɛ wɛnni poca, ɛkkɛ maka gɔki agi, acca walla ne liidɔ ɔɔn ooddɔn bana parɛti, ɔci ciedɔn aŋan ywoni ne cyɛɛlɔ aŋka ɔɔn cɔtɔn waak aŋka bilk bɛya ɔɔntiy. 14Naŋka bɛya ɛkkɛ ḍɔɔggɔti ne liidɔ ŋeeddɛ ɛkkɛ? Coodi ɛkkɛ bala a ɔki? Coodi ɛkkɛ bala ba wiew ne baali ne ḍyɛṭ ṭɔɔlɛ ɔci baadi dokiy. 15Dala ɛkkɛ aŋka gɔktɛ agi, “Kan Juaŋ buagɔn ɔɔn ciedɔn noŋdɔn a ɔɔn ne liidɔyɛ, ɔɔn noŋdɔn a ɔɔn.” 16Naŋki ɛkkɛ yeti bala ba naŋki maka yyɛcin. Ɛkkɛ gɔkɛ amaam budan bala ba ne ɛkkɛ jiek ŋeejɛ ɛkkɛ doki no. Ɔci yyɛji ɛkkɛ neeniyɛ, pwatcin bɛɛ, yaayɛ. 17Kan men gɛɛl jyeka pwadin ŋeejɛ oŋ yeti ɛkɛ noŋi ba jyeka neeni bɛɛyɛ, a ɔɔn gena nɔjjo.

will be added

X\