Yaakub 3

1Naa maka coŋin ɛkkɛti aga maka loṭi ma te jyek Jwaŋa Tolan budan amaam ɔɔn bɛɛ. Acaan ŋeejɛ ɛkkɛ ikin maka loṭin mayɛ, kan ikin domtin jiekyɛ, jiek tɛya ikin wyetkɔti ne pɛñan. 2Ikin ma baan waakida a maka domi naŋka coŋin. Kan men gɛɛl gɔki jyeka yeyin oŋgati bɛɛyɛ, mena neeni a mena domi naŋki gɛɛl bɛɛ. Ɛkɛ loonin ñamu doki. Kan ɛkɛ yaakinti lɛmi ɛkɛ mugdɛyɔ ne pwadan a ɔɔnyɛ, ɔci ɛkɛ yaakinti daŋkun war ɛkɛ mugdɛyɔ warda. 3Jyek muŋi lɛmmu neeni bala ba jyek muntan. Kan jiŋgin wiɛntin ikin muntan tukɛti acaan ikin buagin dala muntan noŋdi ba jyek ikinyɛ, jiŋgin yaakinti muntan mugdɛyɔ warda ɔci noŋdi ba jyek ikin. 4Ɔci jyek lɛmmu moki bala ba jyek murka tolan. Murkan ḍwaŋinyɛ, ɛkkɛn ati ne pɛñan ne jwamma tolan baaliy. Ɔci te gɔmña ṭwokki ma ɛkkɛn waakɛn ḍiɛran neeniyɛ, murkan ḍwaŋin ati ba yom maka nɛɛyi ɛkkɛn neeni. 5Ɔci lɛmmu mokiyɛ, ɛkɛ ḍiɛr ḍyɛro, yeti ɛkɛ gɔki jyeka ḍwaŋin bala ba mena yyɛcan. Ɔci jyek lɛmmu moki bala ba jyek maaño. Gɔṭṭɛ poca, kan piilñan ṭɔɔlɛ maañ piilñan ḍiɛran tontan ma lwoma tolantiyɛ, lwoma tolan neeni amdɛ ɛkɛ warda. 6A ɔŋŋiyɛ, ikin waakɔyɛ, balki gena yaayan, gena lɛmmo. Ɔci waak ikin waakɛnda yiegdi te jyek lɛmmu neeni. Te jyek lɛmmu neeni ma buagɔn noŋdi ne yaayan, ɔci jyeka yeyin neeniyɛ, bɛya te bana maaño. 7Dala ɛkkɛ poŋdɛ daŋkun te jyek waka bala bora luomji a ywobk neeni, ma yaakinti ɛkkɛn mwoktan, waagga da te kɛɛnɛn, ɔci waagga da te kɛɛnɛn, ɔci ɛkkɛn pirtan ma baanji, ɔci ɛkkɛn a ywobk moki bɛɛ. Waka neeniyɛ, gena leyi, ɔci ḍiirg, ɔci kogi, ɔci waka bala pietin waakɛnda. 8Yeti lɛmmuyɛ, ɛkɛ yaayɛ a yuom ne tolan hay! Menga yaakinti lɛmmɛ agdiyɔ aŋka jyeka yeyin neeni baadi bɛɛ. Ɛkɛ gɔki ne yaayan amaam budan, ɔci jyek ɛkɛ bala ba jan lieno. 9Gɔṭṭɛ, te lɛmi ikin neeniyɛ, ikin gɔkin ne pwadan te Wey ikin mena Ciɛggɔn neeni. Ɔci te lɛmi ikin moki lɛmma ne cyɛɛlɔ neeniyɛ, ikin ḍorin maka pookɛn waakɛn. Gena maka aŋŋɛ Juaŋ ba bolji ɛkɛy. 10Jyeka pwadin neeni ɔci jyeka yeyin neeni ɛkkɛn bɛya bora te tuka ne cyɛɛlɔ neeniti. Modg ɔɔn, naa ɛkkɛ noŋɛ naŋka neeni a ɔɔn bɛɛ! A’a, yaayɛ a ɔɔn. 11Jina piegɛ pwadin ɔci jina piegɛ yeyinyɛ, ɛkkɛn piegɛn bɛya bora te nona ne cyɛɛlɔ boki? A’a. 12Jan ŋuami yaakinti jieda toon ṭɔlgɛ boki? A’a. Ɔci luutkin yaakinti jieda ŋuami ṭɔlgɛ boki? A’a. Ɔci jina piegɛ bala ba eeñanyɛ, pyega pwadin bɛya bora te ɛkɛti boki? A’a. 13Kan ma ɛkkɛ gɛɛg ñingɛn tɛy tɛy ɔci kan ɛkkɛn jiek ŋeecɔn ne pwadanyɛ, dala ɛkkɛn noŋdi naŋka pwadin te yoma pwadan, naa ɛkkɛn noŋi ba maka yyɛcin bɛɛ. Te naŋki ɛkkɛn neeniyɛ, ɛkkɛn ŋeettan ma naŋka neeni bala ba naŋki maka ñingɛn tɛyan awarɛ. 14Yeti kan ɛkkɛ korkɔ cyɛy cyɛy ɔci korkɔ modɔ ne pɛñan a ɔɔnyɛ, ɔci kan ɛkkɛ ṭiewɛ te waak a ɔɔnyɛ, naa ɛkkɛ poŋɛ gɔki agi ñing tɛɛn bala ɛkkɛti bɛɛ. Kan ɛkkɛ poŋɛ gɔkɛ a ɔɔnyɛ, bala ba ɛkkɛ yookɛ te jyeka awarɛ no. 15Ñing tɛɛn guaŋŋɛ ɛkkɛ neeniyɛ, bɛɛn te ñaalɔ bɛɛ, bɛɛn te iñɔ ṭɛɛrji a ñing tɛɛn ma baan budan. Ɔci ɛkɛ a ñing tɛɛn Juaŋ bɛɛ, gena ñing tɛɛn Jwaŋa Yaayan. 16Kan ma korkɛn modɔ, ɔci kan ɛkkɛn ṭiewɔ te waakyɛ, jyek ɛkkɛn a jyek laño, ɔci naŋka yeyin bala coŋɔ. 17Ñing tɛɛna bɛya te ñaalɔyɛ, da parɛ. Maka balki ñing tɛɛn neeniyɛ, poŋi jyeka yeyin bɛɛ. Coodi ɛkkɛn pwad pwado. Ɛkkɛn ṭiewɔ te waak bɛɛ. Ɛkkɛn wyetkɛn yeyɔ bɛɛ. Ɛkkɛn gɔki ne pɛñan mati bɛɛ. Ɛkkɛn tyeŋi jiek ne pwadan. Yomg ɛkkɛn bala mati ne pwadan, ɔci ɛkkɛn noŋi ne pwadan oŋkanda. Jyek ɛkkɛn a cyɛɛlɔ. Ɛkkɛn noŋi ma ñingɛn bɛɛ. 18Ɛkkɛn a maka yɔŋi jiek maka pookɛnti aŋka ma cootɛ te pwaniy, ɔci te naŋki ɛkkɛn mati neeniyɛ, ma noŋdi naŋka pwadin naŋka Juaŋ buagɛy.

will be added

X\