Yaakub 2

1Modg ɔɔn, dala ɛkkɛ noŋdɛ mati waakɛnda ba bolja ne cyɛɛlɔ, naa ɛkkɛ ma gɛɛg aŋka naŋdɛ ne pwadan, ɔci ɛkkin pookɛn aŋka naŋdɛ yaaldɛ a yaali bɛɛ. Ɛkkɛ jyettɛ Ciɛggɔn ikin Yaccu Kiṭɔ mena pwadan neeniti doki. Ɔci acaan a ɔŋŋiyɛ, naa ɛkkɛ noŋɛ jiek ne yyɛɛwɔ bɛɛ. 2Gɔṭṭɛ, jwali ‘ya neeni bala a ɔŋŋi te naŋki ɛkkɛ, kan men gɛɛl ɛŋi tiŋkin naŋɛ ma te dahab ɔci bworŋin pwadinyɛ, ɔci kan ɛkɛ bɛya nona ḍwoṭɛ ɛkkɛ wyetkɔ on Juaŋyɛ, ɛkkɛ gɔkɛ gena ɛkɛti ne pwadan agi, “Hay! Dala i bɛɛd coocca nona pwadanti neeni.” Yeti ne mena anan mena ɛŋi bworŋa yaayan, bɛɛdiyɛ, ɛkkɛ gɔkti ɛkɛti agi, “Hay, dala i bɛɛd yɔɔtca wɛnni,” walla agi, “Dala i bɛɛd coocca iñɔ ṭɛɛrji ɔɔn ñomgɔti wɛnni.” 4Tieŋdɛ hay modg ɔɔn, kan ɛkkɛ noŋɛ a ɔɔnyɛ, ɛkkɛ noŋɛ ba ɛkkɛ yookɛ te ma gɛɛg no. A ɔɔnyɛ, bala ba ɛkkɛ ma kɛɛmmɛ jitin doki te yomg ɛkkɛ pookɔ amaamo. 5Modg ɔɔn modga ana ‘yay, dala ɛkkɛ tieŋdɛ! Maka anin maka wak ɛkkɛn baawyɛ, ɛkkɛn lɔɔnnɛ Juaŋ bora ɔci aŋi ba maka cyɛgan te jyeni ɛkkɛn ɛkɛti ne pwadan, ɔci ɛkkɛn ‘wondɛ Juaŋ cyɛgji ɛkɛ ba jyeka naŋŋɛ ɛkɛ te ñamu agi maka ani ɛkɛyɛ, ɛkkɛn ‘wondɛ ɛkɛ cyɛgji ɛkɛ. 6Yeti ɛkkɛ aŋka noŋɛ ne yaayan maka ananti neeni. Ɛkkɛ noŋɛ ba ne ɛkkɛn a waagga bɛɛ. Hay, ŋeejɛ ɛkkɛ ne maka cyɛgan ɛkkɛn a maka ñieyi te ɛkkɛ bɛɛ? Ɔci ɛkkɛn a maka ɛkkɛ eetɛ noŋtɛ godan bɛɛ? 7Ɔci ɛkkɛn a maka ḍori yenti Yaccu yenta pwadan yenta bala ɛkkɛti neeni bɛɛ? Ɛɛ, gena ɛkkɛn woodgɛn. 8Kan ɛkkɛ ganuun Ciɛggɔn tiidɛyɔ ne pwadan ba jyeka kiigin ne gɔkki agi, “Dala anna i ani maka pookɛnyɛ, yoomdi i anna i ani war iy,” a ɔɔnyɛ, yɔmjin. 9Yeti kan ɛkkɛ ma gɛɛg aŋka naŋdɛ ne pwadan, ɔci ɛkkin pookɛn aŋka yaaldɛ a yaaliyɛ, naŋka neeni aŋka a nɔjjo. Ɔci a ɔɔnyɛ, ɛkkɛ aŋŋɛ maka lɛɛwi jyek ganuun doki. 10Kan men gɛɛl jyek ganuun jitkɛn tiiññɛyɔ waakɛnda, ɔci ɛka ne cyɛɛlɔ aŋka bɛɛnɛjiyɛ, a ɔɔnyɛ, ɛkɛ ganuun pookɛn lɛɛŋŋɛ jitin waakɛnda daŋkun. 11Acaan Jwaŋa Tolan mena gɔki agi naa ma noŋdɔ tomi bɛɛyɛ, ɛkɛ gɔki moki agi naa ma nokkɔ maka pookcɛn bɛɛ. Ɔci kan men gɛɛl ciya budan te naŋki tomi oŋ yeti kan ɛkɛ nokti mengayɛ, a ɔɔn ɛkɛ aŋi mena bɛɛyi jyek ganuun daŋkun. 12Dala jyek ɛkkɛ ɔci naŋki ɛkkɛ bala ba naŋki maka godan bɛya ɛkkɛnti ba jyek ganuun ikin pɔŋninti Yaccu ḍɔɔggɔti neeni. 13Acaan Jwaŋa Tolan yomɛ pɔktɛ ne ɛkɛ jiek oldɛ mena yomɛ ulan neeni wyeñɛti bɛɛ, yeti mena yomɛ pwadan matiyɛ, ɛkɛ aŋka buayi jyek godan Juaŋ neeni bɛɛ. 14Modg ɔɔn, kan men gɛɛl gɔki agi ɛkɛ jyetci Juaŋti, ɔci kan ɛkɛ noŋi ne pwadan maka pookɛnti bɛɛyɛ, oŋ a ɔɔn yɔmdi a ɔki? Jyenna ɛkɛ jyeti Juaŋti neeni yɔmjin boki? Ɛkɛ yɔɔdɛ Juaŋ a ɔɔn boki? Ɛkɛ yɔɔdɛ Juaŋ te jwali jyeni budan kan naŋka pwadan baaw ɛkɛti bɛɛ. 15Kan mod ɛkkɛ gɛɛl walla kow ɛkkɛ gɛɛl bɛɛn nona ɛkkɛ Ma Kiṭɔti, ɔci kan bworŋ ɛkɛ yaañi ɔci waka amdɛ ɛkɛ oŋkanda moki bɔɔnjin, 16ɔci kan i ɛkɛ ‘woñga genga bɛɛyɛ, jyeka guaŋŋi i ɛkɛti agi dala ɛkta ciedɔ ne pwadan, ɔci agi naa ɛkta nogda jwami bɛɛ, ɔci agi naa ɛkta amda koñ bɛɛ neeniyɛ, a jyeka budan. 17Ɔci ba jyeka neeniyɛ, bala ba jyenna ikin jyettin Juaŋtiy. Kan jyeni bala parɛ ɔci kan naŋka pwadin baawyɛ, jyenna neeni a jyeka budan. 18Men gɛɛl kaapun kɛkti te jyeka guaŋi ‘ya neeni, ɔci ɛkɛ gɔkti kaapun agi ma gɛɛg a maka balki jyenno, ɔci maka pookɛn daŋkun a maka noŋi naŋka pwadin, kan men gɛɛl bala gɔki a ɔɔnyɛ, ‘ya ṭwokca ɛkɛti a ɔŋŋi daŋkun agi, “Dala i ‘ya myetta poca, men gɛɛl yaakinti jyeddi Yaccuti ɔci naŋka pwadin dɔki baaw ɛkɛti a ɔki? Yeti ‘yayɛ, naŋki ‘ya naŋka pwadin jyenna ‘ya jyetta lɛɛltan bora.” 19Ne ɛkkɛ jyettɛ gɔkɛ agi Juaŋ baalɔyɛ, a ɔɔn pwatcin. Yeti jwali jyeni ɛkkɛ wanna yɔmdi parɛ te gena? Tieŋdɛ, Jwaŋa Tolan ŋeecɔn jɔkin yeyin daŋkun agi ɛkta baalɔ, ɔci ɛkkɛn buayi waakɛn ḍiedan ne tolan. 20Hay! Ɛkkɛ ñingɔ tɛɛcin boki? Tieŋdɛ, ɛkkɛ myettin ‘ya te jyenna jyetki may. Kan jyeni bala parɛ ɔci naŋka pwadin baawyɛ, jyenna neeni yɔmjin te genga bɛɛ. 21Gɔṭṭɛ, poca te jyek Wey ikin Abrahim neeni. Wey ikin Abrahim pwani Juaŋ ñamɛti te naŋka naŋŋi ɛkɛ oŋŋa ɛkɛ Juaŋ ‘wonnɛ kaci ɛkɛ Icaak ba gena ‘yɛrŋɛ ɛkɛ nona ɛrki ma waak bɛɛ? 22Te naŋki ɛkɛ neeniyɛ, ŋeecin ikin jyeni bala parɛ bɛɛ. Yeti jyeni bala yaakkɛn i naŋki ɛkɛ naŋka pwadan. Ne ɛkɛ noŋni naŋki ɛkɛ neeniyɛ, bala ba jyenna ɛkɛ jyetti Juaŋti neeni bɛɛn bora ne pwadan doki. 23Te naŋka naŋŋɛ Abrahim neeniyɛ, bala ba jyeka kiigin worgaji bɛɛn bora doki, gena jyeka gɔki agi, “Abrahim jyeti Juaŋti, ɔci te jyenna ɛkɛ jyetti neeniyɛ, ɛkɛ pwani Juaŋ ñamɛti.” Ɔci ma boṭi Abrahim agi mug Jwaŋa Tolan. 24Te jyeka neeniyɛ, ŋeecin ikin men gɛɛl pwada Juaŋ ñamɛti te jyeni ɛkɛ parɛ bɛɛ. Dala ɛkɛ baltan naŋka pwadin daŋkun i jyenno. 25Ɔci jyek Rahab ɛŋa toban bala a ɔɔn daŋkun. Wɔɔka gɛɛltiyɛ, maka cuuñɛ ma lɛɛl noon ban Jɛrikɔ bɛɛn on ɛkɛ. Ɔci ɛkkɛn maŋŋɛ ɛkɛ, ɔci ɛkkɛn cuuññɛ ɛkɛ te pɔya parɛ aŋka naa ɛkkɛn mwoktan ma ɔci noktan bɛɛ. Ɔci ɛkɛ pwani Juaŋ ñamɛti te naŋki ɛkɛ neeni. 26Bala ba kan boŋ tɛɛtin baaw mentiyɛ, mena neeni a tuuta doki. War ɛkɛ niin budan. Ɔci ba jyeka neeniyɛ, bala ba jyeni moki. Kan jyeni bala menti parɛ ɔci naŋka pwadan baawyɛ, jyenna neeni bala ba jyeka budan.

will be added

X\