Ibrun 9

1Jyeka naŋɛ Juaŋ i ma ñamuyɛ, ɛkkɛn ma myetkɛ te malla ɛkkɛn mortɛ Juaŋti a ɔkiy, ɔci aŋka ma ona morki ɛkkɛn iñɔ ṭɛɛrji wɛnni neeni cɔttan a ɔki. 2A ɔŋŋiyɛ, ona a bworŋ cɔdɛ ma yenti Nona Pwadanyɛ, ɛkɛ balkɔn dyɛkan dɛki, ɔci tarabɛɛca ɔci byedga ‘wontan ma Juaŋy. 3Ɔci on kona neenitiyɛ, bworŋa kɛkci ma bala. Ɔci on kona bworŋa neeni ŋoyɛtiyɛ, bartan ma agi, “Nona Pwadan Ne Tolany.” 4Gena on ṭɔla balkɔn gena ṭuorki ma jien gena naŋi ma te dahab, ɔci canduuk jyeka ḍyɛŋŋɛ Juaŋ canduuk naŋɛ ma te dahab warɛ warday. Ɔci kulla naŋi ma te dahab kulla ḍuacki ma ama bartan ma a “Manna” ama ma ‘wonnɛ Juaŋ te ñaalɔ pɔliji, ɔci gɔl Haruun gɔla pworŋ, ɔci gwoyi ṭɔlgɛn kieññi Juaŋ jyeka ḍyɛŋŋɛ ɛkɛyɛ, bala jiju canduuk neeniji wɛnan. 5Ɔci canduuk neeni wyeñɛtiyɛ, malɛɛkan bartan ma agi caryubim bala yɔɔd ne yyɛɛwɔ. Ɛkkɛn mieti ma agi Juaŋ baalɔ nona yɔtki ɛkkɛn wanna, ɔci ɛkkɛn kɔggɛn nona Juaŋ bɔɔci ma te nɔji kwomiyɔ. Oŋ yeti accayɛ, wɔɔka gɛɛl bala aŋka lookin jiek korkɛn bɛɛ. 6Waak waakɛnda a ywaŋgɔn a ɔŋŋi, gaciicin kaatti on kona ñamu oŋkanda aŋka noŋi kanŋa. 7Oŋ yeti on kona parɛtiyɛ, gaciic tolan Ma Yahuud aŋka kaatti parɛ oŋi ne cyɛɛlɔ te ywonna ne cyɛɛlɔ. Oŋ yeti ɛkɛ kaatti budan bɛɛ, ɛkɛ eedi yimg gena ŋardɛ ɛkɛ ‘wondɛ ɛkɛ Juaŋ te nɔji ɛkɛ, ɔci te nɔjja naŋɛ ma ɛkɛy. 8Boŋ Juaŋ nɔɔti te Nona Pwadan Ne Tolan agi pɔy tuktan agi uulgɔn, acaan ona yɔɔd bora bala yɔɔd men. 9Ɔci kanŋa a ywaŋgɔn neeniyɛ, nɔɔti te oŋka accay. Waka ‘wontan ma Juaŋ ɔci waka ŋartan mayɛ, ɛkkɛn yaakinti nɔji ma eetan ɔntɔ te ma yomgɛnti bɛɛ. 10Oŋ yeti ɛkkɛn a waka amtin, ɔci waka maattin, ɔci lɔɔŋa luaktan ma jitkɛn ne coŋɔny. Ɛkkɛn kandi te waka neeni ɔɔn ne kanŋa woonɛ neeni bɛɛdi ɔɔn. 11Oŋ yeti Yaccuyɛ, ne ɛkɛ bɛɛni aŋŋi gaciic tolan te jyek waka pwadin waka bala acca neeniyɛ, ɛkɛ doki kaaccin on Juaŋ ñaalɔ ona naŋɛ ma te byeŋkɛn bɛɛ neeni. Ona kaannɛ ɛkɛ neeni tol tolo, ɔci pwatcin ne tolan te oorga naŋtan ma te byeŋkɛn. Ɔci ona neeni te ṭɛɛrji wɛnni bɛɛ. 12Ɔci ne ɛkɛ kaanni Nona Pwadan Ne Tolanti oŋi ne cyɛɛlɔyɛ, ɛkɛ kaaccin te yimg ḍɛɛk ɔci yimg yotk ṭɔlgɛn bɛɛ, yeti ɛkɛ kaaccin te yimg ɛkɛ parɛ, ɔci ɛkɛ ikin eeŋnin yɔɔta baadi bɛɛy. 13Oŋ kan gañi yimg ḍɛɛk ɔci yotk, ɔci twon neek ṭɔlgɛn a moong, maka a nɔɔtk ywaŋtan pwaddi Juaŋ ñamɛtiy, 14oŋ poca, gɔrca! Yaccu Kiṭɔ, yimg ɛkɛ noŋi ne pwadan ne tolan ikinti. Ɛkɛ warɛ ‘wonnɛ Juaŋ ba gena ‘yɛrŋɛ ɛkɛ Juaŋti pwadan te Boŋa baadi bɛɛy. Ɔci yimg ɛkɛ nɔji ikin eetan ɔntɔ te ikin yomgɔti i waka budan neeni aŋka ikin mortin Jwaŋa tɛɛtiy! 15A ɔŋŋiyɛ, Yaccu Kiṭɔ ɛkɛ a cuuda jyeka naŋŋɛ Juaŋ wonkɛn aŋka maka bornɛ Juaŋ neeni yɔɔrdi waka pwadin waka guaŋŋɛ Juaŋ agi ‘woñji ɛkkɛn waka baadi bɛɛy. Acaan a ɔŋŋiyɛ, ɛkɛ tuun aŋka ma wandɛ te nɔjja naŋɛ ɛkkɛn ne ɛkkɛn balki cieki te jyeka naŋŋi Juaŋ ñamuy. 16Ɔci kan men ne noŋi tuudiyɛ, jyeka ɛkɛ buagɛ aŋka naŋtan mayɛ, kiiddɛ ɛkɛ worgaji, yeti kan ɛkɛ tuun men bɛɛyɛ, jyek ɛkɛ yɔmdi te genga men bɛɛ. 17Jyeka kiinɛ mena tuun worgaji neeniyɛ, balkɔn war tɛɛn ne mena kieñi ɛkkɛn neeni tuuni dokiy. Oŋ kan men tɛɛti menyɛ, jyeka neeni balkɔn war tɛɛn bɛɛ. 18Acaan a ɔŋŋiyɛ, jyeka naŋŋɛ Juaŋ ñamuyɛ, yɔɔtcin iñɔ ne tɛyan budan bɛɛ. Ɛkkɛn yɔɔtcin iñɔ te yimgo. 19Te ñamuyɛ, Muuca ne ma nɔɔnnɛ te jyek ganuun jitkɛn waakɛndayɛ, ɛkɛ oŋ yimg yotk ɔci yimg ḍɛɛk ñaaŋŋɛyɔ i pieg ɔci gannɛ worga ganuunti, ɔci gannɛ ma waakɛnti moki. Ɛkɛ bala goci te aamk min ɔci jyeyya tidan. 20Ɔci ɛkɛ gɔki agi, “Yimga neeniyɛ, gena yimga guaŋŋɛ Juaŋ agi, ‘Dala naŋjɛ ɛkkɛy.’ ” 21Muuca yimg gannɛ ona a bworŋti, ɔci yimg gannɛ waka morki mati moki. 22Waak waakɛnda pwaddi te yimg te jyek ganuun. Kan yimg pwokci ma bɛɛyɛ, buat nɔji gɛɛl bala bɛɛ. 23Ona a bworŋ ona morki ma ɔci waka bala jiju ɛkɛ konɛti neeniyɛ, ɛkkɛn a muacin budan, a waka awarɛ ba waka ñaalɔ pɔliji bɛɛ. Ɛkkɛn waakɛn pwaddi te oljin yimg oltiti ma ɛkkɛntiy. Oŋ yeti waka ñaalɔ pɔlijiyɛ, ɛkkɛn waakɛn pwaddi te waka ‘yɛrtan ma pwadin ne tolany. 24Acaan Kiṭɔ kaaccin Nona Pwadan Ne Tolan naŋi ma baan nona a muacin neeni bɛɛy. Oŋ yeti ɛkɛ ati ñaalɔ pɔliji aŋka warɛ liɛldɛ bora Juaŋ ñamɛti te ikin. 25Gaciic tolan Ma Yahuudyɛ, ɛkɛ kaatti Nona Pwadan oŋi ne cyɛɛlɔ te ywoni te yimg maalo. Yeti Kiṭɔ warɛ ‘wondɛ ma noktan te ikin, gɔ moki nokin a ñaccu ɔɔn bɛɛ. 26Te baali a ɔɔnyɛ, Kiṭɔ te tuun oŋki ne coŋɔn te ma waakɛnda wona noon aŋŋɛ Juaŋy. Oŋ yeti te oŋka ookkin ne ŋoyɔ neeniyɛ, ɛkɛ warɛ lɛɛlnɛ bora oŋi ne cyɛɛlɔ, ɔci nɔji eññɛ ɔntɔ te naŋka ɛkɛ warɛ naŋŋɛ a gena ‘yɛrŋɛ ɛkɛ Juaŋti neeni. 27Men baanyɛ, tuwa oŋi ne cyɛɛlɔ lakun, Juaŋ oŋ hayya gɔrti jyek godan ɛkɛ oŋo. 28A ɔɔn daŋkun Kiṭɔ tuun oŋi ne cyɛɛlɔ aŋka nɔji ma waakɛnda eedɛ ɔntɔ. Ɔci ɛkɛ dɔɔkti te nɔji moki bɛɛ. Ɛkɛ dɔɔkti aŋka maka kɛɛy ɛkɛ neeni yɔɔdɛ.

will be added

X\