Ibrun 8

1Jyeka a jiek wyetkɛnyɛ, ikin balkin gaciic tolan a ɔɔn, ɔci ɛkɛ cooccin ñaalɔ pɔliji kaakci Jwaŋa Tolan taaŋɛti byeŋa byerɔn non Ḍɔŋ Jwaŋa Tolan. 2Ɔci ɛkɛ bala kanŋan Nona Pwadan Ne Tolanti. Gena on Juaŋ ona awarɛ, ona cɔnnɛ Ciɛggɔny. Gena ona cɔdɛ ma baan bɛɛy. 3Kanŋa gaciic tolanyɛ, ɛkɛ noŋi kanŋa waka ‘yɛrtan ma Juaŋti i waka ‘wontan ma Juaŋy. Acaan a ɔŋŋiyɛ, Kiṭɔ mena gaciic tolan neeniyɛ, dala ɛkɛ daŋkun etti genga Juaŋti. 4Kan te ɛkɛ baali ṭɛɛrji wɛnniyɛ, ɛkɛ te aŋi gaciic bɛɛ. Acaan gaciicin ‘woñi waak te jyek ganuun Ma Yahuudyɛ, bala doki. 5Ɔci ɛkkɛn kanŋan a muacin budan te ṭiebji waka bala ñaalɔ pɔlijiy. Bala ba Muuca ne buagi eyi on Juaŋyɛ, Juaŋ gɔkcin ɛkɛti agi, “Dala i waŋu tiicca, ɔci noŋja waak waakɛnda ba naŋka i nɔɔnnin poomtiy.” 6Oŋ yeti accayɛ, Yaccu ‘wonnɛ Juaŋ kanŋa pwadan te kanŋa gaciicin ḍwaŋin Ma Yahuud waayi, acaan jwalla naŋŋɛ Juaŋ a ɛkɛ a cuuda Juaŋ ma ɛkɛti neeniyɛ, ɛkɛ aŋka pwatcin ne tolan, acaan jwalla neeni yɔɔnnɛ iñɔ Juaŋ te jyeka ḍuaññɛ ɛkɛ a jyek waka pwadin ne tolany. 7Kan jyeka naŋŋɛ Juaŋ ñamu yɔmjin dokiyɛ, oŋ te Jwaŋa Tolan buagɔn noŋdi jyeka pookɛn moki boki? A’a. 8Ɔci Juaŋ bala wooki maka te ñamu ne ɛkɛ gɔki agi, “Ciɛggɔn gɔki agi, ‘Hay, oŋka bɛya neeniyɛ, ‘ya noŋdin ikin kɛɛn Icrayiil ɔci kɛɛn Yahuuja jyeka wonkɛn. 9Oŋ yeti bala ba jyeka naŋi ‘ya i yɔrg ɛkkɛn oŋŋa ‘ya ɛkkɛn muoŋŋa te byeŋkɛn acaan kooya bora te ban Macor wanna bɛɛ. Ɔci ne ɛkkɛn jyek ‘ya tiikitiyɔ bɛɛyɛ, ‘ya ɛkkɛn daljan noŋi ba yomg ɛkkɛn pookɛn. ‘Ya waŋu tiiccan ɛkkɛnti bɛɛ.’ 10Ɔci Ciɛggɔn gɔki moki agi, ‘Ne oŋ gɛɛltiyɛ, ‘ya noŋdin jiek iki ma Icrayiil, ɔci ganuun ‘ya ḍuacca ‘ya ɛkkɛn wyetkɛnti, ɔci ḍuacca ‘ya ɛkkɛn yomgɛnti, ɔci ‘ya agdi Juaŋ ɛkkɛn, ɔci ɛkkɛn aga ma ‘ya. 11Ɔci ɛkkɛn modgɛn laltan moki bɛɛ. Walla gɔkti modgɛnti agi, “Dala ɛkkɛn Ciɛggɔn ŋeettan bɛɛ,” acaan ɛkkɛn ‘ya ŋeecka waakɛnda doki. Gena maka ḍyɛrin ɔci maka ḍwaŋin. 12Ɔci ‘ya ɛkkɛn bɔɔka te nɔji ɛkkɛn, ɔci ‘ya poŋja te nɔji ɛkkɛn moki bɛɛ.’ ” 13Ɔci te jwali Juaŋ jwalla guaŋŋɛ ɛkɛ te jyeka wonkɛn neeniyɛ, ɛka ñamu naŋŋɛ aŋi daan doki. Ɔci waak waakɛnda waka aŋi donk neeniyɛ, noŋi baadi doki.

will be added

X\