1 Mɛlki Caadik neeniyɛ, ɛkɛ a ciɛggɔn tolan ban Celam. Ɛkɛ a gaciic Jwaŋa Tolan. Gena ɛkɛ ati kookcin Abrahimti ne Abrahim dɔɔŋni te nona ɛkɛ cyekin pookɛn cyekin ḍwaŋin buannɛy. Ɔci Mɛlki Caadik cɔkcin ne pwadan Juaŋti aŋka Juaŋ noŋdi ne pwadan Abrahimti. 2 Ɔci ɛkɛ kɛnnɛ Abrahim gena ne cyɛɛlɔ te waka a inyaakkɛnti te waka yoolnɛ ɛkɛ waakɛnda neeni. Kon yenti ɛkɛ a Mɛlki Caadik neeni agi, “Ciɛggɔn Tolan Ciɛggɔn Naŋka Pwadan.” Ɔci ɛkɛ bartan ma a ciɛggɔn ban Celam ciɛggɔn tolan. Yenta a ciɛggɔn tolan ban Celam neeni kon ɛkɛ agi, “Ciɛggɔn Tolan Ciɛggɔn Coodda Pwadan.” 3 Ɛkɛ balkɔn weegɛn ɔci mɛɛgɛn ɔci yɔrgɛn bɛɛ. Ɛkɛ balkɔn oŋŋa ɛkɛ jɔɔnnɛ te coodi ɔci oŋŋa coodi ɛkɛ wyeñɛ baadi bɛɛ. Yeti ɛkɛ bala ba Kaci Jwaŋa Tolan, acaan ɛkɛ a gaciic Jwaŋa Tolan oŋki waakɛnda. 4 Gɔṭṭɛ moki, ‘wana neeniyɛ, tolcin hay! Aŋka Abrahim yɔr weyi ikinyɛ, ɛkɛ ‘wonnɛ gena ne cyɛɛlɔ te waka ne inyaakkɛnti te waka oonɛ ɛkɛ waakɛndati neeniy. 5 Ɔci gaciicin kɛɛn Laawiyɛ, ganuun gɔki ɛkkɛnti aŋka ɛkkɛn eedi gena ne cyɛɛlɔ te waka ne inyaakkɛnti te mati. Ɛkkɛn eedi waak te modg ɛkkɛn modga bɛɛn te Abrahimtiy. 6 Oŋ yeti Mɛlki Caadikyɛ, ɛkɛ bɛɛn te kɛɛn Laawiti bɛɛ, yeti ɛkɛ eci gena ne cyɛɛlɔ te waka ne inyaakkɛnti te Abrahimti, ɔci ɛkɛ cɔkcin Juaŋti aŋka Juaŋ noŋdi ne pwadan Abrahimti. Gena Abrahim ḍuaññɛ Juaŋ te jyeka naŋŋɛ ɛkɛy. 7 Awarɛ, gena mena tolan aŋka gɔkti jyeka pwadin mena ḍiɛrantiy. 8 Gaciicin kɛɛn Laawi maka eci gena ne cyɛɛlɔ te waka ne inyaakkɛnti waakɛnda neeniyɛ, ɛkkɛn a maka tuwa lakun. Yeti Mɛlki Caadik mena eci gena ne cyɛɛlɔ te waka ne inyaakkɛnti neeni, worga Juaŋ gɔki agi ɛkta tuudɔ bɛɛ, agi waka ‘wontan ma Juaŋ te waka ne inyaakkɛnti neeni limmɛ Mɛlki Caadik mena tɛɛti neeni. 9 Ɔci ‘ya gɔkca te ma Laawi maka eci waak te mati neeni, ka ɛkkɛn daŋkun ḍɔccin waka neeni ne ɛkkɛn men balki te Abrahim konɛtiy. 10 Acaan te wɔɔka Mɛlki Caadik kookki i Abrahim waayiyɛ, Laawi men biɛṭi te yɔr ɛkkɛn Abrahim konɛti. 11 Juaŋ ma ‘wonnɛ ganuun te gaciicin ma Laawi, ɔci te kanŋa yɔmni te gaciicin ma Laawiyɛ, te Juaŋ moki noŋdi gaciic parɛ mena bala ba Mɛlki Caadik neeni boki? A’a. Yeti Juaŋ noŋi gaciic parɛ bala ba Mɛlki Caadik neeni ɔɔn acaan kanŋa ma Laawi bɔɔnjin, ɔci gaciic neeniyɛ, ɛkɛ bala ba Haruun bɛɛ. 12 Kan kanŋa gaciicin warɛ aaŋŋɛyɛ, ganuun warɛ agdɛ daŋkun. 13 Kiṭɔ mena guagdɛ Juaŋ mena bala ba Mɛlki Caadik neeniyɛ, ɛkɛ bɛɛn te kɛɛna parɛti. Ɔci maka te kɛɛna neenitiyɛ, menga noŋi kanŋa ‘yɛrŋ waak neeni bɛɛ. 14 Oŋ yeti awarɛyɛ, Ciɛggɔn ikin Yaccu Kiṭɔ bɛɛn te kɛɛn Yahuujati, ɔci Muuca gɔki jwali gɛɛl te kɛɛna neeni te jyek gaciicin bɛɛ. 15 Naŋka neeni warɛ liɛllɛ ne pwadan moki, acaan gaciic parɛ gɛɛl warɛ liɛllɛ bala ba Mɛlki Caadik ɔɔn. 16 Ɛkɛ naŋɛ ma a gaciic ba jyek ganuun ma baan bɛɛ, yeti ɛkɛ naŋŋɛ Juaŋ a gaciic te war tɛɛn tɛɛtin baadi bɛɛy. 17 Ɔci worga Jwaŋa Tolan gɔki agi, “I agdi gaciic oŋki waakɛnda ba Mɛlki Caadik.” 18 Waka ñamuyɛ, ɛkkɛn baaw yɔɔni acaan ɛkkɛn bɔɔnjin, ɛkkɛn yɔmjin te genga bɛɛ. 19 Acaan ganuun Muuca genga naŋŋɛ ḍaaŋŋɛ warda bɛɛ, oŋ yeti acca Juaŋ gɔkkin te jyek waka pwadin ɛkɛ buagɔn ‘wontin ikiny, ɔci te jwalla neeniyɛ, ikin ortinti Jwaŋa Tolanti. 20 Ɔci jyeka neeniyɛ, Juaŋ gɔkcin ɛkkɛn budan bɛɛ, ɛkɛ gɔkcin ɛkkɛn te yenti ɛkɛ awarɛ! 21 Ɔci maka pookɛn neeniyɛ, ɛkkɛn aŋi gaciicin budan. Juaŋ gɔkcin ɛkkɛnti te yenti ɛkɛ awarɛ bɛɛ. Oŋ yeti Yaccuyɛ, aŋi gaciic te jwalla awarɛ ne Juaŋ gɔŋni ɛkɛti agi, “Ciɛggɔn paŋi ɛkɛ agdɛyɔ bɛɛ. Ɔci ɛkɛ gɔkcin awarɛ agi, ‘I a gaciic oŋki waakɛnda.’ ” 22 Acaan a ɔŋŋiyɛ, Yaccu aŋi mena ikin woŋgɔ ñiektin a Juaŋ noŋdi waka ikin ḍuaññinti ɛkɛ te jwali a waka pwadin neeni ikinti. 23 Awarɛ, gaciicin ma Laawiyɛ, ɛkkɛn coŋɔ, acaan ɛkkɛn tuw ɔci yaakinti noŋi kanŋa moki bɛɛ. 24 Oŋ Yaccuyɛ, ɛkɛ aŋka bala oŋki waakɛnda, ɔci a ɔŋŋiyɛ, kanŋa ɛkɛ agi gaciic neeniyɛ, luldɛ menga bɛɛ. 25 A ɔŋŋiyɛ, ɛkɛ yaakinti maka ortiti Juaŋti te ɛkɛyɛ, yɔɔdɛ oŋki waakɛnda, acaan ɛkɛ bala cɔki Juaŋti te ɛkkɛn oŋkanda, ɔci ɛkɛ tuwa oŋgati bɛɛ. 26 Acaan Yaccu a gaciic tolan, a ɔŋŋiyɛ, ɛkɛ yɔmjin te ikin ɔci ɛkɛ a mena pwadan, ɛkɛ balkɔn nɔji bɛɛ, ɔci ɛkɛ balkɔn naŋka yaayan gɛɛl bɛɛ. Ɛkɛ kooyin bora te maka a nɔɔtkti doki. Ɔci ɛkɛ bala ciyi ñaalɔ ban Jwaŋa Tolan. 27 Ɛkɛ bala ba maka a gaciicin ḍwaŋin Ma Yahuud neeni bɛɛ. Ɛkkɛn eci waka ‘yɛrtan ɛkkɛn oŋkanda te nɔji ɛkkɛn ñamu, ɔci te nɔji mako. Yaccu buagɔn noŋdi a ɔɔn bɛɛ, te nɔji mayɛ, ɛkɛ noŋi naŋka neeni oŋi ne cyɛɛlɔ ne ɛkɛ ŋaapkiti ma kakantiy. 28 Acaan ganuun Muuca maka waakɛn koyanyɛ, muodɛ bora aga gaciicin ḍwaŋin Ma Yahuud, oŋ yeti jyek Juaŋ jyeka awarɛ bɛɛn ganuun ŋoyɛti, ɛkɛ mwoki Kaci Juaŋ aŋka aga gaciic tolan awarɛ oŋki waakɛnda.
