Ibrun 6

1A ɔŋŋiyɛ, dala bolja ikin loṭin ñɔkin a ñwaŋi a jiek ŋwayya ne cyɛɛlɔ a ñaccu te jyek jyenna ma jyetti Kiṭɔti neeniyɛ, daltin lakun. Dala ikin ‘uottin ñamu lalla korkɛn twotinti. Naa ikin moki dɔɔtin ŋoyɔ aŋka gɔwwin te jyek bolja ma waakɛn yaltiti te naŋka yeyin naŋka etti lienti bɛɛ, ɔci moki te jyek jyenna ma jyetti Juaŋti bɛɛ, 2ɔci te jyek lali bulti ma ɔci tañña ma byeŋkɛn tantiti ma wyetkɛnti bɛɛ, ɔci jɔŋŋin maka a tuutan jɔŋti ñaalɔ te lienti bɛɛ, ɔci ywobji Juaŋ ywobja baadi bɛya neeniti bɛɛ. 3Kan Juaŋ ikin daltinyɛ, dala ikin ‘uottin ñamu te naŋki waka neeniti! 4Oŋ kan magga jyeni ɛkkɛn dalji dokiyɛ, dɔɔkkin ɛkkɛn dɔɔktiti aŋka waakɛn yaltitiyɛ, koocin ɛkkɛnti moki bɛɛ. Ɛkkɛn bala te ñamu non Juaŋ nona dɛki, ɔci ɛkkɛn dɛccin gena ma ‘wonnɛ Juaŋ te ñaalɔ, ɔci ɛkkɛn balki ñoowin Boŋ Juaŋ daŋkun. 5Ɔci ɛkkɛn jwalla pwadan ŋeejjɛ te Juaŋti, ɔci naŋka tɛyan naŋka bɛya ñomgɔti neeni ŋeejjɛ daŋkun. 6Oŋ yeti ɛkkɛn jyetcin ɔntɔ, ɔci dɔɔkkin ɛkkɛn dɔɔkti aŋka waakɛn yaltitiyɛ, kooccin ɛkkɛnti moki bɛɛ. A ɔɔnyɛ, bala ba ɛkkɛn Kaci Jwaŋa Tolan ŋaaptan ñaalɔ kakanti moki te naŋki yoñ ɛkkɛn aŋka ɛkɛ ‘wontan lɔɔn ma ñomgɛnti. 7Acaan ṭɛɛr ne ñaal liɛbi ɛkɛti oŋkandayɛ, ɛkɛ moti piego. Kan ɛkɛ poka piidi ma yuoldɛ ñaalɔ ne pwadan maka dwokiti neeniyɛ, Juaŋ yomɛ pwad pwad ṭɛra neeniti. 8Oŋ yeti kan ṭɛɛr etti kuwi ɔci janga yeyinyɛ, ɛkɛ ‘waldɛ Juaŋo, ɔci ne baaṭi ɛkɛ amdɛ maaño. 9Mung ɔɔn, ‘ya gɔkkan doki te waka yeyin, yeti ŋeej ‘ya ne pwadan ɛkkɛ yɔɔrdɛ waka pwadin te Juaŋti acaan ɛkkɛ yɔɔññɛ ɛkɛ. 10Acaan Juaŋ menga amdɛji te genga bɛɛ, ɔci ɛkɛ ñingɛ yeya te naŋki ɛkkɛ bɛɛ, ɔci te anna lɛɛlni ɛkkɛ bora ɛkɛti te yenti ɛkɛ ne ɛkkɛ balgɛ kanŋɛ mokɛ Ma Kiṭɔy, ɔci ɛkkɛ balgɛ kanŋɛ te maka neeni men ɔɔn. 11Ɔci ɔɔn buagɔn men da war tɛɛn ɛkɛ lɛɛldi bora warda ne naŋka neeni baadi ɔɔn, a ɔŋŋi ɛkkɛ yɔɔrdɛ waka pwadin waka kɛɛdɛ ɛkkɛ neeni te Juaŋti. 12A ɔŋŋiyɛ, ɔɔn buagɔn naa ɛkkɛ waakɔ morndi bɛɛ, oŋ yeti dala ɛkkɛ noŋdɛ ba maka jyeti jwali Juaŋ, ɔci yomgɛn tiektany. A ɔɔnyɛ, ɛkkɛn mwoki waka pwadin te Juaŋti waka jwallɛn ḍuaññɛ ɛkɛy. 13Ne Juaŋ Abrahim ḍuaññɛ te jwaliyɛ, ɛkɛ gɔkcin awarɛ te yenti ɛkɛ, acaan menga bala tolcin te Juaŋ aŋka ɛkɛ gɔŋni te yenti mena parɛ gɛɛl bɛɛ. 14Ɛkɛ gɔkcin agi, “‘Ya noŋja ne pwadan iti awarɛ, ɔci kɛɛn i naŋdi ne coŋɔn.” 15A ɔŋŋiyɛ, Abrahim yomɛ tieŋnɛ ɔci yɔṭi waka ɛkɛ ḍuaññɛ Juaŋy. 16Acaan a ɔŋŋiyɛ, ma gɔki awarɛ te mena tolan te ɛkkɛny, ɔci jyeka guaktan ɛkkɛn awarɛyɛ, jyek pɛɛdin yɔɔdɛyɔ waakɛnda. 17Acaan Juaŋ buagɔn maka jyeti jyeka naŋŋɛ ɛkɛ neeni nɔɔttɛ ne pwadan agi paŋi ɛkɛ agjiyɔ moki bɛɛyɛ, ɛkɛ gɔkcin agi, “‘Ya gɔkka awarɛ.” 18Ikin balkin jyeka ikin ḍuaññinti ɛkɛ, ɔci jyeka guaŋŋɛ ɛkɛ te yenti ɛkɛ awarɛy. Waka yaakkɛn neeniyɛ, yɔɔd ne tɛyan, Juaŋ yaakinti jomi jiek te ɛkkɛn bɛɛ. Ɔci ikin yiŋŋin Juaŋti, a ɔŋŋiyɛ, ɛkɛ ikin yɔɔññin, ɔci ɛkɛ ikin myennin awarɛ aŋka ikin yomgɔ tiektin ne ikin jyettin kɛɛyin waka pwadin, waka ikin ḍuaññinti ɛkɛ te jwali aŋka ikin ‘wontin ɛkkɛny. 19Jwalla ḍuaññɛ Juaŋ te waka pwadin neeniyɛ, bala ba lɔña tɛyan coodi ikinti, ɛkɛ tɛɛna tɛɛno. Jwalla ikin ḍuaññinti Juaŋ neeni moki, ikin wɛɛtin ne jiju bworŋa on Juaŋ ona a bworŋji neeni aŋka ikin dɛntin nona baali Jwaŋa Tolany. 20Gena nona kaanni Yaccu ñamu te ikiny, ɔci ɛkɛ aŋi gaciic tolan yuonginda ba Mɛlki Caadik.

will be added

X\