Ibrun 5

1Ɔci gaciicin ḍwaŋin waakɛndayɛ, ɛkkɛn lɔɔttan ma bora te ma jitin, aŋka kanŋan kanŋa Juaŋ te ma waakɛnda. Mena gaciic tolanyɛ, ɛkɛ waak ‘wondɛ Juaŋ te mako. Ɔci ɛkɛ ɛṭi waak Juaŋti te mako. A ɔŋŋiyɛ, Juaŋ ɛkkɛn bɔɔktɛ te nɔji ɛkkɛn. 2Ɔci ɛkɛ yaakinti moki maka noŋi nɔji, ɔci maka pɔy Juaŋ ŋeecɔn bɛɛy, acaan ɛkɛ da warɛ koy koy ba ɛkkɛn ɔɔn. 3Ɔci a ɔŋŋiyɛ, ɛkɛ da warɛ ‘yɛrdɛ te nɔji ɛkɛ bala ba bolja ɛkɛ ɛṭi ma ɛkɛ te nɔji ɛkkɛn wanna ɔɔn. 4Yeti menga warɛ naŋdɛ aga gaciic tolan parɛ bɛɛ. Gena mena borti Juaŋ a borkin bala ba Juaŋ ne Haruun borniy. 5Oŋ Kiṭɔ daŋkunyɛ, warɛ olnɛ ñamu parɛ nona ɛkɛ agɛ gaciic tolan neeniti bɛɛ. Gena Juaŋ aŋka gɔkcin ɛkɛti agi, “I a Kaci ‘ya. I jiennin ‘ya te oŋŋo.” 6Ɔci Juaŋ gɔki worga kona parɛ gɛɛlti moki agi, “I ag gaciic younginda ba Mɛlki Caadik.” 7Ne Yaccu men baali ciyi te coodi ma baanyɛ, ɛkɛ bala cɔki Juaŋti, ɔci bala wiak te pyeg woŋgɛ Juaŋti, ɔci bala yaadan Juaŋti acaan Juaŋ yaakinti ɛkɛ yɔɔdɛ te lieno. Ɔci Juaŋ tieŋŋin cɔŋi ɛkɛ, acaan ɛkɛ bala noŋi ba jyek Juaŋo. 8Ɛkɛ a Kaci Jwaŋa Tolan, oŋ yeti ɛkɛ yaaŋnɛti tiit jyek Juaŋ te taab ɛkɛ neeni. 9Ɔci ne ɛkɛ cwamnɛ Weegɛnyɛ, ɛkɛ aŋi mena yuoci maka tyeŋi jyek ɛkɛ waakɛnda, ɔci ɛkkɛn ‘wondɛ ɛkɛ tɛɛtin baadi bɛɛy. 10A ɔŋŋiyɛ, Juaŋ ɛkɛ barŋɛ a gaciic tolan ba Mɛlki Caadik. 11’Ya buaga ɛkkɛ myettin jiek ne coŋɔn te jwalla neeni, oŋ yeti ɛkkɛn lwoŋŋɛn tɛɛcin ɛkkɛti, acaan ɛkkɛ balgɛ ba maka miŋko. 12Awarɛ, ɛkkɛ balkɛ wɔɔka aŋka te ɛkkɛ agdɛ maka loṭi mako, oŋ yeti ɛkkɛ buagɛ dɔkɔ mena ɛkkɛ laldɛ te jɔɔtcin ɛkkɛ jɔɔttɛ te lali jwali Juaŋy. Ɛkkɛ buagɛ jyek Juaŋ jyeka koyan ba aak neeni, ɛkkɛ buagɛ oomdin tɛyan bɛɛ. 13Mena moti aakyɛ, ɛkɛ a kacco, ɔci ɛkɛ a mena jyeka pwadin ŋeejɛ bɛɛy. 14Oŋ yeti oomdin tɛyanyɛ, gena oomdin maka ḍwaŋin maka tɛyan, acaan ɛkkɛn ñingɛn tɛɛn ɔci yaaŋnɛti naŋka pwadan ŋeejjɛ, ɔci naŋka yeyin ŋeejjɛ moki.

will be added

X\