Ibrun 4

1Oŋ kan ne Juaŋ bala ikin ḍuaññin te jwali aŋka ikin kaattin nona wooti may, dala ikin buattin aŋka naa menga ikinti dita dɛndi nona wooti ma aŋan baaw bɛɛ. 2Acaan ikin lalkin ma te jyeka wonkɛn jyeka pwadin bala ba ɛkkɛn ne lalkiti ma daŋkuny. Oŋ yeti jyeka tieŋjɛ ɛkkɛn neeniyɛ, yɔmjin te genga ɛkkɛnti bɛɛ. Acaan maka tieŋŋin neeniyɛ, ɛkkɛn jyeti jyeka neeni te yoma awarɛ bɛɛ. 3Oŋ yeti ikin a maka jyeti Jwaŋa Tolanti neeni aŋka kaattin nona wooti may. Gena guagdɛ Juaŋ agi, “‘Ya gɔkcan te loñk awarɛ ɛkkɛnti ka, ‘Naa ɛkkɛn kaatti nona wooti ma nona ‘woñga ‘ya ɛkkɛn neeni bɛɛ.’ ” 4Juaŋ gɔki a ɔɔn ne ɛkɛ ḍookki te kanŋa wona ɛkɛ okki waaky. Ɔci ɛkɛ gɔki worgaji te ninna akki ne dɔɔyɔ wyetkɛn ne yyɛɛwɔ agi, “Jwaŋa Tolan wooki te ninna akki ne dɔɔyɔ wyetkɛn ne yyɛɛwɔ neeni ne ɛkɛ ḍookki te kanŋa ɛkɛy.” 5Ɔci ɛkɛ gɔki moki agi, “Naa ɛkkɛn kaatti nona wooti ma nona ‘woñga ‘ya ɛkkɛn neeni bɛɛ.” 6Acaan maka lali ma ñamu te jyeka wonkɛn jyeka pwadin neeniyɛ, ɛkkɛn kaaccin nona wooti ma bɛɛ, acaan ɛkkɛn tieŋŋin jyek Juaŋ bɛɛ. Maka pookɛn gɛɛg kaatti nona wooti ma acaan ɛkkɛn tieŋŋin jyek Juaŋo. 7A ɔŋŋiyɛ, Juaŋ oŋŋa parɛ gɛɛl kɛnnɛ bora barŋɛ agi, “Te Oŋŋo.” Ɛkɛ gɔki ɔɔn te tuk Daawud te baaṭi agi, “Kan ɛkkɛ tieŋnɛ pwan Juaŋ te oŋiyɛ, naa ɛkkɛ wyetkɔ tɛya bɛɛ.” 8Kan te Jɔcwa ma Icrayiil kaannɛ nona wooti ɛkkɛnyɛ, te Juaŋ moki gɔki te oŋŋa parɛ gɛɛl bɛɛ. Yeti Jɔcwa ɛkkɛn kaannɛ aŋan bɛɛ. 9Ma Juaŋ aŋka balki wooka ba wooka woonɛ Juaŋ te ninna akki dɔɔyɔ wyetkɛn ne yyɛɛwɔy. 10Kan mena kaatti nona wooti ma nona ma ‘wondɛ Juaŋyɛ, ɛkɛ woodi te kanŋa ɛkɛ bala ba Juaŋ ne wookki te kanŋa ɛkɛy. 11Acaan a ɔŋŋiyɛ, dala ikin kantin ne pɛñan aŋka ikin kaattin nona wooti ma neenitiy. Dala ikin buattin aŋka naa menga ḍaga yomu budan te kaaccin ɛkɛ kaatti nona wooti ma neeni te naŋki waka bala ba waka naŋi maka jyek Juaŋ lɛɛgɛ jitin waayi bɛɛ. 12Jwali Juaŋyɛ, ɛkɛ tɛɛti, ɔci ɛkɛ kanŋan mati. Ɛkɛ byeŋgaaran balki lɛkɛ ne yyɛɛwɔ buannɛ te ñɔjjo. Ɛkɛ i waru ŋwoddɛ jitin i booŋo, ɔci wɔtti owi jitin ɔci ṭuŋiti. Ɛkɛ paŋi ma baan ɔci waka yomg ma baan buagɛ byɛŋdɛji waakɛnda. 13Genga bala warɛ a coggɔn Juaŋti bɛɛ. Waak waakɛnda waakɛn a liɛlgin Juaŋ woŋgɛti. Ɛkɛ a mena myettin ikin naŋki ikin waakɛnday. 14Ikin balkin gaciic tolan. Gena Yaccu Kiṭɔ Kaci Jwaŋa Tolan, ɛkɛ ati ñaalɔ Juaŋti, ɔci a ɔŋŋiyɛ, dala jyeni ikin muktin ikin yomgɔti ne tɛyan. 15Ikin balkin Yaccu a gaciic tolan, ɔci ɛkɛ yaakinti ikin maktin te war koñi ikin, acaan ɛkɛ pɔɔññɛ Jwaŋa Yaayan te waak waakɛnda ba ikin ɔɔn, oŋ yeti ɛkɛ noŋi nɔji bɛɛ. 16A ɔŋŋiyɛ, dala ikin ortinti Jwaŋ naŋki pwaniti te yoma tɛyan aŋka Jwaŋa Tolan yomɛ pɔktɛ ikinti, ɔci ikin yɔɔrtin yom pwani Juaŋo. Ɔci ne naŋka yeyin bɛɛti ikintiyɛ, ɛkɛ ikin maktin.

will be added

X\