Ibrun 3

1A ɔŋŋiyɛ, hay modg ɔɔn maka pwadgin Juaŋ ñamɛti maka bornɛ Juaŋy, dala ɛkkɛ gɔrtɛ Yaccu Kiṭɔ mena cuonnɛ ɛkɛ a gaciic tolan ɔci a Ciɛggɔn jyeni ikin neeniy. 2Ɔci ɛkɛ a mena noŋi ba jwali Juaŋ mena ɛkɛ naŋŋɛ a gaciic tolan bala ba Muuca ne baali noŋi ba jwali Juaŋ on Juaŋy. 3Oŋ a ɔŋŋiyɛ, ɛkɛ pwatcin ne tolan te Muuca bala ba mena eñi ony. Acaan kan men gɛɛl eñi onyɛ, ma noŋi ne pwadan ɛkɛti ne tolan te ono. 4Oorg waakɛndayɛ, eetan ma a een balki maka cɔti ɛkkɛny, oŋ yeti Jwaŋa Tolanyɛ, ɛkɛ a mena cɔti waak waakɛnday. 5Oŋ yeti awarɛyɛ, Muuca bala gɔṭi on Juaŋ ne pwadan ba mena kanŋan a kanŋin ɔɔn. Ɔci ɛkɛ bala nɔɔti ma te waka guaŋŋɛ Juaŋ agi balgɔ bɛɛdɔ te oŋka bɛɛdɔ ne ŋoyɔy. 6Oŋ yeti Kiṭɔ bala gɔṭi on Juaŋ ne pwadan acaan ɛkɛ a Kaci Jwaŋa Tolan, ɔci ikin agin on ɛkɛ kan ikin ɛkɛ tieŋnin ne pwadan te yomg ikin, ɔci kan ikin yomgɔ ŋoodan te waka pwadin waka ɛkɛ buagɔn acaan ‘wontin ikin neeni bɛɛy. 7Acaan a ɔŋŋiyɛ, bala ba jyeka guagdi Boŋ Juaŋ agi, “Kan ɛkkɛ tieŋnɛ pwan Juaŋ te oŋiyɛ, 8naa ɛkkɛ wyetkɔ tɛy tɛy ba naŋka naŋɛ yɔrg ɛkkɛ te baaṭi wanna bɛɛ. Ɛkkɛn jyetcin ɔntɔ yookɔn te jyek ‘ya ne ɛkkɛn balki wɔɔŋjiy. 9Ɔci ɛkkɛn ‘ya pɔɔka, ɔci ɛkkɛn gɔrcin naŋki ‘ya yuong ma baan ne yyɛɛwɔ (40). 10Acaan a ɔŋŋiyɛ, ‘ya baal looñ ɛkkɛnti, ɔci ‘ya gɔkcan ka ɛkkɛn oŋkanda noŋi nɔji yomgɛnti, yeti ɛkkɛn pɔɔk ‘ya ŋeecɔn bɛɛ. 11Acaan a ɔŋŋiyɛ, ‘ya gɔkcan te loñk awarɛ ɛkkɛnti ka naa ɛkkɛn kaatti nona wooti ma nona ‘woñga ‘ya ɛkkɛn neeni bɛɛ.” 12Hay modg ɔɔn, dala ɛkkɛ woŋgɔ tiittɛ, naa menga baltan yoma yaayan yoma baaw Juaŋti te dwakta ɛkɛ dɔɔdi ŋoyɔ te Jwaŋa tɛɛti neeniti bɛɛ. 13Dala ɛkkɛ ṭeewɛ yɔtin pookɔ oŋkanda ba jyek jwalla gɔki agi “Te Oŋŋo,” aŋka naa menga ɛkkɛti wyeñɛ tɛya te maalla ɛkɛ maaldɛ nɔji bɛɛ. 14Kan ikin yɔɔnnin ne tɛyan Jwaŋa Tolanti ne baaṭi ɔɔn ba bolja ikin jɔɔnnin jyettin ɛkɛti ñamu neeniyɛ, ikin ñootin a cyɛɛlɔ waakida Yaccu Kiṭɔti. 15Bala ba Boŋ Juaŋ ne gɔki agi, “Kan ɛkkɛ tieŋnɛ pwan Juaŋ te oŋiyɛ, naa ɛkkɛ wyetkɔ tɛy tɛy bɛɛ, naa ɛkkɛ noŋdɛ ba naŋka naŋɛ yɔrg ɛkkɛ ne ɛkkɛn jyecki bora wɔɔŋji yookiti te jyek Juaŋ wanna bɛɛ.” 16Oŋ a makɛ tieŋjin pwan Juaŋ ɔci looñjiny? Gena maka koonɛ Muuca bora te ban Macory. 17Oŋ a makɛ Juaŋ looñjin ɛkkɛnti yuong a ma baan ne yyɛɛwɔy (40)? Gena maka noŋi nɔji, ɔci ɛkkɛn a maka tuun wɔɔŋjiy. 18Juaŋ gɔkcin makɛti te loñk awarɛ agi, “Naa ɛkkɛn kaatti nona wooti ma nona ‘woñga ‘ya ɛkkɛn neeni bɛɛy?” Gena maka yookɔn waakɛn te tieŋŋin jyek ɛkɛy. 19Acaan a ɔŋŋiyɛ, yuartin ikin ɛkkɛn yaaŋnɛti kaaccin nona wooti ma neeni bɛɛ, acaan ɛkkɛn jyeti Juaŋti bɛɛ.

will be added

X\