Ibrun 2

1Yaccu tol tol te malɛɛkan, a ɔŋŋiyɛ, dala ikin woŋgɔ tiittin te waka tieŋnin ikin aŋka naa ikin jyettin ɔntɔ bɛɛ. 2Jyeka guagɛ malɛɛkan a jyeka awarɛ, ɔci jyeka neeni bɛɛyɛji ma. Ɔci maka noŋi nɔji neeniyɛ, ywobji Jwaŋa Tolan bɛɛn ɛkkɛnti waakɛnda awarɛ. 3Kan ikin woŋgɔ tiittin te yɔɔta Juaŋ yuoci ikin neeni bɛɛyɛ, ikin uttin bɛɛ. Ciɛggɔn ikin Yaccu Kiṭɔ ɛkɛ jɔɔtcin te jyek yɔɔta neeni ñamu, ɔci maka tieŋŋin ɔci jyek ɛkɛ mugɛyɛ, ɛkkɛn mieti ikin a jyeka neeni awarɛ ɔci tiekɛ ne ikin bɛɛnin ɔɔn. 4Ɔci Juaŋ daŋkun ikin myennin a jyeka neeni ɛkkɛn awarɛ. Ɛkɛ ikin myennin te naŋka tɛyan naŋka ñyecki ma war tɛɛn ɛkɛ ɔci te naŋka ma woŋgɛn ñiektiti te ɛkɛ, ɔci te ‘woñgin ɛkɛ ikin ‘wonninti Boŋ ɛkɛy. Ɛkɛ ikin ‘wonnin waka neeni aŋka ŋeettin ikin jyeka neeni awarɛ. 5Šɛɛr warda ṭɛra bala ne baaṭi ṭɛra guaktin ikin neeniyɛ, ɛkɛ ḍuannɛ Juaŋ malɛɛkan byeŋkɛnti bɛɛ. 6Oŋ yeti menga gɔki worga Juaŋji agi, “Men baan ɛkɛ a menɛ aŋka i poŋi te ɛkɛy? Ɔci ɛkɛ a menɛ aŋka i gɔṭi ɛkɛy? 7I ɛkɛ naŋŋi ḍiɛrŋ te malɛɛkan wɔɔka ne ḍuulan, ɔci i ɛkɛ ‘wonnɛ pwanno, 8ɔci i waak waakɛnda ḍuanni ɛkɛ bieŋɛti.” Jwalla neeni kon ɛkɛ bala a ɔŋŋi, kan waak tieŋdi jyek ɛkɛ waakɛndayɛ, Juaŋ genga dalnɛ bora ne cyɛɛlɔ bɛɛ, waak waakɛnda ‘wonni ɛkɛ men baan bieŋɛti. Yeti acca waak yuartin ikin tyeŋi jyek men baan waakɛnda moki bɛɛ. 9Yeti Yaccu Mena ḍuannɛ Jwaŋa Tolan ḍiɛrŋ te malɛɛkan wɔɔka ne ḍuulan neeniyɛ, ɛkɛ yuartin ikin ne ɛkɛ ‘wonnɛ Juaŋ yom pwani aŋka ɛkɛ dɛccin pɛñi lieno. Ɛkɛ naŋŋɛ Juaŋ ḍiɛrŋ te malɛɛkan te naŋki pwani Juaŋo. A ɔŋŋiyɛ, ɛkɛ tuun te ma waakɛnda. 10Acaan waak waakɛnda cɔnnɛ Jwaŋa Tolan, ɔci ɛkɛ waak waakɛnda naŋŋɛ bala ati yɔɔda bɛɛ. A ɔŋŋiyɛ, yɔmjin doki ne Juaŋ Yaccu naŋŋɛ kanŋa ɛkɛ cwamdɛ te taaby. A ɔŋŋiyɛ, ɛkɛ eccin kɛɛgin ne coŋɔn aŋka ñoowɔ iki ɛkɛ te pwani ɛkɛ. Acaan Yaccu a mena ɛkkɛn wɛɛdɛ nona ɛkkɛn yɔɔdɛ Juaŋy. 11Yaccu ma pɔŋnɛ te nɔjjo. Ɔci ɛkɛ i maka pɔŋnɛ ɛkɛ te nɔji neeni Wey ɛkkɛn a cyɛɛlɔ. A ɔŋŋiyɛ, Yaccu lɔɔddi te barŋa ɛkkɛn bardɛ a modin bɛɛ. 12Ɔci ɛkɛ gɔkcin Juaŋti agi, “Modg ɔɔn nɔɔtka ‘ya te yenti i, ɔci ‘ya ‘ualja te yenti i kaniicaji.” 13Ɛkɛ gɔki moki agi, “Paŋi ‘ya ḍuacca aŋa Juaŋti.” Ɔci ɛkɛ gɔki moki agi, “‘Ya wɛnni iki kɛɛgin ‘ya ‘wonnata Juaŋ nɛ.” 14Acaan kɛɛgin neeniyɛ, ɛkkɛn a ma baano, ɔci Yaccu daŋkun aŋi men baan ba ɛkkɛn ɔɔn. Ɔci te lyen ɛkɛ neeni ɛkɛ mena balki jyek lien neeniyɛ, nuudɛ jitin. Gena Jwaŋa Yaayan. 15A ɔŋŋiyɛ, maka ciyi kɛñji jitin neeni pɔŋnɛyɔ ɛkɛ te kɛñji acaan ɛkkɛn buayi lien ne tolan. 16Oŋ yeti awarɛyɛ, ɛkɛ moki malɛɛkan bɛɛ. “Ɛkɛ moki gena kɛɛn Abrahim.” 17Acaan a ɔŋŋiyɛ, dala ɛkɛ bala ba modgɛn te waak waakɛnda aŋka ɛkɛ yomɛ pwada ɛkkɛnti ɔci noŋdi ba jyek gaciic tolan Ma Yahuud awarɛ te wak Jwaŋa Tolan aŋka ɛkɛ ma wandɛ te nɔji ɛkkɛn. 18Acaan ɛkɛ taabbin, ɔci ɛkɛ pɔɔññɛ Jwaŋa Yaayanyɛ, ɛkɛ daŋkun yaakinti moki maka pɔɔdɛ Jwaŋa Yaayany.

will be added

X\