Ibrun 13

1Dala ɛkkɛ oondɛ yɔtin pookɔ ba maka a modin. 2Naa ɛkkɛ ñingɔ yeya te ḍuat maka wɛlg bɛɛ. Te naŋka wannayɛ, ma gɛɛg malɛɛkan ḍuayɛ ne ɛkkɛn kwoyɔn ɛkkɛn ɔɔn. 3Dala ɛkkɛ poŋdɛ te maka ciyi ciginji bala ba ne ɛkkɛ balgɛ iki ɛkkɛn jiju ciginji ɔɔn, ɔci dala ɛkkɛ poŋdɛ te taab maka naŋtan ma ne yaayan neeni. Dala taab ɛkkɛn bala ba taab ɛkkɛ ɔɔn. 4Dala ma waakɛnda poŋdi a ḍɛɛn neeni ɛkɛ a gena pwadan. Ɔci maka ‘uay i moongyɛ, naa ɛkkɛn noŋdi tomi maka pookɛnti bɛɛ. Juaŋ jiek oldɛ maka noŋi tomi wyetkɛnti. 5Naa ɛkkɛ anɛ bilk bɛɛ. Dala ɛkkɛ yɔmdɛ te waka bala ɛkkɛti wanna doki. Acaan Juaŋ gɔki agi, “‘Ya i daldin bɛɛ, ɔci ‘ya i yiɛptin ɔntɔ bɛɛ.” 6Dala ikin yomgɔ tɛya, ɔci gɔktin agi, “Ciɛggɔn a mena moki ‘yay. A ɔŋŋiyɛ, ‘ya buay genga moki bɛɛ. Menga yaakinti ‘ya naŋda ɔŋka bɛɛ.” 7Dala ɛkkɛ poŋdɛ te maka ɛkkɛ lalkɛ te jyek Juaŋy. Dala ɛkkɛ poŋdɛ te coodda cieki ɛkkɛn, ɔci te lyena tuuki ɛkkɛny. Dala jyeni ɛkkɛ bala ba jyeni ɛkkɛn. 8Yaccu Kiṭɔ warɛ agdɛ oŋgati bɛɛ. Tɛɛnɔ, ɔci te oŋŋo, ɔci yuonginda ɔɔn ɛkɛ warɛ agdɛ bɛɛ. 9Naa ɛkkɛ maaltɛ jyeka pookɛn gɛɛg ɔntɔ te jyeka awarɛti neeni bɛɛ. Pwatcin doki ne i yɔɔrdi war tɛɛn i yomuti te yom pwani Jwaŋa Tolany. Yeti yom tɛɛna neeni yuara i te tiit jyek ganuun te jyek oomdin bɛɛ. Maka bala tieci jyeka neeniyɛ, ɛkkɛn magɛ jyeka neeni bɛɛ. 10Maka moṭi Juaŋti nona morki ma Juaŋti te baaṭiyɛ, ɛkkɛn omi waka ‘yɛrtan ɛkkɛn Juaŋti neeni, yeti ɛkkɛn yaakinti omdi genga te nona ɛṭin ikin waak a nona woonɛ neeniti bɛɛ. 11Gaciic tolan Ma Yahuud etti yimg maal Nona Pwadan Ne Tolanti neeni aŋka ‘wondɛ ɛkɛ Juaŋ te nɔjjo. Yeti yoŋgi waka ‘yɛri ma neeni tontan ma maañ baan ŋoyɛti bora aŋan. 12Yaccu daŋkun tuun bora baan ŋoyɛti a ɔɔn aŋka ma pwaddi te yimg ɛkɛ. 13Dala ikin gortin bora ɛkɛti baan ŋoyɛti aŋan aŋka ɛkɛ yoortin ikin te lɔɔno. 14Acaan ikin balkin bana yɔɔd ne tɛyan gɛɛl iñɔ ṭɛɛrji wɛnni moki bɛɛ. Ikin kɛɛyin bana ikin ‘wontinti Juaŋ ne baaṭi neeni. 15Acaan Yaccu tuun te ikinyɛ, dala jiɛta jieyin ikin Juaŋ oŋkanda neeni, bala ba waka ‘yɛrtin ikin Jwaŋa Tolanti, ɔci te jiɛta neeniyɛ, ikin mietin a ɛkɛ a Ciɛggɔn. 16Naa ɛkkɛ yiedɛ te naŋka pwadin ɔci te moowin yɔtin pookɔ bɛɛ, acaan Juaŋ yomɛ pwatcin te naŋka pwadan neeni bala ba ne ɛkkɛn akki waka ‘yɛrŋin ikin ɛkɛti no. 17Dala ɛkkɛ tieŋdɛ jyek maka wɛɛyi ɛkkɛ, ɔci noŋdɛ ba jyeka guaktan ɛkkɛn ɛkkɛtiy. Ɛkkɛn gɔṭi ɛkkɛ woodi bɛɛ, acaan ɛkkɛn taadɛ Juaŋ te kanŋa ɛkkɛn neeni. Kan ɛkkɛ tieŋdɛ jyek ɛkkɛnyɛ, ɛkkɛn noŋdi kanŋa ɛkkɛn te yoma ñɔyan. Kan ɛkkɛ tieŋdɛ jyek ɛkkɛn bɛɛyɛ, ɛkkɛn noŋdi kanŋa te yoma pwadan bɛɛ, ɔci yɔɔrdi gena pwadan gɛɛl te naŋka neeni bɛɛ. 18Dala ɛkkɛ cɔktɛ te ɔɔn oŋkanda Juaŋti. Çeejɔn ɔɔn ne pwadan paŋŋa bɛya te yomg ɔɔnti pwanna pwani, acaan ɔɔn buagɔn noŋdɔn a naŋka pwadan oŋkanda ɔɔn. 19Ɔci ‘ya toocca ɛkkɛti moki ne tolan ka dala ɛkkɛ cɔktɛ Juaŋti aŋka ɛkɛ ‘ya cuonda dɔɔda ɛkkɛti moki ne pɛñan. 20Ciɛggɔn ikin Yaccu Kiṭɔ luolnɛ Jwaŋ coodda pwadan ñaalɔ te lienti, Yaccu aŋi ḍɛɛnɔn kulin Ḍɛɛnɔn Tolan te lyen ɛkɛ. Ɔci te yimg ɛkɛyɛ, Juaŋ jiek naŋɛ iki mako. Jyeka naŋi ɛkkɛn neeni baadi bɛɛ. 21Dala Jwaŋ naŋka pwadan ɛkkɛ ‘wondɛ waka pwadin waka ɛkkɛ buagɛ waakɛnda aŋka ɛkkɛ noŋdɛ ba naŋka ṭagdɛ ɛkɛy. Ɔci dala ɛkɛ noŋdi ikinti te Yaccu ba naŋka ṭagdɛ ɛkɛy. Ɔci dala Yaccu Kiṭɔ jiɛtan ma yuonginda ɔɔn! Amɛɛn. 22Modg ɔɔn, ‘ya gɔkka ɛkkɛti, dala ɛkkɛ tieŋdɛ jwalla ɛkkɛ ‘wondɛ yoma pwadan, ɔci dala ɛkkɛ yomgɔ tɛya. Acaan worga kiewan ‘ya ɛkkɛti neeni beecin bɛɛ. 23’Ya buaga dala ŋeeddɛ ɛkkɛ mod ikin Timutawuc pɔkkɛ ma te ciginji doki. Kan ɛkɛ bɛɛn ne pɛñan dokiyɛ, ‘ya baldin iki ɛkɛ oŋŋa ‘ya ɛkkɛ yuardiny. 24Dala ɛkkɛ maka wɛɛyi ɛkkɛ ñiiptɛ iñɔ te ɔɔn, ɔci Ma Kiṭɔ waakɛnda. Modg ikin maka ban Itali ñiepi ɛkkɛ waakida. 25Dala Jwaŋa Tolan yomɛ pwada a pwani ɛkkɛti oŋkanda.

will be added

X\