Ibrun 12

1Maka boorŋ ‘ya te yengɛn coŋin neeniyɛ, ɛkkɛn gɔṭi ikin, ikin yudkinyɔ. A ɔŋŋiyɛ, dala ikin waka cyɛgan ɔci nɔjja kɔrcinti ikinti ne tɛyan neeniyɛ, yiɛptin ɔntɔ, ɔci dala ikin yomgɔ tiektin ne ikin yiŋin boddin oŋkanda te boddin ḍuaññɛ Juaŋ ikin ñomgɔti neeniy. 2Ɔci dala ikin woŋgɔ tiittin gena Yaccu Kiṭɔt mena a bɛɛkin jyeni ikiny. Ɔci ɛkɛ a mena ikin naŋtin pwattin te jyeni ikiny. Ɛkɛ yookɔn warɛ te kakan bɛɛ, ɔci ɛkɛ poŋjin te ŋɛɛgga ḍorki ma ɛkɛ bɛɛ, ŋeejɛ ɛkɛ yom ñɔɔn bala kɛɛy ɛkɛ. Ɛkɛ poŋjin te lɔna tuudɛ ɛkɛ kakanti neeni bɛɛ. Oŋ accayɛ, ɛkɛ bala ciyi Juaŋ taaŋɛti byeŋa byerɔn. 3Dala ɛkkɛ poŋdɛ te loomg tɛɛn ɛkɛ. Ɛkɛ naŋka naŋɛ maka yeyin ɛkɛti buannɛ jitin waakɛnda aŋka naa ɛkkɛ yomgɔ poda, ɔci yomgɔ buaya bɛɛ. 4Te lañ ɛkkɛ neeniyɛ, ɛkkɛ noowɛ i nɔjjo, oŋ yeti ɛkkɛ noonɛ ne tuunɛ men bɛɛ. 5Ɛkkɛ ñingɔ yien te jyeka guaŋŋɛ Juaŋ ɛkkɛti ba ɛkkɛ agɛ kɛɛgin ɛkɛyɛ? Juaŋ gɔki agi, “Hay, kaci ‘ya, dala i waŋu tiicca ne Ciɛggɔn i ṭeeditiy, ɔci naa i yomu koya ne ɛkɛ i ṭeeditiyɔ bɛɛ. 6Acaan Ciɛggɔn ṭeyi maka ɛkɛ aniy, ɔci mena mugdɛ ɛkɛyɛ, ḍuadɛ ɛkɛ ba kaci ɛkɛ.” 7Dala ɛkkɛ yomgɔ tiektɛ ne Juaŋ ṭeyi ɛkkɛy. Ɛkkɛ naŋdɛ ɛkɛ ba kɛɛgin ɛkɛ. Kɛɛgin waakɛnda ṭeetan weyyɛn. 8Kan ɛkkɛ ṭeedɛ Juaŋ ba kɛɛgin ɛkɛ waakɛnda bɛɛyɛ, a ɔɔn ɛkkɛ agɛ kɛɛgin ɛkɛ awarɛ bɛɛ. Kan a ɔɔnyɛ, bala ba ɛkkɛ agɛ kɛɛgin jiedi ma te tommo. 9Weyya ikin jietkinyɛ, ɛkkɛn ṭeyi ikin ɔci ikin buayin ɛkkɛn, oŋ dala ikin tieŋtin Wey ikin Jwaŋa Tolanti aŋka ikin tɛɛttin. 10Weyya ikin jietkinyɛ, ikin ṭeekin wɔɔka ne ḍuulan ba naŋka yomg ɛkkɛn buagɔn, oŋ yeti Juaŋyɛ, ikin ṭeenin ɛkɛ yɔŋi ikin a ywaŋi aŋka ikin ñootin te pwani ɛkɛ. 11Ikin ne ṭeekinti mayɛ, te oŋŋa wanna ikin poŋŋin ka ṭeena neeni yaayɛ, pwatcin bɛɛ. Oŋ yeti ne ŋoyɔyɛ, ṭeena neeni etti naŋka pwadan te maka ṭeyi ma te naŋka neeniy. A ɔŋŋi, ɛkkɛn ciya ne pwadan. 12Dala byeŋki ɛkkɛ byeŋka morŋan neeni koobdɛ ñaalɔ, ɔci dala ɛkkɛ ‘woŋga ḍiedan neeni tiittɛ iñɔ. 13Dala ɛkkɛ ooddɛ te pɔɔka a tyɛlgan aŋka naa ciega morŋan beeldi bɛɛ, yeti dala ɛkkɛn waakɛn tiittan iñɔ ne tɛyan. 14Dala ɛkkɛ ciedɛ i ma waakɛnda ne pwadan te coodda pwadan. Kan pwani baaw mentiyɛ, mena neeni Ciɛggɔn yuardɛ bɛɛ. 15Dala ɛkkɛ woŋgɔ tiittɛ, acaan naa menga warɛ ñiedɛ jitin te yom pwani Jwaŋa Tolan te gena Juaŋ buagɛ aŋka ‘wondɛ ɛkɛ neeni bɛɛ. Ɔci naa mena yaayan gɛɛl bala ɛkkɛti, ɔci ma yaadɛ ne coŋɔn te naŋki ɛkɛ bɛɛ. “Ɛkɛ bala ba jana yaayan ywollin baljiy.” 16Naa ɛkkɛ menga noŋdi ne yaayan aga tomma ba Icɔ mena jyek Juaŋ baaw yomɛti ɔci ḍɔŋa ɛkɛ jiennɛ mɛɛgɛn agi kacca ñamu neeni wiɛlnɛyɔ te ama ne cyɛɛlɔ neeni bɛɛ. 17Çeejɛ ɛkkɛ ne ɛkɛ buaŋŋi ne ŋoyɔ aŋka dala weegɛn gɔkti ne pwadan ɛkɛtiyɛ, Icɔ ṭiiŋŋɛ wey ɛkkɛn acaan ɛkɛ yaakinti naŋka naŋŋɛ ɛkɛ neeni agdiyɔ moki bɛɛ, yeti Icɔ bala wiak te pyeg woŋgɛ, ɔci yɔṭi jyeka pwadin te weegɛnti moki bɛɛ. 18Ɛkkɛ bɛɛnɛ non waka ɛkkɛ yaakɛti yuartɛ, bala ba yɔrg ɛkkɛ ne bɛɛki Pom Cinati bɛɛ. Ɛkkɛn bɛɛn maña koldanti, ɔci nona miel ɔci ṭuuli wiew ɔci nona yiŋɛ tuol neeni. 19Ɔci ɛkkɛn bɛɛn nona wiagi ṭuoŋ, ɔci non pwana gɔkiy. Ɔci maka tieŋŋin pwana neeniyɛ, kɛkkin agi naa ɛkkɛn tieŋdinti jwali gɛɛl moki bɛɛ. 20Acaan ɛkkɛn buañi jyeka neeni. Jyeka neeni bala gɔki agi, “Kan mala ati te ciegɛn gɛɛl jokcin poomtiyɛ, ɛkɛ yeptan ma te gwoyi ne tuudi ɔɔn.” 21Muuca buañi ne tolan ne ɛkɛ gɔrni poomtiy, ɔci ɛkɛ waanɛ gɔki agi, “‘Ya buay ne pɛñan, ɔci waru ḍiedan.” 22Yeti ɛkkɛ bɛɛnɛ Pom Ciyɔnti ɔci ban Jwaŋa tɛɛtiti Urcaliimti ñaalɔ pɔliji i malɛɛkan coŋiny. 23Ɔci ɛkkɛ bɛɛnɛ non yom ñɔɔn ñoowin kɛɛgin Juaŋ kɛɛgin a kɛɛgin, maka yengɛn a kiigin ñaalɔ pɔlijiy. Ɔci ɛkkɛ bɛɛnɛ Juaŋti mena noŋi godan ma waakɛnda, ɔci ɛkkɛ bɛɛnɛ moki non boŋki maka pwadgin naŋŋɛ Juaŋ aŋi maka awarɛy. 24Ɛkkɛ bɛɛnɛ Yaccuti mena a cuuda jyeka naŋŋɛ Juaŋ wonkɛn neeniti. Ɛkkɛ bɛɛnɛ yimg Yaccuti yimga mieti ikin te bɔɔkin ikin bɔɔŋninti Juaŋ te nɔjiy. Yimg Yaccu neeni bala ba yimg Habiil yimga balkɛ jyek yoni waakɛn wanna bɛɛ. Ɔci ɛkkɛ moki bɛɛnɛ yimga a gaagin jiekɛn a naŋgin ne pwadan te yimg Habiily. 25Dala ɛkkɛ woŋgɔ tiittɛ, naa jyek mena gɔki neeni tuodɛ bɛɛ. Kan maka jyek mena gɔki ṭeyi ma waakɛn iñɔ ṭɛɛrji wɛnni neeni tuoyɛ ɔci ɛkkɛn uni te ywobji Juaŋ bɛɛy, oŋ ikin uttin a ɔki, kan ikin jyek mena gɔki te ñaalɔ pɔliji neeni tuoññiny! 26Pwan ɛkɛ te oŋŋa waayiyɛ, ṭɛɛr jiɛññɛyɔ. Yeti acca ɛkɛ gɔkkin moki agi, “‘Ya ‘uocca oŋi ne cyɛɛlɔ moki ṭɛɛr jiɛdyɔ ɔci ‘ya ṭɛɛr jiɛdyɔ parɛ bɛɛ, yeti ‘ya pɔli daŋkun jiɛdyɔ.” 27Jyeka gɔki agi “Oŋi ne cyɛɛlɔ moki,” jyeka neeni nɔɔti te waka jieci waakɛn neeni ɛkkɛn uuttɛ Juaŋ ɔntɔ. Ɛkkɛn a waka a cɔdgin. Ɔci waka waakɛn jiɛtan bɛɛ neeni aŋka ciya. 28Dala ikin gɔktin a pwatcin Juaŋti acaan ikin mwokkin cyɛgja jieci warɛ bɛɛy. Dala ikin buayin Juaŋ ne ikin moṭin Juaŋti te malla buagi ɛkɛy. 29Acaan Jwaŋ ikinyɛ, ɛkɛ a maña omiy.

will be added

X\