Ibrun 11

1Jyeniyɛ, ɛkɛ a gena ñyecin ikin waka kɛɛtin ikiny. Ɔci te jyeniyɛ, ikin jyettin yomgɔti awarɛ te waka yuarŋin ikin men bɛɛy. 2Te jyeniyɛ, maka te baaṭi Juaŋ yomɛ pwanna pwani ɛkkɛnti. 3Te jyeniyɛ, ikin waak ŋeecin waakɛnda ka cɔnnɛ Jwaŋa Tolan te jwali ɛkɛ, ɔci waka ñaltin ikin acca neeniyɛ, ɛkkɛn cɔnnɛ Juaŋ te waka yuartin ikin te woŋgɔ bɛɛ neeniti. 4Te jyeniyɛ, gena oonɛ Habiil Juaŋti ɛkɛ pwatcin te gena oonɛ mod ɛkkɛn kɛɛn Juaŋtiy. Te jyeniyɛ, ɛkɛ maaŋŋɛ Juaŋ agi ɛkta agɔ mena pwadɔ acaan Juaŋ bala gɔki ne pwadan te gena ‘wonnɛ Habiil ɛkɛy. Ɔci te jyeniyɛ, ne Habiil tuuniyɛ, jyek ɛkɛ bala gɔki ikinti acca men ɔɔn. 5Te jyeniyɛ, Inak eññɛ Juaŋ ñaalɔ ne ɛkɛ a tɛɛta ɔɔn, tuun bɛɛ. Ɔci ɛkɛ yuarŋɛ menga bɛɛ. Ɛkɛ eññɛ Juaŋ ñaalɔ doki. Worga Juaŋ gɔki agi ne Inak eññɛ Juaŋ men bɛɛyɛ, Juaŋ yomɛ pwatcin ɛkɛti. 6Jwaŋa Tolan yomɛ pwada mengati budan kan jyeni baaw ɛkɛti bɛɛ. Kan menga buagɔn bɛya Juaŋtiyɛ, dala ɛkɛ jyeddi a Juaŋ bala, ɔci moki dala ɛkɛ jyeddi a maka lieṭi Juaŋ neeni ‘wondɛ ɛkɛ waka pwadin. 7Te jyeniyɛ, Nɔwa noŋi ba jyeka ɛkɛ myennɛ Juaŋ te naŋka bɛya ne ŋoyɔ naŋka yuarŋɛ ɛkɛ men bɛɛ neeni. Ɛkɛ cɔti murka tolan aŋka ɛkkɛn uddɛ iki kɛɛgin ɛkɛ i moongɛn. A ɔŋŋiyɛ, ywobji Juaŋ bɛɛn ṭɛɛr wyeñɛ warda, ɔci Juaŋ gɔki agi Nɔwa agɔ mena pwadɔ te jyeni ɛkta. 8Te jyeniyɛ, Abrahim jyeti jwalla guaŋnɛ Juaŋ ɛkɛti agi ɛkta gortɔ bora ooddɔ bana ɛkɛ ḍuaññɛ Juaŋ te jwaliy. Ɛkɛ ban ɛkɛ dalnɛ, ɔci ɛkɛ bala ati ooddi bana kwoyi ɛkɛ. 9Te jyeniyɛ, ɛkɛ bala ciyi ba mena wɛli bana ɛkɛ ḍuaññɛ Juaŋ neeniji. Ɛkɛ bala ciyi te ona a bworŋo, ɔci Icaak i Yaakub ɛkkɛn bala ciyi te oorga a bworŋin daŋkun. Ɔci Juaŋ daŋkun ɛkkɛn ḍuaññɛ te jwali ba jwalla guaŋŋɛ ɛkɛ Abrahimti neeni daŋkun. 10Abrahim bala kɛɛy bana yɔɔd ne tɛyan neeni, ɔci gena Jwaŋa Tolan, ɛkɛ a mena cɔti bana neeniy. 11Te jyeniyɛ, Caara waanɛ yɔṭi war tɛɛn aŋka ɛkɛ laatti ne ɛkɛ aŋi ṭien doki ɔɔn. Ɛkɛ jyeti agi Juaŋ mena ɛkɛ ḍuaññɛ te jwali neeniyɛ, gɔki awarɛ. 12A ɔŋŋiyɛ, Abrahim bala ba mena tuuta acaan ɛkɛ aŋi daan doki, yeti ɛkɛ jieni kɛɛgin ne coŋɔn ba kɛltan, ɔci ɛkkɛn kɔɔna kɔɔni bala ba ŋɔmma niin kɔmi ḍwaŋɛti. 13Maka neeni bala ciyi te jyenna ɛkkɛn jyetki Juaŋti neeni ne oŋŋa ɛkkɛn tuuki ɔɔn. Ɛkkɛn waka jwallɛn ḍuaññɛ Juaŋ neeni yuarɛ bɛɛ, yeti ɛkkɛn waka neeni yuarcɛji te nona loonan ɔci mugɛ ɛkkɛn yomgɛnti. Ɔci ɛkkɛn jyeti yomgɛnti a ɛkkɛn ciyi a wɛlg iñɔ ṭɛɛrji wɛnni. 14Maka gɔki te waka neeniyɛ, ɛkkɛn mieti agi ɛkkɛn lieṭi ban ɛkkɛn waanɛ. 15Ɛkkɛn poŋi te bana dolliyɔ ɛkkɛn waayi moki bɛɛ. Te ɛkkɛn poŋki te bana dollɛ ɛkkɛn waayiyɛ, te ɛkkɛn dɔɔki doki. 16Yeti ɛkkɛn dɔɔki bɛɛ, acaan ɛkkɛn buagɔn bana ñaalɔ pɔliji bana pwadan. Ɔci a ɔŋŋiyɛ, Juaŋ lɔɔdan ne ɛkkɛn borki ɛkɛ a Juaŋ ɛkkɛn bɛɛ, acaan ɛkɛ ɛkkɛn noŋnɛ baano. 17Oŋŋa Juaŋ Abrahim pɔɔññɛ aŋka gɔrti ne yom ɛkɛ baali a ɔkiyɛ, Abrahim jyeti Juaŋti men ɔɔn, ɔci kaci ɛkɛ Icaak ‘wonnɛ Juaŋo, ɛkɛ yookɔn bɛɛ. 18Te ñamu Jwaŋa Tolan Abrahim ḍuaññɛ te jyek kacca neeni agi, “Kɛɛgin Abrahim bɛya te Icaakti.” Yeti Abrahim noŋi kaci ɛkɛ kacca nɔɔti ne cyɛɛlɔ neeni ‘yɛrdɛ Juaŋti. 19Abrahim poŋi gɔki agi Juaŋ Icaak jɔɔŋda ñaalɔ te lienti moki, ɔci a ɔŋŋiyɛ, bala ba ne ikin gɔkin agi Abrahim Icaak duaŋŋɛ dɔkɔ te lienti. 20Te jyeniyɛ, Icaak gɔkcin Yaakubti ɔci Icɔti te naŋka bɛya pwadan ɛkkɛnti ne baaṭiy. 21Te jyeniyɛ, Yaakub ne buaŋŋɛ lienyɛ, ɛkɛ gɔkcin ne pwadan kɛɛgin Yuocipti waakɛnda, ɔci ɛkɛ ḍaŋnɛ tɛɛlnɛ kɔmñi ɛkɛ wyeñɛti, ɔci morcin Juaŋti. 22Te jyeniyɛ, Yuocip ne buaŋŋɛ lienyɛ, ɛkɛ gɔkcin te jyek kooyin ma Icrayiil bora te ban Macor, ɔci ɛkɛ ma nɔɔnnɛ te nona jokki ma owi ɛkɛy. 23Te baaṭi ḍuaŋa tolan ma Macor bala noki kɛɛgin ma Icrayiil. Yeti te jyeniyɛ, Muuca ne jietkiti mayɛ, ɛkɛ cogɛyɔ weegɛn i mɛɛgɛn ponk ne ḍoogɔ, acaan ɛkɛ yuarcɛ ɛkkɛn pwanna pwanno. Ɔci ɛkkɛn buañi jwali ḍuaŋa tolan ma Macor moki bɛɛ. 24Te jyeniyɛ, Muuca ne tolliyɛ, ɛkɛ yookɔn warɛ te barŋa ɛkɛ bartiti ma a kaci ṭɔl ḍuaŋa tolan ma Macory. 25Ɛkɛ buagɔn taabdi ba taab taabki ma Juaŋ wanna, ɔci buagɔn yomɛ ñɔya te wak nɔji neeni wɔɔka ne ḍuulan bɛɛ. 26Acaan yuarnɛ ɛkɛ te jwolta ma juolki Ma Kiṭɔyɛ, ɛkɛ aŋka pwatcin ne tolan te mal ma Macor mala coŋin mala pwadin neeni, acaan ɛkɛ bala poŋi gɔki agi gena ɛkɛ ‘wondɛ Juaŋ neeni aŋka pwatcin ɛkɛti. 27Te jyeniyɛ, Muuca kooyin bora te ban Macor, ɔci ɛkɛ buañi te loñk ḍuaŋa tolan ma Macor bɛɛ. Ɛkɛ yookɔn warɛ te dɔɔkkin bala ba Juaŋ mena yuartan ma te woŋgɛn bɛɛ neeni yuartɛ ɛkɛ no. 28Te jyeniyɛ, Muuca ma myennɛ aŋka ɛkkɛn ŋordi kulin ṭɔlgɛn ɔci noŋdi iid. Ɔci ɛkɛ ɛkkɛn myennɛ aŋka ɛkkɛn yimg kulin ṭɔlgɛn gattan ‘yegin tuggɛnti aŋka Malɛɛka Lien kɛɛgin ɛkkɛn kɛɛgin a kɛɛgin nogdɛ bɛɛ. Ɔci iid neeni ma boṭi agi, Iid Malɛɛka Lien Bɛɛn Goṭi A Gorŋo. 29Te jyeniyɛ, ma Icrayiil galŋa bartan ma a Galŋa Tidan jyɛdɛji. Ɛkkɛn bala ati ba ne atki nona iwanti ɔɔn. Ɔci ne ma Macor buaŋŋɛ acaan kaatti daŋkunyɛ, galŋ ɛkkɛn muulnɛ ñaalɔ ɔci eññɛ. 30Te jyeniyɛ, ne ma Icrayiil kaatan ban Jɛrikɔ wiilkitiyɔ nink ne dɔɔyɔ wyetkɛn ne yyɛɛwɔyɛ, kaatan ḍɛɛmdin. 31Te jyeniyɛ, Rahab ɛŋa toban neeni tuun iki maka a nɔɔtk bɛɛ, acaan ɛkɛ ma Icrayiil maka ati lɛɛl noon neeni coŋŋɛyɔ. 32’Ya ‘uocca gɔkca a ɔki moki? ‘Ya balka wɔɔka aŋka gɔkta te Gidyan, ɔci te Baraak, ɔci te Camcuun, ɔci te Jɛpta, ɔci te Daawud, ɔci te Camwil, ɔci te maka a bɔwan moki bɛɛ. 33Te jyeniyɛ, ɛkkɛn keedin buanɛ, ɔci ɛkkɛn noŋi ne pwadan, ɔci ɛkkɛn waka ɛkkɛn ḍuaññɛ Juaŋ te jwali mugɛ, ɔci ɛkkɛn jyer ‘uorkɛ tuggɛnti, ɔci ɛkkɛn amɛ jyer bɛɛ. 34Ɔci ɛkkɛn war tɛɛn maañ buannɛ, ɔci ɛkkɛn uni te lyen byeŋgaaran. Ɛkkɛn a maka waakɛn koyan yeti ɛkkɛn waakɛn tɛɛn, ɔci ɛkkɛn tɛɛna tɛɛn lañti. Ɔci ɛkkɛn ackan bonka pookɛn buanɛ. 35Te jyeniyɛ, moong gɛɛg ma ɛkkɛn maka jɔŋŋin te lientiyɛ, yuarɛ. Ɔci ma gɛɛg korkɛn ñakcin te jwolto. Yeti ɛkkɛn yookɔn waakɛn te pɔkkin ɛkkɛn pɔktiti ma aŋka ɛkkɛn ḍɔɔggɛn wɔkti te lyena ɛkkɛn noktiti ma, acaan ɛkkɛn buagɔn jɔŋdi te lienti te tɛɛtin pwadan. 36Ɔci ma gɛɛg juoli ma, ɔci ḍwayɛ, ɔci gɛɛg ḍɛɛgɛ, ɔci oljɛ jiju ciginji. 37Ɔci gɛɛg yepci ma te gwoyi ɔci nogɛ. Ɔci gɛɛg ŋuodɛ ma jitin, ɔci gɛɛg nogɛ te byeŋgaaran. Ɔci ɛkkɛn bala ɛŋi geek kulin i geek ḍɛɛko, ɔci ɛkkɛn bala ati amaam budan, gena bartan ɛkkɛn a gen ɛkkɛn gɛɛl bala bɛɛ. Ɛkkɛn naŋɛ ma ne yaayan. 38Ɔci ɛkkɛn yɔmji i baan konɛ moki bɛɛ! Ɛkkɛn ati amaam wɔɔŋji ɔci pomk jitin, ɔci ɛkkɛn wɔti kɔki pomkti. 39Maka neeniyɛ, ɛkkɛn maaŋi ma te jyeni ɛkkɛn. Oŋ yeti ɛkkɛn waka jiekɛn a ḍuagin neeni yuarɛ men bɛɛ. 40Juaŋ ikin ḍɔɔŋnin gena pwadan aŋka ɛkkɛn pwattin iki ikin a cyɛɛlɔ.

will be added

X\