1 Ganuun Ma Yahuud, ɛkɛ a ṭiebji waka pwadin waka bɛya ne ŋoyɔ neeni budan. Ɛkɛ awarɛ ba waka bɛya ne ŋoyɔ neeni bɛɛ. A ɔŋŋiyɛ, waka ‘yɛrtan ma Juaŋti yuonginda neeni yaakinti maka moṭi Juaŋti neeni naŋtan pwaddi bɛɛ. 2 Oŋ kan te waka ‘yɛrtan ma neeni yaakinti nɔji eetan ɔntɔyɛ, te ma yɔɔni te ‘yɛrŋ ɛkkɛn doki. Acaan maka moṭi Juaŋti neeni te nɔji ɛkkɛn te eyɛ waka neeni doki, ɔci te ɛkkɛn yaakinti poŋi te nɔji ɛkkɛn moki bɛɛ. A ɔŋŋiyɛ, te waka ‘yɛrtan ma neeni te yɔɔni waakɛnda doki. 3 Yeti ma ɛṭi waka neeni yuonginda aŋka ma poŋdi te nɔji ɛkkɛn. 4 Acaan yimg yotk ɔci yimg ḍɛɛk yaakinti nɔji eetan ɔntɔ bɛɛ. 5 A ɔŋŋiyɛ, ne Yaccu buaŋŋɛ woon bɛɛdi iñɔ ṭɛɛrjiyɛ, ɛkɛ gɔkcin Juaŋti agi, “Waka ‘yɛrtan ma ɔci waka ‘wontiti ma iyɛ, i buagi ɛkkɛn bɛɛ, yeti i ‘ya noŋna waro. 6 I buagi waka ṭultan ma ɔci waka ‘yɛrtan ma te nɔji neeni bɛɛ. 7 Ɔci ‘ya gɔkcan ka, ‘‘Ya wɛnni nɛ, hay Juaŋo, aŋka ‘ya noŋ ba gena ṭaga i bala ba jyeka a kiigin worgaji te ‘yay.’ ” 8 Ɛkɛ gɔki ñamu agi, “Waka ‘yɛrtan ma ɔci waka ‘wontiti ma i, ɔci waka ṭultan ɛkkɛn gena ɛrki ma waak wyeñɛti neeni, ɔci waka ‘yɛrtan ma te nɔjiyɛ, i buagi ɛkkɛn bɛɛ.” Ɛkɛ gɔki a ɔɔn ne ŋeejɛ ɛkɛ waka neeni ‘yɛri ma ba jyek ganuun ɔɔn. 9 Ɛkɛ gɔkcin moki agi, “‘Ya wɛnni neeni, ‘ya bɛɛn aŋka noŋ naŋka ṭaga iy.” Ɔci a ɔŋŋiyɛ, Yaccu jyek naŋka ɛrki ma waak ñamu olnɛ ɔntɔ, ɔci jyek naŋka Juaŋ buagɛ naŋka woonɛ neeni aŋka ḍuannɛ ɛkɛ non waka te ñamu. 10 Ɔci te naŋka wannayɛ, ikin pwannin oŋi ne cyɛɛlɔ doki te war Yaccu Kiṭɔ ne ɛkɛ warɛ ‘yɛrŋi te ikiny. 11 Gaciicin Ma Yahuud ñamuyɛ, ɛkkɛn noŋi kanŋa ɛkkɛn oŋki waakɛnda. Ɛkkɛn ɛṭi a waka ne cyɛɛlɔ oŋkanda ɔɔn. Waka neeni yaakinti nɔji eetan ɔntɔ bɛɛ. 12 Yeti Kiṭɔ warɛ ‘yɛrŋɛ oŋi ne cyɛɛlɔ te nɔji ma waakɛnda. Te naŋka neeniyɛ, ɛkɛ nɔji eññɛ ɔntɔ ne baaṭi ɔɔn, ɔci ɛkɛ cooccin iñɔ Juaŋ taaŋɛti taaŋŋa a byerɔn. 13 Yaccu bala kɛɛy oŋŋa maka yoyi ñin iki ɛkɛ neeni bwandɛ Juaŋ ɔci ḍuattɛ Juaŋ iñɔ ɛkɛ ciegɛtiy. 14 Te gena ‘yɛrŋɛ ɛkɛ ne cyɛɛlɔ neeniyɛ, maka ɛkɛ buagɔn naŋdi pwaddi neeniyɛ, naŋŋɛ ɛkɛ pwadgin doki. 15 Boŋ Juaŋ moki nɔɔti ikin te naŋka neeni. Te ñamu ɛkɛ gɔki agi, 16 “Gena jyeka naŋdɔn ɔɔn iki ɛkkɛn ne ninka neeni baatiy. Ciɛggɔn gɔki agi ganuun ‘ya olja ɛkkɛn yomgɛnti, ɔci ‘ya ganuun ḍuacca jiju ɛkkɛn wyetkɛnti.” 17 Ɔci ɛkɛ gɔkcin moki agi, “Nɔji ɛkkɛn ɔci naŋki ɛkkɛn naŋka yeyinyɛ, ‘ya poŋja te ɛkkɛn moki bɛɛ.” 18 Acaan Juaŋ ma bɔɔŋnɛ te nɔji dokiyɛ, jyek ‘yɛrŋ waak bala moki bɛɛ, bawwin doki. 19 Acca modg ɔɔn, Yaccu Kiṭɔ tuun te ikin. A ɔŋŋiyɛ, ikin balkin bwaji moki ne ikin kaattin Nona Pwadan Ne Tolanti neeni bɛɛ. 20 Ɛkɛ ikin pɔŋnin pɔya woonɛ pɔy tɛɛtin te ‘yɛrŋa ɛkɛ warɛ ‘yɛrŋɛy. A ɔŋŋiyɛ, ikin kaattin jiju bworŋa kɛkci ma on Juaŋ neeni konɛti. 21 Ikin balkin gaciic tolan, ɔci ɛkɛ mwoki on Jwaŋa Tolan. 22 A ɔŋŋiyɛ, dala ikin ortinti Juaŋti te yoma pwadan, ɔci te jyenna awarɛ, ɔci te yomga nɔjjɛn baaw, ɔci te waaka a luaggin te pyega pwadiny. 23 Dala ikin yomgɔ tiektin ne ikin kɛɛyin waka pwadin waka ikin ḍuaññinti Juaŋ te jwaliy. Acaan ikin jyettin ka Juaŋ jwalla guaŋŋɛ ɛkɛ ikinti neeni daldɛ budan bɛɛ. 24 Dala ikin gɔɔrin yɔtin aŋka ikin moowin yɔtin pookɔ aŋka ikin ani lɛɛltin bora ɔci noŋtin ne pwadan. 25 Naa ikin mwontin te ḍɔɔlla ikin ḍwoṭin wyetkɔ oŋkanda neeni bɛɛ. Ma gɛɛg te baaṭiyɛ, ɛkkɛn mwonnin te ḍɔɔli wyetkɛn. Yeti dala ikin moowin yɔtin pookɔ waakida ne tolan, acaan yuartɛ ɛkkɛ oŋŋa Ciɛggɔn ikin bɛɛdi cɔɔllin doki. 26 Kan ikin naŋka awarɛ ŋeennin oŋ ikin buagin noŋin nɔji men a labji ɔɔnyɛ, gena ‘yɛrtan ma gɛɛl bala moki nɔji ikin eedɛ ɔntɔ bɛɛ. 27 Ɔci a ɔŋŋi aŋka ikin buayin ywobji Juaŋ ywobja bɛya ne ŋoyɔ neeni, ɔci maña koldan maña maka yoyi ñin iki Jwaŋa Tolan neeni amdiy! 28 Mena ganuun Muuca lɛgdɛjiyɛ, ɔci kan ma ne yyɛɛwɔ walla ne ḍoogɔ gɔkcin te naŋki ɛkɛyɛ, ɛkɛ noktan ma. Menga yomɛ pwada ɛkɛti bɛɛ. 29 A ɔŋŋiyɛ, ɛkkɛ poŋɛ naŋka bɛya mena noŋdi ne yaayan Kaci Juaŋti neeni bala a ɔki? Ɔci mena yimg Yaccu yimga ɛkɛ naŋŋɛ Juaŋ pwanni neeni ñaldɛ a genga bɛɛ neeniy, a gena bɛya ɛkɛtiy? Ɔci a gena bɛya mena wooki Boŋ Juaŋ Boŋa etti yom pwani Juaŋ mati neeniy? Maka noŋi naŋka neeniyɛ, Juaŋ jiek oldɛ ɛkkɛn wyetkɛnti. 30 Çeecin ikin mena gɔki agi, “‘Ya noŋja ne yaayan maka noŋi ne yaayan ‘yati neeni.” Ɛkɛ gɔki moki agi, “Juaŋ noŋdi godan ma ɛkɛti.” 31 Ḍɛmmin ma ḍɛmti Jwaŋ tɛɛtin bieŋɛtiyɛ, ɛkɛ a gena buayin ikiny! 32 Dala ɛkkɛ poŋdɛ te ninka ati waayi ne ɛkkɛ koonɛ bora Juaŋ te miel jitinyɛ, ɛkkɛ beelkɛ waak jitkɛn ne coŋɔn, yeti ɛkkɛ buankɛ ɛkkɛn bɛɛ. 33 A oŋki ɛkkɛ balgɛ lɔɔn jitin, ɔci ma noŋi ne yaayan ɛkkɛti. Ɔci a oŋki ɛkkɛ ñoowɛ iki maka naŋtan ma ne yaayan neeni. 34 Ɛkkɛ ñoonɛ iki ma te taab ne ɛkkɛn balki ciginji, ɔci ne mal ɛkkɛ kuakiti mayɛ, ɛkkɛ yomgɔ ñɔɔna ñɔɔn men ɔɔn, acaan ŋeejɛ ɛkkɛ doki ɛkkɛ balkɛ mala pwadan mala baadi bɛɛy. 35 A ɔŋŋiyɛ, naa ɛkkɛ yomgɔ toga bɛɛ, acaan ne ɛkkɛ yomgɔ tiektiyɛ, ɛkkɛ ‘wondɛ Juaŋ waka pwadin ñaalɔ pɔliji ne baaṭi. 36 Dala ɛkkɛ yomgɔ tiektɛ aŋka ɛkkɛ noŋdɛ ba naŋka ṭagdɛ Jwaŋa Tolan aŋka ɛkkɛ yɔɔrdɛ gena guaŋŋɛ ɛkɛy. 37 Acaan bala ba jwalla guagdɛ worga agi, “Ne ḍiɛran ṭɔɔlɛ lakun, ɔci mena bɛya neeniyɛ, ɛkɛ bɛya, ɛkɛ kwatti bɛɛ. 38 Men ‘ya mena pwadanyɛ, ɛkɛ ciya te jyeni ɛkɛ, yeti kan ɛkɛ dɔɔki ŋoyɔyɛ, ‘ya yomu pwada ɛkɛti bɛɛ.” 39 Ikin agin maka dɔɔdi ŋoyɔ ɔci ḍakti bɛɛ. Yeti ikin balkin jyenno. Ɔci ikin unnin doki.
