Ibrun 1

1Jwaŋa Tolan ne maka yɔrg ikin ɔci weyi ikin nɔɔnnɛ te baaṭi te maka a bɔwan Jwaŋa Tolan te jiek jitkɛn ne coŋɔn ɔci oŋki ne coŋɔnyɛ, 2ɛkɛ oŋ ikin nɔɔnnin te ninka bawwin doki neeni te Kaci ɛkɛ Yaccu Kiṭɔ. Ɛkɛ naŋŋɛ Juaŋ a mena mwoki waak waakɛnday, ɔci te ɛkɛ mokiyɛ, Juaŋ cɔti ṭɛɛr ɔci pɔllo. 3Ɔci Kaci ɛkɛyɛ, ɛkɛ a mena yɔṭṭin ikin pwani Jwaŋa Tolany, ɔci ɛkɛ bala ba bolji Jwaŋa Tolan awarɛ, ɔci ɛkɛ eci waak waakɛnda ati te ɛkɛ yɔɔda bɛɛ. Ɔci ne ɛkɛ ma pɔŋnɛ te nɔjiyɛ, ɛkɛ oŋ cooccin Jwaŋa Tolan taaŋɛti taaŋŋa a byerɔn ñaalɔ pɔliji. 4Ɔci Kaci Jwaŋa Tolanyɛ, ɛkɛ tolcin te malɛɛkan waakɛnda bala ba ne ɛkɛ ‘wonnɛ Weegɛn yenta pwadan te malɛɛkan waakɛnday. 5Acaan Juaŋ gɔkcin malɛɛka gɛɛlti oŋgati a ɔŋŋi bɛɛ. Ɛkɛ gɔki agi, “I a Kaci ‘ya, i jiennin ‘ya te oŋŋo.” Ɔci moki agi, “‘Ya agdi Wey ɛkkɛn ɔci ɛkɛ aga Kaci ‘ya.” 6Yeti ne Juaŋ buaŋŋi aŋka cuondi Kacca a kɛɛgɔn iñɔ ṭɛɛrji wɛnniyɛ, ɛkɛ gɔkcin agi, “Dala malɛɛkan Jwaŋa Tolan morti ɛkɛti waakɛnda.” 7Ɔci ɛkɛ gɔki agi, “Ɛkɛ malɛɛkan ɛkɛ naŋdɛ aga jwammo, ɔci maka kanŋan ɛkɛti aga maañ lɛmmɛ.” 8Oŋ yeti te Kaci ɛkɛyɛ, ɛkɛ gɔki agi, “Hay Juaŋo, kaakci iyɛ, ɛkɛ bala oŋki waakɛnda baadi bɛɛ. Ɔci naŋka pwadanyɛ, aga war tɛɛn cyɛgji i. 9I an naŋka pwadan, ɔci i yooki te naŋka yeyin. Ɔci a ɔŋŋiyɛ, Jwaŋa Tolan Jwaŋ iyɛ, i muoni bora ɔci ‘wonnɛ yoma ñɔyan ne tolan te mung ɛkkɛ.” 10Ɔci Jwaŋa Tolan gɔkcin moki agi, “Ciɛggɔn, te ñamuyɛ, i okki ṭɛɛr ɔci pɔllo. Ɛkkɛn a kanŋa byeŋ i. 11Yeti ɛkkɛnyɛ, baadi, oŋ iyɛ, aŋka baldi oŋki waakɛnda. Ɔci ɛkkɛn aga donk ba bworŋ ne agdi daany. 12Ɔci ɛkkɛn wiñayɔ i ba bworŋa tolan ɔɔn, ɔci ɛkkɛn waakɛn aktan ba bworŋ ɔɔn. Oŋ yeti iyɛ, waru aga oŋgati bɛɛ. I ciy yuong waakɛnda ɔɔn.” 13Juaŋ gɔkcin malɛɛkan ɛkɛ gɛɛlti oŋgati boki agi, “I coocca ‘ya taaŋuti taaŋŋa a byerɔny, ɔci ‘ya maka noŋi ne yaayan iti neeni bwandi, ɔci ḍuacca ‘ya iñɔ i cieguti.” 14Malɛɛkan ɛkkɛn waakɛnda a boŋka cundɛ Juaŋ noŋi kanŋan maka ḍuaññɛ Juaŋ aŋka non yɔɔt ɛkɛ muktan neeniti.

will be added

X\