Galatiya 6

1Modg ɔɔn, kan men gɛɛl yuardɛ ɛkkɛ, kan ɛkɛ bala noŋi ne yaayan, dala ɛkkɛ maka yɔɔd ne tɛyan neeniyɛ, dala ɛkkɛ ɛkɛ magdɛ te jyek Jwaŋa Tolan te yoma pwadan aŋka ɛkɛ jiek ywaŋdɛ. Ɔci ne ɛkkɛ ɛkɛ magdɛyɛ, dala ɛkkɛ woŋgɔ tiittɛ te yomg ɛkkɛ daŋkun aŋka naa ɛkkɛ ḍɛɛmdɛ iñɔ ba ɛkɛ ɔɔn bɛɛ. 2Dala ɛkkɛ moowɛ yɔtin pookɔ te jyeka tɛyan, ɔci a ɔɔnyɛ, ɛkkɛ yaakɛti tiecɛ Jyek Kiṭɔ waakɛn. 3Kan men gɛɛl poŋi gɔki agi ɛkɛ toljiyɛ, ɛkɛ dyeti war ɛkɛ parɛ. 4Dala ɛkkɛ waakida gɔrti naŋki ɛkkɛ ne naŋki ɛkkɛ pwatki boki no. Ɔci ne men gɛɛl gɔrti naŋki ɛkɛ pwadiyɛ, ɛkɛ yomɛ ñɔɔna ñɔɔn te naŋki ɛkɛ neeni. Ɔci ɛkɛ poŋi te kanŋa mena parɛ bɛɛ. 5Menga da kɛṭi naŋki ɛkɛ te ḍwaŋ ɛkɛ, ɔci menga da kɛṭi naŋki ɛkɛ te ḍwaŋ ɛkɛ. 6Mena laltan ma te jyek Juaŋyɛ, dala ɛkɛ mena loṭi ɛkɛ kɛndɛ waka pwadin waka bala ɛkɛti waakɛnda. 7Naa ɛkkɛ waakɔ dieddɛ ñin pookɔ bɛɛ. Naa ɛkkɛ poŋɛ gɔkɛ agi men gɛɛl yaakinti Juaŋ naŋdɛ ñin bɛɛ. Acaan kan menga dwoki waak gɛɛgyɛ, waka wanna ‘yɛrdɛ ɛkɛ parɛ daŋkun. 8Acaan jyek ikin waakɛnda ŋeejɛ Juaŋo, ɔci ba naŋka naŋtin ikin acca neeniyɛ, naŋka neeni etti naŋka pookɛn ne baaṭi. Kan men gɛɛl bala noŋi ne yaayan ba yom ɛkɛ yoma te baaṭi neeniyɛ, ne baaṭi naŋka neeni etti lieno. Ɔci kan men gɛɛl noŋi ne pwadan te war tɛɛn Boŋ Jwaŋa Tolan ɛkɛ yomɛtiyɛ, ne baaṭi naŋka neeni etti tɛɛtin, ɔci tɛɛtin neeni bɛya te Boŋ Jwaŋa Tolanti. Ɔci tɛɛtin neeni baadi ywongati bɛɛ. 9Acaan a ɔɔnyɛ, naa ikin taaptin te naŋka pwadin neeni bɛɛ. Acaan ne oŋŋa guaŋŋɛ Juaŋ neeni bɛɛdiyɛ, kan yomg ikin ḍɛɛmdin iñɔ bɛɛyɛ, jyeka neeni ikin ‘wontin waka pwadin te kanŋa ikin. 10A ɔŋŋiyɛ, ne pɔya ikin noŋtin ne pwadan mati baaliyɛ, dala ikin noŋtin ne pwadan mati waakɛnda. Ɔci maka jyeti Juaŋti dokiyɛ, dala ɛkkɛn maktin ikin ne pwadan nɔñji. 11Gɔṭṭɛ, ne ‘ya kieda worga ɛkkɛtiyɛ, ‘ya kiewa ɛkkɛti te kiikan ḍwaŋin. 12Maka ‘yeṭi ɛkkɛ te jyek ŋwoti neeniyɛ, ɛkkɛn buagɔn dala ɛkkɛn pwaddi ma ñomgɛnti aŋka naa taab bɛya ɛkkɛnti te jyek lyen Ciɛggɔn ikin Yaccu Kiṭɔ, lyena tuuni ɛkɛ kakanti neeni bɛɛ. 13’Uaya ŋuodɛ ma neeniyɛ, ɛkkɛn tieci jyek ganuun jitkɛn ne pwadan boki? Hayɛllɛ! Ɛkkɛn gɔki ɛkkɛti te jyek ŋwoti acaan ɛkkɛn buagɔn dala ɛkkɛ agdɛ ba maka ne cyɛɛlɔ iki ɛkkɛn aŋka ɛkkɛn jiɛtan ma te naŋka neeni. 14’Ya buaga jiɛt waru te naŋki gɛɛl bɛɛ, gena lyena tuuni Ciɛggɔn ikin Yaccu Kiṭɔ kakanti neeni aŋka ‘ya jieya ɛkɛ neeni. Te lyen ɛkɛ neeniyɛ, ‘ya tuun daŋkun. Ɔci a ɔŋŋiyɛ, jyeka bala iñɔ wɛnni ṭɛɛrjiyɛ, aŋi ba jyeka budan ‘yati doki. Ɔci jyeka bala iñɔ wɛnni baan konɛtiyɛ, ɛkkɛn yaakinti gɔkti genga ‘yati moki bɛɛ. Acaan ‘ya aŋi ba gena tuuta ɛkkɛnti doki. 15Kan jyek ŋwoti balayɛ, jyek ŋwoti neeni a genga bɛɛ. Ɔci kan jyek ŋwoti moki baawiyɛ, ɛkkɛn noŋdi genga bɛɛ. Gena jyek aŋŋa ikin aktin maka wonkɛn te jyek Juaŋyɛ, aŋka tolcin. 16Maka ciyi te jyeka neeniyɛ, dala ɛkkɛn ciya te coodda pwadan, ɔci dala Juaŋ yomɛ pɔktɛ ɛkkɛnti. Gena ma Icrayiil woodgɛn ɛkkɛn guagdi ‘ya neeni. 17Acca menga yaakinti etti taab ‘yati te genga moki bɛɛ. Bilgin bala ‘ya waruti te naŋka naŋɛ ma yaayan ‘yati te jyek Yaccu. Ɔci te bilgin neeniyɛ, ŋeecin ma ‘ya a men Kiṭɔ. 18Modg ɔɔn, dala ɛkkɛ magdɛ Yaccu Kiṭɔ Ciɛggɔn ikin yomgɔti waakida. Amɛɛn.

will be added

X\