Galatiya 5

1Ikin pɔŋnin Kiṭɔ te jyek kɛnjo. A ɔŋŋiyɛ, dala ɛkkɛ yɔɔddɛ ne tɛyan. Ɔci naa ɛkkɛ dɔɔdɛ kɛnjiti moki bɛɛ. 2Tieŋdɛ jyek ‘ya neeni. Gena ‘ya Buuluc gɔk ɛkkɛti neeni. Naa ɛkkɛ ŋwottɛ ma bɛɛ. Kan ɛkkɛ ŋwottɛ mayɛ, a ɔɔn bala ba jyek Kiṭɔ aŋi jyeka budan ɛkkɛti doki. 3Ɛkkɛ maka buagɔn jyek ŋwotiyɛ, ‘ya gɔkka ɛkkɛti moki, kan ɛkkɛ buagɛ jyek ŋwotiyɛ, dala ɛkkɛ jyek ganuun tiidɛyɔ waakɛnda. 4Kan ɛkkɛ buagɛ pwaddɛ Jwaŋa Tolan ñamɛti te tiid jyek ganuun waakɛnyɛ, a ɔɔn bala ba jyek Kiṭɔ baaw ɛkkɛti, ɔci a ɔɔn moki bala ba ɛkkɛ yookɛ te naŋka naŋdɛ Juaŋ mati te yom ɛkɛ yoma pwadan neeni. 5Te Boŋ Jwaŋa Tolan ikin yomgɔtiyɛ, ŋeecin ikin oŋŋa ikin yɔɔttin Juaŋ ñamɛtiyɛ, jiek bala moki bɛɛ. Ikin pwannin ɛkɛ ñamɛti doki. 6Maka bala Yaccu Kiṭɔti, kan jyek ŋwoti bala ɛkkɛnti ɔci kan walla baaw ɛkkɛntiyɛ, jyeka neeni bala bolja ne cyɛɛlɔ. Kan jyek jyeni ɔci jyek ani aŋka bala ma yomgɛntiyɛ, a ɔɔn yɔmjin. 7Te ñamu ɛkkɛ balgɛ yɔɔdɛ ne pwadan. Oŋ ɛkkɛ jyɛnnɛ menɛ ɔntɔ yeti te jyeka awarɛ neeniti? 8Jyeka pookɛn neeni bɛɛn te mena ɛkkɛ muonɛ bora neeniti bɛɛ. 9Jyeka pookɛn neeni bala ba jyek ñamgo. Ma gɔki agi, “Kan ñamg bala ḍuobjiti ne ḍiɛkanyɛ, ɛkkɛn ooddi ḍuobji warɛti warda.” 10Çeej ‘ya yomuti ɛkkɛ magdɛ Ciɛggɔn, ɔci ɛkkɛ moki dɔɔktɛ jyek ‘yati. Ɔci mena eccin jyeka pookɛn ɛkkɛti neeniyɛ, ɛkɛ ŋeej ‘ya bɛɛ, yeti ne baaṭi ywobji Juaŋ bɛya ɛkɛ wyeñɛti. 11Modg ɔɔn, te ‘ya baala loṭa ɛkkɛ te jyek ŋwoti menyɛ, te ma Icrayiil bala etti jyek taab neeni ‘yati boki? A’a. Kan ‘ya te loṭa ma agi dala ma ŋwottan mayɛ, te ma Icrayiil te yookɔn te jyek lyen Yaccu bɛɛ. 12’Ya poŋ ka dala te maka poṭi ɛkkɛ waakɔ te jyek ŋwoti wanna dala ɛkkɛn ‘uotti ñamu te naŋka wanna ɔci ‘wolgɛn yuutan aga luoko. Ɔci te naŋki ɛkkɛn neeniyɛ, ɛkkɛn waakɛn uuttan ɔntɔ te kaniicaji. 13Modg ɔɔn, ɛkkɛ muonɛ Jwaŋa Tolan bora, ɔci ɛkkɛ pɔŋnɛ ɛkɛ doki. Ɛkkɛ pɔŋnɛ Juaŋ acaan ɛkkɛ noŋɛ te yomg ɛkkɛ pookɔ bɛɛ. Ɛkkɛ pɔŋnɛ Juaŋ aŋka dala ɛkkɛ oondi yɔtin pookɔ. 14Jyek ganuun jitkɛn waakɛndayɛ, jitk ɛkkɛn bala te jwalla ne cyɛɛlɔ kiiwɛ ma agi, “Dala ɛkkɛ anɛ maka ciyɛ iki ɛkkɛ a cyɛɛlɔ ba anna ɛkkɛ anɛ waak ɛkkɛ pookɔ neeni ɔɔn.” 15Yeti kan ɛkkɛ yoyyɛ ñin, ɔci yaccɛ waakɔ pookɔ bala ba leyya ywobkyɛ, dala ɛkkɛ woŋgɔ tiittɛ te jyeka bɛya bora te coodi ɛkkɛy. Acaan coodda pwadan baadi te yoyyin ñino. 16Dala ɛkkɛ aŋka ciedɛ te Boŋ Jwaŋa Tolan oŋkanda, ɔci a ɔŋŋiyɛ, ɛkkɛ noŋdɛ ba yoma te baaṭi moki bɛɛ. 17Yoma te baaṭi neeniyɛ, yookɔn te Boŋ Juaŋo, ɔci moki Boŋ Juaŋ yookɔn te jyek yoma te baaṭi. Ɛkkɛn noowi yaakkɛn a ɔɔn. Ɔci a ɔŋŋiyɛ, ɛkkɛ yaakɛti noŋdɛ ba naŋka ɛkkɛ buagɛ bɛɛ. 18Kan ɛkkɛ wɛɛdɛ Boŋ Juaŋ oŋkandayɛ, jyek ganuun bala ɛkkɛti moki bɛɛ. 19Naŋki yoma te baaṭiyɛ, gena tommo, ɔci naŋka amaamo, ɔci wɛljo, 20ɔci mali jɔkin yeyin waka pɔɔtan ma a pɔɔto, ɔci ṭyejjo, ɔci pɔñko, ɔci yom yoño, ɔci jyek wɛɛdin, ɔci yom monno, ɔci loñko, ɔci anna anki ma waak ɛkkɛn pookɛny. Ɔci jyek kɛɛptin ɔci jyek tyewwin daŋkun, 21ɔci nooŋi mooyo, ɔci naŋki bajjo, ɔci naŋka pookɛn waakɛnda ba naŋka neeni ɔɔnyɛ, ɛkkɛn bɛya te yoma te baaṭiti. Ɔci ‘ya ṭey ɛkkɛ moki bala ba ṭeena ɛkkɛ ṭeenin ‘ya te ñamu ɔɔny, maka noŋi naŋka neeniyɛ, ɛkkɛn balki noon ban cyɛgji Jwaŋa Tolanti bɛɛ. 22Te naŋki Boŋ Jwaŋa Tolan ma yomgɛntiyɛ, Juaŋ etti naŋka pwadin. Ɔci te Boŋ Juaŋ neeniyɛ, ma ani Juaŋo, ɔci ma ooni yɔtin pookɛn. Ɔci naŋka pookɛnyɛ, gena yom ñɔɔno, ɔci coodi pwanno. Ɔci te naŋki Boŋ Jwaŋa Tolan neeniyɛ, ma loomgɛn tɛy tɛyo. Ɛkkɛn yomgɛn pwadɔ mati. Ɔci ɛkkɛn yomgɛn bɔw bɔwo, ɔci ɛkkɛn jiekɛn a yyɛɛwɔ bɛɛ, 23ɔci ɛkkɛn a ywobk bɛɛ, ɔci ɛkkɛn yaakinti paŋi jiek ñamu, ɔci ɛkkɛn noŋi amaam budan bɛɛ. Jyek ganuun yaakinti gɔkti genga te naŋka pwadan neeni bɛɛ. 24Yoma buagɔn naŋka yaayan ne pɛñan neeniyɛ, ma Yaccu Kiṭɔ mwonnin te ɛkɛ doki. Bala ba yoma te baaṭi neeni olji ɛkkɛn kakanti ɔci tuun doki bawwin. 25Kan tɛɛtin Juaŋ bala ikinti te Boŋ ɛkɛyɛ, dala ikin noŋtin ba jyeka guagdɛ Boŋ ɛkɛ ikinti oŋkanda neeni. 26Naa ikin jieyin waakɔ pookɔ te naŋka naŋtin ikin bɛɛ. Naa ikin noŋtin naŋki aŋka maka pookɛn loondi ikinti bɛɛ. Ɔci naa ikin korkɔ modɔ yɔtin bɛɛ.

will be added

X\