Galatiya 4

1Ɔci acca ‘ya gɔk daŋkun te mena guagdɛ weegɛn agi dala maal wiɛnda ɛktayɛ, ne ɛkɛ wona ḍiɛri menyɛ, ɛkɛ bala ba bolji mena kɛɛngɔn. Acaan mena kɛɛngɔn ɛkɛ noŋi ba yom ɛkɛ parɛ bɛɛ ne waak waakɛnda bala ɛkɛ bieŋɛti ɔɔn. 2Mena guagdɛ weegɛn neeniyɛ, ne baaṭi ɛkɛ aga mena mwoki mal weegɛn. Yeti ne ɛkɛ wona ḍiɛri menyɛ, ma bala gɔṭi ɛkɛ ne pwadan ɔci ma bala gɔṭi mal ɛkɛ daŋkun ne pwadan ne oŋŋa guaŋŋɛ weegɛn te baaṭi neeni bɛɛni ɔɔn. 3Ɔci ba jyeka neeniyɛ, bala ba jyek ikin daŋkun. Te ñamu ne ikin jyek Juaŋ jitkɛn ŋeecin ne pwadan men bɛɛyɛ, ikin balkin ba maka kɛɛnk men. Ikin balkin loṭin te jyeka jyetki yɔrg ikin te baaṭiy. 4Ɔci ne oŋŋa guaŋŋɛ Juaŋ wanna waanɛ jiñɛ bɛɛniyɛ, ɔci Juaŋ Kaci ɛkɛ cuonnɛ iñɔ. Ɔci ɛkɛ jiennɛ mena ɛɛŋo, ɔci ɛkɛ aŋi men baano. Ne ɛkɛ bɛɛniyɛ, ɛkɛ daŋkun cien te jyek ganuun ma Icrayiil. 5Kaci Juaŋ bɛɛn aŋka maka ciyi te jyek ganuun neeniyɛ, wandɛ ɛkɛ, ɔci aŋka ikin pirtin Juaŋ aktin kɛɛgin ɛkɛ. 6Ɔci acaan ikin akin kɛɛgin Juaŋ awarɛyɛ, ikin ‘wonnin Juaŋ Boŋ Kaci ɛkɛ ikin yomgɔti. Ɔci Boŋa bala ikin yomgɔti neeniyɛ, gɔki Juaŋti agi, “Wey ɔɔn, Wey ɔɔn!” 7Ɔci acca i baal ba kɛɛngɔn moki bɛɛ. I aŋŋi kacca tolan doki, ɔci acaan i a kaci Juaŋ a ɔɔnyɛ, i baal ba mena guaŋŋɛ Weegɛn agi dala maal wiɛnda ɛktay. 8Te ñamu ne Jwaŋa Tolan ŋeejɛ ɛkkɛ men bɛɛyɛ, ɛkkɛ agɛ kɛɛnk waka bartan ma agi jɔkin. Ɔci ɛkkɛn a waka budan. Ɛkkɛn a jɔkin woodgɛn bɛɛ. 9Yeti acca Juaŋ ŋeennɛ ɛkkɛ doki. Ɔci ɛkkɛ ŋeejɛ ɛkɛ daŋkun. Oŋ te gena yeti ɛkkɛ jyennɛ ɔntɔ aŋka ɛkkɛ dɔɔkkɛ jyeka yeyinti neeni moki? Ɛkkɛ buagɛ agdɛ kɛɛnk moki? 10Ɛkkɛ dɔɔkkɛ ŋoyɔ cooŋɛ ñingɔ te waka bala naŋdɛ ɛkkɛ te baaṭiy, gena jyek oŋko, ɔci jyek ponko, ɔci jyek yuongo. 11Ɔci ‘ya buay kanŋa ‘ya aga kanŋa budan dita. 12Modg ɔɔn, ‘ya buaga dala ɛkkɛ baldɛ ba ‘ya ɔɔn. Acaan ganuun yaakinti gɔkti genga ‘yati bɛɛ. ‘Ya aŋi ba men ma ɛkkɛ doki. Ɛkkɛ dommɛ naŋki gɛɛl ‘yati bɛɛ. 13Oŋŋa ‘ya bɛɛna loṭa ɛkkɛ te ñamuyɛ, ŋeejɛ ɛkkɛ ‘ya waru yaayɛ. 14Waja ‘ya neeni a pɔɔt ɛkkɛti, yeti ɛkkɛ yookɛ te ‘ya bɛɛ. Ɔci ɛkkɛ ‘ya liɛllatiyɔ bɛɛ. Yeti ɛkkɛ balgɛ noŋɛ ne pwadan ‘yati ba ne ɛkkɛ noŋdɛ malɛɛka gɛɛlti walla Kiṭɔtiy. 15Ɛkkɛ yomgɔ ñɔɔna ñɔɔn te ñamu! Oŋ a gena bɛɛn ɔŋ? Te wɔɔka wannati kan te ‘ya gɔkkan ɛkkɛtiyɛ, te ɛkkɛ woŋgɔ dɔɔnnɛ bora ɔci ‘wonnata ‘ya te yoma ñɔyan. 16Ɔci acca ba yom ñɔɔn ɛkkɛ bala aŋɛ? Ɛkkɛ yookɛ te ‘ya ne ‘ya mieta ɛkkɛ te jyeka ɛkkɛ myennin ‘ya a jyeka awarɛ nɛ? 17Maka pookɛn maka bɛɛn ɛkkɛti neeniyɛ, ɛkkɛn bala gɔki ne pwadan ɛkkɛti, yeti ɛkkɛn balkɔn yoma awarɛ bɛɛ. Ɛkkɛn buagɔn ɛkkɛ kɛptɛji i ‘ya acaan ɛkkɛn buagɔn dala ɛkkɛ yomgɔ myɛldi ba ɛkkɛn ɔɔn. 18Gɔṭṭɛ, kan ma yomgɛn myɛlɔ te naŋka pwadanyɛ, yaayɛ bɛɛ, pwatcin. Yeti naa naŋka neeni bala te oŋka ‘ya balgin iki ɛkkɛ budan bɛɛ, dala naŋka neeni bala ne ‘ya baawa ɛkkɛti daŋkun ɔɔn. 19Kɛɛgin ‘ya kɛɛgin onga ‘yay, kan ɛɛŋ amɛ jiediyɛ, kaci pɛñ pɛñ ɛkɛti, ɔci ba jiedi kaciyɛ, bala ba ‘ya daŋkun, ‘ya yomu yaayɛ ne tolan acaan ‘ya buaga dala Yaccu bala ɛkkɛti ne pwadan. 20Hay, a ɔɔnyɛ, bala ba dala te ikin balkin iki ‘ya a cyɛɛlɔ aŋan aŋka ‘ya gɔkka ɛkkɛti te tuk ‘ya, acaan ‘ya baal poŋ te ɛkkɛ a jiñu bɛɛ. ‘Ya gɔk ka ɛkkɛ balgɛ ɔntɔ kaapun. 21Hay ɛkkɛ maka buagɔn ciyi te jyek ganuun nɛ, jyek ganuun jitkɛn ŋeejɛ ɛkkɛ ne pwadan boki? 22Jyeka kiigin gɔki agi kɛɛgin Abrahim kɛɛgin a ‘uay bala ne yyɛɛwɔ. Kacca ne cyɛɛlɔ gɛɛl jiennɛ mena kɛɛngɔn, ɔci ɛka parɛ jiennɛ ɛŋ ɛkɛ waanɛ. 23Kaci mena kɛɛngɔn neeniyɛ, ɛkɛ jiedɛ ma ba naŋki ma baan oŋkanda. Yeti kaci ɛŋ Abrahim waanɛyɛ, ɛkɛ jiedɛ ma ba jyeka naŋɛ Juaŋ iki Abrahim te ñamuy. 24Ba jyek moonga ne yyɛɛwɔ neeniyɛ, ɔci bala ba jyeka naŋɛ Juaŋ iki ma Icrayiil te baaṭiy. Haajaryɛ, ɛkɛ a kɛɛngɔn, ɔci kɛɛgin ɛkɛ a kɛɛnk ba ɛkɛ daŋkun. 25Ɔci ba jyek Haajar neeniyɛ, bala ba jyek ganuun jyeka ma ‘wonnɛ Jwaŋa Tolan poomti, poma yenti Pom Cina ban Arayaji. Ɔci maka ciyi te jyek ganuunyɛ, ɛkkɛn a kɛɛnko. Ɔci maka ciyi ban Urcaliim accayɛ, ɛkkɛn a kɛɛnk ba Haajar ɔɔn, acaan ɛkkɛn bala ciyi te jyek ganuun men. 26Yeti jyek Caarayɛ, da pookɛn. Ɛkɛ a ɛŋ Abrahim waanɛ. Ɛkɛ a kɛɛngɔn bɛɛ. Ɔci ba jyek ɛkɛyɛ, bala ba jyek maka jyeti Juaŋti, maka a ma Urcaliim ñaalɔ pɔliji neeni. Ɛkɛ a mɛy ikin. Ɛkɛ a kɛɛngɔn bɛɛ. Ɔci ikin balkin ba ɛkɛ daŋkun. Ikin akin kɛɛnk bɛɛ. 27Acaan worga gɔki agi, “Dala i yomu ñɔya, hay, i ɛŋa kɛɛggɛ baawy! Dala i yaajja dɛɛrja te pwana tolan te yom ñɔɔno. I a mena dɛnni pɛñi jiedi kaci oŋgati bɛɛy! Acaan ɛŋa ‘uarɛ ati ɔntɔ te ɛkɛti neeniyɛ, ɛkɛ baltan kɛɛgin ne coŋɔn, ɔci ɛkɛ ɛŋa niin iki ‘uarɛ oŋkanda neeni bwandɛ ɛkɛ te kɛɛgin.” 28Modg ɔɔn, ikin aŋŋin kɛɛgin Jwaŋa Tolan ba jyeka naŋɛ Juaŋ yaakkɛn iki Abrahim te baaṭiy. Ɔci te naŋka neeniyɛ, ikin balkin ba Icaak. 29Ɔci te oŋŋa wannayɛ, mena jiedɛ ma ba naŋki ma baan budanyɛ, ɛkɛ bala noŋi ne yaayan kacca neeniti, gena kacca jiedɛ ma te Boŋ Juaŋy. Ɔci acca moki taab ikin bala a ɔɔn daŋkun. 30Jyek worga gɔki a ɔki te naŋka neeni? Worga gɔki agi, “Ɛŋa a kɛɛngɔn neeniyɛ, dala ɛkɛ oldɛ ɛkkɛ ɔntɔ iki kaci ɛkɛ a cyɛɛlɔ aŋka kaci ɛkɛ neeniyɛ, naa jyek ɛkɛ ñoodi i jyek kacca guaŋŋɛ weegɛn agi dala maal wiɛnda ɛkta neeni bɛɛ.” 31Ɔci a ɔŋŋiyɛ, ikin akin kɛɛgin mena kɛɛngɔn bɛɛ. Ikin akin kɛɛgin mena ciyi budan te kɛnjo.

will be added

X\