Galatiya 1

1Gena ‘ya Buuluc ñiep ɛkkɛ neeni. Çeejɛ ɛkkɛ ‘ya cuonna men baan gɛɛl bɛɛ. Gena Yaccu Kiṭɔ ‘ya cuonna ɔci Weegɛn Jwaŋa Tolan mena ɛkɛ jɔɔlnɛ ñaalɔ te lientiy. 2Ɔci modg ikin modga balgin iki ‘ya wɛnniyɛ, ɛkkɛn ñiepi ɛkkɛ daŋkun. Ɔɔn ñiepɔn ɛkkɛ ma kaniican ban Galatiya. 3Dala Jwaŋa Tolan Wey ikin ɔci Ciɛggɔn ikin Yaccu Kiṭɔ ɛkkɛ ‘wontɛ coodi pwanno, ɔci dala ɛkkɛn yomgɛn pwada a pwani ɛkkɛti moki. 4Yaccu a mena war ɛkɛ ‘wonnin ikin te nɔji ikin aŋka ɛkɛ yuoci ikin te ṭɛra ciyin ikin acca ṭɛra yaayan neeni. Ɛkɛ noŋi a ɔɔn ba yom Wey ikin Jwaŋa Tolan. 5Dala ma jieyi ɛkɛ yuonginda ɔɔn. Amɛɛn. 6’Ya yomu wiak ne ɛkkɛ waakɔ yalnɛ ɔntɔ ne pɛñan te Juaŋti mena ɛkkɛ muonɛ bora neeniy. Jwaŋa Tolan yomɛ pwad pwad ɛkkɛti ɔci ɛkkɛ muonɛ Juaŋ bora te yom pwani Kiṭɔ. Ɔci ɛkkɛ waakɔ yalnɛ ɔntɔ jyeka wonkɛn jyeka pookɛnti neeni. 7Jyeka pookɛn neeniyɛ, a jyeka wonkɛn jyeka pwadin awarɛ bɛɛ. Ma gɛɛg bala, ɔci ɛkkɛn buagɔn ɛkkɛ nuutɛ wyetkɔti ɔci ɛkkɛn jyek Kiṭɔ jyeka wonkɛn jyeka pwadin aktanyɔ aga jyeka jomgin budan ɛkkɛti. 8Kan men gɛɛl te ɔɔnti, walla kan a malɛɛka gɛɛl bɛɛn te ñaalɔ pɔliji ɔci lorti ɛkkɛ te jyeka pookɛn gɛɛg bala ba jyeka ɛkkɛ lalkɛ ɔɔn ñamu neeni bɛɛyɛ, dala ɛkɛ ḍardɛ Jwaŋa Tolan. 9’Ya gɔkka ɛkkɛti moki, kan men gɛɛl bɛɛn ɔci lorti ɛkkɛ te jyeka pookɛn gɛɛg bala ba jyeka muŋŋɛ ɛkkɛ ñamu neeni bɛɛyɛ, dala ɛkɛ ḍardɛ Jwaŋa Tolan. 10Ɛkkɛ poŋɛ gɔkɛ agi ‘ya buagata ma baan gɔktɔ agi ‘ya pwadjɔ? A’a, ‘ya buaga Juaŋ aŋka gɔkti agi ‘ya pwadjɔ. ‘Ya buaga ŋeetta ma baan ne coŋɔn? A’a. Te ‘ya baala potta noŋa aŋka ŋeetta ma ne coŋɔnyɛ, te ‘ya noŋ kanŋa Kiṭɔ ne pwadan bɛɛ. 11Modg ɔɔn, tieŋdɛ ne pwadan. Jyeka wonkɛn jyeka pwadin ɛkkɛ nɔɔnnin ‘ya neeni a jyek men baan gɛɛl budan bɛɛ. 12’Ya myenna men baan gɛɛl te jyeka wonkɛn jyeka pwadin neeni bɛɛ. Ɔci moki ‘ya lalka ma te jyeka wonkɛn neeni bɛɛ. Gena Yaccu Kiṭɔ aŋka ‘ya lɛɛrna jyeka wonkɛn neeni te naŋki ɛkɛy. 13Ɛkkɛ tieŋnɛ jyek naŋki ‘ya doki. Wona ‘ya aŋŋa cuuda Yaccu men bɛɛyɛ, ‘ya baal noŋ ba naŋki ma Icrayiil. ‘Ya baal noŋ ne yaayan ma kaniicati oŋkanda ne tolan, acaan ‘ya buaga dala jyek Yaccu baadi, ɔci maka booti ɛkɛti nogdi waakɛnda. 14Maka ‘uayi maka a ma ɔɔn ba ‘ya ɔɔnyɛ, ɛkkɛn buani ‘ya te mali ma Icrayiil a ḍiɛkan bɛɛ, acaan ‘ya waru byerŋa byerŋ te jyek naŋki yɔrg ikin yɔrga te baaṭi. 15Yeti ne ‘ya jiennata mɛy ɔɔn men bɛɛyɛ, ‘ya doki muona Jwaŋa Tolan bora te kanŋa ɛkɛ doki. Ɔci oŋ gɛɛltiyɛ, ɛkɛ ‘ya borna te yom pwani ɛkɛ ‘yati. 16Ɔci ‘ya lɛɛrna ɛkɛ Kaci ɛkɛ, ɔci ‘ya oŋ cuuñña ɛkɛ ati lor Keedin Pookɛn te Jyek Kiṭɔ oŋo. Ne ‘ya cuuññati Juaŋ a ɔɔnyɛ, ‘ya tooccan men gɛɛlti te jiek gɛɛg bɛɛ. 17Maka muonɛ Jwaŋa Tolan bora ñamu te ‘ya ŋeej ‘ya ne balki ban Urcaliimji ɔɔn. Yeti ‘ya ati aŋan aŋka myetta ɛkkɛn te jwali gɛɛl bɛɛ. Yeti ‘ya ati gena ban Arabya, ɔci ne baaṭi ‘ya dɔɔkkan dɔki ban Ḍimaackati. 18Ɔci ne yuonga ne ḍoogɔ bɛɛki borayɛ, ‘ya oŋ ati ban Urcaliimji, ḍieŋjan Butructi oŋo. Ɔɔn balgɔn iki ɛkɛ nink a inyaakkɛn om ne cyɛɛlɔ (15). 19Yeti Cuudan Yaccu makɛn pookɛnyɛ, ɛkkɛn yuarŋ ‘ya bɛɛ, gena Yaakub mod Yaccun aŋka yuarŋ ‘ya parɛy. 20Jyeka kiewan ‘ya ɛkkɛti neeniyɛ, a jyeka jomgin bɛɛ. Çeejɛ Juaŋ jyeka neeni a jyeka awarɛ. 21Ɔci ne baaṭi ‘ya oŋ ati ban Cuurya ɔci ban Ciliicya oŋo. 22Ɔci ma kaniican ban Yahuudiya, ɛkkɛn ‘ya yuarka te woŋgɛn bɛɛ. 23Ɛkkɛn tieŋŋin te jyetkɛn budan agi mena noŋɔ ne yaayan ɛkkɛnti te ñamuyɛ, agi ɛkta baalɔ loṭɔ ma te jyeka wonkɛn jyek Kiṭɔ jyeka ɛkta baalda nokta ma agi dala baadɔ te ñamuy. 24Ɔci ma bala jieyi Juaŋ te naŋka naŋŋɛ ɛkɛ ‘yati te akta ɛkɛ ‘ya aaŋŋati ñin pwanna neeni.

will be added

X\