Ɛpacac 6

1Kɛɛgin, dala ɛkkɛ noŋdɛ ba jyek weyi ɛkkɛ ɔci ba jyek mɛyi ɛkkɛ. Ɔci a ɔɔnyɛ, yɔmjin Jwaŋa Tolanti. 2Ne Juaŋ gɔŋni mati te ganuun jiña neeniyɛ, ɛkɛ jwali gɛɛl naŋɛ ɛkɛ iki ma doki te ganuun jiña neeni. Ganuun jiña neeni gɔki agi, “Kan ɛkkɛ tieŋdɛ jyek weyi ɛkkɛ ɔci jyek mɛyi ɛkkɛ te yoma pwadanyɛ, 3ɔci coodi ɛkkɛ pwada ɔci beya iñɔ baanji ṭɛɛrji wɛnni.” 4Hay, kɛɛgin weyyɛn, naa ɛkkɛ gɔkɛ kɛɛgin ɔɔrndɛ a ɔɔrŋin a ɔɔn aŋka ɛkkɛn loondi bɛɛ. Dala kɛɛgin ɛkkɛ laldɛ ɛkkɛ ne pwadan, ɔci dala ɛkkɛn ṭeedɛ ɛkkɛ ne pwadan aŋka ɛkkɛn bootti Ciɛggɔn ikinti. 5Maka kɛɛnko, dala ɛkkɛ woŋgɔ tiittɛ te jyek kanŋa weyyɛn iñɔ ṭɛɛrji wɛnni ne pwadan. Dala ɛkkɛ kandɛ te yoma pwadan kanŋa weyyɛnti, ɔci dala ɛkkɛ buattɛ ɛkkɛn. Ne ɛkkɛ balgɛ noŋɛ kanŋa neeniyɛ, dala ɛkkɛ poŋdɛ kanŋa neeni a kanŋa Kiṭɔ. 6Acaan ɛkkɛ agɛ kɛɛnk Kiṭɔyɛ, naa ɛkkɛ noŋɛ kanŋa ne pwadan te kanŋa weyyɛn ñingɛnti budan bɛɛ, ne ɛkkɛ noŋdɛ a ɔɔn te ma ñingɛnyɛ, ɛkkɛ buagɛ dala ma jieyi ɛkkɛ. Dala ɛkkɛ daŋkun kandɛ ne pwadan ne kanŋa weyyɛn baaki daŋkuny. Kan ɛkkɛ noŋdɛ a ɔɔn te yoma pwadanyɛ, ɛkkɛ yaaktɛti noŋdɛ ba naŋka Juaŋ buagɛy. 7Dala kanŋa ɛkkɛ naŋdɛ waakɛnda te yoma pwadan. Dala ɛkkɛ kanŋa neeni naŋdɛ Juaŋti, naa naŋdɛ ɛkkɛ ma baanti budan bɛɛ. 8Dala ŋeeddɛ ɛkkɛ kan men gɛɛl a kɛɛngɔn walla kan a kɛɛngɔn bɛɛyɛ, waka naŋŋɛ ɛkɛ ne pwadan wannayɛ, etti waka pwadin ne baaṭi te Ciɛggɔn ikinti. 9Hay! Kanŋa weyyɛn, dala ɛkkɛ yomgɔ pwaddi kɛɛnk ɛkkɛti daŋkun. Naa ɛkkɛ ɔɔrŋɛ kɛɛnk ɛkkɛ waakɛn a ɔɔrŋin te jyeka yeyin neeni bɛɛ. Naa ɛkkɛ woŋgɔ yeya te jyeka neeni bɛɛ. Wey ɛkkɛ Weya ñaalɔ pɔlijiyɛ, ɛkɛ a Wey ɛkkɛ waakida i kɛɛnk ɛkkɛ. Ɛkɛ a mena kɛɛb ma jitkɛn bɛɛ. 10Jwali ṭɔɔlɛ gɛɛl bala moki ne cyɛɛlɔ. Acaan ɛkkɛ balgɛ Jwaŋa Tolantiyɛ, dala war tɛɛn ɛkɛ bala ɛkkɛti oŋkanda, acaan war tɛɛn ɛkɛ neeniyɛ, tol tol ɔci tɛɛna tɛɛno. 11Ne lañ baaliyɛ, ma ɛŋi wak laño. Ɔci ɛkkɛ daŋkun, dala ɛkkɛ noŋdɛ naŋki Juaŋ aŋka ne ɛkkɛ noogdɛ iki Jwaŋa Yaayan daŋkunyɛ, ɔci ɛkkɛ yɔɔddɛ ne tɛyan. Ɔci a ɔɔnyɛ, ɛkkɛ ḍɛɛmdɛ iñɔ te naŋka naŋdɛ ɛkɛ te ñing tɛɛn ɛkɛ neeni bɛɛ. 12Ikin noowin iki ma baan bɛɛ. Ikin noowin iki jɔkin yeyin pɔɔldinji, ɔci ikin noowin i jɔkin yeyin i Jwaŋa Yaayan mena etti naŋka yeyin iñɔ ṭɛɛrji wɛnni neeni. 13Acaan a ɔŋŋiyɛ, dala ɛkkɛ noŋdɛ ba naŋki Juaŋ waakɛnda aŋka ne oŋŋa jiek yiekti ɛkkɛtiyɛ, ɛkkɛ yɔɔddɛ ne tɛyan. Ɔci ne lañ baali toliyɛ, ɛkkɛ yooŋdɛ ɔntɔ bɛɛ. Ɛkkɛ yɔɔttɛ iñɔ ne tɛyan ɔɔn. 14’Ya gɔk ɛkkɛti dala ɛkkɛ yɔɔddɛ ne tɛyan te ŋeejin ɛkkɛ Juaŋ ŋeejɛ ba mena warɛ ywaŋŋɛ buagɔn noŋi ṭwaŋy. Dala ɛkkɛ baltɛ yoma pwadan. Yoma pwadan neeniyɛ, bala ba buarñan ḍyɛktan ma korkɛnti ne ma nookiy. 15Dala ɛkkɛ baltɛ yoma buagɔn mieti ma te jyeka wonkɛn jyeka pwadin neeni. Gena jyek coodda pwadan. Ɔci ba jyek yoma buagɔn miti ma neeniyɛ, bala ba mena ɛŋi wɛyi ṭwaŋ ciegɛtiy. 16Dala jyeni ɛkkɛ tiektɛ ne tɛyan oŋkanda bala ba kɔɔrña eetan ma ṭwaŋti aŋka dooŋɛ ɛkkɛ jyek Jwaŋa Yaayan jyeka bala ba cowwa tuggɛn bitin cowwa noki ɛkkɛy. 17Dala ɛkkɛ baltɛ yɔɔt Juaŋ yɔɔta yuoci ɛkkɛy. Ɔci jyek yɔɔt neeniyɛ, bala ba jyek taaggan ‘yɛŋtan ma a taaggan ṭwaŋy. Dala ɛkkɛ jyek Juaŋ jyeka ikin ‘wonninti Boŋ Juaŋ neeni ŋeeddɛ. Ɔci jwali Juaŋ neeni bala ba byeŋgaaran ikinti. 18Dala ɛkkɛ cɔkɛ oŋkanda ɔɔn. Naa ɛkkɛ woodɛ bɛɛ. Dala ɛkkɛ toottɛ aŋka dala Juaŋ ɛkkɛ magdɛ, cɔktɛ ɛkɛti te wɔɔkan waakɛnda ne ɛkkɛ wɛɛdɛ Boŋ Juaŋy. Acaan a ɔɔnyɛ, dala ɛkkɛ yɔɔddɛ ne tɛyan, naa togdɛ bɛɛ, dala cɔktɛ oŋkanda te Ma Kiṭɔ waakɛnda. 19Dala ɛkkɛ cɔktɛ Juaŋti te ‘ya daŋkun. Ne ‘ya tuku pɔkta gɔkta mati loṭa mayɛ, dala Juaŋ ‘ya ‘wonda jyeka pwadin tukuti aŋka ‘ya yaaktati gɔkca mati ne pwadan te jyeka jitkɛn a coggin mati te baaṭi jyeka lɛɛlnɛ Juaŋ bora a jyeka wonkɛn jyeka pwadin neeni. 20’Ya a cuuda Yaccu ec jyek ɛkɛ mati, ɔci acca ‘ya ḍɛɛkka ma te jiŋgin te jyek ɛkɛ. Dala ɛkkɛ cɔktɛ Juaŋti te ‘ya aŋka ne ‘ya gɔkta matiyɛ, naa ‘ya buay genga bɛɛ. Dala ‘ya gɔkca mati te yoma tɛyan, ɔci a ɔɔnyɛ, yɔmjin. 21Ɛkkɛ buagɛ ‘ya ŋeeddata ne ‘ya baala ciya a ɔkiy, ɔci ne ‘ya baala noŋa a ɔkiy. Ticcikoc, ɛkɛ a mena anki may, ɔci ɛkɛ bala tieci kanŋa Juaŋ warɛ ne pwadan. Ɛkkɛ nɔɔttɛ ɛkɛ te coodi ‘ya waakɛnda. 22’Ya ɛkɛ cuoñña ɛkkɛti, ɔci dala ɛkkɛ myettɛ ɛkɛ te jyek ɔɔn, ɔci dala ɛkkɛ yomgɔ ñɔya ɔci yomgɔ tɛya. 23Modg ikin waakɛndayɛ, dala ɛkkɛn ‘wondɛ Juaŋ coodda pwadan. Ɔci anna Juaŋ ani mayɛ, dala oldɛ ɛkɛ ɛkkɛn yomgɛnti daŋkun. Ɔci dala Juaŋ ɛkkɛn ‘wondɛ jyek jyeni daŋkun. Dala waka neeni bɛya mati te Wey ikin Juaŋti, ɔci te Ciɛggɔn ikin Yaccu Kiṭɔti moki. 24Maka ani Ciɛggɔn ikin Yaccu Kiṭɔ ne pwadan oŋkandayɛ, dala Juaŋ yomɛ pwada a pwani ɛkkɛnti waakɛnda.

will be added

X\