Ɛpacac 5

1Dala ɛkkɛ lɔktɛ ba naŋki Jwaŋa Tolan acaan ɛkkɛ agɛ kɛɛgin ɛkɛ, ɔci ɛkɛ ani ɛkkɛ ne tolan. 2Kiṭɔ ani ikin ne tolan aŋka ɛkɛ tuuni te nɔji ikin, ɔci baalli ba gena ‘yɛri ma pwadan Juaŋti neeni. Ɔci dala anna ɛkkɛ oondi yɔtin bala a ɔɔn daŋkun. 3Acaan ɛkkɛ agɛ Ma Kiṭɔyɛ, naa jiek bɛya te bora ɛkkɛti agi ɛkkɛ baljɛ noŋjɛ tomi a ɔɔn bɛɛ, ɔci walla naa jiek bɛya ɛkkɛti agi ɛkkɛ anjɛ wak maka pookcɛn bɛɛ. Ɔci kan jyek naŋka neeni bɛya Ma Kiṭɔti bɛɛyɛ, a ɔɔn yɔmjin. 4Naa ɛkkɛ jyeyɛ te jyek wɛlji ɔci te jyeka yeyin bɛɛ. Ɔci moki naa ɛkkɛ juolɛ jyeka yeyin bɛɛ. Jyeka neeniyɛ, yɔmjin Ma Kiṭɔti bɛɛ. Yeti dala ɛkkɛ gɔktɛ agi pwatcin Juaŋti oŋkanda. 5Acaan ŋeejɛ ɛkkɛ maka noŋi tomi ɔci maka poŋi jyeka yeyin, ɔci maka ani wak maka pookɛnyɛ, non ɛkkɛn baaw ban Kiṭɔ i ban Juaŋo. Jyek ani wak maka pookɛnyɛ, ɛkkɛn bala ba jyek mali jɔkin yeyin ɔɔn daŋkun. 6Naa ɛkkɛ naŋtɛ ma ñin te jyeka budan neeni bɛɛ. Te naŋka yeyin neeniyɛ, ywobji Juaŋ bɛya mati. Gena maka tuoci waakɛn te jyek ɛkɛy. 7Naa ɛkkɛ ñoodɛ iki ɛkkɛn bɛɛ. 8Te ñamu ɛkkɛ balgɛ ciyɛ te nona mielo, yeti acca ɛkkɛ aŋŋɛ yoŋŋa ne cyɛɛlɔ iki Yaccu, ɔci ɛkkɛ balgɛ nona bɔwanti acca. Dala ɛkkɛ ciyɛ ne pwadan ba maka ciyi te nona bɔwany. 9Naŋka bɛya te nona bɔwantiyɛ, gena naŋka pwadan ɔci naŋka awarɛ. 10Te ñamu dala ɛkkɛ poŋdɛ ne pwadan, ɔci kan naŋki ɛkkɛ pwad pwad Ciɛggɔn ikintiyɛ, dala ɛkkɛ oŋ noŋdɛ oŋo. Kan naŋka neeni pwatcin bɛɛyɛ, naa noŋdɛ bɛɛ. 11Naŋka naŋtan maka ciyi te nona ulanti menyɛ, etti jyeka pwadin bɛɛ. Ɔci naa ɛkkɛ ñoodɛ iki ɛkkɛn te naŋka neeni bɛɛ. Dala ɛkkɛ aŋka gɔktɛ ɛkkɛnti, ɛkkɛn ṭeedɛ te naŋki ɛkkɛn. 12Acaan naŋka naŋtan ɛkkɛn lieda neeniyɛ, yaayɛ ne tolan. A ɔɔnyɛ, bala ba ‘ya gɔkta jyek naŋki ɛkkɛn neeni ‘ya tukuti bɛɛ. 13Naŋki waakɛndayɛ, kan eetan ma bora nona bɔwantiyɛ, ɔci ŋeettan ma ne kan naŋki pwadɔy. Kan noon bɔw bɔwyɛ, ma yaakinti naŋka yeyin neeni coktan iñɔ moki bɛɛ. Acaan ne nona bɔwan dɛkti nona ulantiyɛ, ɔci nona ulan neeni baadi doki. 14Ɔci a ɔŋŋiyɛ, bala ba jwalla gɔki agi, “Mena wici, i ṭiewa, hay! Mena tuuta, i jɔlla ñaalɔ, ɔci Kiṭɔ i dyɛgdi.” 15Dala ɛkkɛ woŋgɔ tiittɛ te coodi ɛkkɛ. Naa ɛkkɛ ciyɛ ba maka jiek kwoyɔn noŋi amaam budan ɔɔn bɛɛ. Dala ɛkkɛ ciyɛ ba maka ñingɛn tɛyan. 16Dala ɛkkɛ tiecɛ oŋki ɛkkɛ waakɛn ne pwadan acaan nɔji tol tol mati. 17Naa ɛkkɛ noŋɛ ba maka jiek kwoyɔn bɛɛ. Dala yom Juaŋ ŋeeddɛ ɛkkɛ ne pwadan. 18Naa ɛkkɛ noktɛ mooy bɛɛ. Acaan nooŋi mooyyɛ, ɛkkɛn ɛkkɛ yaatɛ. Dala ɛkkɛ yomgɔ aŋka kuma te gena Boŋ Jwaŋa Tolan oŋkanda. 19Ne ɛkkɛ coottɛ iñɔ a cyɛɛlɔyɛ, dala ɛkkɛ jyeyɛ te ɔɔlga ɛkkɛ laldɛ Boŋ Juaŋy, ɔci dala ɛkkɛ ‘ualɛ Juaŋti moki te yomg ɛkkɛ. 20Ɔci oŋkandayɛ, dala ɛkkɛ gɔktɛ a pwatcin Wey ikin Juaŋti te yenti Ciɛggɔn ikin Yaccu Kiṭɔ te waak waakɛnda. 21Dala ɛkkɛ tieŋdɛ jyek modg ɛkkɛ acaan ɛkkɛ waakida noŋɛ ne pwadan Yaccu Kiṭɔti. 22Moongo, dala ɛkkɛ tieŋdɛ jyek ‘uay ɛkkɛ bala ba bolja ɛkkɛ tieŋdɛ jyek Ciɛggɔn ikiny. 23Maka ‘uayyɛ, ɛkkɛn a wyetk maka moong bala ba Kiṭɔ ɛkɛ a wyeñ ma kaniica. Ma kaniicayɛ, ɛkkɛn a war Kiṭɔ, ɔci Kiṭɔyɛ, ɛkɛ a Mena Yuoci Ma kaniica. 24Ɔci ba bolja ma kaniica tyeŋki jyek Kiṭɔ oŋkanda neeniyɛ, dala moong tieŋdi jyek ‘uay ɛkkɛn oŋkanda daŋkun. 25Ɛkkɛ, maka ‘uayo, dala ɛkkɛ anɛ moong ɛkkɛ ne tolan bala ba bolja Kiṭɔ ani ma kaniica, ɔci ɛkɛ tuuni te ɛkkɛny. 26Yaccu tuun te ma kaniica aŋka ɛkkɛn yomgɛn pwaddi te nɔji ne ɛkkɛn bultɛti may. Ɔci jyek Jwaŋa Tolan neeni ɛkkɛn naŋtan pwaddi Jwaŋa Tolan ñamɛti. 27Ɛkɛ noŋi a ɔɔn acaan ɛkɛ buagɔn dala ma kaniica pwada ɛkɛ ñingɛti ne tolan. Dala ɛkkɛn bala ba mena ɛŋi bworŋin pwadin, bworŋin giikkɛn baawy. A ɔŋŋiyɛ, Kiṭɔ buagɔn naa gena yaayan gɛɛl bala kaniica ɛkɛti bɛɛ. 28A ɔŋŋiyɛ, dala maka ‘uayyɛ, ɛkkɛn ani moong ɛkkɛn ba ne ɛkkɛn anki waak ɛkkɛn ɔɔn. Kan menga ani ɛŋ ɛkɛyɛ, a ɔɔn bala ba ɛkɛ ani war ɛkɛ daŋkun. 29Men gɛɛl yookɔn te war ɛkɛ boki? Hayɛllɛ! Men gɛɛl yookɔn te war ɛkɛ bɛɛ. Ɛkɛ gɔṭi kon ɛkɛ oŋkanda ne pwadan te waka amdɛ ɛkɛ. Ɛkɛ gɔṭi war ɛkɛ ne pwadan oŋkanda bala ba ne Kiṭɔ gɔṭi kaniica ɛkɛ oŋkanda ɔɔn, 30acaan ikin akin war ɛkɛ. 31Jyeka kiigin gɔki agi, “A ɔŋŋiyɛ, ne mena kaalgɔn ḍɛɛdi ɛɛŋyɛ, ɛkɛ on weegɛn ɔci mɛɛgɛn daldɛ, ɔci ɛkɛ ciyi iki ɛŋ ɛkɛ oŋkanda ɔɔn. Ɔci ɛkkɛn ñoowin yaakkɛn doki. A ɔŋŋiyɛ, ɛkkɛn aŋi ba mena ne cyɛɛlɔ doki, a yyɛɛwɔ moki bɛɛ.” 32Jwalla neeniyɛ, gɔki te mena ‘uan i ɛŋ ɛkɛ. Ɔci jwalla neeniyɛ, kon ɛkɛ ɛka parɛ bala moki. ‘Ya gɔk ka gena jyek ñoowin Kiṭɔ i kaniica ɛkɛ. 33Ɛkkɛyɛ, dala maka ‘uay ani moong ɛkkɛn ba ne ɛkkɛn anki waak ɛkkɛn ɔɔn. Ɔci moongyɛ, dala ɛkkɛn tieŋdi jyek ‘uay ɛkkɛn te yoma pwadan.

will be added

X\