Ɛpacac 4

1Gena ‘ya a mena olji ma ciginji te jyek Ciɛggɔn ikin Yaccu Kiṭɔy. ‘Ya ṭey ɛkkɛ ka dala ɛkkɛ ciedɛ ne pwadan acaan ɛkkɛ muonɛ Juaŋ bora. 2Dala ɛkkɛ yomgɔ ḍyɛrdi. Dala ɛkkɛ yomgɔ pwaddi mati oŋkanda ɔɔn. Ɔci dala ɛkkɛ loomgɔ tɛya. Ɔci dala ɛkkɛ bɔyyɛ yɔtin pookɔ ne ɛkkɛ oonni yɔtin pookɔy. 3Ɛkkɛ agɛ maka ne cyɛɛlɔ te Boŋ Juaŋ Boŋa ɛkkɛ noŋnɛ ŋɛyy. A ɔŋŋiyɛ, dala ɛkkɛ ŋeewin ɛkkɛ ŋeenɛ, ɔci ñoonɛ neeni tiidɛ ñin oŋkanda ɔɔn. 4Ɛkkɛ agɛ yoŋŋa ne cyɛɛlɔ. Ɔci Boŋ Juaŋ a Boŋa ne cyɛɛlɔ moki. Ɛkkɛ muonɛ bora Jwaŋa Tolan ne cyɛɛlɔ parɛ, ɔci ɛkkɛ jyettɛ kɛɛyɛ naŋka ne cyɛɛlɔ daŋkun. 5Ɛkkɛ balkɛ Ciɛggɔn ne cyɛɛlɔ, ɔci jyenna ne cyɛɛlɔ, ɔci bulta ne cyɛɛlɔ. 6Jwaŋ ɛkkɛ a Jwaŋa ne cyɛɛlɔ, ɔci ɛkɛ a Wey ikin waakida. Waak waakɛnda buannɛ ɛkɛ, ɔci ɛkɛ kanŋan waakti waakɛnda, ɔci ɛkɛ ciyi waak jitin waakɛnda. 7Juaŋ yomɛ pwad pwad ikinti waakida. Ikin ‘wonnin Kiṭɔ naŋka pwadin waakida te yom ɛkɛ parɛ. Ɔci naŋka ikin ‘wonninti Kiṭɔ pwadin neeniyɛ, a naŋka ne cyɛɛlɔ bɛɛ. Ikin ‘wonnin ɛkɛ naŋko, ɔci menga da te naŋki ɛkɛ, ɔci menga da te naŋki ɛkɛ. 8Jyeka neeni bala ba jyeka kiigin ne gɔkki agi, “Ne ɛkɛ atti ñaalɔ pɔlijiyɛ, ɛkɛ ma gɛɛg yaallɛ eññɛ bieŋɛti, ɔci ɛkɛ ma baan ‘wonnɛ waak te yom ɛkɛ budan.” 9Ne worga gɔki agi, “Kiṭɔ atti ñaalɔ pɔlijiyɛ,” a ɔɔnyɛ, bala ba worga gɔki te bɛɛna ɛkɛ bɛɛni te ñaalɔ, bɛɛni iñɔ wɛnni ṭɛɛrjiy. 10Yaccu neeni bɛɛn iñɔ, ɔci ɛkɛ moki ati ñaalɔ nona loonan pɔlijiy. Ɛkɛ noŋi a ɔɔn aŋka noon warda kuma te ɛkɛ te iñɔ wɛnni ne nona loonan ñaalɔ ɔɔn. 11Ikin ‘wonnin ɛkɛ naŋki ɛkɛ budan. Ɔci naŋka neeni waakɛnda bala bolja ne cyɛɛlɔ bɛɛ. Ma gɛɛg ikinti a cuudan Juaŋ eci jyek ɛkɛ. Ɔci ma gɛɛg naŋŋɛ ɛkɛ a bɔwan. Ɔci ma gɛɛg naŋŋɛ ɛkɛ aŋi maka booti baan konɛ loṭi ma te jyek ɛkɛ. Ɔci ma gɛɛg naŋŋɛ ɛkɛ a gaciicin. Ɔci ma gɛɛg naŋŋɛ ɛkɛ aŋi maka loṭi may. 12Acaan ikin agen war Yaccuyɛ, Juaŋ men da ‘woñgi kanŋa ɛkɛ, ɔci men da ‘woñgi kanŋa ɛkɛ aŋka ɛkkɛn Ma Kiṭɔ maktan ne pwadan te jiek waakɛnda, ɔci ɛkɛ buagɔn aŋka Ma Kiṭɔ kooptan ñaalɔ. 13A ɔŋŋiyɛ, ikin maktin Juaŋ te naŋki ikin neeni oŋkanda, acaan Jwaŋa Tolan buagɔn dala ikin aktin maka ne cyɛɛlɔ te jyenna ikin jyettin Yaccuti, ɔci te ŋeejjin ikin Kaci Jwaŋa Tolan ŋeennin ne pwadan neeniy. Acaan ɛkɛ buagɔn dala ikin baltin waak waakɛnda yomgɔti waakida, ɔci ‘uottin ñamu, ɔci ikin baltin ba Yaccu ɔɔn. 14Ɔci kan ikin balkin a ɔɔnyɛ, ikin balkin ba kɛɛgin moki bɛɛ. Ɔci kan jyeka laltan ma a jomgin gɛɛg bɛya ikintiyɛ, ikin balkin ba waka peedɛ jwami budan bɛɛ. Pɔya ikin yɔɔttin ne tɛyan bala doki. Ɔci maka ñingɛn tɛyan te naŋki ma ñingɛnyɛ, kan ɛkkɛn buagɔn noŋdi a ɔɔn ikintiyɛ, ɛkkɛn yaakinti noŋdi genga ikinti bɛɛ. 15Jwaŋa Tolan buagɔn dala ikin waakida gɔktin jyeka awarɛ te yoma pwadan. Dala ikin ‘uottin ñamu aŋka baltin ba Kiṭɔ te naŋki waakɛnda, ɛkɛ a wyeñ ikin. 16Ma Kiṭɔ waakɛndayɛ, ɛkkɛn i Kiṭɔyɛ, ɛkkɛn a wara ne cyɛɛlɔ. Ɔci Kiṭɔyɛ, ɛkɛ a wyeñ ikin, ɔci ɛkɛ a mena ikin naŋtin ciyin ne pwadan ba maka ne cyɛɛlɔy, ɔci ɛkɛ ikin naŋtin kantin ne pwadan waakida aŋka ikin balkin ba wara baaki waja ɔci tɛyany. Ɔci a ɔŋŋiyɛ, kan menga da te kanŋa ɛkɛ, ɔci menga da te kanŋa ɛkɛyɛ, ikin ‘uottin ñamu te jyek oonnin yɔtin. 17Tieŋdɛ jyeka guagdi ‘ya ɛkkɛti neeni. ‘Ya gɔk ɛkkɛti te yenti Ciɛggɔn ikin, ka dala ɛkkɛ mwondɛ te naŋki maka ciyi budan te jyek Juaŋo. Dala ɛkkɛ paŋŋa paŋtan ɛkkɛn a paŋŋa budan neeni daldɛ. 18Acaan ɛkkɛn yaakinti poŋi jiek jitkɛn ne pwadan bɛɛ. Ɛkkɛn balki tɛɛtin Jwaŋa Tolan bɛɛ. Ɛkkɛn ciyi budan amaamo. Ɛkkɛn wyetkɛn tɛy tɛy aŋka tɛɛtin Juaŋ baawi ɛkkɛnti neeni. 19Ɛkkɛn yaakinti poŋi te jyek naŋka naŋtan ɛkkɛn, walla balkɛ lɔɔn moki bɛɛ. Ɛkkɛn poŋi te gena jyek naŋki tomi budan. Ɛkkɛn naŋki tomi gɛɛl dalji bɛɛ. Ɛkkɛn noŋi naŋka yeyin jitkɛn waakɛnda. 20Ne ɛkkɛ tieŋnɛ jyek Kiṭɔyɛ, jyeka neeni bala ba jyeka neeni boki? Hayɛllɛ! 21Çeej ‘ya ɛkkɛ tieŋnɛ te naŋki Yaccu doki, ɔci ɛkkɛ balgɛ Yaccuti doki, ɔci ɛkkɛ lalkɛ ma te jyek Yaccu jyeka awarɛ neeni. 22Jyek ɛkɛ neeni gɔki agi dala ɛkkɛ mwonjɛ te yom ɛkkɛ yoma te baaṭi yoma ɛkkɛ oldɛ noŋɛ ba naŋki ɛkkɛ naŋka te baaṭiy. Yom ɛkkɛ yoma a daan neeni ɛkɛ buagɔn waka coŋin amaam budan, ɔci waka coŋin neeniyɛ, yomg ɛkkɛ maaltan ɔci yaatan ɛkkɛn. 23Dala ɛkkɛ daŋkun ooktɛ yomga wonkɛn, ɔci wyetka wonkɛn naŋŋɛ Juaŋ ba yom ɛkɛ ɔɔn. Kan ɛkkɛ noŋdɛ a ɔɔnyɛ, ɛkkɛ baldɛ ba Juaŋo, ɔci ɛkkɛ noŋdɛ ba jyek ɛkɛ jyeka awarɛ neeni te naŋka pwadin naŋka ɛkɛ buagɛy. 25A ɔŋŋiyɛ, dala ɛkkɛ mwondɛ te jomi jieko. Dala ɛkkɛ gɔgdɛ yɔtin te jyeka awarɛ oŋkanda, acaan ikin waakidayɛ, ikin akin yoŋŋa ne cyɛɛlɔ. 26Kan ɛkkɛ looñi te gengayɛ, naa loñka neeni etti nɔji ɛkkɛ yomgɔti bɛɛ. Ɔci naa loñka neeni ḍuadɛ yomgɔti oŋkanda ɔɔn bɛɛ. Dala baadi ne noon men bɔwi ɔɔn. 27Naa Jwaŋa Yaayan pɔktɛ pɔy aŋka ɛkkɛ pɔɔdɛ yomgɔti te loñk ɛkkɛ neeni bɛɛ. 28Mena bala koṭi waakyɛ, dala ɛkɛ mwondi te kali waako. Ɔci dala ɛkɛ noŋdi kanŋa pwadan te byeŋ ɛkɛ. Dala ɛkɛ balki waak te kanŋa naŋŋɛ ɛkɛ te byeŋ ɛkɛ aŋka dala ɛkɛ moki maka anin daŋkun. 29Naa ɛkkɛ gɔktɛ jyeka yeyin oŋgati bɛɛ. Dala ɛkkɛ gɔktɛ jyeka pwadan jyeka ma kooptan ñaalɔ aŋka maka neeni maktan jyek ɛkkɛ neeni. 30Naa ɛkkɛ noŋɛ naŋka yaayan aŋka Boŋ Juaŋ yomɛ wiak a ɔɔn bɛɛ. Acaan Boŋ Juaŋ ɛkkɛ yomgɔti neeni bala ba mañ Juaŋo. Ɔci maka balki mañ Juaŋ te Boŋ ɛkɛ te wanna ɛkkɛn wannɛ Juaŋ neeniyɛ, cwamdi ɛkɛ ne baaṭi. 31Dala ɛkkɛ mwondɛ te yom yoño, ɔci te ywobjo, ɔci moki te loñka budan, ɔci moki te wɛyyin, ɔci moki te lomi jieko. Ɔci naa jwalla yaayan gɛɛl daldɛ niin ɛkkɛ yomgɔti bɛɛ. 32Dala ɛkkɛ moowɛ yɔtin pookɔ. Dala ɛkkɛ yomgɔ bala mati moki, ɔci dala ɛkkɛ bɔyyɛ yɔtin pookɔ daŋkun bala ba bɔɔkin ɛkkɛ bɔɔŋnɛ Juaŋ te naŋki Yaccu Kiṭɔ neeni.

will be added

X\