Ɛpacac 3

1Gena ‘ya Buuluc mena olji ma ciginji te ɛkkɛ Keedin Pookɛn ne ‘ya baala mieta ɛkkɛ te jyek Yaccu Kiṭɔy. 2Ɛkkɛ tieŋnɛ ne ‘ya naŋŋata Juaŋ aŋŋa mena moki ɛkkɛ te yom pwani ɛkɛ parɛ boki? 3Ɛkkɛ kieŋnin ‘ya jiek gɛɛg doki te naŋki Jwaŋa Tolan ne ɛkɛ ‘ya lɛɛrnati jyek Yaccu jyeka coggin te ñamuy. Ɛkkɛn oonɛ Juaŋ bora ‘yati. 4Ɔci ne ɛkkɛ poktɛ jyeka kiewan ‘ya ɛkkɛti te ñamu neeniyɛ, ŋeeddɛ ɛkkɛ ne pwadan jyek Kiṭɔ jyeka coggin te ñamuyɛ, jitkɛn ŋeej ‘ya ne pwadan. 5Yɔrg ikinyɛ, jyek Yaccu Kiṭɔ ŋeecin ɛkkɛn ne pwadan bɛɛ. Yeti acca jiek oonɛ Boŋ Jwaŋa Tolan bora ma ɛkɛti. Gena Cuudan Yaccu ɔci bɔwan Jwaŋa Tolan maka yomgɛn bala Juaŋti ne pwadany. 6Jyeka coggin oonɛ Boŋ Juaŋ bora neeniyɛ, gena jyek ñoowin ma yahuud iki Keedin Pookɛn te jyeka wonkɛn jyeka pwadin neeni. Jyeka neeni gɔki agi waka ‘wondɛ Juaŋ ma yahuudyɛ, ɛkkɛn ‘wondɛ Juaŋ Keedin Pookɛn daŋkun, ɔci ɛkkɛn aŋi yoŋŋa ne cyɛɛlɔ. Ɔci jyeka guaŋŋɛ Juaŋ ma yahuudti te Yaccu Kiṭɔyɛ, aŋi jyek Keedin Pookɛn daŋkun. 7’Ya naŋŋa Jwaŋa Tolan aŋi mena mieti ma te jyeka wonkɛn jyeka pwadin neeni. ‘Ya ‘wonna Juaŋ kanŋa neeni te yom pwani ɛkɛ, ɔci ɛkɛ bala kanŋan ne tolan ‘yati te war tɛɛn ɛkɛ. 8’Ya a mena ḍiɛran te Ma Kiṭɔ waakɛnda, yeti ‘ya ‘wonna Jwaŋa Tolan kanŋa ɛkɛ te yom pwani ɛkɛ aŋka ‘ya miet Keedin Pookɛn te jyeka wonkɛn jyeka pwadin neeni te Yaccu Kiṭɔ. Ɔci jyeka neeni bala ba mala ma ‘wondɛ Juaŋ a mala tolany. 9Juaŋ buagɔn ‘ya ma myetka jiek jitkɛn waakɛnda agi ɛkɛ jyeka neeni cɔmdɛ bora a ɔki. Te ñamu jyeka neeni a coggin yuonginda ɔɔn, ɔci jyeka neeni bala aŋa Juaŋti mena oki waak waakɛnda neeni parɛ. 10Ɔci acca jyek yɔɔta ma yɔɔdɛ Juaŋ bɛɛn bora doki, ɔci ñing tɛɛn Juaŋ ñing tɛɛn tolan ŋeecin malɛɛkan ñaalɔ pɔliji, ɔci boŋko, ɔci jɔkin waakɛnda. Ñing tɛɛn Juaŋ neeni yuarɛ ɛkkɛn ne Juaŋ noŋi naŋki ɛkɛ ma kaniicatiy. 11Jwaŋa Tolan balki jyek naŋka neeni yomɛti te baaṭi doki ne ṭɛɛr men baawiy. Ɔci ne Yaccu Kiṭɔ Ciɛggɔn ikin neeni bɛɛni dokiyɛ, Juaŋ jyeka neeni naŋŋɛ ba jyeka ḍuaññɛ ɛkɛ dokiy. 12Ɔci ne ikin balkin Yaccuti te jyenna ikin jyettin ɛkɛti neeniyɛ, ikin yaakinti ortinti Jwaŋa Tolanti ne pwadan. Ikin buayin genga bɛɛ. 13Ɔci a ɔŋŋiyɛ, ‘ya gɔkka ɛkkɛti ka naa ɛkkɛ yomgɔ tuwa te taab bala ‘yati neeni bɛɛ. Taab ‘ya neeniyɛ, etti naŋka pwadan ɛkkɛti. 14Ne ‘ya baala poŋa jyek naŋka naŋŋɛ Jwaŋa Tolan pwadan neeniyɛ, gɔ ‘ya moki ḍwoñji iñɔ morci Wey ɔɔn ñamɛti ɔɔn. 15Ɛkɛ a mena ‘woñi ma waakɛnda te yenti ɛkɛ ñaalɔ pɔliji ɔci iñɔ ṭɛɛrji wɛnni. 16Ɔci ‘ya cɔk Juaŋti ka dala ɛkkɛ ‘wondɛ ɛkɛ war tɛɛn ɛkɛ ɛkkɛ yomgɔti te Boŋ ɛkɛ, te pwani ɛkɛ pwanna tolan neeniti acaan Jwaŋa Tolanyɛ, ɛkɛ tɛɛna tɛɛno. 17’Ya cɔk Juaŋti ka dala ɛkkɛ yomgɔ aga nona ciyi Kiṭɔ oŋkanda te jyenna ɛkkɛ jyettɛ ɛkɛti neeni. Dala ɛkkɛ waakɔ tiittɛti jyek oonnin ma oonki yɔtin ŋeeddɛ ɛkkɛ ne pwadan 18aŋka ɛkkɛ yɔɔdɛ ne tɛyan. Ɔci a ɔŋŋiyɛ, ŋeeddɛ ɛkkɛ i Ma Kiṭɔ waakɛnda anna Kiṭɔ ani ɛkkɛ tol tol bala a ɔki. 19Anna neeniyɛ, tol tolo. Mena anna neeni ŋeejɛ warda ne pwadanyɛ, gɔ bala bɛɛ. Yeti ‘ya aŋka baal cɔk Juaŋti aŋka ŋeeddɛ ɛkkɛ. Ɔci dala ɛkkɛ yomgɔ kuma ne tolan te Jwaŋa Tolan. 20’Ya jiey Jwaŋa Tolan mena noŋi naŋka tɛyan ikin yomgɔti te war tɛɛn ɛkɛ neeni. ‘Ya jiey ɛkɛ a ɔɔn acaan ɛkɛ yaakinti noŋi naŋka tɛyan neeni ne tolan nɔñji, ɔci naŋki ɛkɛ neeni ‘uottiti ɛkɛ parɛ ba bolja ikin yaakinti paŋtin bɛɛy. 21Dala ma jieddi Juaŋ ne tolan te naŋka naŋŋɛ ɛkɛ ma kaniicati te Yaccu Kiṭɔy. Dala ɛkkɛn jyeddi ɛkɛ yuonginda ɔɔn. Amɛɛn.

will be added

X\