Ɛpacac 2

1Te ñamu ɛkkɛ balgɛ ba maka tuutan acaan ɛkkɛ balgɛ noŋɛ ne yaayan, ɔci moki acaan ɛkkɛ balgɛ noŋɛ nɔjjo. Yeti acca ɛkkɛ tɛɛtɛ te naŋka naŋŋɛ Kiṭɔ ɛkkɛti neeni. 2Te ñamu ɛkkɛ balgɛ noŋɛ ba naŋka iñɔ baanji wɛnni budan. Ɔci naŋka neeni gena naŋki ḍuaŋa boŋka yeyin. Gena ɛkɛ bala noŋi naŋka neeni maka bɛɛyi jyek Juaŋ yomgɛnti neeniy. 3Te ñamu ikin waakida balkin noŋin ba maka yeyin neeni. Ikin balkin noŋin ba yomg ikin. Ɔci ikin balkin noŋin ba naŋka waak ikin buagɔn, ɔci ba paŋi ikin paŋŋa yaayan neeni. Ɔci acaan a ɔŋŋiyɛ, kan ywobji Jwaŋa Tolan bɛya ikintiyɛ, ɔci kan ywobji ɛkɛ bɛya mati waakɛndayɛ, a ɔɔn yaayɛ bɛɛ. Yɔmjin a ɔɔn. 4Yeti Jwaŋa Tolan noŋi a ɔɔn bɛɛ. Ɛkɛ yomɛ pɔŋnɛ ikinti. Ɛkɛ ani ikin ne tolan. 5Ɔci ne ikin balkin ba maka tuutan te nɔji ikinyɛ, ikin ‘wonnin ɛkɛ tɛɛtin te tɛɛtin ‘wonnɛ ɛkɛ Kiṭɔ wanna. Gɔṭṭɛ, ikin yɔɔññin ɛkɛ te naŋka ɛkɛ ikin ‘wonninti tɛɛtin te yom pwani ɛkɛ neeni. 6Oŋŋa Kiṭɔ luolnɛ Juaŋ ñaalɔ te koolji tɛɛti mokiyɛ, ikin luolnin Juaŋ ñaalɔ te koolji tɛɛtin moki daŋkun. Ɔci ne Yaccu coonni Juaŋ taaŋɛtiyɛ, ikin coonnin Juaŋ taaŋɛti ba ɛkɛ ɔɔn, acaan ikin akin war ɛkɛ. 7Ɛkɛ noŋi a ɔɔn aŋka yom pwani ɛkɛ yom pwani tolan naŋŋɛ ɛkɛ ikinti te Yaccu Kiṭɔ neeni, warɛ lɛɛldɛ bora ne yuonga bɛya ne baaṭi neeni. 8Oŋŋa ɛkkɛ jyettɛ Juaŋtiyɛ, ɛkkɛ yɔɔññɛ ɛkɛ te yom pwani ɛkɛ parɛ neeni. Ɛkkɛ yɔɔññɛ ɛkɛ te naŋka naŋŋɛ ɛkkɛ gɛɛl bɛɛ. 9Acaan Juaŋ buagɔn naa menga jieyi warɛ te yɔɔta ɛkɛ yɔɔññɛ Juaŋ bɛɛ. 10Ikin naŋŋin Juaŋ aŋŋin maka wonkɛn te naŋki Yaccu Kiṭɔ ikinti aŋka ikin noŋin naŋka pwadan naŋka ḍuaññɛ Juaŋ agi naŋcin ikiny. 11Naa ɛkkɛ yiedɛ bɛɛ, ɛkkɛ jietki ma agi Keedin Pookɛn. Ɔci ma yahuud maka balkin jyek ŋwotiyɛ, ɛkkɛn ḍori ɛkkɛ agi maka ciyi budan te jyek ŋwotto. Yeti gɔṭṭɛ, jyek ŋwoti mayɛ, a jyek ŋwoti ma yoŋgɛn budan. 12Ne ɛkkɛ balgɛ ɔntɔ te Kiṭɔtiyɛ, ɛkkɛ kɛɛptɛ jitin iki maka muonɛ Juaŋ bora neeni, gena ma yahuud. Ɔci jyeka ɛkkɛn ‘wonnɛ Juaŋ neeniyɛ, a jyek ɛkkɛ bɛɛ. Ɛkkɛ balgɛ kɛɛyɛ Juaŋ aŋka ɛkkɛ ‘wondɛ ɛkɛ waka pwadin. Ɔci Jwaŋa Tolan a Jwaŋ ɛkkɛ bɛɛ. 13Te ñamu ɛkkɛ longɛ ɔntɔ te Jwaŋa Tolanti, yeti acca te naŋki Yaccu Kiṭɔ ɛkkɛtiyɛ, ɛkkɛ ornɛti Jwaŋa Tolanti te yimg Kiṭɔ. 14Kiṭɔyɛ, gena ɛkɛ eccin coodda pwadan ikinti aŋka jyek ma yahuud ywaŋŋɛ ɛkɛ i jyek Keedin Pookɛn aŋka ɛkkɛn ŋeeki neeni. Yoyyin ɛkkɛn yooki ñin wannayɛ, bala moki bɛɛ. Bawwin doki. Ɔci acca ɛkkɛn kɛɛptan jitin moki bɛɛ. 15Oŋŋa Kiṭɔ tuuniyɛ, ganuun a genga nɔñji moki bɛɛ, ɔci ma yahuud i Keedin Pookɛn neeni naŋŋɛ Yaccu aŋi maka ne cyɛɛlɔ te naŋki ɛkɛ. Ɔci a ɔŋŋiyɛ, Yaccu Kiṭɔ coodda pwadan oonɛ ikinti. 16Gena te jyeka neeni aŋka Yaccu bɛɛni neeni. Ɛkɛ bɛɛn ɔci tuun kakanti aŋka maka neeni aga maka ne cyɛɛlɔ. Yoyyin ɛkkɛn yooki ñin neeni lɛɛŋŋɛ ɛkɛ jitin doki te oŋŋa ɛkɛ tuuni neeni. Ɔci ne ɛkɛ ɛkkɛn ñaaŋŋɛ ñin akki mena ne cyɛɛlɔyɛ, ɛkɛ ɛkkɛn yɔŋni jiek i Juaŋ daŋkun. 17Ɔci a ɔŋŋiyɛ, Yaccu Kiṭɔ bɛɛn ɔci Keedin Pookɛn maka bala ɔntɔ lonin neeniyɛ, ñaaŋŋɛyɔ i ma yahuud maka cwalŋan neeni te jyeka wonkɛn jyeka pwadin neeni. Gena jyek coodda pwadan. 18Te naŋki Yaccu Kiṭɔyɛ, ikin waakida Keedin Pookɛn ɔci ma yahuudyɛ, yaakinti ortinti Wey ikinti te Boŋa ne cyɛɛlɔ. Gena Boŋ Jwaŋa Tolan. 19Acca ɛkkɛ Keedin Pookɛn balgɛ ba maka wɛlg moki bɛɛ. Ɛkkɛ aŋŋɛ maka ne cyɛɛlɔ i Ma Kiṭɔ. Ɛkkɛ aŋŋɛ kɛɛgin Jwaŋa Tolan doki. 20Ɛkkɛ waakida balgɛ ba ona pwadan ona cɔdi ma te gwoyiy. Ɔci cuudan Yaccu ɔci bɔwan Jwaŋa Tolanyɛ, ɛkkɛn a gwoyya yiecki ma on ŋwayɛ. Ɔci guonan tolan on warɛtiyɛ, gena Yaccu. 21Ɔci gwoyya cɔttan ma on warɛtiyɛ, gena ɛkkɛ. Yaccu ɛkkɛ ywaŋŋɛyɔ ɔci ɛkkɛ aŋŋɛ wara ne cyɛɛlɔ iki ɛkɛ. A ɔŋŋiyɛ, ɛkkɛ waakida aŋŋɛ ba ona ne cyɛɛlɔ on Jwaŋa Tolan ona pwadan. 22Ɛkkɛ Keedin Pookɛn ɔci ma yahuud acaan ɛkkɛ balgɛ Kiṭɔtiyɛ, ɛkkɛ agɛ ona ciyi Jwaŋa Tolan te Boŋ ɛkɛ.

will be added

X\